سايكس-بيكو و الحرب العالميه الاولى … شهاده عيان على ثوره ١٩١٩ … الحلقه ٣٧

sykespico_37_1919_revolutionنكمل شهاده انجيليس انجيلياكيس من الحلقه السابقة (مصدر ١) على تطورات الأحداث خلال ثوره ١٩. 

شفنا واحد من الفلاحين شاف انجيليس على المركب و هو بيعدي لقريه السادات و قاله أوعى تروح تل رق لحسن الفلاحين قتلوا كل النصارى. انجيليس بيكمل في مذكراته و بيقول:

“كنت على المركب في وسط النهر و سمعت الأخبار عن تل رق و لقيت نفسي مش عارف اعمل أيه. هل ارجع العزبه؟ بس صوت جوايا قالي أني حاموت موته شنيعه على أيد الفلاحين اللي أنا كنت بأشرف عليهم و أشغلهم في العزبه. لذلك قررت أني أتحرك لقدام. على فين. مش عارف. لما وصلنا قريه السادات، الفلاح اللي كان عارفني سألني: انت رايح على فين يا خواجه؟ النصارى ماتوا كلهم. من غير ما أرد سبت الحمار بتاعي يكمل السكه في أتجاه تل رق ماشيين خلال الحقول بتاعه رزجالي بيه سيتي. 

و أنا ماشي في وسط الطريق قابلت زوجات (جمع زوجه) مراقب الفلاحين بتاعي و كان بيحبني. نصحوني أني ارجع لان فيه ثوره في تل رق. لكن أنا اعتمدت على ربنا و قررت أني اكمل بالحمار. مكملتش كتير بعد الستات دول و لقيت الفلاحين اللي بيحرثوا الارض بيشتموني. و واحد منهم ابتدى يجري ناحيتي عاوز يضربني. الستات حاشوا عني. و ابتديت اقرب من تل رق. 

اول ما دخلت تل رق لقيت شتايم و طوب بيتحدف عليا من العيال و الستات. مشيت بالحمار بعيد عن القريه في اتجاه السوق اللي على بعد ٣٠٠ متر من القريه. وصلت السوق لقيته فاضي خالص. لكن لقيت دكان فاريتاس مفتوح و بعض الجنود و الفلاحين قاعدين براه. مشيت ناحيه البوليس عشان محدش يهجم عليا. بصيت جوه الدكان عشان اشوف اذا كان فاريتاس لسه عايش. ربطت الحمار بره الدكان و دخلت. لقيت فاريتاس متسمر في مكانه. و لقيت الفلاحين بيدخلوا و يطلعوا من الدكان مستنين اللحظه اللي يسرقوا فيها الدكان. 

سألت فاريتاس أيه الموضوع. قاللي ما انت سابق قدامك. سألت عن اخبار بوليزويس فرد الموظف بتاعه و قال انه مشي من الصبح. 

بعد شويه لقيت ضابط الشرطه بتاع النقطه بيركب الحنطورو ماشي رايح القمر الصغير. سألت فاريتاس حيحصل لنا أيه دلوقتي. قاللي انه مش حيقدر يقفل المحل دلوقتي. لو أنا استنيت هنا حنموت احنا الاتنين. ليه متمشيش انت على الأقل ننقذ حياه واحد مننا. و متاخدش الحمار بتاعك. امشي في السر على رجليك. 

لكن أنا لو مشيت على رجلي حاديهم انطباع اننا خايفين و ده حيسرع انهم يعملوا اللي عاوزينه. 

و احنا بنتكلم لقيت أبن العمده جاي و دخل المحل و بيقول “النبره دول لسه هنا ليه”. و ابتدى يهجم علينا و مسكنا من رقبتنا. هوه كان متوقع اننا نقاوم. لكن أنا مقاومتش. لكن ابتدينا نكلمه كلام حلو و معسول و قدرنا نفلفط منه. بصيت لفيريتاس لقيته بيقولي اننا خلصنا خلاص. 

بصيت لفيريتاس و قلتله أنا ماشي رايح السنيطه لانها أمان. رد و قالي “ربنا معانا” 

في الطريق قابلت شتايم من الفلاحين بس مش كتير قوي. وصلت عزبه تريانتافيلوس. و كانت فاضيه خالص. سألت اول فلاح قابلته فين ناظر العزبه. رد و قالي طفش يا خواجه. 

الساعه بقت ٤ العصر و أنا ماشي في الصحرا مش عارف اروح فين. لقيت الفلاحين عاملين حفله و زيطه. قررت اروح عزبه متسجاليس على مسافه نصف ساعه. “

اللورد كرومر كتب في مذكراته ان اليونان والمالطيين و الأرمن والطليان كانوا زي طبقه البراهما في الهند بيتمتعوا بكل المميزات و المصريين كانوا زي الانتوتشابل أر الطبقه المحرومة في الهند. و احنا شايفين كل العزب مملوكه لجريج و متسميه باسمائهم. 

لذلك ثوره ١٩ في الحقيقه جزء منها ثوره ضد الأجانب. و ثوره حتى ضد النصارى. حنفهم بعدين الموضوع ده اكتر لكن احنا شايفين جدا الظلال الاسلامية و الاجتماعيه و الاقتصاديه للثوره. فهي مش بالضبط الثوره الوطنية القوميه ضد الاحتلال اللي كتاب التاريخ المدرسي بيتكلم عنها. 

نلاحظ كمان ان الشرطه هربت. و ده موضوع شفناه في ثوره يناير. 

نلاحظ كمان ان مستحيل ان ابن العمده يشارك في الثوره الا اذا كان في تنسيق و دعم من الملك و الحكومه. مستحيل ده بحكم العلاقات الاسريه و العشائرية في الريف المصري. زي ما شفنا الحلقه اللي فاتت السلطان فؤاد كان له دور مهم في التحريض من خلف الستار عشان يتخلص من الإنجليز و ان وزاره الملك ساعدت سعد زغلول. 

ده وضع مختلف تماما عن ثوره يناير اللي فيها العمد و الشرطه و كل الجهاز الاداري للدوله كان ضد الثوره. حتي الجيش نفسه كان ضد الثوره و ده واضح جدا من المراسلات اللي انتشرت بعد كده و حللناها (مصدر ٢)

و نكمل الحلقه الجايه بعون الله. 

المصادر:

——-

١- الحلقات السابقة مجمعه من صفحات مخفيه من تاريخ مصر:

https://jawdablog.org/category/التاريخ/صفحات-مخفيه-من-التاريخ/

٢- هل كانت ثوره يناير مؤامره؟

https://jawdablog.org/2016/01/07/myth72_was_jan_25_revolution_conspiracy/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s