تعالوا نتعلم الاقتصاد ببساطه … ما هي ضريبه القيمه المضافه؟

lets_learn_economy_what_is_added_value_tax

تعالوا نتعلم الاقتصاد ببساطه … ما هي ضريبه القيمه المضافه؟ 

و لماذا يصر صندوق النقد علي تطبيقها؟

——

نكمل في السلسله دي شرح المفاهيم الاقتصاديه باسلوب مبسط (الحلقات السابقه كلها في مصدر ١). 

ضريبه القيمه المضافه value added tax هي ببساطه ان كل مره اي حد او اي جهه بتبيع اي شيئ لاي حد تاني، الحكومه بتاخد نسبه عن قيمه البيع دي. 

في حاله مصر الحكومه حددت النسبه دي ب ١٣٪‏ العام الحالي و حتزيد تبقي ١٤٪‏ السنه الجايه (مصدر ٢). 

تعالوا نفهم الموضوع. مثلا تاجر مواشي اشتري من الفلاح جاموسه بسعر الف جنيه. الحكومه حتاخد ١٣٠ جنيه عن عمليه البيع دي. تاجر المواشي حيدفع للفلاح الف جنيه تمن الجاموسه و حيدفع فوقهم ١٣٠ جنيه للفلاح. الفلاح حيحط ال ١٣٠ جنيه علي جنب و يشيلهم عشان يديهم للحكومه. بعد كده تاجر المواشي باع الجاموسه للجزار بعشر الاف جنيه. تقوم الحكومه واخده ١٣٠٠ جنيه عن عمليه البيع دي. برضه الجزار حيدفع لتاجر المواشي ١٠ الاف جنيه تمن الجاموسه. و فوقهم حيدفع ١٣٠٠ جنيه لتاجر المواشي اللي حيشيلهم برضه علي جنب عشان يدفعهم للحكومه. و بعدين الجزار حيدبح الجاموسه و يقطعها و يبيع الكيلو بعشره جنيه، تقوم الحكومه واخده جنيه و تلاتين قرش عن كل كيلو. و بنفس الطريقه المستهلك اللي بيشتري اللحمه حيدفع ١٣٠ قرش زياده فوق تمن كل كيلو. و تاجر اللحمه حيشيل ال ١٣٠ قرش دول علي جنب عشان يدفعهم للحكومه. 

في اخر السنه الفلاح حاش ١٣٠ جنيه عشان ضريبه القيمه المضافه و حيقوم موردهم للدوله. حيقول انه باع جاموسه للتاجر فلان الفلاني بمبلغ الف جنيه. 

في اخر السنه برضه تاجر المواشي حيقول للدوله انه اشتري جاموسه من الفلاح و دفع فيها الف جنيه و دفع عليهم ١٣٠ جنيه ضريبه مبيعات. و برضه حيقول للدوله انه باع الجاموسه بمبلغ ١٠ الاف جنيه و لم عليهم ١٣٠٠ جنيه ضريبه مبيعات. حيقوم المواشي يقول انه علي نفس الجاموسه لم ١٣٠٠ ضريبه مبيعات و دفع ١٣٠ جنيه. حيقوم بقي خاصم ال١٣٠ جنيه اللي دفعهم من ال ١٣٠٠ جنيه اللي شايلهم عنده و يقول انه حيورد للحكومه الفرق بين الاتنين اللي هوه ١٣٠٠ ناقص ١٣٠ يعني يورد للحكومه ١١٧٠ جنيه بس من ال ١٣٠٠ اللي شالهم عنده. 

ليه بيدفع الفرق بس؟ عشان هي اسمه ضريبه القيمه المضافه. يعني تقدر تقول كده ضريبه عن الفارق بين الداخل و الخارج. التاجر عمل ربح ٩٠٠٠ جنيه و بالتالي حيدفع ضريبه عنه بس. احنا بنقول ربح لكن هوه مش بالضبط ربح. هو بالضبط الفارق بين الداخل و الخارج. ليه؟ لان مثلا في اجور موظفين و عمال. دي معليهاش ضريبه قيمه مضافه بالرغم انها داخله في حسابات الربح و الخساره. 

