سايكس-بيكو و الحرب العالميه الاولى…  العبر المستفادة …  الحلقه ٥٠ و الاخيره

Sykes_Pico_50.jpg

شفنا على مدى ٤٩ حلقه في ٥٢ أسبوع استعراض للأحداث اللي شكلت الشرق الاوسط الحديث و درسنا بعمق أمور في الأغلب كتير مننا ما كانش عارفها و ده بمناسبه الذكرى المئوية للحرب العالميه الاولى و توقيع اتفاقيه سايكس-بيكو في عام ١٩١٦و ظهور وثائق سريه كثيره متعلقة بتلك الفتره. الحرب دي هي اللي حطمت الدوله العثمانيه و ألغت الخلافه الاسلاميه و أسست اسرائيل و أسست الدول الوطنيه في الشرق الاوسط و هي دول كانت غير موجوده من قبل زي الاْردن و سوريا و العراق و لبنان. و حتى مصر كانت تابعه للدوله العثمانيه و كانت قوانينها مستمده منها. و كان المصري يستطيع السفر و المعيش في فلسطين او الشام او اسطنبول دون عوائق. و كان السوري أيضا يأتي لمصر و ينشئ جرايد و مجلات و مسارح دون ان يتعجب احد. كانت حاله شبيهه بدول الاتحاد الاوروبي الان. لكن فجأه بعد الحرب تحولت مصر و العراق و سوريا و لبنان و تركيا لدول مستقله لها حدود بل و تقاتل من اجل تلك الحدود. و خلال ٤٩ حلقه حاولنا ان نطبق العبر من تلك الأحداث على الحاضر عن إيمان ان الامه الجاهله بماضيها لا شك ستكرر اخطاء الماضي و هو امر يحدث الان بينما تجري عمليه أعاده تشكيل المنطقه بعدما ثبت فشل كل الدول الوطنيه العربيه. و الصراع الان في المنطقه هو بين من يريد لسايكس بيكو ان تستمر كما هي و لو بالقلب الاصطناعي لمنظومة الدوله الوطنيه و بين من يريد ان يفتت المنطقه بشكل أوسع من سايكس بيكو و من يريد أعاده تشكيل المنطقه على أسس من التآلف. لدرجه ان سياسي لبناني درزي مثل وليد جنبلاط يقول ان الحياه تحت العثمانيين (و قد اضطهدوا الدروز في السابق) كانت افضل كثيرا من الوضع الحالي. 

١- رأينا ان الدوله العثمانيه تخلفت بشكل فادح عن بقيه العالم. و قد اخطأت بشكل كبير في دخول الحرب العالميه الاولى و إنتاجها الصناعي اقل من ١٠٪‏ من انتاج بريطانيا و مستعمراتها. و الحروب النظاميه الحديثه بين الدول ليست مبارزه بالسيوف بل قدره على تطويع الانتاج الصناعي و القدره المعرفيه نحو الانتصار. ليس معنى ذلك ان الضعيف لا ينتصر و لنا في فيتنام عبره. لكن الضعيف لا يدخل حرب نظاميه. بل الضعيف يحارب بوسائل اخرى نطلق عليها وسائل غير متماثلة او Asymmetrical warfare. الضعيف يستخدم حرب العصابات و يستخدم الغابات و الكر و الفر و الاختباء في الصحراء. و لا يفعل مثل صدام حسين بدخول حرب نظاميه ضد أقوى جيوش العالم. لذلك كان الاولى على الدوله العثمانيه تجنب الحرب بشكل كامل. و لكن طمع سياسي الدوله وقتها و رغبتهم في الإنجاز السريع خيلت لهم انه يمكن الانتصار على روسيا بسهوله و بالتالي استعاده ما خسرته الدوله العثمانيه في البلقان و في جمهوريات وسط اسيا. خصوصا ان روسيا كانت ضعيفه وقتها. لكن لم يحسب العثمانيون حساب ان بريطانيا ستدخل الحرب و بقوه و ستقرر انها لا بد ان تأخذ مغانم ستكون على حساب الدوله العثمانيه لا شك. نفس خطأ صدام. و نفس خطأ جمال عبد الناصر مع اسرائيل. الاستبداد الحقيقه يخيل للمرء سهوله الانتصار. و منطقتنا لها طول عهد مع الاستبداد ينتج عنه طول عهد مع الهزائم. 

٢- و بما ان الشيئ بالشيئ يذكر. ناقشنا على عده حلقات اتهامات الخيانه و العماله الموجهه لحركه تركيا الفتاه و قياداتها طلعت و انور و جمال باشا. و انهم خططوا و تآمروا من الداخل لاسقاط الخلافه. مع ان انور باشا مات مقتول على يد القوات الروسيه و المصحف في أيده بعد مغامرة ضخمه. مشكله زعماء تركيا الفتاه كانت الاستبداد و بعض من جنون العظمه صور لهم انهم اذكى من القوى الاوروبيه الاخرى. غير كده مفيش اَي ادله تآمر. بالعكس. حاربوا باقصى قدراتهم. 

