سايكس-بيكو و الحرب العالميه الاولي … فظاعات الحرب في سوريا … الحلقه ٣١

sykes_pico_31_war_in_syria1

قبل ما نكمل الاحداث اللي وقفنا عندها بإعلان استسلام الدوله العثمانيه بعد احتلال حلب (الحلقات السابقه – مصدر ١)، كان لازم نقف وقفتين. الاولانيه الحلقه اللي فاتت و كانت وقفه استراتيجيه شوفنا فيها ازاي نتايج الحروب بتتحدد (الحلقه السابقه) و طبقنا ده علي الوضع في الشرق الاوسط دلوقتي و شفنا انه حتي لو قوى معينه تبان منتصره (زي روسيا مثلا دلوقتي او المانيا وقت الحرب العالميه الاولي) في الحقيقه امكانياتها الاقتصاديه ضعيفه جدا (دخل روسيا اقل من سُدس دخل امريكا) و بالتالي عند الجد هزيمتها مؤكده.

الوقفه التانيه النهارده وقفه انسانيه. للاسف سوريا مش جديده علي فظائع الحروب. لسبب جغرافي مهم سوريا و موقعها موعوده تماماً بفظائع الحروب زي ما شايفين دلوقتي. موقع حساس و حواليه مصالح كتيره من دول معظمها معندهاش اهتمام انها تقتل المدنيين العرب و المسلمين في سوريا في سبيل تحقيق أهدافها في الإقليم و ابعد من الإقليم كمان.

تعالوا نشوف التاريخ حصل فيه ايه.

في عصر يوم ٢٣ سبتمبر، الجيش الهندي البريطاني دخل مدينه حيفا في فلسطين. ويليام يال (فاكرينه من الحلقات اللي فاتت؟ هوه العميل الامريكي في الشرق الاوسط و كان مرافق للجيش البريطاني) نزل يتمشى في المدينه. الجنود الهنود كانوا لسه بيستخدموا سلاح الحربه وقتها. في شوارع البلد القديمه في حيفا سلاح الحربه اثبت كفاءه شديده جدا. الجنود الأتراك كانوا بيجروا من الفزع و الجنود الهنود كانوا بيجروا وراهم بالحراب و يقتلوهم. الشوارع كانت مليانه جثث. مصدر ٢.

تاني يوم الصبح ويليام يال طلع علي الطريق الساحلي خارج حيفا. لقى طوابير من الجنود الأتراك ماشيين ورا بعض رايحين معسكرات الأسر. كل طابور سايب وراه جنود مقدروش يكملوا و وقعوا علي الارض عشان يموتوا في الشمس. لا الجنود الهنود بيساعدوهم و لا حتى زملائهم الجنود الأتراك بيحاولوا. كأنه يوم القيامه. و لا حتى ويليام يال وقف عشان يساعد الناس اللي عماله تقع دي.

ويليام يال كتب في مذكراته: “و لا حتى فكرنا اننا نقف ناخد في عربيتنا حتى واحد او اتنين من الجنود دول ننقذهم. كنا في منتهى قسوه القلب”.

ويليام ساق العربيه لحد ما وصل من حيفا لحد بلد في جنوب سوريا اسمها طفس. و هي تقع بالضبط خارج هضبه الجولان قرب الحدود مع الاْردن حاليا و جنوب مدينه درعا السوريه (نلاحظ ان المسافات في الشام قصيره. المسافه من بغداد لسوريا هي تقريبا المسافه من سوريا للقاهره بالمناسبه. احنا بننسى ده دائماً. بننسي ان السبب ان التأثير المتبادل بين سوريا و مصر و هو تاريخيا قوي، هو قليل جدا حاليا بسبب وجود اسرائيل كعازل و يزيد ذلك العازل ان الحكومات العسكريه المصريه المتعاقبه بتحجز فلسطين عن مصر و مصر عن الشام).

في نفس اليوم، لورانس و مجموعه جنود عرب معاه من فيلق فيصل بن الحسين قابلوا مجموعه اهالي خايفين مستخبيين في الزراعات خارج طفس. الأهالي كانوا بيهمسوا من الخوف و قالوا ان الجنود الأتراك و الألمان بيقتلوا كل الناس في طفس. لورانس دخل طفس و لقي فعلا شواهد على كده. الجنود الأتراك و الألمان بسبب الهزيمه في فلسطين و اجتياح درعا ملقوش غير انهم ينتقموا من العرب و الأهالي لإحساسهم انهم خانوهم وتحالفوا مع البريطانيين ضدهم. مصدر ٣.

sykes_pico_31_war_in_syria2

فجأه طفله صغيره طلعت من الزرع و بتعيط و مضروبه بسيف في رقبتها و بتنزف و اول ما شافت لورانس قالتله: “ما تضربنيش يا بي” او يا ابي بالسوري. بعدها علي طول البنت وقعت ميته.

لورانس كمل في طفس و لقي ان الألمان و الأتراك قتلوا الستات حتي الحوامل في عمليه انتقاميه شديده.

واحد من مرافقين لورانس كان الشيخ طلال الحردين و هو شيخ طفس. ربما الأتراك فعلا كانوا عارفين ان شيخ طفس و أهاليها خانوهم و بالتالي كان الانتقام. محتمل. طبعا ليس مبرر. لكن جنود في ظروف انهيار كامل و مذابح بتتعمل لهم زي ما شفنا. مذابح شغاله بقالها شهور علي الأقل.

