لماذا لن يؤدي تعويم الجنيه لانطلاق الاقتصاد المصري؟

لماذا لن يؤدي تعويم الجنيه لانطلاق الاقتصاد المصري؟

تعالوا نتعلم الاقتصاد ببساطه 

why_floating_egyptian_point_will_not_lead_economic_growth

البعض يقول ان تعويم الجنيه سيودي لتدفق الاستثمارات بسبب انخفاض سعر العماله في مصر و تقليل سعر الصادرات المصريه و بالتالي زيادتها و كل ذلك سيؤدي لتحسين الاقتصاد المصري بل و انطلاقه و ان ما فعله السيسي هو في الحقيق ثوره اقتصاديه في مصر.

الحقيقه هذا كلام غير علمي و لن يحدث. لماذا؟ تعالوا نفهم ليه.

الاستاذ ابراهيم مدني راجل عنده مصنع منسوجات من زمان قوي. المصنع ده مشغل فيه عمال كتير و بينتج فيه فوط قطن بيصدرها للعالم. الاستاذ ابراهيم مدني بيشتري القطن من الفلاحين. كل فوطه داخل فيها قطن قيمته ١٠ جنيه. و كمان كل فوطه بتتكلف عماله قيمتها حوالي ٥ جنيه بيدفعها اجور للعمال. و كل فوطه بتتكلف حوالي ٥ جنيه كمان بيدفعها كهربا و إكراميات و ضرائب الخ. يعني كل فوطه بتتكلف حوالي ٢٠ جنيه. الدولار زمان كان بخمسه جنيه. زمان. يعني كل فوطه متكلفه على الاستاذ ابراهيم حوالي ٤ دولار. الاستاذ ابراهيم كان بيبيع الفوطه بحوالي ٦ دولار. يعني بيكسب ٢ دولار في الفوطه. الامور كانت ماشيه جدا.

طبعا بالحسابات الاقتصاديه العاديه. لو سعر الدولار بقى ٢٠ جنيه. و الاستاذ ابراهيم فضل يدفع للعمال نفس المرتبات و فضل يدفع نفس تمن الكهربا. الخ. يبقى كل فوطه متكلفه على الاستاذ ابراهيم دولار واحد بس. يعني ابراهيم دلوقتي اما انه حيكسب ٥ دولار في كل فوطه. او انه كمان ممكن يضارب على الصينيين و يبيع الفوطه ب ٢ دولار بس في امريكا و بالتالي يكسب دولار عن كل فوطه بس حيكسب كمان انه بدل ما يبيع عشرين الف فوطه في السنه حيضارب على الصينيين و يبيع مليون فوطه في السنه و بالتالي يزود الانتاج و يكبر المصنع و يشغل ناس كتير و الاقتصاد يغتني و يتنعنش و كله يبقى مبسوط. هوه ده دائماً اللي بيستند عليه كل الاقتصاديين بتوع تعويم العملات. و الكلام ده حيفضلوا يرددوه في مصر كتير قوي الايام اللي جايه.

المشكله هي ببساطه ان من كام سنه المعلم تامر العسكري اخد المصنع كله من الاستاذ ابراهيم مدني. المعلم تامر العسكري قفل المصنع كله و بيستورد هو ذات نفسه فوط صيني باتنين دولار من الصين و يبيعها للشعب المصري بما يعادل اربعه دولار. لذلك اي زياده في سعر الدولار معناها ان سعر الفوط دي في السوق المصريه حيزيد. و ده معناه تضخم في الاسعار و دي الحاله اللي احنا شايفنها دلوقتي.

طيب ناس حتقول احنا بنبالغ. تعالوا نبص للأرقام. في خلال ال ١٢ شهر اللي فاتوا الانتاج الصناعي في مصر تراجع حوالي ١٥٪‏ مقارنه بالسنه اللي قبلها (مصدر ١). و هذا التراجع في الانتاج الصناعي يتزايد في الشهور الاخيره كما هو موضح بالشكل المرفق. و هذه بيانات وزاره التخطيط المصريه ذاتها. ايه معني التراجع في الانتاج الصناعي؟ معناه انه مصانع بتقفل. عمال بتتشرد. و بدل ما ننتج بقينا بنستورد أكتر و أكتر. لذلك لما نقول ان المعلم تامر العسكري قفل المصانع احنا شايفين الأرقام بتقول كده.

