سايكس-بيكو و الحرب العالميه الاولي … كيف تخلق احزاب و جماعات مواليه؟ … الحلقه ٢١

Sykes_Pico_8_12_16

شفنا انه مع وصولنا لعام ١٩١٧ حصلت نقلات نوعيه في مستويات كتيره. اولا لورانس في الحجاز كان بيعمل صفقات مع القبائل العربيه انتهت بأنهم آمنوا أستيلائه علي العقبه بالتزامن مع قصف البحريه البريطانيه و بالتالي تأمين أجناب الجيش البريطاني المتقدم من سينا في أتجاه فلسطين. و دي كانت سياسه حيتم اتباعها دائماً بعد كده مع العرب (مصدر ١). ليه تبعت قوات بريه طالما القبائل العربيه تقوم بالمهمة. شفنا برضه انه في ١٩١٧ حصلت الثوره الروسيه اللي بدأت بطلبات ديمقراطيه و انتهت بعد عده شهور ان تحولت للفاشيه بمساعده المخابرات الالمانيه كي تخرج روسيا من الحرب (مصدر٢). 

النهارده حنفهم المجهود السياسي البريطاني اللي صاحب تقدم الجيش البريطاني في سينا لطرد العثمانيين من الشام. 

طبعا فرنسا حليفه بريطانيا كانت شايفه الوضع في مصر و واضح جدا ان قوات من الجيش البريطاني بتستعد انها تهاجم مره كمان علي غزه عشان تدخل فلسطين و منها لبقيه الشام. طبعا فرنسا قلقه ان بريطانيا تاخد الشام كله لنفسها حتي بالرغم من وجود اتفاقيه سايكس-بيكو. و طبعا بيزود القلق ده ان فرنسا شايفه التعاون ببن بريطانيا و الشريف حسين في الحجاز و قلقانه جدا ان التعاون ده معناه ان حسين و أولاده يدخلوا الشام و تطلع فرنسا بلا شيئ من الحرب لأنهم حيعلنوا انهم عرب و دي منطقه عربيه و فرنسا ملهاش دعوه. 

و شفنا في الحلقات الماضيه (مصدر ٣) ازاي حاولت فرنسا بشتي الطرق عرقله الشريف حسين حتي لو علي حساب انتصار الأتراك عليه في المدينه و إبقاؤه محبوس داخل الحجاز ميطلعش منها. بالتوازي مع ده فرنسا كحليفه بعتت لبريطانيا في أوائل ١٩١٧ بتقول انها عاوزه تبعت قوات فرنسيه مع الجيش البريطاني اللي حيدخل فلسطين من مصر (مصدر ٤). 

طبعا سهل جدا ان بريطانيا تقول لا. ببساطه بريطانيا حتقول ان الوقت متأخر جدا و ان الجيش حيتحرك بي خلال أسابيع. و ان الجنود الجداد دول متدربوش مع البريطانيين فتره كفايه. و بالتالي وصولهم حيأخر المجهود الحربي مش حيساعده (لذلك ان دوله عربيه مثلا تبعت قوات بريه لمصر او سوريا قبل حرب ٧٣ بأيام فهذا كلام فارغ. ممكن مثلا قوات جويه او معدات تم التدريب عليها فعلا. غير ذلك فهو عك. و للاسف معظم العرب يتعاملون مع المعدات العسكريه الحديثه و مع فكره الحرب و القتال عموما كأنه قتال بالسيوف و شخص يعدي يلم الناس للجهاد دون تدريب و لا استعداد. عمليه عزوه بالعين اكثر منها غزوه بالغين). 

أكيد فرنسا لم تيأس. فوصل كتاب اخر من فرنسا لرياسه الوزرا في بريطانيا ان طيب احنا فهمنا ان وجود جنود من فرنسا مش حيساعد. طيب احنا حنبعت ضابط سياسي political officer فرنسي واحد يكون في رفقه الجيش البريطاني و اننا بنقترح ان الضابط ده يكون بيكو! واضح طبعا القصد الفرنسي هو مراقبه مدي التزام بريطانيا بالاتفاق. طبعا مستحيل ان بريطانيا ترفض طلب زي ده جاي من حليف. ده ضابط واحد يعني. بريطانيا راحت باعته لفرنسا انها ترحب بوصول بيكو لمصر في مارس ١٩١٧ و انه حيكون في رفقه الجيش البريطاني اللي قرب يدخل غزه وقتها و ان بريطانيا حتعين ضابط سياسي بريطاني لمرافقته ايضا. و طبعا الضابط ده حيكون سير مارك سايكس. دول الاتنين اللي عملوا الاتفاق مع بعض من حوالي سنه و عارفين بالضبط ايه اللي في الاتفاق. 

