تعالوا نتعلم الاقتصاد بسهوله … ما هي المؤسسات الماليه الدوليه؟ و هل يملكها ال روتشيلد؟ و هل هدفها افلاس الدول؟

International_Financial_Institutionفي اخر حلقه (مصدر ١) شرحنا بالتفصيل صندوق النقد الدولي و نوعيه قروضه. لكن جاتلنا اسئله كتير جدا متلخبطه بين صندوق النقد و البنك الدولي و البنوك العاديه و قروض الدول لبعضها. كمان جاتلنا اسئله كتيره بتعمم بكلام كبير قوي من نوعيه ان صندوق النقد و البنك الدولي و قروضهم كلها هدفها السيطره الامريكيه علي العالم او ان روتشيلد يمتلك البنك الدولي (!) و كمان لقينا ناس بتقول ان حرب الخليج سببها ان صدام قرر يستخدم اليورو بدل الدولار في تعاملات البترول. تعالوا نفهم الحقيقه بالراحه كده. لان الناس بقت ثقافتها سماعي من التلفزيون اللي للاسف لسه عايش في الستينات بثقافه برضه سماعي. 

المؤسسات الماليه الدوليه:

——————-

مؤسسه دوليه معناها ايه؟ معناها ان مجموعه دول قررت انشاء مؤسسه بينهم وفق اتفاقيه معينه لاهداف محدده. يعني مش دوله واحده. بعد الحرب العالميه الثانيه برزت في العالم مؤسستان ماليتان هما صندوق النقد الدولي و البنك الدولي للإنشاء و التعمير. 

الهدف من انشاء المنظمات دي هو بالأساس التعلم من اللي حصل في الحرب العالميه الاولي و بعد كده أدى للحرب العالميه التانيه. و هو ان اقتصاد المانيا عانى بشده بعد الحرب العالميه الاولي و بالتالي حدث فيه عجز كبير في ميزان المدفوعات و اضطرت المانيا للاستدانه بمبالغ كبيره كانت عاجزه عن سدادها (مصدر ٢). المانيا بعد الحرب العالميه الاولي اعتمد اقتصادها علي التصدير لامريكا و لما حصل الكساد الكبير في امريكا و انهيار بورصه نيويورك وقف تصدير المانيا و حصل نتيجه لكده انخفاض كبير في حصيله المانيا من الدولارات و بالتالي ارتفاع سعر الدولار قصاد المارك الألماني و بالتالي حصل تضخم شديد و ارتفاع كبير في الاسعار في المانيا. اضطرت المانيا تاخد قروض كبيره من البنوك التجاريه بفوائد عاليه جدا لان الثقه في اقتصادها كانت محدوده. المانيا في التلاتينات كانت عاجزه عن سداد القروض دي و اضطرت تأخذ سياسات تقشفيه جدا. الفقر اللي نتج عن كده كان اهم أسباب نشوء النازيه في المانيا. ده كان درس مهم جدا. فالعالم طبعا بقياده امريكا وقتها قرر انه يعمل مؤسسه ماليه تحط فيها كل دول العالم بحصص مختلفه احتياطي نقدي و ذهبي بحيث لو دوله حصل عندها مشكله في ميزان المدفوعات (الداخل من العملات الاجنبيه اقل بكتير من المصروفات) تقدر الدوله دي انها تأخذ قرض تتخطى به الازمه الموقته. الفكره انه لو المانيا كانت اخدت قروض بشروط ميسره كان ده حيسهل عمليه امتصاص صدمه الكساد في السوق الامريكي لحد منتجات المانيا ما تقدر تلاقي أسواق تانيه. و دي فكره صندوق النقد الدولي. مساعده اي دوله بتتعرض لازمه مؤقته في ميزان المدفوعات و عندها الاستيراد اكثر بكثير من التصدير و عملتها بتنهار انها تاخد قرض بفوائد ميسره في مقابل ان الدوله دي تطبق شروط محدده تقدر بها انها تطلع من الازمه زي انها تدور علي أسواق جديده لمنتجاتها او تعمل برامج لتقليل الاستيراد او زياده التصدير. المهم إعطاء الدوله دي مجال للتنفس. 

