!مصر تستقبل حاييم وايزمان استقبال الأبطال

صفحات مخفيه من تاريخ مصر 

سايكس بيكو و الحرب العالميه الاولي 

الحلقه ٢٦

sykes_pico_26_egypt_receives_wayzman_as_hero

في مارس ١٩١٨ الصوره في العالم بدأت تتغير جدا. المانيا بدأت تنفيذ الخطه مايكل في يوم ١٨ مارس و اندفعت القوات الالمانيه بضراوة لدرجه ان دي تبقي اول مره في الحرب يحصل تقدم حقيقي في الجبهه الغربيه. يعني قبل كده بشهور كانت الجبهه الغربيه بتتحرك بوصه يمين او بوصه شمال و يموت فيها عشرات الآلاف. فجأه الجيش الألماني بيندفع بالكيلومترات. لدرجه ان الجنود بتتحرك اسرع من قدره التموين الوصول ليهم. المانيا وقتها اقتربت من انها توصل لساحل نورماندي و تقطع فرنسا عن بريطانيا و بلجيكا تماماً. 

ده كان بسبب ان المانيا سحبت قواتها من جبهه روسيا بعد الثوره البلشفيه و انسحاب روسيا من الحرب و قررت انها تركز في الجبهه الغربيه بسرعه قبل وصول الجنود الامريكان و انها تلحق تخطف النصر قبل وصول امريكا. 

ده نفس الوقت اللي اللنبي كان خلص راحه قواته و بيستعد انه يهجم من القدس في اتجاه دمشق زي ما شفنا في الحلقات السابقه (مصدر ١). 

طبعا بريطانيا ابتدت تسحب قواتها من اللنبي بعشرات الآلاف و تحولهم لجبهه فرنسا. و طبعا ده خلى اللنبي يؤخر حركته في اتجاه دمشق. 

كتير احنا دائماً بنفكر في الصراعات في داخل حدودالدوله او المنطقه بينما الحقيقه كل الدول اللي بنتعامل معاها بيديروا صراعات دوليه و كل مناطق العالم مرتبطه ببعضها. و ساعات كتير عجزنا عن فهم ده بيخلينا نستدعي نظريات غريبه تبدو فيها مصر او اي دوله محرر العالم. بينما الحقيقه انها جزء من العالم. 

في خلال أواخر ١٩١٧ و حتي بدايات ١٩١٨ كانت مصر بتغلي و فيها اضطرابات مستمره ضد وعد بلفور و اتفاق سايكس بيكو بعد ما اتعرفوا و شفنا ده في الحلقات السابقه و اتكلمنا عن ثوره ١٩١٧ في مصر التي لا يعرفها احد (مصدر ٢). 

عشان بريطانيا تتجنب انهيار الجبهه مع العثمانيين او ان الشعب المصري يثور في خلال فتره ان الجيش البريطاني في مصر و فلسطين في اضعف لحظاته بعد سحب أعداد كبيره منه و إرسالها لفرنسا في مارس-ابريل ١٩١٨ و كمان خوف ان الشريف حسين و أولاده يخونوهم و يرجعوا يتحالفوا مع تركيا، بريطانيا عملت حركه حتتكرر بعد كده كتير. بريطانيا جمعت كبار رجال الحركه الصهيونيه في العالم و بعتتهم مصر عشان يزوروا مصر و يقابلوا أعيان مصر و أعيان سوريا عشان يطمنوهم ان الحركه الصهيونيه حركه سلام و ملهاش أغراض تعمل دوله في فلسطين. هن بس عاوزين ان اليهود يهاجروا فلسطين و يعيشوا فيها بسلام. و ان الصهاينه حيحافظوا علي المقدسات الاسلاميه. الخ. الحركه دي بيتقال عليها charm offensive. او هجوم الجاذبيه. 

حاييم وايزمان و اللجنه الصهيونيه وصلوا اسكندريه في ٢٠ ابريل ١٩١٨. تلاميذ المدارس في اسكندريه استقبلوهم بعزف نشيد الهاتكفاه او الأمل بالعبري. تخيلوا. 

حاييم وايزمان و اللي معاه قابلوا أعيان مصر و طبعا طمنوهم تماماً. و بعدين قابلوا أعيان سوريا و فلسطين اللي موجودين في مصر و طمنوهم. لدرجه ان وايزمان قالهم ان اقامه دوله يهوديه في فلسطين ضار لمصالح اليهود! في الوقت ده بريطانيا عملت وقف لعمليات بيع و شراء الاراضي في فلسطين. وايزمان قال للأعيان المصريين و السوريين ان هوه شخصيا اللي طلب من بريطانيا تعمل الوقف ده. العجيب ان وايزمان كتب في مذكراته انه قال لبقيه اللجنه انها تطلب من أغنياء اليهود في العالم يجمعوا فلوس عشان اول ما وقف البيع ينتهي انهم يشتروا اراضي علي طول خصوصا ان العرب دلوقتي مطمئنين جدا لاهداف الصهيونيه. 

طبعا وايزمان اشاد بالثوره العربيه في الحجاز ضد الأتراك. أكيد. و قال ان ده كفاح مشترك بين العرب و الصهاينه. 

لذلك لما حد يقولك الفلسطينين باعوا ارضهم. فكره و الله ان تلاميذ المدارس المصريين وقفوا طابور في ميناء اسكندريه عشان يغنوا هاتكفاه لاستقبال حاييم وايزمان! و كتبنا احنا عن موضوع بيع الارض ده لدحض هذه الاساطير (مصدر ٣). 

