الدهب راح فين؟ … الحلقه ٢٥

صفحات مخفيه من تاريخ مصر

سايكس بيكو و الحرب العالميه الاولي 

sykes_pico_25_where_is_gold

بعد دخول اللنبي القدس في ديسمبر ١٩١٧ كان لازم الجيوش البريطانيه ترتاح و تستقر شويه لان اي حركه بعد كده حتكون اختراق للجولان و الدخول للعمق في سوريا الحاليه (المسافه بين القدس و الجليل مائه كيلو و من الجليل حتي دمشق ١٥٠ كم و بالتالي المنطقه كلها من القدس حتي دمشق هي جبهه واحده تحتاج معركه واحده لاختراقها او الهزيمه. بننسي احنا دائماً ان المسافات في المشرق العربي و الشام مسافات صغيره و ده أكتر شيئ اسرائيل بتخاف منه. انه اي اختراق في الجليل مثلا معناه تهديد مباشر للقدس). 

الراحه دي كان مقرر ليها انها تستمر لحد أوائل مارس بحيث ان شهور الشتا تعدي و بالتالي يتجنبوا التلج و البرد القارص في جبال الجولان. لكن ده معناه برضه انهم يدوا راحه للجيش التركي انه يتجمع و يركز جهوده في سوريا و بالتالي يزود احتمالات انه يصد الهجوم البريطاني من القدس في اتجاه سوريا. او الاسوء ان الجيش التركي ينزل من سوريا جنوبا في اتجاه الاْردن الحاليه و يهاجم الجيش البريطاني عبر نهر الاْردن و بالتالي مسبقاش في راحه. 

كانت فكره لورانس انه في خلال فتره الراحه و التعبئة الاستراتيجيه دي انه ياخذ قواته من العرب اللي كانت عماله تهاجم خط سكه حديد اسطنبول-الحجاز و كانت استولت علي العقبه زي ما شفنا في الحلقات اللي فاتت (مصدر ١). و يطلع من العقبه علي مدينه الطفيله (في الاْردن الحاليه) و يستولي علي المدينه اللي كانت وقتها قريه و بعدين يطلع منها و يعبر هضبه موآب الاردنيه و يدخل مدينه اريحا الفلسطينيه بعبور نهر الاْردن و من اريحا يربط مع جيش اللنبي في القدس (الخريطه المرفقه). و بكده يقدر انه يؤمن تماماً أجناب جيش اللنبي في فلسطين (دي اهميه تشكيل دوله الاْردن. انها تأمين استراتيجي لاجناب اسرائيل بالضبط زي سينا تفضل صحرا فاضيه تأمين استراتيجي لها في العمق الجنوبي). 

الخطه دي طبعا كانت خطه عبقريه. لكن كانت حتبقي اول مره لورانس و قواته من البدو يستولوا علي مدن. زي ما شفنا قبل كده ان كل خطتهم كانت تعتمد انهم في كل مكان و مش في اي مكان. لكن المره دي لازم يستولوا علي مدن و فيها سكان. و كان الهدف الاستراتيجي مدينه الطفيله الاردنيه. لورانس طلع مع زيد بن الحسين و قواته و فعلا هاجموا الحاميه التركيه في الطفيله و استولوا علي المدينه بعد قتال قدروا فيه في ليله واحده انهم يقتلوا ٥٠٠ جندي تركي بحكم تفوق المدفع الرشاش الإنجليزي و استغلال طبيعه التلال في الهضبه و نصب المدفع الرشاش علي التلال (مصدر ٢). 

لورانس في خلال المعركه دي كان خايف جدا من تصرفات السكان في الطفيله و انهم يثوروا عليه و يقفوا مع الجيش التركي المسلم ضد البدو و ضده. لكن لورانس اتعلَّم حاجه مهمه جدا كتبها في مذكراته (مصدر ٣). اتعلَّم ان السكان المدنيين في اي حرب اهم حاجه عندهم هي الامن و الاستقرار. و انه حيقفوا علي الحياد لحد ما يبان مين يقدر يوفرلهم الامن و الاستقرار بصرف النظر عن توجهاته السياسيه و الدينيه. الدرس ده مهم جدا. احنا كتير بنبص لأحداث مصر و سوريا و نقول ليه أهل القاهره او الصعيد مثلا دلوقتي مش بينتقضوا ضد السيسي او ليه بعد رابعه محصلتش ثوره كامله او ليه لسه في ناس في سوريا بتؤيد بشار الاسد. بننسي دائماً درس لورانس في مذكراته. انه السكان حتفضل علي الحياد لحد ما المعركه يبان فيها منتصر و لو المنتصر ده حيوفر استقرار حتي لو كاذب ممكن السكان يتعاونوا معاه. حتي لو بدوي و معاه محتل بريطاني. ده يفسر مثلا ازاي برضه ان أهل الموصل مش بيثوروا ضد داعش. لذلك لو بصينا لتطورات الثوره السوريه او رابعه و أحداثها و انتفاضه الصعيد وقتها (و ان خبت لاحقا) نقول انها بطولات غير عاديه فعلا. لذلك لما حد يشتم الشعب المصري او السوري بنزعل جدا لانه تعميم مخل فضلا ان ده التصرف الطبيعي من المدنيين وقت الحرب. 