٣- العجيب ان الناس سابت ادله خيانه واضحه ظاهره موثقه بين الشريف حسين و بريطانيا و مسكت في اتهامات بالعماله لزعماء تركيا الفتاه و كمال اتاتورك. الشريف حسين هو اللي بدأ الاتصالات مع بريطانيا. مش بريطانيا حتى اللي فتحت الاتصال معاه. بالعكس بريطانيا كانت متشككة في قدراته. جمال باشا بعت للشريف حسين رساله بيقوله فيها ان بريطانيا حترميك و لو انت فاكر انها حتديك الشام و العراق انت اميد بتحلم. و بيقوله انت ازاي تخون أبناء دينك و تروح تتعاون مع بريطانيا. و قاله سيبك من بريطانيا و احنا حننسى الخيانات السابقه. وقت الرساله دي كان خلاص الشريف حسين متورط في الخيانه و كان صعب التراجع.

٤- الشريف حسين و أولاده دول كانوا حماه الاسلام السني. ده واحد كان حاكم مكه ذات نفسها و من نسل الرسول و كان بيقول انه حامي الحرمين الشريفين و كان متشدد دينيا جدا. و مع ذلك خيانه. تفكر في ذلك. كل اللي بيقولك دلوقتي انه حامي الاسلام السني و خادم الحرمين الشريفين بيضحك عليك و هم اول من يتآمر. بص كده على محمد بن سلمان بيزور ترامب في واشنطن و يقول عنه انه صديق للمسلمين! طبعا عشان ترامب ضد ايران. تفكر في معنى ذلك و لا تكرر التاريخ… نفس الناس دي هي اللي خططت و دعمت و ايدت انقلاب يونيو في مصر و دعمت الثوره المضاده و اجهاض كل الثورات العربيه. واضح الكلام قدام عينا بس احنا رافضين نصدق و عاوزين نصدق حامي الاسلام السني و خادم الحرمين و لابسين لَبْس إسلامي و مطبقين الشريعه. نفس الكلام اللي عمله الشريف حسين. 

٥- بريطانيا مدتش الشريف حسين اَي اهتمام الا بعد حاجه مهمه جدا حصلت. ايه هي؟ بعد لما ضابط في الجيش العثماني هرب تجاه البريطانيين في مصر و قالهم انه في منظمه اسمها عهد و ان المنظمه دي بتنسق مع الشريف حسين. هنا بريطانيا ابتدت تفهم انه الشريف حسين مش بس انه حاكم سني يستطيع التأثير على مشاعر المسلمين. لأ كمان ده معاه قوه عسكريه. هنا بريطانيا قررت انها اخيرا ترد على رسايل و محايلات الشريف حسين فيما عرف لاحقا برسائل حسين – ماكماهون. الكلام ده مهم ليه؟ لان التحالف بين الحكم الديني المتزمت و الجيوش العربيه هو التحالف اللي بيحكم المنطقه من وقتها لحد دلوقتي! تحالف بين حكم يدعي اما انه خادم الحرمين او حامي الاسلام (و كله كلام الغرض منه التحكم في مشاعر المسلمين) و بين جيوش عربيه بتقول انها تقدميه. و ده كلام يبان غريب. ازاي ناس متزمته دينيا تتحالف مع ناس بتقول انها تقدميه و مع التحرر. لكن التحالف ده هو الحقيقه اللي بيحكم المنطقه من وقتها. و لما التحالف ده بيتخلخل المنطقه بتتخلخل. شفنا مثلا تحالف فهد مع صدام. فهد بن عبد العزيز مع صدام حسين. خادم الحرمين مع التقدمي البعثي! التحالف ده مهم للغرب جدا. لانه الغرب محتاج حد له تأثير إسلامي واسع عشان يقدر يساعد الغرب في التحكم في مشاعر مليار مسلم. و الفكره كلها ان يكون الشخص ده ضعيف و مهدد من كل اللي حواليه و بالتالي تحت سيطره الغرب. فكر في ال سعود و من قبلهم الشريف حسين. حاكم السعوديه يقول للمسلمين شمال بيروحوا شمال. نحارب صدام. معاه. نحارب ايران. تمام. الشيعه وحشين. أكيد. طبعا غير مطلوب ان الشخص ده يكون جزء من اَي منظومة قويه في المنطقه. لكن التأثير الديني لوحده مش كفايه. في أوقات لازم تستخدم القوه العسكريه لردع الشعوب دي و ده دور الجيوش العربيه. لما التحالف بين الديني و الجيش يبقى شغال المنطقه بتستقر زي مثلا علاقه مبارك مع ال سعود. لما حاجه بتهدد التحالف ده بتلاقي الكل بيتدخل عشان يرجعه زي أعاده مصر السيسي لتكون خاضعه للسعوديه. و تدخل ترامب لاعاده إمدادات النفط السعوديه للسيسي و تخفيض حده التلاسن بين الدين السعودي و الجيش المصري! فكر كويس في الكلام ده. 

