تعالوا نتعلم الاقتصاد ببساطه … تعويم الجنيه

floating_egyptian_pound

ناس كتير بتتكلم عن تعويم سعر الجنيه. تعالوا نفهم معناه. المعلم تامر العسكري تاجر خضار كبير في السوق. المعلم تامر كان زمان بيحب يعمل الخير. فكان بيبيع الطماطم بارخص من سعرها و بيخسر فيها. بس في مقابل كده كان بيكسب في بقيه الخضار و كان الحال ماشي. طبعا السعر الرخيص للطماطم كان بيخلي ناس كتير عاوزه تشتري منه. و عشان كده كان بيخلي عنده مخزون كبير من الطماطم. بمرور الوقت المعلم تامر مقدرش انه يحافظ علي السعر القليل للطماطم لان بقيه تجارته قربت تفلس. بس في نفس الوقت مش قادر يزود سعر الطماطم علي الناس لانه خايف منهم. مع انه طول الوقت بيقول انه مش خايف لدرجه انه حكي مره قصه انه كان ماشي ع البحر في اسكندريه و ناس في اتوبيس قالتله اوعي تخاف! 

فطبعا ابتدي مخزون الطماطم عنده يقل لانه بيبيع بسعر رخيص و مش قادر يشتري مخزون بالغالي زي ما كان بيعمل زمان. 

المعلم فهد السعودي صاحب المعلم تامر العسكري جدا و عاوز يسنده بأي شكل. كل لما مخزون الطماطم يخلص عند تامر يقوم المعلم فهد يبعتله مخزون جديد. 

مشكله المعلم تامر انه بدل ما يشغل الناس و يخليهم يزرعوا طماطم و ينتجوا و بعدين ييجوا يطالبوه بحقوقهم في المحل اللي هوه سارقه منهم و بانيه علي ارضهم هو خايف من كده و بيشتري سكاتهم بشويه طماطم رخيصه. و المعلم فهد طبعا حاسس انه لو الناس عند تامر ثارت الناس عند فهد السعودي حتثور برضه خصوصا ان فهد سارق الناس أكتر حتي من تامر. 

المشكله ابتدت تكبر لحد لما في يوم المعلم فهد السعودي جاب خواجات من بره معاه قالوا للمعلم تامر انهم حيدولوا مخزون طماطم جديد بس دي اخر مره حيدولوه فيها طماطم. و بعد كده هو محتاج يعوم سعر الطماطم. بمعني انه وفق العرض و الطلب. 

ده بالضبط اللي حاصل دلوقتي. 

– الدولار زي الطماطم زي اي سلعه لها تمن. في الطبيعي السعر ده يعتمد علي العرض و الطلب (مصدر ١) 

– الوضع الأولاني لما كان تامر العسكري بيخلي سعر الطماطم منخفض معتمد علي ان عنده مخزون من الطماطم هو اللي بنسميه التعويم المدار او managed float للسعر. يعني بتسيب السعر ينزل و يطلع لكن بتحافظ عليه منخفض بشكل عام معتمد ان عندك احتياطي من السلعه تنزله في السوق لما السعر يزيد. 

– كتير من دول العالم بتعتمد علي التعويم المدار ده. 

– الفتره الاخيره في مصر صعب نقول عليها انه تعويم مدار لان مفيش سوق أساسا للدولار. الموجود انه بقي سعر محدد fixed exchange rate بتحدده الحكومه للدولار زي زمان قوي. سعر ملوش اي علاقه بقوي العرض و الطلب. و ده طبعا بيخلق سوق سودا. سهل قوي ان جد يشتري طماطم رخيصه من تامر و يبيعها بعيد شويه بسعر عالي جدا و ياخذ الفرق. ده من اساسيات الاقتصاد يعني. ملهاش علاقه بجشع او غيره. الناس مدفوعه دائماً انها تحقق ارباح بأسهل طريق ممكن و مفيش قانون و لا دين يعاقب المكسب السهل بالعكس. امال الناس تبقي مدفوعه انها تخسر يعني؟ وظيفه الحكومه انها تمنع خلق سوق سودا. مش بالقرارات و لا بالحبس و لا الكلام الفارغ ده. بأنها تعمل سوق فعاله و تشجع الناس علي الاستثمار و العمل زي ما بقيه العالم بيعمل. اننا ننتج و نصنع. مش نتنهب من الجيش و من تامر العسكري و فهد السعودي بحجه شويه طماطم. 

طبعا فهد السعودي عنده سعر محدد و ثابت قصاد الدولار لان عنده مخزون كبير من الدولار بيجي من تجاره الخضار التانيه او البترول بمعني أوضح. تامر العسكري معندوش. مفيش. 

و الحلقات الكامله من تعالوا نتعلم الاقتصاد ببساطه في مصدر ٢، و شرحنا قبل كده حاجات كتير زي التضخم و تشجيع التصدير و سعر الدولار و البورصه و ايه الحاجات المهمه في اي اقتصاد و معدلات النمو و ليه السيسي فاشل و توقعنا ده من قبل ما يبان الفشل و مفاهيم كتيره مش واضحه عند الناس. 

المصادر:

——-

١- تعالوا نتعلم سعر الدولار ببساطه:

https://jawdablog.org/2015/01/03/understand_economy_02_15/

٢- تعالوا نتعلم الاقتصاد ببساطه:

https://jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s