مارك سايكس و بيكو وصلوا القاهره في أوائل ١٩١٧. طبعا بيكو عاوز يفهم ايه الأوضاع و طلب انه يقابل الاطراف السياسيه اللي بريطانيا علي اتصال معاها لتمهيد الوضع في الشام قبل دخول الجيش البريطاني. 

طبعا دي مشكله كبيره. لانه معناها ان بيكو يقابل الشريف حسين و أولاده. و طبعا دول حيقولوا لبيكو عن اتفاقهم مع بريطانيا انهم حيعملوا دوله عربيه. و طبعا سير مارك سايكس كان عارف ان كان فيه مراسلات بين حسين و ماكماهون زي ما شفنا قبل كده (مصدر ٥). و بكده يتم تاكيد كل اللي فرنسا كانت شاكه فيه. و الاسوء كمان لو بيكو يبتدي يقابل اليهود الهربانين في مصر من الدوله العثمانيه و يقابل اليهود في بريطانيا ذاتها و يبتدي يشم ان وقتها برضه بريطانيا كانت علي وشك إصدار وعد بلفور (حنشوف الموضوع ده في الحلقه الجايه). طيب سايكس يعمل ايه عشان يتجنب كل ده؟ 

 تفتق ذهن سايكس انه يكون مجموعه من الوجهاء السوريين و اللبنانيين الذين يبدون انهم ناس مهمين و لهم حيثيه بينما في الحقيقه هم مالهمش اي تاثير حقيقي في اي شيئ و لا يعلمون اي شيئ عن الترتيبات و التعهدات البريطانيه. الناس دي حيبانوا ناس محترمه و مهمه. و يمكن كمان يقولوا كلام كويس جدا. و يطالبوا بحريه و استقلال الشام. و يقولوا انهم بيكرهوا الأتراك لكن كمان مش عاوزين احتلال فرنسي او غيره. 

و ده اللي حصل بالضبط. مارك سايكس خلي بيكو يقابل جماعات من اللاجئين السوريين في مصر. كلهم قالوا كلام كويس جدا ملوش اي تاثير. 

الجماعات دي طبعا افتكروا انهم طالما قابلوا ناس مهمه في بريطانيا و فرنسا يبقي بقالهم مطالب و تاثير و انهم دعاه استقلال و تكوين دوله لبنانيه او سوريه مستقله لا علاقه لها بالحجاز و لكن علي علاقه خاصه مع اوروبا دون احتلال. الناس دي افتكروا انهم لهم تاثير. طبعا انتهي الحال ان الشام بقي تحت الاحتلال الفرنسي زي ما حنشوف لاحقا. 

الكلام ده شغال لحد دلوقتي. و بياخد أشكال كتيره. و مبقاش بس سايكس اللي بيعمله. بقي الساسه العرب بيعملوه كمان. يعني وزير خارجيه اجنبي يطلب يقابل القوي السياسيه في مصر. يقوم حاكم مصر الديكتاتور سواء مبارك او السيسي يحطله مجموعات لا حول و لا قوه لها. المشكله بتظهر لما واحد من الجماعات دي يفتكر نفسه ذي تأثير حقيقي. كمان اما دوله غربيه تدخل دوله شرق أوسطيه. مثلا امريكا تعمل لويا جيرجا في أفغانستان. كلام ملوش تاثير حقيقي بس يبان انه في ريس منتخب و في اتساق مع التقاليد و الاعراف و في ناس شكلها مهم بتقول كلام كويس. التأثير الحقيقي كان للميليشيا الافغانيه.

و نكمل بعون الله. 

و الحلقات السابقه كلها في مصدر ٦ 

#سايكس_بيكو 

#صفحات_مخفيه

 المصادر:

——-

١- صفحات مخفيه من تاريخ مصر … كيف تحارب في الشرق الاوسط؟

https://jawdablog.org/2016/07/23/sykes_pico_19_how_to_fight_in_middle_east/

٢- صفحات مخفيه من تاريخ مصر … الثوره الروسيه و تشابهها مع يناير ٢٠١١ في مصر:

https://jawdablog.org/2016/08/05/sykes_pico_20_how_to_have_loyal_parties/

٣- السياسه الفرنسيه التاريخيه في الشرق الاوسط:

https://jawdablog.org/2016/07/08/sykes_piko_17_france_role/

٤- لورانس في الجزيره العربيه:

https://books.google.com/books/about/Lawrence_in_Arabia.html?id=99NTgkPUh9AC&printsec=frontcover&source=kp_read_button&hl=en#v=onepage&q&f=false

http://www.nytimes.com/2013/08/11/books/review/lawrence-in-arabia-by-scott-anderson.html?_r=0

٥- مراسلات حسين – ماكماهون:

https://jawdablog.org/2016/04/15/sykes_pico_and_world_war_1_post5/

٦- صفحات مخفيه من تاريخ مصر … كل الحلقات السابقه مجمعه:

https://jawdablog.org/category/التاريخ/صفحات-مخفيه-من-التاريخ/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s