البنك الدولي للإنشاء و التعمير موضوعه مختلف تماماً. البنك الدولي بيسلف رأسمال لمشاريع محدده. يعني دوله عاوزه تعمل نفق او سد او كوبري او محطه نوويه او محطه كهربا بس معندهاش رأسمال تقوم رايحه للبنك الدولي اللي بيدرس المشروع ده و العايد منه و يحدد هل يستثمر فيه ام لا. مثلا معظم مشاريع تطوير قناه السويس جت بتمويل من البنك الدولي (مصدر ٣). 

البنك الدولي تركيزه دلوقتي في مكافحه الفقر في العالم. و بالتالي في الاغلب معظم قروضه رايحه للدول الاكثر فقرا في العالم. و مصر خرجت من الدول دي في سنه ٢٠٠٠ (مصدر ٤). مش معني كده ان مصر مش بتاخذ قروض من البنك الدولي. 

طبعا احنا كلنا سماعي فاكرين مشكله مصر مع البنك الدولي (مش صندوق النقد الدولي) في تمويل مشروع السد العالي. طبعا مفيش شك ان وقتها في الخمسينات كانت سيطره امريكا و اوروبا علي التصويت في البنك الدولي و حتي في صندوق النقد الدولي كانت سيطره كامله. مكانش فيه اقتصاديات تانيه في العالم. دلوقتي مجموع حصص الصين و و السعوديه و تركيا و ايران و كوريا و البرازيل و الهند مساوٍ لحصه امريكا او حصه الاتحاد الاوروبي. بالتقريب امريكا حوالي ١٧٪�. الاتحاد الاوروبي ٢٠٪� و الدول دي مجتمعه حوالي ١٧٪� (مصدر ٥). طبعا في الخمسينات الدول دي مكانش لها تاثير او وجود. للاسف العالم بيتغير و احنا لسه عايشين في أوهامنا. 

مش معني كده ان امريكا مثلا ليس لها علاقات و تاثير علي الصين او روسيا او كوريا او السعوديه او البرازيل. بالعكس. لها علاقات تجاريه ضخمه و تاثير كبير جدا. لكن القرارات الماليه الدوليه فيها دلوقتي سيوله في اتخاذ القرار غير الخمسينات مثلا. و بعدين في الخمسينات امريكا كانت في حرب عقائديه مع الاتحاد السوفيتي و كانت بتشوف الدنيا كلها من منظار الحرب البارده. العالم الان مختلف. كتير في امريكا بيشوف العالم بس من خلال مصالح تجاريه. و طبعا برضه في كتير بيشوفها من خلال منظار داعش و القاعده زي ترامب مثلا. لكن لحد دلوقتي قيادات امريكا بيغلبوا مصالحهم التجاريه الرئيسيه لدرجه اوباما بيقول ان الحرب مع داعش ليست حرب وجوديه مثلما كانت الحرب البارده (مصدر ٦). 

في مؤسسه تانيه حديثه نسبيا و هي منظمه التجاره الدوليه world trade organization. دي هدفها تحرير التجاره العالميه. برضه ده درس من كل الحروب الكبيره في العالم ان معظمها منشأه الاقتصادي كان ان الدول بتتبع استراتيجيات حمائية في التجاره. بمعني ان الدول تحت الضغط الاقتصادي تقوم تمنع الاستيراد من جيرانها و فاكره بكده انها حتستمر في التصدير يقوم ميزانها التجاري يتعدل. طبعا لما بلد تمنع الاستيراد من بلد تاني أكيد البلد التاني حيرد انه يمنع الاستيراد برضه. و تحصل حرب تجاريه. و بمرور الوقت تبقي حرب حقيقيه. لذلك هدف منظمه التجاره الدوليه انها عن طريق اتفاقيات ملزمه تمنع اي سياسات حمائيه من اي دوله. 

مشكله بلد زي مصر انها مش لاقيه حاجه تبرع فيها و تصدرها. و احنا كتبنا قبل كده بالتفاصيل ازاي نحل المشكله دي (مصدر ٧). 

طبعا محدش بيضرب اي بلد علي أيدها انها تأخذ قروض من صندوق النقد او البنك الدولي. إطلاقا. 