why_floating_egyptian_point_will_not_lead_economic_growth2

لما كمان بنقول ان الاستيراد زاد بشكل لم يسبق له مثيل عشان نعوض قفل المصانع. فالأرقام بتقول كده. بص علي مصدر ٢ تلاقي انه في شهر اغسطس مصر استوردت أكتر مما قدرت بما قيمته أكتر من ٤ مليار دولار. و ان الحقيقه ان سنه ٢٠١٢-٢٠١٣ شهدت بعض التحسن زي ما شكل ٢ بيورينا. لكن من بدايه سنه ٢٠١٦ و الانهيار في التصدير و تزايد الاستيراد بيحصل بشكل مخيف.

لذلك اي بلد وضعها كده و بتستورد أكتر بكتير مما بتنتج. و إنتاجها الصناعي عمال ينزل مفيش حاجه اسمها ان تعويم العمله ينفعها. الكلام ده ينفع في دول زي شرق اسيا عندها انتاج صناعي ضخم و بتصدر أكتر مما تستورد و بالتالي تخفيض قيمه عملتها بيخلي منتجاتها اسعارها تقل في العالم و تاخد سوق اكبر و بالتالي يحصل تحسن لأداء الاقتصاد. الكلام ده ملوش اي علاقه بمصر في الوضع الحالي.

طبعا في ناس بتقول: ايه اللي يمنع مستثمر اجنبي انه ييجي يشتري المصنع المقفول ده و يرجع الانتاج. او كمان ايه اللي يمنعه انه يستغل فرصه ان الجنيه المصري رخيص و الايدي العامله رخيصه و رخصت أكتر مع تعويم الجنيه و انه ييجي يعمل مصنع في مصر.

الاستثمار الأجنبي و تدفقه بيدخل فيه عوامل كتيره جدا. سعر العمله مجرد عامل واحد. يعني لو كان الموضوع بسعر العمله فقط كان مثلا الاستثمارات تدفقت علي بلد افريقيه زي زيمبابوي بها أرخص عمله في العالم و عملتها تقدر بالكيلوغرام أساسا.

المستثمر الأجنبي عشان يستثمر في دوله محتاج التالي:

١- فرصه للاستثمار تعطيه ميزه تفضيليه ينافس بيها في العالم. يعني باختصار انه لما يستثمر يجيله عايد. بالبلدي كده. 

٢- قله البيروقراطيه. 

٣- انخفاض الفساد. 

٤- القدره علي تحويل المكاسب خارج البلاد.

احنا بنتكلم عن بلد ترتيبها هو رقم ١٢٢ في العالم في سهوله الاعمال. لو نبص علي دول المنطقه. تركيا رقم ٦٩. تونس رقم ٧٧. اسرائيل رقم ٥٢. جنوب افريقيا رقم ٧٤. لذلك العامل التاني في مصر عن قله البيروقراطيه عامل غير مساعد في مصر. مصدر ٣.

في الفساد مصر ترتيبها ٨٨ في الدول الأقل فسادا في العالم. تركيا ترتيبها ٦٦. تونس ٧٦. زامبيا ٧٦. زي تونس. مصدر ٤. ادي كمان العامل التالت ضد مصر.

العامل الرابع سيئ جدا كمان. لان مصر دلوقتي فيها تحديد لكميه الأموال التي يستطيع اي مستثمر تحويلها للخارج. و بالتالي العامل الرابع كمان سيئ.

مع كل العوامل السيئه دي لازم المستثمر يبقى قصاده فرص جباره للاستثمار. يعني ممكن مستثمر يقبل كل العوامل السيئه دي و ياخذ مخاطره كبيره لو مثلا قدّامه مشروع يعمل عائد ٣٠-٤٠٪‏ في السنه. طبعا بالدولار. حد ممكن يقولنا ايه المشروع اللي ممكن يعمل عايد ٣٠-٤٠٪‏ في السنه في مصر؟ أكيد مش مشروع صناعي يعني. أكيد مش تصنيع محركات الطيارات لانه مفيش خبرات في مصر لكده. اكيد حتى للاسف مش تصنيع العصائر و المعلبات لان الجوده الصناعيه المصريه اقل بكتير من لبنان و تركيا و بالتالي المنتجات المصريه عاجزه عن المنافسه في الحاجات دي. اكيد كمان مش منسوجات و لا قطن. ده كان زمان. دلوقتي المنسوجات المصريه عاجزه عن منافسه مثيلتها من بنجلاديش في الجوده و السعر (في مصدر ٥ عملنا دراسه كبيره عن كيفيه تحفيز التصدير في مصر. لكن مين يقرأ). الشيئ الوحيد اللي ممكن يعمل عائد زي كده هو اما الاستثمار في العقارات او الاستثمار في المولات. دي كلها استثمارات استهلاكيه لكن الشعب المصري بيقبل عليها و بيدفع فيها ارقام كبيره جدا.

