!مفاجآت فيلم الجزيره

surprises_of_aljazeera_military_movie

مين مكانش عارف قبل امبارح ان التجنيد عمليه تعذيب و ان الضباط بتضرب المجندين و انهم بيشغلوا في خدمه مرات الباشا و ان ده يعتبر تكريم ما بعده تكريم؟ كل ده معروف. امال يعني الشعب كله بيدور على وسايط لأولاده ليه؟ و على فكره الناس ممكن تحتمل الاهانه لو ليها هدف إنما كله عارف انه لا فيه حرب ضد اسرائيل و لا غيرها. 

في الثمانينات كنّا صغيرين و بنصدق اللي بيتقالنا. كان قبل و بعد نشره الساعه ٩ في القناه الأولي كانت تيجي أفلام تسجيليه عن عظمه الجيش المصري. كنت بأبقى منبهر بأفلام الفنيه العسكريه أو الأكاديمية الطبيه العسكريه. لحد ما قررت أني ادخل واحده منهم. و حدث هجوم شديد من كل الأهل و الأصدقاء. “انت يا بني ازاي ساذج و تصدق كلام الأفلام دي”. بالمناسبه معظمهم دلوقتي من مؤيدي السيسي و شرف العسكريه المصريه … طالما طبعا حد تاني هو اللي بيتقتل و يموت. 

تكوين جيش في مجتمع طبقي لذلك عمليه صعبه. ليه؟ لان الطبقات الراقية عندها استعداد تدخل اَي حروب و تأخذ اَي قرارات طالما انها لا تدفع ثمن تلك القرارات. و بالتالي عند تلك الطبقات استعداد كامل انها تكرر كل اخطاء الماضي فمن يتحمل فاتوره تلك الأخطاء هي الطبقات الفقيره. 

طبعا بعد تكرار الأخطاء الطبقات الفقيره لازم تثور و تتمرد. و دي هي عقده تكوين جيش في مجتمع زي المجتمع المصري. 

لذلك يوجد حلان لا ثالث لهما لتكوين جيوش في المجتمعات الطبقية زي المجتمع المصري:

١- استخدام البروباجندا بالذات ذات الطابع الديني. 

الاسهل طبعا استخدام البروباجندا الوطنية. عمار يا مصر. احنا اسياد افريقيا. احنا أحسن ناس في المنطقة. الحفاظ علي الدوله المصريه. المؤامرات ضد مصر. خليكوا معايا يا مسريين. و هكذا. نفس الكلام كان يردده الفراعنة بالمناسبه و كل الديكتاتوريات من وقت اكتشاف الزراعه مِن حوالي ١٠ آلاف سنه. حتى كود حامورابي كان بيتكلم عن تفوق البابليين عمن حولهم! 

في العاده ده مَش كفايه. بتحتاج جرعه اكبر من البروباجندا خصوصا لما تكون اخطاء الأغنياء كبيره و وقعتهم سودا زي في مصر كده. مفيش أحسن من البروباجندا الدينية في الظروف دي. لذلك كل لما نظام يلجأ اكثر للبروباجندا الدينيه كل ما تعرف انه واقع في مشكله اكبر. 

يعني كلام من نوعيه خير اجناد الارض. و كل هذه البروباجندا. أو تجيب شيوخ يكلموا الجنود ان فتل المعتصمين في رابعه حلال الخ. 

٢- استخدام العنف أو التهديد به. 

كثير البروباجندا لوحدها مش كفايه ان تخلي الفقرا يسكتوا و يعملوا اللي الساده عاوزينه. لذلك اللجوء للعنف. الضرب. التعذيب. كسر الكرامه الإنسانيه. 

استخدام العنف مش سهل على فكره. بيحتاج تنظيم لاستخدام العنف. مين يستخدمه. ضد مين. و اذا كان العنف ضد الكل اذا سيتنتج الناس ان الثروه اسهل. و اذا زاد العنف عن حد معين ممكن يجيب نتايج عكسيه و الناس تستبيع. لذلك العنف دائماً بيكون محدود و دائماً بيكون انتقائي. و دائماً في نظام بحيث انك تشم العنف بس و تعمل اَي شيئ عشان ميزيدش عليك. اول ما دخلت في الدائره دي صعب تطلع منها لأنك بقيت أسير لها. 

الكلام ده من ايّام الفراعنة. اقرأ مصدر ١ كده و انت تعرف. 

طبعا مفيش جيش حينتصر في حروب و هو جيش من عبيد بالشكل ده. الا اذا كان الجيش اللي قدّامه من عبيد برضه. ممكن تحارب الهكسوس أو الحيثين كده. لكن دول خلاص انتهوا. لذلك الجيوش زي الجيش المصري كده مستحيل تنتصر في حرب الا اذا تم تحريرها زي في حرب ٧٣ و كان فيه هدف و الكل بيشارك في تحقيق الهدف مش الفقير بس. غير كده مفيش غير هزائم من نوعيه ٦٧ و أسوأ. الا اذا حاربت الحيثين أو جيش مستعبد زيك. 

المجتمعات الصناعية أو اللي بعد الصناعية، تغلبت على المشكله دي بأنها اما:

١- عملت التجنيد دون وسايط في فترات الحروب. فيه هدف محدد الكل داخل عشانه. 

٢- أو في فترات السلام عملت التجنيد اختياري. اللي داخل بمزاجه داخل يبقى راجل (أو ست) محترف. متخصص في القتال و لما تحصل حرب شغلته بتبقى انه يستوعب المجندين و يدربهم و يعمل تشكيل قتالي متقدم و حر و يدافع عن الوطن. و عن الوطن و ليس عن عرق الجيش. 

هيييه. نقول آيه. تعبنا. و على فكره كتبنا احنا كل ده قبل كده في سلسله سميناها “ازاي نبني على نضافه” و موجودة في مصدر ٢. لكن لازم نخترع العجله. 

المصادر:

١- سابينز – التاريخ المختصر للجنس البشري. يوفال نوح هاراري:

https://books.google.com/books/about/Sapiens.html?id=FmyBAwAAQBAJ&printsec=frontcover&source=kp_read_button#v=onepage&q&f=false

٢- سلسله جوده: “على نضافه”:

https://jawdablog.org/category/علي-نضافه/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s