مثلا في الازمه الاسيويه في التسعينات ماليزيا رفضت قروض صندوق النقد الدولي مع ان عملتها الرينجيت كانت بتنهار. لسبب بسيط جدا هو ان وصفه صندوق النقد الدولي كانت و ما زالت اجراءات تقشفيه كبيره. ماليزيا شافت ان الازمه كانت المضاربه علي عملتها في الاسواق الدوليه و بالتالي انهيار سعر العمله (مصدر ٨). مش ان عندها ازمه هيكليه في اقتصادها. علي فكره بقيه دول اسيا اخدت قروض من صندوق النقد الدولي بقيمه ٤٠ مليار دولار (مصدر ٩). كل دول اسيا تعافت من الازمه سواء اللي اخدت القرض او اللي ما اخدتش. طبعا في جدل حاد لان مجموعه دول الآسيان منظومه واحده متكامله. يعني مثلا تلاقي المايكروبروسيسور بتاع الكمبيوتر بيتعمل في ماليزيا و يتجمع في تايوان و الكمبيوتر كله يتجمع في الصين بتصميم أمريكي. لدلك كون ان بلد واحده رفضت و كل الدول حواليها اخدت القرض يخلي الموضوع مش واضح اي سياسه هي الافضل في وقتها. و بالمناسبه ماليزيا طبقت شروط كتير من شروط الصندوق. زي مثلا تحجيم خروج راس المال من ماليزيا و رفع سعر الفايده و المراقبه علي البنوك و السماح بتفليس البنوك العاجزه. 

في حاله الاقتصاديات الاسيويه مشكلتها كانت ان دي دول حصل ليها نمو اقتصادي سريع جدا نتج عنه تدفق رأسمال من كل حته في العالم عشان يشتري فيها اراضي و مصانع و عقارات. فطبعا سعر عملتها ارتفع جدا بشكل سريع. اي بلد في العالم حصل فيها كده بيحصلها تصحيح. و ده اللي المضاربين توقعوه. فبدأوا يبيعوا عملات الدول الاسيويه بكميات كبيره و يشتروا دولارات. لذلك سهل جدا تحل الازمه دي انك تدي الدول دي دولارات بكميات مناسبه عشان تستخدمها احتياطي تثبت به سعر العمله. في حاله مصر الموقف مختلف تماماً. مصر لا حصل فيها نمو و لا تدفقات استثماريه و لا تشغيل و لا صناعه و لا تنتج شيئ أساسا و الانتاج الصناعي فيها عمال ينخفض من ٢٠١٣ (مصدر ٩). لذلك اي قرض مش حيحل حاجه. بالعكس مصر محتاجه سياسه اقتصاديه اولا. محتاجه سياسه نمو تقوم بجذب الاستثمارات الصناعيه و تشغيل الناس. 

هل المؤسسات الماليه الدوليه بتمول قروض عشان تعجز الدول عن سدادها؟

—————–

معظم دول العالم سددت قروضها للمؤسسات الماليه الدوليه. تركيا سددت (مصدر ١٠). مصر نفسها سددت ديونها لصندوق النقد الدولي (مصدر ١١). و هكذا. هو مش هبل ان الصندوق يدي دوله ديون عشان متسددهاش. بالعكس احد مهام موظفي الصندوق هو التأكد من ان الإصلاحات الاقتصاديه في الدوله تجعلها قادره علي السداد (مصدر ١٢). مش دي المشكله. المشكله هي ان وصفه الصندوق في حاله مصر بالذات غير مناسبه كما ذكرنا في مصدر ١. السياسات التقشفية في مصر ستساعد في سداد القرض لكنها ستفاقم ازمه البطاله. 

قدرات المؤسسات الماليه الدوليه:

————————

الحقيقه انه في مبالغه رهيبه في قدرات و إمكانيات المؤسسات الماليه الدوليه. مثلا صندوق النقد الدولي يمتلك موجودات assets اقل من ٣٠٠ مليار دولار و مثلهم البنك الدولي (مصدر ١٣). 

قارن هذا ببنك الصناعه و التجاره الصيني و موجوداته ٣,٥ تريليون دولار. او قارن ببنك جي بي مورجان الامريكي و موجوداته ٢,٥ تريليون دولار (مصدر ١٤). انت تتحدث ان هذه البنوك التجاريه لديها موجودات عشره اضعاف صندوق النقد الدولي مثلا. 

طالما كده لماذا تلجأ الدول مثل مصر لصندوق النقد الدولي؟ ببساطه لان البنوك التجاريه لا تريد ان تأخذ كل المخاطره في تسليف دول مضطربه و اذا سلفتها سنعطيها فايده عاليه جدا. 