في فرق كبير بين ضريبه القيمه المضافه و ضريبه المبيعات. ازاي؟ ضريبه المبيعات بتبقي بس علي السلعه الاخيره. اللي هي في الحاله دي كيلو اللحمه. يعني ضريبه المبيعات حتبقي بس ١٣٠ قرش علي كيلو اللحمه اللي بعشره جنيه. ضريبه القيمه المضافه بتكون علي كل خطوه في دوره الاقتصاد. و بالتالي طبعا حصيلتها اعلي من ضريبه المبيعات. 

ضريبه المبيعات دي مطبقه في مصر من ايام عاطف صدقي في أوائل التسعينات برضه كجزء من برنامج التفاوض وقتها مع صندوق النقد الدولي. 

تعليق جوده:

و ده اللي احنا بنقوله ان برامج صندوق النقد غير صالحه لمصر. و ده غير اللي بعض القراء بيقولوه ان الصندوق عاوز يستعمر مصر (علي ايه مش عارفين يعني ! و بعدين هو فيه استعمار أكتر من بتاع الجيش يعني؟). البرامج اشتغلت مثلا في جنوب شرق اسيا وقت ازمتها و كمان في تركيا في نهايه القرن العشرين. هذه دول كان بها استثمارات و نمو اقتصادي و عانت فقط من أزمات مؤقته. ازمه مصر هيكليه و هي انها لا تنتج شيئ! مصدر ٣ شرحنا فيه الكلام ده بالتفصيل. 

طيب ايه هي مشكله ضريبه القيمه المضافه الاساسيه؟

—————

بلد زي امريكا مثلا لا تطبق ضريبه قيمه مضافه و تم رفضها في امريكا مرات عديده. كمان امريكا بالرغم انها تطبق ضريبه مبيعات الا انها تطبقها بنسب بسيطه جدا و ايضا بمعارضه شديده جدا (مصدر ٤). 

لسبب بسيط جدا. ان ضريبه المبيعات و ضريبه القيمه المضافه بتؤثر في محدود الدخل بشكل اكبر بكتير من الطبقات الغنيه. 

في حاله مصر الحكومه أعفت الماكولات الاساسيه زي العيش مثلا و كمان أعفت الكهربا من ضريبه القيمه المضافه. لذلك الفقير قوي مش حيتأثر قري بضريبه القيمه المضافه. اللي حيتأثر بيها قوي هو الطبقه المتوسطه و ما حولها. يعني الراجل الموظف اللي بيروح يشتري من كارفور و معظم دخله رايح في لبس ولاده و اكل الأسبوع اللي بيشتريه من كارفور و رايح في مصاريف الولاد في المصايف عشان عاوزين يبانوا انهم معاهم فلوس. الراجل او الست دول هم اللي حياخدوا الضربه القويه. ليه لان معظم مصاريفهم هي علي سلع سعرها حيزيد بسبب ضريبه القيمه المضافه. هم مش بيشتروا عيش التموين و لا فول من العربيه. 

بالعكس لو بصينا علي الاغنيا في مصر. حنلاقي ان إنفاقهم علي السلع المعيشية نسبه قليله جدا من دخلهم. جزء كبير من دخلهم بيروح استثمار سواء داخل او خارج مصر. و بالتالي تاثير ضريبه زي دي ضعيف جدا. 

لذلك بلد زي امريكا فيها تفاوت كبير جدا للدخول (مصدر ٥) وفقا لمقياس جيني Gini، لازم تتجنب ضريبه مبيعات او ضريبه قيمه مضافه و تعمل ضريبه مباشره علي الدخل. يعني صاحب الدخل الكبير يدفع ضرائب أكتر و صاحب الدخل القليل يدفع ضرائب اقل كثيرا. 

