سايكس-بيكو و الحرب العالميه الاولي … دليلك لتكوين جماعات و احزاب مواليه … الحلقه ٢٠

Sykes_Pico_20_How_to_have_Loyal_Parties

في نفس الوقت اللي كان لورانس بيقابل عوده ابي طايع في الحجاز و جنوب الاْردن و بيوزع علي قبيلته الذهب المصري عشان يقدر يوصل العقبه و يحتلها و يأمن أجناب الجيش البريطاني المتقدم من سينا نحو فلسطين (الحلقه السابقه – مصدر ١)، في نفس الوقت قامت في روسيا ثوره فبراير ١٩١٧. عشان منتلخبطش روسيا قامت فيها ثورتين كبار. ثوره فبراير ١٩١٧ و بعدها ثوره اكتوبر ١٩١٧. ثوره فبراير بدأت ان العمال في مدينه سان بطرسبرج الروسيه عملوا إضراب احتجاجا علي ظروفهم. الإضراب ده امتد لكل مدن روسيا. قيصر روسيا نيقولا الثاني خاف انه يتقتل او تحصل اعمال عنف ضده و ضد أسرته فقرر التنحي و التنازل عن العرش. و تولي الحكم في روسيا مجلس النواب المعروف بأسم الدوما. قامت في روسيا حكومه انتقاليه هدفها اقامه الديمقراطيه (مصدر ٢). 

بالتزامن مع غزوه العقبه لتأمين تقدم الجيش البريطاني في فلسطين كان العمل السياسي شغال. و الحقيقه ان العمل السياسي ده كان شغال بطريقتين مختلفتين و محتاجين اننا نفهمهم كويس جدا. 

الطريقه الاولي في روسيا! لان في الوقت اللي كان لورانس شغال علي القبائل العربيه عشان تحارب معاه في أوائل ١٩١٧ و اللي انتهي بيهم الامر انهم دخلوا معاه العقبه، قامت الثوره الروسيه ضد حكم القيصر و ال رومانوف. الثوره الروسيه مكانتش بلشفيه في البدايه. بالعكس قامت فيها حكومه انتقاليه كان هدفها القضاء علي فساد ال رومانوف. و ده شجع امريكا أنها تدخل الحرب مع الحلفاء لان امريكا كانت رافضه تماماً تدخل الحرب في نفس معسكر قياصره روسيا اللي امريكا كانت بتعتبرهم متخلفين و ضد حقوق الانسان. في نفس الوقت ده كانت المخابرات الالمانيه بتعمل اكبر عمليه زرع عملاء في التاريخ الحديث و كانت بتزرع لينين و بترجعه روسيا عشان ينقلب ضد حكومه الثوره الروسيه و يتحول بروسيا نحو البلشفيه عشان يطلع بها من الحرب ضد المانيا و بالتالي تركز المانيا في القتال ضد بريطانيا و فرنسا. 

كان وقتها لينين منفي في سويسرا مع رفقائه. لينين من صغره في الجامعه اعتنق الفكر الشيوعي الماركسي و بالتالي رفته نظام القيصر من الجامعه و بعدين تم نفيه و اتهامه بالتأليب ضد حكم القيصر بالرغم انه كان من أسره ميسوره (مصدر ٣). لما قامت الحرب العالميه الاولي لينين كان في المنفي في اوروبا و كان ضد الحرب بشده. و رأيه ان هدفها الوحيد هو تحول الراسماليه الي امبرياليه هدفها البحث عن عماله و موارد رخيصه في العالم. و كان شايف ان الحرب لازم تتحول لنضال البروليتاريا ضد حكوماتها و انتصارهم حتي يسود السلام في العالم لان مصدر الحرب هو الرغبه في التوسع الامبريالي المدفوع بالرأسمالية. 

في فبراير ١٩١٥ شخص في المخابرات الالمانيه اسمه ألكسندر جلفاند وضع خطه كم ٢٣ صفحه قدمها لقيصر المانيا و كان فيها ازاي المانيا تتخلص من روسيا كعدو و كان فيها ان المانيا تزرع الشيوعيين البلاشفة في روسيا و هم ضد الحرب و بالتالي روسيا تخرج من الحرب. الأوراق دي اشتهرت باسم أوراق جلفاند. و صحيفه دير شبيجل الالمانيه نشرتها مؤخراً (مصدر ٤). 