بالمناسبه دوله مثل الامارات لديها صندوق سيادي به ١,٢ تريليون دولار. السعوديه لديها ٧٠٠ مليار دولار. قطر لديها ٢٠٠ مليار دولار. معظم هذه الأموال مستثمره في امريكا. الأرقام هذه اكبر كثيرا من ايه احتياطيات لدي صندوق النقد. و بدلا من ان تعطي تلك الدول حسنات الاجدي ان تعطي استثمارات. لكن مصر اصبحت دوله خدميه و ليست صناعيه و هو مخطط لدي دول الخليج كي تظل مصر خاضعة (و قلنا هذا من زمن طويل جدا جدا. مصدر ١٥). و حتي في الاقتصاد الخدمي اصبحت مصر الان طارده للاستثمار. 

هل روتشيلد يمتلك البنك الدولي او صندوق النقد الدولي؟

————–

طبعا لا. كل دوله من دول العالم لها حصه سواء في البنك او الصندوق. و الحصه بمقدار حجم اقتصاد الدوله. مفيش اي جهه خاصه بتمتلك اي شيئ في هذه المؤسسات الدوليه. و علي فكره كمان كل عيله روتشيلد اول عن اخر تمتلك ٣٠٠ مليار دولار معظمها في لوحات فنيه و عقارات و استثمارات (مصدر ١٦) و عدد أفرادها بالمئات. هذا الان لا يقارن مثلا بالثروات العربيه فالصناديق السياديه العربيه بها ٢٠٠٠-٣٠٠٠ مليار دولار اي عشره اضعاف زي ما ذكرنا. بيل جيتس و هو شخص واحد ثروته ٧٥ مليار دولار (مصدر ١٧) و هو كونها بعرقه و مجهوده. 

هذه أرقام لا تقارن مثلا بموجودات بنك اوف امريكا و قيمتها حوالي ٢ تريليون دولار أمريكي. و لا تقارن بقيمه الثروه في العالم كله و قيمتها ٢٥٠ تريليون دولار (مصدر ١٨). 

يعني عيله روتشيلد بكل المئات من الأفراد فيها يمتلكون حوالي واحد في الألف من الثروه في العالم. 

حجم الثروه في العالم الان شديد الضخامه لدرجه يصعب السيطره عليها من عيله او شخص او حتي دوله واحده. 

لذلك انتم ناس عايشين في القرن ١٩ لما كانت عيله روتشيلد مؤثره في السياسه الاستعماريه البريطانيه و لما كانش في بلد متقدمه في العالم الا بريطانيا. أرجوكم ممكن تنسوا القرن ١٩ و الخمسينات و كتب التاريخ المدرسي اللي لحست دماغكم دي و لسه انتم مفكرين اننا عايشين فيها؟ 

اخيرا: هل امريكا غزت العراق عشان صدام كان عاوز يستخدم اليورو في سعر النفط؟

——————-

هذه نكته و الله. يعني اوروبا اللي كلها بتستخدم يورو و امريكا اللي بتشجع دول اوروبا الشرقيه انها تدخل الاتحاد الاوروبي، امريكا سايبه كل ده و حتمسك في تجاره العراق من البترول اللي هيا اربعه مليون برميل في اليوم. يعني اخرها ٤٠٠ مليون دولار في اليوم يعني اخره حوالي ١٦٠ مليار دولار في السنه. بينما حجم التجاره العالميه بالدولار ٢٠ تريليون دولار سنويا (مصدر ١٩). يعني ٢٠ الف مليار. يعني تجاره العراق اقل من ١٪� من تجاره العالم بالدولار. 

انتم تهرجون و الله. يعني نفهم حد يقول عشان احتياطي البترول الكبير او عشان الموقع الاستراتيجي إنما عشان صدام قرر انه ياخد فلوس البترول باليورو؟ مع ملاحظه ان الفلوس دي كانت تحت برنامج النفط مقابل الغذاء. يعني كان بيشتري بيها اكل. و كانت الامم المتحده بتخصم من الفلوس مصاريف موظفي الامم المتحده و التعويضات و الباقي بتشتري بيه اكل و أدويه! صدام للاسف كان بيشتغلكم زي ما كل ديكتاتور في الشرق الاوسط كان بيعرف يلعب عليكم. مع ملاحظه ان مثلما ان صدام مجرم و ديكتاتور و قاتل و هو السبب فيما وصل له الحال كذلك فله شجاعه غير منكره و تحول في اخر أيامه للتدين و لكن هذا موضوع مختلف. 