بينما اوروبا هي الحقيقه أكتر مكان فيه ضريبه القيمه المضافه في العالم. كل دول الاتحاد الاوروبي ملزمه بتطبيق ضريبه للقيمه المضافه وفق قوانين الاتحاد الاوروبي (مصدر ٦). و ده ببساطه لان دول الاتحاد الاوروبي مفيهاش فروق الدخل الصارخه اللي موجوده في مصر او امريكا. بالعكس فيه تجانس كبير في الدخل في اوروبا وفق مقاييس جيني (مصدر ٥). و بالتالي سواء كانت ضريبه دخل او ضريبه قيمه مضافه مفيش فروق كبيره من ناحيه تأثيرها علي الفقراء. كمان اوروبا فيها افضل برامج الرعايه الاجتماعيه و الصحيه للفقراء في العالم و ببساطه يحصل عليها كل المواطنين بصرف النظر عن الدخل و ده شيئ مش موجود في امريكا اللي بتفتقر لبرامج جاده لرعايه الفقراء (طبعا افضل من مصر بكتير لكن اقل اهتماما بالامور الاجتماعيه من اوروبا). لذلك ضريبه قيمه مضافه تمشي كويس في اوروبا. 

سبب كمان في اوروبا هو وجود الاتحاد الاوروبي ذاته يخلي انك لازم تعمل ضريبه القيمه المضافه. ليه؟ لان في دول الاتحاد السلعه ممكن مني (حيوانات منويه) لعجل في سويسرا ثم تباع في الدانمارك. و ينمو العجل فيها ثم يباع في بلجيكا و يذبح في فرنسا و توزع لحومه في البرتغال. و يكون مقر الشركه التي أدارت ذلك كله في إيطاليا. و بالتالي تدفع تلك الشركه ضرائب في إيطاليا و تخسر كل دول الاتحاد الاوروبي التي ساهمت في العجل حصيله مهمه للضرائب. لذلك الاتحاد الاوروبي لازم يكون عنده ضريبه قيمه مضافه. 

بلد زي مصر فيها تفاوت كبير للدخول وفق مقياس جيني (مصدر ٧) لازم ان ضريبه القيمه المضافه فيها تؤثر علي الطبقات الوسطي بشكل كبير جدا. 

تطبيق ضريبه القيمه المضافه في مصر

———————–

شكلت اوروبا هيئه متخصصه لأداره ضريبه القيمه المضافه فيها بالاضافه لهيئه مماثله في كل دوله عضو. و تطبيق ضريبه القيمه المضافه ليس سهلا إطلاقا. ليه؟ لان ارجع كده لمثال تاجر المواشي. لازم انه يدون امتي اشتري العجل و من مين و ازاي و دفع كمان. و كمان الفلاح لازم يعمل نفس الحكايه. و لا بد انهم الاتنين يثبتوا عمليه البيع و الشرا بينهم بنفس الطريقه ويدونوا نفس السعر عشان تقدر تتاكد ان عمليه البيع و الشرا حصلت. كمان لازم تحويل البنك يكون مدون و ثابت. في الدول المتقدمه ده بيتم كله عن طريق الكمبيوتر. كل عمليه بيع و شرا اسمها transaction بيتم تدوينها و تسجيلها علي قاعده بيانات موحده بطريقه موحده و كل منشأه لها كود قومي تستخدمه في تدوين العمليات transactions. 

تكوين نظام وطني كهذا سيستغرق وقتا. ليس مسأله أسابيع. ده طبعا بفرض ان لدينا خبرات تشكيل مثل هذه الهيئه و مثل هذا النظام. و ده طبعا بفرض ان لدينا أساسا اراده تكوين نظام محترم! و الحكومه عاوزه الفلوس بسرعه. لذلك سيتم الاعتماد علي الورق في البدايه.

و هنا سيكون التلاعب علي أشده. انا تاجر مواشي. حأقول اني دفعت في العجل ٨٠٠٠ جنيه بدل الألف الحقيقيه. و اشتريتها من فلاح اسمه محمد عبد العال. الفلاح ده مش مطلوب منه تسجيل اسمه او تسجيل عمليات البيع و الشرا بتاعته وفق القانون المصري الجديد لسبب انه حجم أعماله صغير. لذلك الفلاح ده اللي اسمه محمد عبد العال مش محتاج يثبت انه لا باع و لا اشتري. 

لذلك الشركات الكبيره في وجود نظام ورقي فاسد مثل مصر ستقوم بعمليات من هذا النوع و سيجدون لها مليون مبرر. من سيكون الضحيه لهذا؟ الراجل او الست الذي يشتري فقط و لا يبيع شيئا. يعني المستهلك. 