٦- شفنا ان شخص واحد اسمه أرون ارونسون قدر انه يسهل لبريطانيا احتلال فلسطين. شخص واحد بس. بريطانيا حاولت تحتل فلسطين بغزوها عن طريق مصر كذا مره. و في كل مره الجيش العثماني كان بيصدها لان بريطانيا كانت بتدخل عن طريق غزه و العثمانيين ممتازين في الدفاع الثابت و كان عندهم تحصين قوي في غزه. أرون ارونسون و كان عالم نباتات عثماني يهودي مقيم في فلسطين أدى بريطانيا خريطه أماكن تواجد المياه في سينا و النقب. و بالتالي خلى الجنرال اللنبي انه بدل ما يهاجم غزه يهاجم بير سبع. و من بير سبع يلتف حوالين غزه و يضرب يافا شمالها في حركه التفاف كان العثمانيين متخيلين انها مستحيله و هي مستحيله فعلا بدون معرفه أماكن المياه في صحراء سينا و النقب. شخص واحد فقط غير مسار التاريخ. ليه بنقول غير مسار التاريخ؟ لان بريطانيا مكانش فيه شك انها حتهزم الدوله العثمانيه. مفيش شك يعني. السؤال هو ايه شكل الهزيمه. و اسوء أشكال الهزيمه هو ان العدو يحتلك لانه بكده بيملك مقدراتك. لذلك مع ان العثمانيين انهزموا لكن لان بريطانيا عجزت عن احتلال تركيا ذاتها اللي حصل ان اولا تركيا فضلت دوله مستقله و قدرت تستعيد قوتها. مع ان اتفاقيه سايكس بيكو قسمت تركيا بالضبط زي ما قسمت الدول العربيه و اسوء. لكن كفاح الشعب التركي للحفاظ على بلده دون احتلال عمل فرق كبير. لو كان أرون ارونسون معملش اللي عمله كان زمان فلسطين و الشام و العراق مثل تركيا الان و افضل حالا بكثير عن الوقت الحالي.

٧- كفاح الشعب التركي ده كان بدون شك تحت قياده اتاتورك. و كان بالرغم من رغبه بريطانيا العارمة في القضاء على تركيا و اتاتورك شخصيا. غير كل الكلام اللي انت بتسمعه. اتاتورك عنده عيب كبير انه ربط تخلف تركيا و الدوله العثمانيه بالإسلام و ده مش حقيقي مع ان التخلف كان حقيقي. لكن لاحظ حاجه مهمه جدا. رجب طيب اردوغان يحكم تركيا دون منازع. و يستطيع انه يلغي زياره قبر اتاتورك السنويه. او يقلل منها. لكنه لم يفعل. و يرد بقوه عندما يحاول احدهم ان ينال من اتاتورك. ببساطه لانه مع عيوب اتاتورك الشديده الا انه قاد كفاح الشعب التركي في وقت عصيب للتخلص من الاحتلال اليوناني و الايطالي و أسس تركيا الحديثه. مع ملاحظه انه مقضاش على المدارس الاسلاميه مثلا و كان يستطيع. و دي المدارس اللي منها مدرسه الامام الخطيب اللي اتخرج منها رجب اردوغان شخصيا. مشكله الإسلاميين المصريين هي مشكله المصريين عموما هي الإفراط في كل شيئ حتى في الحب و الخصومه. 