يا رب نكون فهمنا. الحقيقه استغربنا من الاسئله و كان لازم نرد عليها. 

و كل حلقات تعالوا نتعلم الاقتصاد في مصدر ٢٠. 

المصادر:

——-

١- تعالوا نتعلم الاقتصاد بسهوله … قروض صندوق النقد الدولي:

https://jawdablog.org/2016/08/11/lets_learn_econoy_imf_loans/

٢- الأسباب الاقتصاديه لظهور النازيه:

http://www.historyplace.com/worldwar2/riseofhitler/begins.htm

٣- تمويل البنك الدولي لمشاريع توسيع قناه السويس:

http://www.worldbank.org/projects/P004982/suez-canal-development-project?lang=en&tab=overview

٤- خروج مصر من الدول الاكثر فقرا في العالم:

https://www.gfmag.com/global-data/economic-data/the-poorest-countries-in-the-world

٥- حصص تصويت دول العالم في البنك الدولي:

http://siteresources.worldbank.org/BODINT/Resources/278027-1215524804501/IBRDCountryVotingTable.pdf

٦- منظور اوباما للحرب مع داعش:

http://www.msnbc.com/rachel-maddow-show/obama-isis-theyre-not-existential-threat-us

http://www.cnsnews.com/news/article/susan-jones/obama-climate-change-major-problem-isis-theyre-not-existential-threat

٧- حل مشكله التصدير في مصر:

https://jawdablog.org/2016/01/13/lets_learn_economy_import_export_in_egypt/

https://jawdablog.org/2016/01/14/httpjawdablog-org20160113lets_learn_economy_import_export_in_egypt/

https://jawdablog.org/2016/01/12/lets_learn_economy_tunis_versus_egypt_exports/

٨- ماليزيا ترفض قرض صندوق النقد الدولي:

http://www.essentialaction.org/imf/asia.htm

٩- تراجع الانتاج الصناعي في مصر:

http://www.dailynewsegypt.com/2016/03/23/9-2-drop-value-industrial-production-q3-2015-compared-q2-capmas/

http://www.dailynewsegypt.com/2015/12/16/3-3-decline-in-manufacturing-extractive-industries-production-index-in-october-capmas/

http://www.tradingeconomics.com/egypt/industrial-production

١٠- سداد تركيا لديونها من صندوق النقد الدولي:

http://www.bloomberg.com/news/videos/b/114d53f6-e565-4bc0-ac99-828f7ee41471

١١- سداد مصر لديونها من صندوق النقد:

http://schools.aucegypt.edu/GAPP/casar/Pages/The-Egypt-IMF-Loan-.aspx

١٢- احد شروط صندوق النقد الدولي التأكد من قدره الدوله علي السداد:

https://www.imf.org/external/np/exr/facts/conditio.htm

١٣- موجودات البنك الدولي و صندوق النقد الدولي:

https://www.imf.org/external/np/exr/facts/sdr.htm

http://data.worldbank.org/indicator/FM.AST.NFRG.CN

١٤- موجودات البنوك التجاريه الكبري:

http://www.accuity.com/useful-links/bank-rankings/

١٥- انواع الاقتصاد:

https://jawdablog.org/2015/04/26/understand_economy_09_15/

١٦- ممتلكات عائله روتشيلد:

http://www.investopedia.com/articles/investing/111915/how-rothschild-family-created-their-wealth.asp

١٧- ثروه بيل جيتس:

http://www.forbes.com/profile/bill-gates/

١٨- حجم الثروه و الموجودات في العالم كله:

http://money.visualcapitalist.com/all-of-the-worlds-money-and-markets-in-one-visualization/

http://www.cnbc.com/2013/10/11/global-wealth-hit-241-trillion-but-distribution-skewed.html

١٩- حجم التجاره العالميه:

https://www.wto.org/english/res_e/statis_e/wts2016_e/wts2016_e.pdf

٢٠- تعالوا نتعلم الاقتصاد بسهوله:

https://jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.