سايكس-بيكو و الحرب العالميه الاولى … بروتوكلات حكماء صهيون … الحلقه ٤٥

sykespico_45_1

مع كل المشاكل في الشرق الأوسط بريطانيا ابتدت تلوم كل حد الا نفسها و ابتدت تدور على مؤامرات في كل حته (الامم لما تضعف تبتدي تتحجج بالمؤامرات سواء حقيقيه او لا). لورد كتشنر من أوائل الحرب و من قبلها في ١٩٠٨ كان بيقول ان حركه تركيا الفتاه ألمانيا مسيطره عليها بدعم يهودي! مع انه طبعا مفيش اَي وثائق بتقول كده و شفنا (الحلقه السابقه – مصدر ١) ان واحد زي انور باشا مات في بخارى و هو بيدافع عن الثوره الاسلاميه فيها و مات و ماسك القرآن في أيده. بالرغم من كده فضلت بريطانيا تتهم حركه تركيا الفتاه انها متحالفه مع اليهود الشيوعيين! طبعا كلام متناقض و مستحيل.

بريطانيا مكانتش واخده بالها او مش عاوزه تاخد بالها انها كقوه مسيحيه أصبحت الان قوه احتلال في كل الشرق الأوسط و ان التمرد ضدها اساسه ان شعوب الشرق الأوسط المسلمه رافضاها، و الشعوب دي معندهاش مانع تاخد دعم روسي او ألماني عشان تتخلص من الاحتلال البريطاني. دي كانت الحقيقه.

لكن الاوهام البريطانيه عن المؤامرات اليهوديه استمرت!

ظهر في لندن في عام ١٩٢٠ كتاب اسمه “الخطر اليهودي”. الكتاب ده قال انه الترجمة الانجليزية ل “بروتوكولات حكماء صهيون”. مصدر ٢.

في نفس الوقت ظهرت ترجمه فرنسية في باريس. البروتوكولات بتقول انها محاضر اجتماعات عقدها اليهود و الماسونيون في نهايه القرن ١٩ و خططوا فيها للإطاحة بالمسيحية و الراسماليه و تشكيل حكومه عالميه تحت السيطره المشتركه لليهود و الماسونيين.

ظهرت البروتوكولات لأول مره في روسيا في جريده اولا سنه ١٩٠٣ و بعدين كتاب سنه ١٩٠٥ و ادعت الجريدة و الكتاب ان سيرجي نيلوس احد موظفي قيصر روسيا، اكتشف البروتوكلات. الموضوع مخدش اهتمام كبير لحد ما قامت الثوره البلشفيه عام ١٩١٧ و كتير لاحظوا اولا ان كتير من قياداتها يهود و ثانيا ان الفكر الشيوعي فيه تقارب مع الأفكار الموجوده في البروتوكلات. (طبعا شفنا بعد كده عداء اليهود للاتحاد السوفيتي و ازاي امريكا استغلت اضطهاد اليهود في روسيا للضغط المستمر عليها. مثلا اليهود مكانش مسموح لهم يدخلوا الجيش السوفيتي. لكن كل ده مكانش ظاهر وقتها).

في ١٩٢٠ لذلك ناس كتير في لندن و باريس صدقوا ان البروتوكلات حقيقيه. و صدقوا ان البروتوكلات فعلا بتشرح أسباب التمرد ضد بريطانيا في الشرق الأوسط و ليه الشعوب المسلمه تتمرد ضد بريطانيا. أكيد مؤامره بين المسلمين و اليهود و الشيوعين. (طبعا الفكره ذاتها مضحكه و غير ممكنه. لكن الشعوب المفلسة ممكن تصدق حاجات كتير).