الشيخ طلال شاف المنظر و عيط. لورانس تشاور مع عوده ابي طايع شيخ مشايخ القبائل في المنطقه دي و اتفقوا ان يومها مفيش اسرى حيتاخدوا.

لورانس و معاه الفيلق العربي هاجموا على الجنود الأتراك و الألمان المنسحبين في أتجاه دمشق. حوالين ٦ الاف جندي مفضلش منهم الا اقل من ألفين هربوا على دمشق. حتى لورانس نفسه كتب في مذكراته انه “كان جنون”.

الامور ساءت لدرجه ان واحده من الكتائب العربيه مع لورانس مسمعتش موضوع انه مفيش اسرى يومها. فاخذوا حوالي ٢٥٠ إسير تركي و ألماني. لورانس قالهم متخلوهمش. لورانس نفسه كتب في مذكراته: “حطينا المدفع هوتشكيس – مدفع رشاش ثقيل- ضد الأسرى و قتلناهم كلهم. و محدش منهم فتح بقه حتى”. يبدو ان بالنسبه للأسرى دول الحياه زي عدمها. بالعكس الموت مريح.

جيش فيصل العربي دخل مدينه درعا تاني يوم زي ما شفنا قبل كده و قعد ينهب كل حاجه في المدينه! اللي هو المفروض ان دي مدينه الجيش العربي ده جاي يحررها!

جنرال جورج بارو دخل درعا و لقى الموقف بالسوء ده. جنرال بارو نده لورانس و أمره انه يوقف عمليه النهب دي. لورانس رد عليه انه “دي الطريقه اللي العرب بيحاربوا بيها”. بارو قاله: “بس دي مش الطريقه اللي احنا بنحارب بيها”.

رجاله الجنرال بارو الإنجليز و الاستراليين دخلوا محطه سكه حديد درعا (اللي هي زي ما شفنا اهم نقطه استراتيجيه بتربط سوريا بفلسطين بالحجاز و كمان هي اللي بتطلع لدمشق بعدها. شرحنا الكلام الاستراتيجي ده في الحلقات السابقه). لقوا ان فيه قطار تركي عباره عن مستشفي. و ان جنود فيصل العرب دخلوا القطار و سرقوا حتى الضمادات من اجساد المصابين و قطعوا رقاب المصابين.

في اكتوبر بعد لما بريطانيا دخلت دمشق، اهالي دمشق وزعوا علي الجنود الورد من البلكونات. تخيلوا. و شرحنا سيكولوجيه الموضوع ده قبل كده. اهم حاجه عند المدنيين هي الاستقرار. ده طبيعي في اي مكان. اهالي دمشق رقصوا و غنوا في الشوارع. الألمان نفسهم تعاونوا مع الاحتلال الامريكي في الحرب العالميه التانيه و بنات ألمان مثلا ناموا مع العساكر الامريكان.

في يوم ٢ اكتوبر جندي استرالي راح يقابل ويليام يال في الفندق اللي كان قاعد فيه في دمشق و سأله “انت شفت المستشفي التركي؟”

يال راح مع الجندي الأسترالي يشوفوا المستشفي التركي ده. مكانش بعيد عن محطه سكه حديد دمشق. لقوا ٢ عساكر أستراليين واقفين علي بوابه المستشفي. دخلوا جوه. لقوا منظر مهول. عساكر اتراك ميتين و جثثهم متعفنه. عساكر اتراك صاحيين فوق الجثث و بيتألموا. الفئران بتأكل الجثث و بتاكل اجسام الأحياء كمان. بول و براز في كل مكان لان العيانيين مش قادرين يتحركوا. الجنود العرب و الحراميه سرقوا كل الأكل و الشرب و رموا المصابين من علي السرائر و سرقوا السرائر.

في الدور الأخير من المستشفي يال لقي ٣ ممرضات اتراك قاعدين في سكون من غير اي كلام بيشربوا قهوه. حاله كامله من انعدام القدره علي التصرف. و طبعا ده بيعمل تبلّد.

لورانس وصل المستشفي التركي. و امر الأسرى الأتراك يحفروا قبر جماعي للميتين. الجثث كانت اول ما تقع في القبر كانت بتفتت. الاستراليين جابوا أدويه و علاج و مياه.

في اليوم التاني لورانس حاول يدخل المستشفي فجندي استرالي قابله. الأسترالي سأل لورانس “انت المسئول عن ده”. لورانس رد انه مسئول. الجندي الأسترالي راح تافف عليه.

لورانس مردش. لانه احس انه يستحق الاهانه.

من وقتها لورانس نفسه اتغير تماماً. و جاله اكتئاب شديد. سنين بعد كده لما لورانس و ويليام يال كتبوا جوابات لبعض متكلموش الا على المستشفي التركي.

موعوده سوريا بالفظاعات دي.

و نكمل بعد الوقفه دي ايه اللي حصل بعد استسلام الدوله العثمانيه و احتلالها.

الصور المرفقه هي لمدينه دمشق و يظهر الجنود الاستراليين يحرسون الميدان الرئيسي في دمشق.

المصادر:

———

١- الحلقات السابقه مجمعه

https://jawdablog.org/…/%D8%B5%D9%81%D8%AD%D8%A7%D8%AA-%D9…/

٢- لورانس في بلاد العرب:

https://books.google.com/boo…/about/Lawrence_in_Arabia.html…

٣- مذكرات لورانس: اعمده الحكمه السبعه:

https://books.google.com/…/ab…/Seven_Pillars_of_Wisdom.html…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s