٨- العلاقه مع امريكا ما زالت ملتبسة دلوقتي بالضبط زي ما كانت ملتبسه وقت الحرب العالميه الاولى! في الوقت اللي كانت بريطانيا بتبعت أدباء و شعراء و ضباط و منقبين عن الاثار و غيره للشرق الاوسط، امريكا بعتت شخص واحد بس هو مهندس بترول! امريكا هي اول امبراطوريه في التاريخ دينها الحقيقي هو النشاط الاقتصادي و الربح. طبعا في موجود ناس متعصبين دينيا و موجود ناس بيكرهوا الاسلام و العرب. كل ده موجود. لكن امريكا مركز الثقل العقلي intellectual center of gravity فيها هو في مجموعات رجال الاعمال. ده امر احنا ما زلنا كشعوب و حتى حكام الشرق الاوسط عاجزين عن فهمه و التعامل معاه. لسه احنا بتقول لأمريكا أدونا عداله في الشرق الاوسط. بينما امريكا مثلا بتبص لمشكله فلسطين انها صفقه تبادل أراضي الأطراف فيها يقدموا تنازلات وفق ميزان القوى بينهم. و بما ان ميزان القوى في صالح اسرائيل إذن التنازلات حتكون لصالح اسرائيل و ان اَي كلام غير كده كلام غير عملي. لذلك الأمريكان عجزوا انهم يفهموا ليه ياسر عرفات يرفض اتفاق فيه انه يأخذ معظم الضفه و بعض السيطره على القدس. مش ده أحسن من وضعه الحالي دون اَي شيئ؟ و ده سؤال ضخم جدا. و هو محور مشكله المصريين مع اتفاق كامب ديفيد. السادات شايف انه افضل من لا شيئ و ان اسوء هزيمه هي احتلال ارضك و لما حد يحتل ارضك هدفك انك تتخلص من الاحتلال بأسرع ما يمكن و مين عالم بعد ١٠٠ سنه توازن القوى حيحصل فيه ايه. و ده الكلام اللي قاله لمحمد ابراهيم كامل في كامب ديفيد. الأوروبيون و البريطانيون على الطرف الاخر ممكن يتفهموا ان العرب عندهم حقوق الخ. بالنسبه لامريكا الموضوع مفيهوش العواطف دي. 

٩- بعد نهايه الحرب بريطانيا واجهت ازمه اقتصاديه حاده و توقعات الشعب البريطاني انه طالما انتصر فهو منتظر عوائد الانتصار و السلام. لذلك بريطانيا اضطرت تسحب مليون جندي من الشرق الاوسط و ترجعهم بريطانيا. ده طبعا خلى المنطقه مخلخله. و شعوب المنطقه شافت ان الحرب انتهت بان بريطانيا كقوه مسيحيه إحتلتهم و انهيار الخلافه الاسلاميه العثمانيه (و هي بالرغم من مشاكلها كانت القوه الجامعه و المتحدثة باسم المسلمين في العالم) و هم رافضين كده. مع خلخله التواجد العسكري البريطاني و تململ شعوب المنطقه من الاحتلال قامت ثورات ضد بريطانيا في مصر (ثوره ١٩) و فلسطين و الشام و العراق (ثوره العشرين) و ايران و أفغانستان و تركستان. ثورات دون تنسيق بدوافع اسلاميه. الثورات دي كلها نؤكد انها كانت بدوافع اسلاميه مش وطنيه. و ده نفس اللي حصل في الشرق الاوسط بين ٢٠١٠ و ٢٠١٢. امريكا احتلت العراق و دمرت التحالف السائد في المنطقه و اثبتت فشل الدوله القطريه العربيه “الحديثه” في الدفاع حتى عن حدودها. و شفنا ازاي ان حاكم عربي زي صدام حسين اتبهدل. ثم تبع ذلك انسحاب أمريكي من الشرق الاوسط وقت اوباما. الانسحاب ده فتح الباب تماما لثورات الربيع العربي. بالضبط زي انسحاب بريطانيا لما فتح الباب لثورات ١٩١٩-١٩٢٠. 

١٠- شفنا ان ثوره ١٩ في مصر كانت بدوافع اسلاميه قويه. كاتب كتاب التاريخ المدرسي ده الصراحه بيحرف اَي حاجه. يعني عجيب جدا ان مفيش اي مذكرات عن ثوره ١٩ أتنشرت في مصر. و لا واحده. لذلك اضطرينا نروح اليونان نترجم مذكرات شهود عيان جريج عشان نفهم اللي حصل. الشعارات كلها في الريف مثلا كانت اسلاميه. شفنا الفلاح المصري بيقول للراجل اليوناني يا خواجه انا بعمل كده عشان جيش الاسلام! كلام واضح. 

١١- بريطانيا عشان توقف الثورات دي لجأت لخطه جهنمية ما زالت شغاله لحد دلوقتي. بريطانيا مش عاوزه انها ترجع مليون جندي الشرق الاوسط. مفيش فلوس للكلام ده. يبقى الحل اننا نقسم المنطقه لدول مستحيل تبقى دول قويه لانها دول غير طبيعيه و بعدين نحط حكام مفروضين على الشعوب في الدول دي و بالتالي الحكام دول محتاجين بريطانيا عشان يفضلوا. و بعدين ندي الحكام دول جيوش هدفها الوحيد الأمن الداخلي. و اخيرا السيطره الاخيره على المنطقه و شعوبها في حاله فشلت الجيوش و الحكام هي عن طريق سلاح الطيران البريطاني! لسه لحد دلوقتي نفس الكلام شغال. شوف ازاي ان امريكا لا تستخدم في المنطقه الا الطيران و اَي سلاح اخر بيبقى بحذر. و الطيران ميزته انه غير مكلف و مش محتاج جنود كتير و قدرته على الرعب كبيره و دي منطقه الطيران فيها ممكن يشتغل طول السنه و مفيهاش لا جبال و لا غابات. دي خطه تشرشل اللي لسه شغاله لحد النهارده. 