في صيف ١٩٢١ قام مراسل التايمز البريطانيه في اسطنبول و اسمه فيليب جريفز بتحقيق في موضوع البروتوكلات و اثبت أنها وثيقة مزوره و ان مباحث قيصر روسيا هي اللي قامت بتزويرها. ازاي اثبت كده؟ من سوء حظ مباحث القيصر ان مكانش عندها وقت تألف البروتوكلات. لكن قامت بسرقتها من مجله كوميديه عن نابوليون الثالث ظهرت في جينيف عام ١٨٦٤ و بروكسيل عام ١٨٦٥. مصدر ٣. المجله الكوميديه دي ما انطبعش منها كتير و ما انتشرتش. اللي قال الكلام ده لفيليب جريفز لاجئ روسي من اعوان القيصر قرر انه يعترف على مباحث القيصر لانه كان محتاج الفلوس بشده. اللاجئ ده اسمه مايكل رازلوفليف و طلب انه اسمه ميظهرش و فعلا اسمه متعرفش الا في سنه ١٩٧٨. مصدر ٤.

sykespico_45_2

رازلوفيف كان معاه نسخه من المجلات الكوميديه دي ورآها لفيليب جريفز و كان واضح ان فعلا اجزاء كبيره من كتاب بروتوكلات حكماء صهيون متاخد من المجلات الساخره دي.

بدأت الصحافه البريطانيه تستيقظ ان فعلا المشكله الحقيقيه هي ان بريطانيا احتلت دول مسلمه و مش عارفه تتعامل معاها. جريده التايمز البريطانيه كتبت في ٢٠ سبتمبر ١٩٢٠ ان “المكتب العربي في القاهره و قياده قوات الشرق الأوسط الموجوده في القاهره و اداره أراضي العدو المحتله في سوريا و فلسطين جميعهم يتحملون درجه كبيره من المسئوليه عن الأرواح و الأموال البريطانيه المفقودة في الشرق الأوسط”. و اضافت الصحيفه: “ان الدعايه البريطانيه لصالح وجود أمه عربيه مستقله هي تهديد للسلام العالمي. و ان المسئولين البريطانيين بيتحججوا باستقلال عربي بينما في الحقيقه هم عارفين ان العرب غير قادرين على اداره الأمور بنفسهم و ان كل هدف المسئولين دول انهم يديروا أمور العرب من وراء ستار الاستقلال العربي و ان المسئولين دول في الحقيقه هدفهم توسيع الامبراطوريه مش استقلال العرب. و ان المسئولين دول مش البلاشفة هم المسئولين عن مشاكل الشرق الأوسط”.

في ٢٧ سبتمبر ١٩٢١ كتبت التايمز ان التفكير القديم أن بريطانيا عندها دور خاص في بلاد المسلمين هو تفكير عقيم. و ان الحقيقه ان “الثوره ضد بريطانيا في الشرق الأوسط هي ثوره ضد الحكم المسيحي” و ان ده “امر اكبر بكتير من اَي دوله أوروبية بمفردها.”

و اضافت التايمز ان: “مشكله بريطانيا و التحدي الحقيقي قدامها مش في الشرق الأوسط لكن هنا في بريطانيا و هو تحدي اقتصادي. و ان بريطانيا محتاجه تجدد نفسها اقتصاديا و اجتماعيا.” و اضافت: “ازاي احنا بنصرف على أنصاف بدو في العراق ١٥٠ مليون إسترليني منذ وقف إطلاق النار في حين لا نجد ٢٠٠ الف جنيه إسترليني لتجديد العشوائيات هنا في بريطانيا او لتفعيل قانون التعليم لسنه ١٩١٨؟”

تعليق جوده:

نفس الكلام يقال الْيَوْمَ او قيل فعلا في امريكا و أدى للانسحاب من العراق و تقليل التواجد الامريكي في الشرق الأوسط. و ما زال المصريون مصرين انه توجد مؤامره اسمها حكماء ال صهيون. كأنه لم يتغير شيئ. و يقوم ممثل مصري (محمد صبحي) معروف بارتباطه باجهزة الأمن المصريه بتمثيل مسلسل كامل عن حكماء ال صهيون لتثبيت الفكره في عقول المصريين. و الهدف من قيام اجهزه الأمن المصريه بتثبيت فكره حكماء ال صهيون في عقول المصريين و العرب عموما هو التالي:

١- تثبيط الهمم. ازاي احنا نقف قدام الناس دي؟ دول اقوياء جدا و عندهم مخططات من سنه ١٩٠٠؟ و بالتالي لا يحق لنا الا الصمت.

٢- الوقوف وراء الزعيم الغضنفر الذي يحارب اسرائيل و يتصدى لمؤامرات ال صهيون برغم انه في الحقيقه مثل حال مبارك و من بعده السيسي على نطاق أوسع هو أكبر متآمر مع الصهيونيه العالميه.

