هل يستطيع ترامب إنقاذ السيسي؟

can_trump_save_sisi

في جو الاثاره الذي يشعر به اخر اتباع السيسي او اللي بنقول عليهم السيسي داي هارد sisi diehard. اللي هم ورآه لحد اخر نفس. لحد ما يموتوا كلهم و يخلصوا ع البلد. الناس دي دلوقتي عايشين على أمل جديد ان ترامب حينقذ مصر و السيسي و ان الخير جاي بس اصبروا و ان طبعا السيسي هو سيدنا الخضر و احنا طبعا سيدنا موسى. طبعا مفيش فايده تقول للداي هارد دول ان كل الامال اللي قبل كده غرقت البلد. و مفيش فايده نقولهم احنا في كل أمل قبل كده طلعنا و قلنا ده سراب قبل ما يثبت للجميع انه سراب (مصدر ١). لكن خلينا مره اخيره مع الكداب لحد باب الدار. حنمشي مع عقل الذبابه و نسأل: هل ترامب يقدر ينعنش مصر؟

الناس دائماً بتقول مشروع مارشال. اللي هو مشروع دعم امريكا لاوروبا الغربيه بعد الحرب العالميه التانيه. امريكا صرفت مباشره حوالي ١٥ مليار دولار في مشروع مارشال ده غير الدعم الغير مباشر من البترول الرخيص و رؤوس الأموال و نقل المعرفه. مصدر ٢. ال ١٥ مليار دول بسعر الأيام دي يبقوا حوالي ١٥٠ مليار دولار. مصدر ٣. عدد سكان أوروبا الغربيه وقتها ١٥٠ مليون نسمه. مصدر ٤. يعني كل طفل و رجل و امرأة اخد حوالي ١٠٠٠ دولار. طيب نحول الكلام ده لمصر نلاقي ان عدد سكان مصر حوالي ٩٠ مليون يعني محتاجين على اقل تقدير ٩٠ مليار دولار دعم مباشر. ده طبعا غير الدعم في صوره بترول و طاقه بسعر مخفض. ده طبعا غير نقل المعرفه اللي محتاج ان امريكا تثق تماما ان المعرفه دي مش حيساء استخدامها ضد الغرب او ضد اسرائيل حتى و لو لاحقا. احنا قدرنا حجم المعونه ده كله بحوالي ٣٠٠ مليار دولار قبل كده. مصدر ٥. و الأهم كمان هو ان دول أوروبا الغربيه بعد الحرب عندها سكان متعلمين و عندهم قدرات تكنولوجيه ضخمه محتاجين فقط زقه ماليه. و كمان فارق ان دي دول كان عندها تقاليد ديمقراطيه قديمه و مفيهاش فساد. معندهاش جيش بيسحب الفلوس و يدي الضباط ملايين و لا يعمل نوادي و لا يشتري سلاح ملوش فايده الا ضرب الشعب و لا بيضيع الفلوس في ترعه قناه السويس اللي ملهاش لزمه. طبعا أحنا ال ٣٠ مليار دولار اللي بلحه أخدها من الخليج عملوا أيه.

طيب هل ترامب يقدر يدي مصر ٩٠ مليار دولار؟ أكيد لا. ده واحد جاي بيقول امريكا اولا. و لما اتسأل هوه و مستشار الأمن القومي بتاعه حتجيب فلوس منين عشان مشروع اقامه مناطق أمنه في سوريا قالهم الخليج معاه فلوس مش عارف يعمل فيها أيه. مصدر ٦. و ده طبعا رأي مشابه جدا لرأي بلحه. بس طبعا ترامب بيقول بترول العراق كان لازم امريكا تأخذه. مصدر ٧.

لذلك ترامب حيروح للخليج و يقولهم ادوا مصر ٩٠ مليار! تخيلوا رد الخليج.

لذلك التعلق بأماني واهيه مش حيحصل. مصر حيبنيها اَهلها لما ينتجوا بعقولهم.

المصادر

——

١- توقعات جوده السابقه و كيف تحققت جميعها

https://jawdablog.org/2014/09/14/electricity_in_egypt_summer_2014/

https://jawdablog.org/2015/05/01/predictions_for_electricity_next_summer/

https://jawdablog.org/2016/08/10/sisi_and_suez_canal/

https://jawdablog.org/2016/11/25/economy_challenges_egypt_2016/

٢- حجم مشروع مارشال 

http://www.history.com/topics/world-war-ii/marshall-plan

٣- تحويل الدولار بسعره الحالي

http://www.dollartimes.com/inflation/inflation.php?amount=15000&year=1948

٤- عدد سكان أوروبا الغربيه بعد الحرب 

http://countrystudies.us/germany/84.htm

٥- الحجم الكلي لما تحتاجه مصر

jawdablog.org/category/الإقتصاد/استراتيجيات-وحلول/

٦- رأي ترامب في الخليج

http://thehill.com/…/251227-trump-saudi-arabia-should-pay-us

٧- بترول العراق

http://www.cnn.com/2017/01/26/politics/trump-oil-isis-iraq/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s