١٢- الخطه البريطانيه العبقريه دي بقالها ١٠٠ سنه شغاله. لكن حصل فيها شروخ كبيره جدا. أولها هو ان الدول دي كلها سواء مصر أو الاْردن او السعوديه او الإمارات او العراق او سوريا دول غير طبيعيه و معندهاش موارد تكفيها و ده طبعا بحكم تصميمها. اللي صممها عاوزها كده by design. في دوله عثمانيه واحده الموضوع سهل قوي يتحل. ظهر بترول في الإمارات و مصر عندها وفره في الايدي العامله حيروحوا يهاجروا للأمارات و يعيشوا هناك مواطنين في بلد واحده. بالضبط زي ما مواطن من كارولينا بيروح تكساس او كاليفورنيا. كمان الأفضل ان تكرير البترول العربي و العماله فيه تعيش في سوريا مثلا الأقرب لمراكز التوزيع و الاستهلاك و الأفضل جوا. مثلا محدش بيعيش في غرب تكساس الغني بالبترول. بيعيشوا و يكرروا البترول في هيوستن الأفضل موقعا و مناخا. ده بيوفر الموارد و بيخلي الناس اسعد و اكثر انتاجا. لكن دلوقتي كل بلد عامله علم و نشيد و عيد وطني و عيد استقلال! تخيلوا. تهريج و أضاعه موارد دون شك. و اهدار في مليون علم و مليون شركه طيران و مليار محطه تلفزيون و خناقات بين الدول دي في الفارغه قبل المليانه. 

المشكله ان الإهدار ده زاد. و شعوب المنطقه تعبانه. و مع ثوره الاتصالات شايفين شعوب كانت وراهم بكتير بتتقدم و المنطقه محلك سر. و بالتالي تبدى عجز الدوله القطريه العربيه عن انها تخدم شعوبها. حتى السعوديه و الإمارات بصرف النظر عن الغنى عاجزه أنها تحقق كرامه لشعوبها. المشكله كمان ان الوطنيه دي جديده و ملهاش جذور عميقه. و بالتالي فيه صراع هويات في الشرق الاوسط ملوش مثيل في اَي مكان تاني في العالم. صراع بين الوطني القومي و الديني و العرقي. و المشكله الأكبر كمان ان الدوله القوميه الوطنيه في الأغلب زي ما حصل في أوروبا بتبقى محتاجه انها تبقى متناسقه في العرق و الدين. ألمانيا للالمان البروتستانت. فرنسا كاثوليكية. و هكذا. مشكله ده في الشرق الاوسط ان هناك فسيفساء من الأعراق و الديانات و النحل. لو حتقسم مش حتخلص. الكردي و الشيعي و المسيحي و اليهودي. تطهير عرقي. و مع فشل الدوله القوميه في تحقيق ابسط متطلبات شعوبها التطهير العرقي ده ابتدى يبقى واقع. احنا بس مش واخدين بالنا. حتى في مصر شايفين تهجير المسيحيين. في سوريا شايفين ملامح دوله علويه على الساحل و دوله سنيه في الداخل. و هكذا. 

لذلك المنطقه اما ستقسم لما هو اصغر او انها ستتجمع لتكوين ما هو اكبر في دوله تشبه الاتحاد الاوروبي و تشمل ايران و تركيا و يهود اسرائيل و مصر و الشام و غيره. ناس كتير تقول ان الحرب في المنطقه الان زي حرب الثلاثين عام في أوروبا و ده حقيقي. و كمان بتقول ان الحرب دي حتنتهي بسلام زي سلام فستفاليا و فيه دول أوروبا حتتفق ان كل واحده عندها هويتها و مش حيتدخلوا في شئون بعض. ممكن. لكن تكلفه ده من التطهير العرقي للحفاظ على سايكس بيكو و الدوله القطريه العربيه حيكون غالي جدا من الناحيه الإنسانيه. 

١٣- دخلنا احنا نفسنا في موضوع بروتوكلات حكماء صهيون. و ناس تحزق عشان تثبت انها حقيقيه. مع ان محدش منهم قراها. ده اولا. ثانيا هي فعلا مزيفه و أثبتنا كده. و هدف تزييفها هو تبرير المذابح الروسيه ضد اليهود. موضوع ملناش دعوه بيه. و كل لما نزود فيه اليهود يقولوا علينا اننا عنصريين. و نخسر قضيتنا العادله قدام نفسنا قبل قدام العالم. اليهود كانوا عايشين معانا. عاوزين يكملوا عايشين معانا اهلًا وسهلا. ينموا و يعمروا و كلنا نستفيد. العالم اضطهدهم. حقيقي. يبقى اهلًا بالمضطهدين في بلادنا مواطنين زينا. لكن مش ياخذوا ارضنا و يسيطروا علينا. دي القضيه العادله بتاعتنا. بنقع احنا في الفخ بمنتهى السهوله و بدون اَي تفكير. عيب قوي نفضل ١٠٠ سنه بنقع في الفخ. 