ليه الصندوق مصر ان مصر تعمل ضريبه قيمه مضافه؟

—————–

زي ما شوفنا في حلقه سابقه (مصدر ٨) ان اهم حاجه عند صندوق النقد انه يسترد فلوسه. الصندوق مدي مصر قرض ب ١٢ مليار دولار و كمان الخليج و البنك الدولي حطوا فوقهم ٨ مليار زي ما توقعنا في مصدر ٨ لان الصندوق في دوله زي مصر حيحتاج ضمانات و مش عاوز يغامر لوحده.. مطلوب ان الفلوس دول يرجعوا علي عده سنوات عاده ٥ سنوات بعد فتره سماح حوالي ٣-٥ سنوات. يعني مطلوب ان مصر في حوالي ٨ سنين تلم ٢٠ مليار دولار (الفايده بسيطه جدا علي قروض الصندوق). يعني في كل سنه مصر لازم تلاقي حوالي ٢-٣ مليار دولار عشان تسدد القروض دي. 

هي دي بالضبط حصيله ضريبه القيمه المضافه اللي الحكومه المصريه متوقعاها (مصدر ٩). 

طبعا لو تقرأ تقارير الصندوق و تقارير الحكومه المصريه حتلاقي كلام كتير ان مثلا القروض دي حتشجع عمليه الاستثمار في مصر (اي كلام. مفيش مستثمر بيحط فلوسه في بلد بتزود الضرايب! و معندهاش خطه اقتصاديه أساسا و بعدين ليه اي مستثمر يحط فلوس في مصر؟ بدل مثلا المغرب او تونس او الاْردن؟ مصر من اسوء دول العالم في الشفافيه و التعليم و سهوله أداره الاعمال؟ مصدر ١٠). و حتلاقي كلام ان مع تشجيع الاستثمار حتزيد الحصيله و ترجع السياحه و هكذا. الحقيقه ان الصندوق حاسب حسبته انه حتي لو مصر متقدمتش خطوه للإمام في اي مجال حيطلع الصندوق بفلوسه و خلاص. 

ياريت نكون فهمنا. 

المصادر:

——-

١- الحلقات السابقه من تعالوا نفهم الاقتصاد ببساطه:

https://jawdablog.org/category/الإقتصاد/حلقات-تعالوا-نفهم-الاقتصاد/

٢- قانون القيمه المضافه في مصر:

http://www.reuters.com/article/us-egypt-economy-tax-idUSKCN1141LM

٣- تعالوا نتعلم الاقتصاد ببساطه. هل صندوق النقد يريد استعمار مصر و كيف تعمل المنظمات الماليه الدوليه؟ 

https://jawdablog.org/2016/08/23/international_financial_institutions/

٤- المقاومه الامريكيه المستمره لضرائب القيمه المضافه و المبيعات:

http://www.wsj.com/articles/should-the-u-s-adopt-a-value-added-tax-1456715703

http://www.heritage.org/research/reports/2010/12/the-value-added-tax-is-wrong-for-the-united-states

٥- تفاوت الدخول في امريكا وفقا لمقياس جيني:

https://www.cia.gov/library/publications/the-world-factbook/rankorder/2172rank.html

٦- ضريبه القيمه المضافه في الاتحاد الاوروبي:

https://ec.europa.eu/taxation_customs/business/tax-cooperation-control/administrative-cooperation/vat-administrative-cooperation_en

٧- تفاوت الدخول في مصر وفق مقياس جيني:

http://www.worldbank.org/content/dam/Worldbank/egypt-inequality-book.pdf

٨- تعالوا نتعلم الاقتصاد ببساطه: قروض صندوق النقد الدولي:

https://jawdablog.org/2016/08/11/lets_learn_econoy_imf_loans/

٩- توقعات حصيله ضريبه القيمه المضافه:

http://english.ahram.org.eg/NewsContent/3/12/217252/Business/Economy/Egypts-finance-ministry-reveals-VATfree-goods-and-.aspx

١٠- مصر الاسوء وفق مقاييس التنميه و الاستثمار:

http://www.doingbusiness.org/~/media/GIAWB/Doing%20Business/Documents/Subnational-Reports/DB14-Egypt.pdf

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s