المصريون و العرب اقتنعوا تماماً. لكن ويليام يال عميل المخابرات الامريكيه في القاهره كان شاكك في الموضوع. و كتب لوزاره الخارجيه الامريكيه (مصدر ٤):

“هذه المؤتمرات التي اقامها وايزمان في مصر نجحت بشكل كبير. و اقتنع أعيان مصر و سوريا ان الصهاينه ليس لديهم نوايا سيئه في فلسطين. لكن من الغريب انه بينما يسافر حاييم وايزمان و رفاقه الصهاينه لفلسطين برعايه الحكومه البريطانيه، يتم منع المصريين و الفلسطينين و السوريين من السفر اليها. و قال لي لويس ماير الامريكي الوحيد العضو في لجنه وايزمان انه بالرغم ان وايزمان بيقول دلوقتي انه معندوش اي نوايا يعمل دوله يهوديه في فلسطين مش معني كده انه مرتبط بالوعد ده في المستقبل. بالعكس فالهدف الرئيسي من الحركه الصهيونيه هو وطن قومي تحت رعايه بريطانيه او امريكيه. و ان التحضيرات لهذه الدوله اليهوديه هي في وضع متقدم للغايه. Quite well advanced. و ان المناقشات داخل اللجنه الصهيونيه تدور الان حول وضع المواطنين العرب بعد اقامه الدوله اليهوديه. و يري البعض انهم سيوفرون عماله رخيصه بينما يري الآخرون انهم يجب ان يطردوا. و ان الامر في النهايه سيكون مسأله أعداد. فمثلما لن يقبل الجنوب الامريكي الأبيض مطلقا ان يسيطر عليه السود لن يقبل اليهود في فلسطين ان يسيطر عليهم العرب و انه لذلك لن يكون هناك بديل عن طرد العرب من الدوله اليهوديه في يوم ما”

علي فكره. في رأينا. هذا اليوم الما قد اقترب. و تقسيم سوريا هو أعداد لذلك حيث سيطرد عرب الضفه نحو ما سيتبقي من داعش. و غزه هي دون اهميه استراتيجيه كما رأينا سابقا و دون تاريخ يهودي يذكر بينما الضفه و القدس هي الاهم في العقليه الصهيونيه. لذلك نضيع نحن وقتنا في عك استراتيجي من نوعيه طرد أهل غزه نحو سيناء. بينما الاجدي طردهم نحو الدلتا و القاهره كي يذوبوا فيها بسهوله و ترك سينا فضاء استراتيجي خالي من السكان كما هو الان و كما يعمل نظام السيسي علي إبقائه كذاك بأي شكل (مصدر ٤). 

انتهي المد الثوري المصري وقتها. و شاركت النخبه المصريه و العربيه عن دون قصد في الاغلب في وأد ثوره ١٩١٧ و أتاحه الفرصه لتقبل المشروع الصهيوني في المشرق العربي بالرغم ان الشعب المصري رفضه حالما علم به سنه ١٩١٧. و بالتالي اصبح القمع ضد من يثور في ١٩١٨ ضد المشروع الصهيوني قمعا مبررا فالنخبه المصريه و العربيه تقف الان مع المشروع الصهيوني. 

و ذات السيناريو يتكرر الان. فالشعب الذي وقف ضد الاستبداد و من اجل النهضه و الكرامه في ٢٠١١ و ضد مشاريع اسرائيل كما تبين في اقتحام السفاره الاسرائليه خلال احداث الثوره المصريه، لم تلبث نخبته ان وضعت يدها في يد المشروع الاسرائلي في المنطقه عام ٢٠١٣ ربما ايضا عن دون قصد. و يجري لاحقا التعامل مع نتنياهو كمساند و حليف استراتيجي. و يستقبل بوتين في القاهره كمنقذ بينما هو من يعمل مع اسرائيل و اليمين الصهيوني الامريكي علي تقسيم سوريا. و وأد الثوره المصريه دون شك له علاقه مهمه بثوره سوريا و كما قال السيسي تم تسريع الانقلاب بعد مؤتمر نصره سوريا. 

و من ضمن ال charm offensive ان يتم وسم بوتين انه بطل قومي للمصريين! و الله العظيم الامور واضحه. بس للاسف لا احد يقرأ التاريخ. 

و نتابع. 

المصادر:

——-

١- الحلقات السابقه من صفحات مخفيه من تاريخ مصر:

https://jawdablog.org/category/التاريخ/صفحات-مخفيه-من-التاريخ/

٢- ثوره ١٩١٧ التي لا يعرفها احد:

https://www.facebook.com/jawda.org/photos/pb.524906364246248.-2207520000.1473875298./1156505067753038/?type=3

٣- اسطوره ان الفلسطينيين باعوا ارضهم:

https://jawdablog.org/2014/12/30/myth_palestenians_sold_their_land/

https://jawdablog.org/2014/12/30/did_palestenians_sell_their_land/

https://jawdablog.org/2014/09/28/egypt_taboo_17/

٤- هل طرد أهل سيناء و تفريغ رفح من مصلحه مصر؟

https://jawdablog.org/2015/01/21/egypt_taboo_34_destruction_of_rafah_beneficial_for_security/

https://jawdablog.org/2014/11/08/egypt_taboo_25/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s