١٤- في الحاله المصريه بالذات فيه حاله انفصام بين الحاكم و المحكوم. المحكوم عاوز ثوره كبيره و نتخلص من الاحتلال البريطاني و نحط حكم إسلامي. كلام غير ممكن دون سلاح و قوه تحميه بالنظر لاهميه مصر لخطوط المواصلات البريطانيه. و بالتالي الحل الوحيد هو تفاهم و اتفاقيه مع بريطانيا زي اتفاق اليابان مع امريكا و الصين مع بريطانيا بعد حرب الأفيون. لكن الانفصام بين الحاكم العاجز انه يقول للشعب الحقيقه دي و الشعب اللي عنده امال غير واقعيه بيؤدي لنتائج اسوء و عنف. كان ممكن قناه السويس تتطور زي هونج كونج و ترجع لسياده مصر زي هونج كونج ما استفادت من الوجود البريطاني. لكن حاله عدم الاستقرار دي شوف ودت قناه السويس فين انها بقت نكته مقارنه بهونج كونج. في بعض الأحيان الإقرار بالهزيمة و معرفه قدراتك الحقيقيه بيخليك تستفيد اكتر و تخطط لمدى ابعد. لسه على فكره نفس الانفصام في مصر. الحكام لسه بيقولوا للمصريين قد الدنيا و حتبقى ام الدنيا. و الناس عاوزه استقلال كامل و القضاء على امريكا كمان!

١٥- فلسطين و سوريا فيهما حاله من التشرذم مستمره من وقتها و هي حاله تاريخيه نتيجه لوجود عائلات قويه موزعه جغرافيا. و ده بيخلي فيه ١٠٠ فصيل في سوريا مثلا مختلفين مع بعض. تاريخيا الحاله دي بيوحدها علاقه خارجيه سواء مع مصر او تركيا. مع قطع هذا الطريق اصبح التشرذم مزمن. فتح و حماس مثال على غزه و الضفه و الفصل الجغرافي. بالعكس اصبح من مصلحه اسرائيل تكريس هذا التشرذم و رعايته برغم الرغبات الحسنه لجميع الاطراف. 

١٦- التقسيم و التشرذم ليس قدرا مكتوبا. شفنا انه بالرغم ان خريطه سايكس بيكو (مرفقه) فيها تقسيم كبير لتركيا ذاتها فده محصلش نتيجه كفاح الشعب التركي. بنحب احنا جدا المؤامرات. و دائماً نتوصل فيها لنتيجه ان طالما فيه مؤامره و من قوى كبيره يبقى خلاص نستسلم و نقعد نولول. و الحقيقه ان ده بالضبط اللي تحالف ال سعود مع الجيوش العربيه عاوزه و بيستمر في ترديده. مخابرات تحالف ال سعود و الجيوش العربيه دائماً تردد ان فيه مؤامرات ضخمه من قوى غربيه علينا و هدف الكلام ده انك تسكت و ترضى بالوضع الحالي. (مش مستغرب ان إعلام السيسي اللي بيقول انه ناصري و بيقولك انه ضد امريكا و أنقذ مصر من مؤامراتها هو نفس الشخص اللي بياخذ سلاح من امريكا و بيشحته و بينسق مع اسرائيل؟ للاسف الكلام واضح). سايكس بيكو كانت مؤامره ضد تركيا و أحبطتها تركيا. انقلاب تركيا كان مؤامره ضد تركيا و أحبطتها تركيا. حرب الأفيون كان مؤامره ضد الصين و على مدى عقود انتصرت الصين. الصواريخ الكوبية كانت مؤامره سوفيتية ضد امريكا و أحبطتها امريكا. المؤامره من خصمك هي جزء من الصراع. زي بالضبط لما انت بتلعب ماتش كوره و الفريق المضاد عاوز ياخد الكوره و يحط جون. هل تقوم انت سايبه و لا تأخذ منه الكوره؟ المؤامره جزء من الصراع. و الحكام الحاليون للشعوب العربيه جزء من المؤامره. 