why_floating_egyptian_point_will_not_lead_economic_growth3

و بالتالي مش حيحصل استثمار في مصر الا في المولات و العقارات. و الحاجات دي لا يمكن تصديرها. و بالتالي حيفضل فيه تراجع في الانتاج الصناعي في مصر و الاستيراد حيبقي كبير.

طبعل فيه السفهاء اللي بيقولوا ان مصر حتستورد باليوان الصيني و ده حيقضي علي الدولار! لان الصين هدفها تقضي علي الدولار! طبعا هذا كلام مضحك. ببساطه لان امريكا هي الشريك التجاري الأكبر للصين. التبادل التجاري بينهم حوالي ٥٠٠ مليار دولار في السنه (قد اقتصاد مصر كله عده مرات) و بالتالي لو انخفضت قيمه الدولار في العالم بشكل كبير ستزيد قيمه صادرات الصين و بالتالي ستفقد الصين ميزتها التجاريه مع امريكا و تزيد اسعار المنتجات الصينيه بشكل كبير في امريكا و بالتالي يقل استيراد امريكا من الصين و يتراجع الاقتصاد الصيني الذي يعتمد بشكل كبير علي التصدير. لذلك الصين بتعمل جاهده انها تحافظ علي قيمه عملتها واطيه جدا قدام الدولار و بتشتري اي دولارات تقدر تتحصل عليها (مصدر ٦). كل ده عشان تفضل تصدر لامريكا بأسعار رخيصه. و ده اللي بتوع تعويم العمله بيقولوه لكن بيشتغل مع الصين اللي بتصدر لامريكا ب ٤٠٠ مليار دولار في السنه و بتستورد بس ب ١٠٠ مليار دولار. مش مع مصر اللي بتستورد في شهر واحد ٤ مليار دولار أكتر ما بتصدر. و بتستورد كل حاجه من الأكل حتي الابره حتي الصاروخ حتي الدواء.

لذلك افتكروا الكلمتين دول كويس. تعويم الجنيه مش حيخلي الاقتصاد يتحرك. هوه بس بالكتير حيخلي احتياطي البنك المركزي لا يتراجع عشان الدول اللي بتسلفنا زهقت من الغباء بتاع مصر و هي بتصرف كل الدولارات اللي بتجيلها عشان تحتفظ بسعر للدولار رخيص في البنك و غالي في السوق السودا. كل اللي حيحصل ان الناس حتتعب أكتر من تبعات ارتفاع الاسعار و التضخم اللي حتحصل في كل حاجه.

و الحلقات السابقه كلها من تعالوا نتعلم الاقتصاد في مصدر ٧.

المصادر:

——-

١- تراجع الانتاج الصناعي المصري:

http://www.tradingeconomics.com/egypt/industrial-production

٢- تزايد الفجوه بين الاستيراد و التصدير في مصر:

http://www.tradingeconomics.com/egypt/balance-of-trade

٣- سهوله أداره الاعمال في مصر و العالم:

http://www.doingbusiness.org/rankings

٤- ترتيب الدول من ناحيه الفساد:

http://www.transparency.org/cpi2015#results-table

٥- دراسه جوده عن حل مشاكل التصدير في مصر باستخدام النظريات الاقتصاديه الحديثه:

https://jawdablog.org/2016/01/13/lets_learn_economy_import_export_in_egypt/

https://jawdablog.org/2016/01/14/httpjawdablog-org20160113lets_learn_economy_import_export_in_egypt/

٦- الصين تحاول ان تجعل عملتها ضعيفه امام الدولار:

http://www.globalfinanceschool.com/blog-post/how-china-keeps-yuan-undervalued

٧- تعالوا نتعلم الاقتصاد ببساطه:

https://jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s