بعد السيطره علي طفيله كان لازم بعد كده اختراق هضبه موآب الاردنيه و الوصول لاريحا. المشكله دلوقتي ان البدو هناك قبائل تانيه و حيحتاجوا دهب و فلوس جديده عشان لورانس يقدر يشتريهم. لورانس رجع العقبه و طلب من القاهره ٣٠ الف جنيه إسترليني دهب (٦ مليون إسترليني بسعر النهارده) عشان يشتري القبائل دي و طلب ده يكون جاهز في ظرف ايام. فعلا الإنجليز في القاهره جمعوا الدهب ده (زي ما شفنا قبل كده الدهب ده كان من الخزينه المصريه). و بعتوه العقبه. لورانس اخذ الدهب في جمال و اتجه من العقبه في اتجاه طفيله و قدر يوصل هناك بصعوبه يوم ١١ فبراير ١٩١٨. لورانس واجه عاصفه ثلجية من اصعب ما يكون و بيقول ان التلج كان واصل لحد وسطه و ان الجمال مكانتش قادره تمشي و انه واجه الموت. لورانس ساب الدهب مع زيد بن الحسين و قاله ميصرفش منه حاجه خالص. و سابه و راح في حمله أستكشافيه في هضبه وآب وصل بها لحد اريحا عشان يستكشف الطريق في الصحرا. رجع لورانس بعد ٦ ايام و قابل زيد يوم ١٨ فبراير. لورانس لقي ان الدهب كله اتصرف. لورانس كان غضبان جدا لانه كان قرب يموت عشان يجيب الدهب ده و من غير الدهب مش حيقدر يشتري القبائل في موآب و بالتالي مش حيقدر يربط مع اللنبي في القدس. و بالتالي الخطه كلها تنهار و هو فعلا كان متاخر في تنفيذ الخطه دي أساسا. 

زيد قاله انه اضطر يصرف من الدهب عشان فيه مصاريف عاجله علي سكان الطفيله و ان قواته مخدتش فلوس من فتره و ان اول ما الدهب وصل الناس هجمت علي الدهب و سرقته. لورانس اكتشف ان زيد كان نصاب و بيضحك عليه. و ان زيد بنفسه وزع الدهب علي أهله و عشيرته (مصدر ٣). 

و الحقيقه اننا بنضحك لما نسمع ان السعوديين او الإماراتيين بيشتكوا ان السيسي اخد الرز منهم و وزعوا علي أهله و عشيرته من الجيش و القضاه و الشرطه! امال هم فاكرين ايه يعني. ما هوه ده الطبيعي في المنطقه اللي احنا عايشين فيها و هوه يعني احنا ورا الدنيا كلها من شويه. 

اخيرا. شفنا في الحلقه ٢٤ ان جمال باشا حاكم سوريا التركي بعت جواب للشريف حسين عن طريق ابنه فيصل في ديسمبر ١٩١٧ انه يسيبه من الخيانه و ينضم لقوات الدوله العثمانيه الاسلاميه خصوصا بعد اكتشاف وعد بلفور و اتفاقيه سايكس بيكو. لورانس كان خايف جدا من صدي الجواب ده مع فيصل خصوصا ان فيصل كان متدين و ان جمال كتب في الجواب كلام كتير عن عدم جواز التحالف ضد المسلمين. 

لورانس عمل فكره عبقريه جدا لسه مستعمله لحد دلوقتي انه يقضي علي فرصه عوده التحالف بين تركيا و الشريف حسين. لورانس اقنع الشريف حسين ان جمال باشا ذو توجهات اسلاميه و انه حيخسر الصراع لصالح جنرالات تركيا (محصلش الحقيقه) و ان جنرالات تركيا بيعملوا مفاوضات سلام في سويسرا مع بريطانيا هدفها بقاء تركيا دوله واحده دون تقسيم و التخلي عن ارض العرب و السلام مع بريطانيا (المفاوضات دي موصلتش لحاجه. و تركيا انقسمت فعلا لاحقا). و بالتالي ليه يتفاوض مع جمال باشا و هو من غير قوه. افضل لحسين انه اما يتقل و يتفاوض مع جنرالات تركيا او انه يستني نتيجه مفاوضاتهم مع بريطانيا او انه يقنع بما ياخذ من بريطانيا. و في الحاله دي يكسب ارض بصرف النظر عن اي احتمالات. لكن لو حط نفسه مع جمال باشا حيخسر لان جمال ذو توجه إسلامي و علي الجانب الخاسر في الصراع داخل تركيا. 

لحد دلوقتي احنا بنسمع الكلام ده! سيبك من الشعب التركي. خليك مع الجنرالات. سيبك من الشعب المصري. خليك مع الجنرالات. احسن للامارات و السعوديه تنسق مع الجنرالات الأتراك و تؤيد انقلابهم عن التنسيق مع اردوغان. مش طبيعي اننا بينضحك علينا كده. مش طبيعي فعلا. 

و نكمل. 

المصادر:

——-

١- الحلقات السابقه مجمعه من صفحات مخفيه من تاريخ مصر:

https://jawdablog.org/category/التاريخ/صفحات-مخفيه-من-التاريخ/

٢- لورانس في بلاد العرب:

https://books.google.com/books/about/Lawrence_in_Arabia.html?id=99NTgkPUh9AC&printsec=frontcover&source=kp_read_button&hl=en#v=onepage&q&f=false

٣- اعمده الحكمه السبعه:

https://books.google.com/books/about/Seven_Pillars_of_Wisdom.html?id=HjWFCAAAQBAJ&printsec=frontcover&source=kp_read_button#v=onepage&q&f=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s