١٧- الدول الاوروبيه وصلت لاقصى تمدد لاستعمارها بعد الحرب العالميه الاولى. بريطانيا احتلت الشرق الاوسط كله بعدها. بقى عندها مستعمرات في شرق اسيا و الهند و الشرق الاوسط و افريقيا. و كذلك فرنسا. الاستعمار وصل لاقصى مراحله تماما بعد الحرب العالميه الاولى. High water mark. لكن ده كان بتكاليف عاليه جدا على الدول الاوروبيه ذاتها. و الشرق الاوسط كان اخر المستعمرات و بالتالي أصعبها. و دي مشكله واجهت أوروبا. انها وصلت لاقصى قدراتها و بقت مكشوفة و معرضه و شعوبها مش عاوزه استعمار و مش عاوزه صرف على تطويع مستعمرات و مشاريع هناك يمكن بعد عقود تجيب عايد على الشعوب الاوروبيه. الشعوب دي عاوزه عوائد النصر دلوقتي. Now. لذلك اما ان بريطانيا تتحول لدوله ديكتاتوريه و تفرض استعمار الشرق الاوسط و تطويعه على شعوبها و اما انها تطلع من الشرق الاوسط عسكريا. و ده اللي حصل. لكن في نفس الوقت دي منطقه مهمه جدا و قريبه من أوروبا و بالتالي لا يمكن تركها. و بالتالي وصلنا للوضع اللي احنا فيه دلوقتي. مقدرش اسيبك و مقدرش ابعد عنك. أوروبا محتلتش الشرق الاوسط وقت كافي عشان تطوعه زي مثلا شمال و جنوب امريكا أو استراليا او شرق اسيا. و كمان مسابتوش مستقل و دوله قويه لها سياده زي اليابان او روسيا. و بالتالي حصل الوضع اللي شايفينه دلوقتي. كم كبير من التخبط. 

١٨- لحد دلوقتي احنا لسه بنعاني من سقوط الخلافه. مين اللي بيتحدث بأسم المسلمين؟ المفروض وفق مخطط تشرشل يكون ال سعود. لكن الشعوب بتسمع لهم معظم الأوقات مش كل الأوقات. و فيه كتل كبيره من الشعوب دي كفرت بال سعود و معندهاش ثقه فيهم. نتج عن كده ان الكتل دي اتبعت الشيوخ اللي بيثقوا فيهم. و بعض الشيوخ دي بيقولهم اعملوا عمليات ارهابيه. و نتج عن كده مشكله الاٍرهاب. انعدام وجود مرجعيه شرعيه اسلاميه جامعه ولد الاٍرهاب. على فكره اللي بيقول الأزهر لازم يفهم ان الأزهر جزء من منظومة تحالف ال سعود مع الجيوش و ده كان واضح جدا في انقلاب يونيو ٢٠١٣ في مصر. الأزهر تابع الحقيقه لآل سعود. الغرب مش عارف يعمل ايه مع المشكله دي. الحل اما انه مزيد من القمع للشعوب اللي عاوزه تنتفض و مزيد من التقسيم و مزيد من الاٍرهاب. او تكوين دوله ذات حيثيه اسلاميه تقدر تلملم الشعوب دي في اجواء ديمقراطيه و حريه. و دي جاذبيه النموذج التركي و أهميته بالذات لامريكا. و السؤال هل ممكن تعميم النموذج التركي؟ تعميمه طبعا يودي لانهيار ال سعود لان أهميتهم في الشرق الاوسط تنتهي. و ده سبب تمويل ال سعود للانقلاب في مصر. تواجد حيثيه اسلاميه مغايره لآل سعود في الشرق الاوسط بالذات واحده تتتحدث العربيه مش التركيه أو الفارسية زي الاخوان المسلمين يقضي على ال سعود. لذلك عداء ال سعود للإخوان استراتيجي. ممكن تكتيكيا يتقبلوهم ضد عبد الناصر مثلا عندما ينهار تحالف الدين و الجيش. لكن وجود اخواني في مصر و إسلامي في تركيا و تجمع قادر على تصنيع سلام مع ايران هو تهديد مباشر للسعوديه. مش بس السعوديه. اسرائيل كمان. لانه ببساطه يقضي على هيمنه المشروع الاسرائيلي في المنطقه اللي احد اهم أهداف تحالف الدين السعودي و الجيوش العربيه هو تأمين المشروع الاسرائيلي. ظهور هذا التجمع التركي العربي لا يقضي على اسرائيل. إطلاقا. هو فقط يضع حدود امام مشروعها. و ده يفسر تحالف السعوديه مع الإمارات مع اسرائيل ضد ثورات الربيع العربي. 