٣- تلويث سمعه العرب و المسلمين في العالم و تمييع القضيه العادله لنا في فلسطين. الحقيقه ان المصريين و العرب اندفعوا حتى للوصول لمراحل إنكار حدوث المحرقه اليهوديه من قبل ألمانيا النازيه و يتعاون العرب و المصريون في احيان كثيره مع دوائر يمينية متطرفه في الغرب تنكر حدوث الهولوكوست. و الحقيقه اننا لا نعرف ما دخل العرب و المصريين و ما مصلحتهم في إنكار الهولوكوست؟ لا يستفيد العرب و لا المسلمون من ذلك الا اظهارهم في اسوء شكل ممكن. فلنفرض ان هناك مبالغه في إعداد اليهود المقتولين في المحرقه، فهل نحن مع قتل يهودي واحد حتى يعيش في أوروبا؟ الحقيقه ان هذا تمييع لقضيتنا مقصود من قبل اجهزه الأمن المصريه المتواطئة لانه يخرجنا من كوننا اصحاب قضيه عادله لنصبح مشجعين على القتل دون سبب و بالتالي عندما يقتلونا دون سبب فأين المشكله؟ يا اخواننا اهلًا و سهلا بأي يهودي يتفضل يجي ارضنا و بلادنا و يعيش فيها و ينتج. إنما يأخذ ارضنا بالعافيه و يطردوا منها و يأخذ مقدساتنا هذه هي المشكله. و اذا كان اليهودي انقتل من ألمانيا النازيه فنحن قطعا نتعاطف معه حتى و لو كان يهودي واحد فقط. و نتعاطف مع اَي احد يتعرض للتعذيب او القتل دون سبب. قتل النفس هو اعظم شيئ في القرآن. احنا ليه بننسى ديننا؟

بالطبع اليهود اقوياء في امريكا و في الغرب عموما. و بالطبع يعملون لمصالحهم. و لكن مصالحهم متضاده في كثير من الأحيان و ليسوا على قلب رجل واحد كما نظن فمنهم جاريد كوشنر زوج بنت ترامب الذي يشجع الاستيطان و منهم بيرني ساندرز عدو الاستيطان و المدافع الأكبر عن المسلمين في امريكا.

لماذا نحول قضايانا العادله لقضايا خاسره من اجل ان نقتنع باوهام تروجها اجهزه الأمن المصريه العميله؟

بالمناسبه ليس هناك اسعد من اجهزه الأمن الاسرائليه بترويج تلك الإشاعات و الاكاذيب في مصر. عند عرض مسلسل محمد صبحي عن حكماء ال صهيون صدر اعتراض خافت من السفارة الاسرائليه في القاهره بينما بالطبع كانت اسرائيل قادره ان تقيم الدنيا و لا تقعدها في امريكا و الغرب و العالم ضد مصر. و لكنها لم تفعل. فتدبر.

في الحلقه القادمه ٤٦ سنتوقف عند سوريا و الاْردن و فلسطين و نرى كيف تطورت الأمور مع اولاد الشريف حسين. و الحلقه بعدها (٤٧). سنرى كيف حلت بريطانيا هذه اللخبطة الضخمه في الشرق الأوسط بتسويات عام ١٩٢٢ و هو العام الذي أقام الشرق الأوسط الحديث. و في الحلقه ٤٨ سنستعرض العبر من احداث الحرب العالميه الاولى و تطبيقاتها الحاليّه. و سنفرد الحلقتين الاخيرتين ٤٨ و ٤٩ للإجابة عن اسئله القرّاء. و بهذا ننهي السلسله التي استمرت عاما كاملا. و السلسله كلها في مصدر ٥.

المصادر:

——-

١- حياه انور باشا زعيم تركيا الفتاه

https://m.facebook.com/jawda.org/posts/1349020161834860:0

٢- the Jewish peril 

The protocols of the learned elders of Zion

https://www.amazon.com/Jewish-Peril-Protocols-Learned-Elders/dp/1578988810

٣- إثباتات تزوير بروتوكلات حكماء صهيون

http://emperors-clothes.com/antisem/graves-text.htm

٤- اشهار اسم رازلوفيف

https://books.google.com/books…

٥- صفحات مخفيه من تاريخ مصر

jawdablog.org/category/التاريخ/صفحات-مخفيه-من-التاريخ/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s