يا ريت نص اقتصاد مصر بيملكه الجيش

what_if_military_owns_half_egypt_economy

تعالوا كده نتخيل مع بعض لو فعلا نص اقتصاد مصر بيسيطر عليه الجيش الوضع حيبقى ازاي. بالحساب و المسطرة. 

حجم العماله في مصر حوالي ٣٠ مليون موظف و عامل و فلاح (مصدر ١). نصهم حيبقى في الجيش طبعا عشان نقدر نطلع نفس الانتاج. يعني ما شاء الله كده الجيش حيبقى ١٥ مليون. حاجه كده اكبر من أمريكا و الصين ذات نفسها. عدد الجيش الصيني ٢ مليون فقط. مصدر ٢. يعني حاجه تسد عين الشمس. و ندخل موسوعة جينيس لأكبر جيش في العالم و دي قصه بيحبها جنرالات مصر اللي بيموتوا في الهيافات زي مثلا أطول صاري علم في العالم. آه و الله عملوها. مصدر ٣. 

طيب العمال ال ١٥ مليون دول متوسط الدخل بتاعهم دلوقتي حوالي ٩٠٠٠ جنيه في السنه وفق أرقام التعبئة و الإحصاء. مصدر ١. طبعا لما يدخلوا الجيش حياخدوا زي العساكر أو على الأقل معظمهم. مهو مش معقول جيش يبقى معظمه الساده الضباط. يعني متوسط الدخل بتاعهم بدل ٩٠٠٠ في السنه حيبقى ال ٢٥٠ جنيه في الشهر بتوع العسكري الدفعه. مصدر ٤. يعني بدل ٩٠٠٠ جنيه حيبقوا ٣٠٠٠ جنيه. يعني اضرب في ١٥ مليون عامل يعني حنوفر مرتبات بحوالي ٩٠ مليار جنيه. الله اكبر. 

دلوقتي بقى بدل ما اصحاب الاعمال و المؤسسات و الشركات بتدفع ٩٠٠٠ جنيه في السنه، الجيش حياخذ كل المؤسسات و الهيئات دي و يدفع للموظفين و العمال فيها متوسط ٣٠٠٠ جنيه في السنه لكل واحد. طبعا حيبقى فيه شويه ضباط حيأخذوا اكتر طبعا. لكن بنقول في المتوسط. يعني ٩٠ مليار جنيه زياده داخلين في جيب الجيش. جميل. 

طيب الاقتصاد المصري كله حوالي ٤٨٠ مليار جنيه في السنه. مصدر ٥. طبعا نصهم دلوقتي حيدخل جيب الجيش. يعني حوالي ٢٤٠ مليار جنيه في السنه. زود عليهم بقى توفير ٩٠ مليار جنيه مرتبات يعني جيب الجيش حيدخل فيه بالمرتاح دلوقتي اكتر من ٣٠٠ مليار جنيه. يعني حتى لو الدولار بقى بميت جنيه فدول حيبقوا ٣ مليار دولار. و طبعا معروف لما بنقول بيدخلوا جيب الجيش فالفلوس بتروح فين. امال مبارك كان حاطط فلوس في سويسرا من أيه؟ مش من مصروف والده يعني. و ليه كان اتفاقه مع المجلس العسكري انه مش حيتنحى الا لما يضمنوا له ان فلوسه ما يتحجزش عليها؟ مصدر ٦. 

طبعا الجيش مش بيدفع ضرائب و لا جمارك. كده نص دخل الدوله راح عليها لان الجيش احتكر نص الاقتصاد. يعني نص ميزانيه التعليم راحت. نص ميزانيه الصحه راحت. و هكذا. طبعا ممكن جدا ان كل ميزانيه التعليم و الصحه يروحوا. و يفضل نص الميزانية اللي هوه بتاع الجيش. واحد يسأل ليه. مش الجيش واخذ نص الاقتصاد. كمان يأخذ الميزانية كلها. نقول اتفضل حضرتك اعترض. او اتفضلي حضرتك اعملي مظاهره في الشارع. 

طبعا واحد حيقول طيب الناس دي اللي كانت بتاخد ٩٠٠٠ في السنه و دلوقتي بتأخذ ٣٠٠٠ تعمل أيه. يا اخي انت مش وطني. فيها أيه يلبسوا كاكي كل يوم. و ياكلوا من تعيين الجيش. و يخدموا عند الساده الضباط. ده حتى الستات تسترزق من حسنات زوجات الضباط. و كده تبقى دي اكبر عمليه سطو في التاريخ جرى فيها سحب ٩٠ مليار جنيه من أيد الناس و تحويلها لجيب ولاد … 

تخيل كمان لو واحد عنده فكره جديده او يجيب تكنولوجيا ينافس بيها الجيش أيه ممكن يحصل له. حنسيب ده لخيالك. فمفيش حيبقى اَي ابداع. كله بالميري. و كله بالضرب. و او مش عاجبك اتفضل هات الست الوالده تأخذ هيا ال ٣ مليار دولار و تعدهم. 

على فكره لو مش مصدق ان الجنرال قال يا ريت ان نص الاقتصاد المصري في أيد الجيش شوف مصدر ٧. 

كله حيلبس كاكي. و حيسبح بحمد الزعيم. و نبقى زي كوريا الشمالية فعلا. و الله احنا حنعتزل الاقتصاد. لكن لو عاوز تعرف الافتصاد في المجره خارج مصر و كوريا الشمالية شغال ازاي زور مصدر ٨. 

على فكره تقديرنا لنسبه تحكم الجيش في الاقتصاد المصري مش ٢٪‏ زي ما السيسي بيقول لكن حوالي ١٠٪‏. مصدر ٩. و كنّا كتبنا زمان ان مفيش حاجه في الدنيا اسمها يد تبني و يد تحمل السلاح. ضحك ع الدقون. اقرأ مصدر ١٠. 

المصادر:

——-

١- عدد و دخل العمال و الموظفين و الفلاحين في مصر

http://www.tradingeconomics.com/egypt/labor-force-total-wb-data.html

http://english.ahram.org.eg/NewsContent/3/12/102394/Business/Economy/Egypts-average-weekly-salaries-rise–in–CAPMAS.aspx

٢- حجم الجيش الصيني

http://nationalinterest.org/feature/the-5-most-powerful-armies-planet-earth-11632

٣- أطول صاري علم في العالم

http://archive.aawsat.com/details.asp?section=31&article=647843&issueno=12026#.WGHbPlMrLIU

٤- اجر العسكري في الجيش المصري

http://www.al-monitor.com/pulse/originals/2015/07/egypt-military-conscription-sinai-attacks.html

٥- حجم الاقتصاد المصري

http://www.tradingeconomics.com/egypt/gdp-constant-prices

٦- اسطوره ان مبارك راجل وطني و تنحى لإنقاذ مصر

https://jawdablog.org/2016/01/04/myth69_mubarak_stepped_down_to_save_the_country/

٧- السيسي: يا ليت نصف اقتصاد مصر في يد الجيش

http://www.youm7.com/story/2016/12/24/بالصور-السيسي-مشاركة-القوات-المسلحة-فى-الاقتصاد-المصرى-تمثل-1/3024211

٨- تعالوا نتعلم الاقتصاد ببساطه 

https://jawdablog.org/category/الإقتصاد/حلقات-تعالوا-نفهم-الاقتصاد/

٩- حجم اقتصاد الجيش المصري

https://jawdablog.org/2015/11/13/lets_understand_economy_the_egyptian_military_empire/

١٠- اسطوره يد تبني و يد تحمل السلاح

https://jawdablog.org/2014/09/16/egypt_taboo_2/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s