الغرب محتار يعمل ايه في النقطه دي. هو متراوح بين اهميه المشروع التركي و الحفاظ عليه لكن جوه الغرب ناس ضده و مع الحفاظ على الوضع الحالي خوفا من ان ظهور دوله مسلمه قويه يهدد أوروبا ذاتها و بين جماعات صهيونية عاوزه مزيد من التشرذم. و التخبط جوه الغرب واضح. ساعات طبعا بيميل ضد تركيا لما يلاقي فيها تهديد. و ساعات لما التهديد الروسي بيزيد بيقفوا مع تركيا لانها طبعا صِمَام الأمان ضد روسيا. في ١٩٢٠ نفس السؤال كان موجود و تشرشل و الغرب وقفوا مع تركيا لكن في ظل شرق اوسط ضعيف و مهلهل زي ما شفنا في الحلقات. في ٢٠١٧ دلوقتي احنا ممكن ناخذ اَي اتجاه. ممكن ناخذ اتجاه ورقه تشرشل اللي بتقول رجعوا الخلافه الاسلاميه تحت زعامه تركيه. ممكن ناخد الوضع الحالي اللي هو حط شعوب الشرق الاوسط تحت أقصى درجات الكبت زي نظام السيسي و خد وضع أمني و ركز فقط على الأمن security. و ممكن اجزاء من سوريا تتقسم فعليا بتشكيل دوله علويه في الساحل السوري تساعد في تأمين اسرائيل و تقبل دوله سنيه في الداخل. و هذا هو اتفاق سايكس بيكو الأساسي (الخريطه مرفقه). 

١٩- بالنسبه لداعش. هي زيها زي معظم التنظيمات الاسلاميه العنيفه فيها ناس فعلا عاوزين الخير وفق ارائهم هم. و فيهم ناس مخترقين. و بالتالي بينتج التخبط اللي احنا شايفينه و عدم وضوح الرؤيه. الأهم ان داعش الان هي اكبر مبرر للقمع في الشرق الاوسط. السيسي بيقول للغرب انا او داعش و ان الشعب بتاعي كله حيقف مع داعش لو ادنالهم الفرصه. حقيقي او مش حقيقي. الغرب عاوز يصدق ده لانه معندوش وقت يأخذ تجارب بالذات في أوروبا. ممكن جدا يكون القضاء على التنظيمات المسلحه الاسلاميه مدخل للديمقراطيه زي ما حصل في امريكا اللاتينية لما كان سقوط الشيوعيه مدخل لانتشار الديمقراطيه. الغرب في عدم وجود تهديد حالي ممكن يرجع انه يضغط في اتجاه الحقوق و الحريات على ناس زي السيسي. و هو ضغط مفيد للشعوب العربيه لأننا محتاجينه. و حكام العرب بيسمعوا كلام الغرب اكتر بكتير من شعوبهم. مفيش مانع من تحسين الظروف. افضل من الوضع الحالي. 

الحقيقه ان المسلمين بيصيبهم ضرر شديد جدا من الجماعات دي. تفجيرات ارهابيه في تركيا مثلا و بها حكومه تأوي معظم حركات التحرر العربي و الاسلامي. معظم قتلى و ضحايا داعش و امثالها هم مسلمون الحقيقه. و طبعا بتبرر الجماعات دي مزيد من قتل المسلمين. لذلك واحد زي رجب اردوغان بيقول ان من ١٠٠ سنه كان فيه لورانس لابس زي عربي و بيتكلم عربي و بيقول الاسلام و واقف مع شيوخ بتقول الاسلام. بس مكانش بيقتل غير المسلمين! و ان دلوقتي لورانس لابس عمه و قفطان و برضه بيقول الاسلام و بيخدعنا به. و لاحظ ان تكتيكات لورانس مشابهه تماما لتكتيكات الجماعات زي داعش او غيرها. طبعا انضم للورانس ناس طيبين. نفس الكلام دلوقتي انضم لداعش ناس طيبين. 

٢٠- اَي اتجاه الأمور حتاخد زي ما شفتم في أيدينا. اللي حيسكت مش حيكون له نصيب في تشكيل الأمور. و الوضع اللي حينتج من التسويات القادمه حيستمر ربما ١٠٠ سنه كمان. احنا بنتكلم عن ان السنين الجايه دي سنين مفصليه. لو الشعب المصري فضل ساكت رأيه مش حيبقى مهم قوي. توقعنا ان فيه تسويات قادمه. و طبعا مثلا لو حصل عمل ارهابي كبير او تفجر ربيع عربي اخر دي احداث ممكن تغير مسار التاريخ. 

و اخيرا الحمد لله الذي اعاننا ان ننهي ٥٠ حلقه بالوثائق الكامله (مصدر ١) في عمل نعتبره ملحمي. و يعلم الله كم المجهود و الليالي لتجميع مثل هذا العمل. و نقول كما قال ابن خلدون: ما فيه من خير فهو من الله فاعلموا و اعملوا به و تعلموا و ما به من خطأ فهو منا و هو قصور انساني. و لكننا اجتهدنا ان يكون عمل نرضى عنه و يرضى به الله عنا فخيركم من تعلم العلم و علمه. 

و السلسله القادمه ستكون عن حرب ٤٨ بعون الله 

و السلام ختام.

المصادر

١- الحلقات السابقه مجمعه

https://jawdablog.org/category/التاريخ/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s