مفيش اي دليل رغم كده ان لينين او المانيا شاركت في ثوره فبراير ١٩١٧. بالعكس. ثوره فبراير ١٩١٧ عملت بالضبط عكس ما المانيا كانت عاوزه! لانه الحكومه الموقته في روسيا أعلنت انها ستستمر في الحرب مع بريطانيا و فرنسا ضد المانيا. و بالعكس حصل ما هو اسوء بالنسبه لالمانيا. امريكا كانت ضد دخول الحرب الي جانب بريطانيا بسبب تحالف بريطانيا و روسيا. امريكا من منطلق اخلاقي كانت شايفه ان نظام قيصر روسيا نظام متخلف و بالتالي مينفعش امريكا تساعده. لما قامت حكومه ديمقراطيه في روسيا، امريكا قررت انها حتدخل الحرب جنب بريطانيا و فرنسا و روسيا ضد المانيا. في نفس الوقت ده امريكا علمت بمخطط ألماني لتأليب المكسيك ضد امريكا. طبعا دخول امريكا الحرب ضد المانيا بموارد و قدرات امريكا الضخمه هو اخر حاجه المانيا عاوزاها. 

لينين في مارس ١٩١٧ أتقدم للحكومه الالمانيه برغبته انه يعدي و ٣٢ من رفقائه من سويسرا نحو روسيا عبر المانيا. في الاول طبعا المانيا رفضت. ده مواطن من دوله عدوه راجع لدوله عدوه. لكن المخابرات الالمانيه لقت فيه لقيه. و سهلت له و رفاقه انهم يسافروا عبر المانيا و من المانيا نحو السويد و بعدين فنلندا و من فنلندا لروسيا. و ادتهم فلوس كمان. المخابرات الالمانيه استمرت تدي فلوس للينين لغايه سنه ١٩١٨. طبعا لينين كنز لالمانيا لانه حيعمل اضطرابات كبيره و هو شيوعي ضد الحرب و يمكن يقدر يحول مسار روسيا و ثوره فبراير ١٩١٧ انها تبقي ضد الحرب. 

الحقيقه ان الحكومه الموقته في روسيا كانت تقدر تمنع لينين من انه يرجع روسيا لكن طبعا اجواء الحريات وقتها و دي حكومه جايه عاوزه ديمقراطيه لذلك منع لينين يتعارض مع توجهاتها. 

الازمه الاقتصاديه في روسيا تفاقمت بسبب الحرب و تكاليفها. و الناس في روسيا بدأت تقتنع ان الحرب سبب مشاكلهم الاقتصاديه. طبعا وجود لينين وقتها كان عامل مساعد. بحلول اكتوبر ١٩١٧ قامت اضطرابات ضخمه في روسيا ضد الحكومه الديمقراطيه المؤقته و ضد الحرب. و هي ما عرفت لاحقا بثوره اكتوبر البلشفيه و انتهت بحرب اهليه روسيه انتصر فيها البلاشفة و خرجت روسيا من الحرب. طبعا لينين نفسه اللي ضد الامبرياليه هو من أقام الاتحاد السوفيتي و توسع فيه ليشمل كل وسط اسيا! 

موضوع علاقه لينين مع المانيا فيه سجال كبير. لان مخابرات القيصر روجت ان لينين مزروع و متعاون مع المانيا قبل ١٩١٧. مفيش الحقيقه اي دلائل علي التعاون ده إطلاقا. مفيش كمان دليل ان المانيا ليها أيد في ثوره فبراير إطلاقا. بالعكس. لكن مما لاشك فيه ان مخابرات المانيا في ١٩١٧ لقت لقيه و ساعدت لينين انه “يسرق” ثوره فبراير و يحولها لثوره بلشفيه ضد الديمقراطيه في اكتوبر مستغلا الوضع الاقتصادي. و كان ممكن ان روسيا تبقي دوله ديمقراطيه من غير كده! هذا لا نقاش فيه. للاسف التزود في التطبيل لعلاقه مسبقه هو آفه كبيره موجوده في روسيا زي مصر. كمان التزود بنفي اي علاقه بين لينين و المانيا كما فعل تروتسكي (مصدر ٣) كمان غلط لانه كلام ثابت. 

الحقيقه في حاجات كتيره نتعلمها من احداث الثوره الروسيه لان فيها كلام كتير مشابه للثوره المصريه:

١- مش لازم السيسي متعاون من زمان مع المخابرات الاسرائليه او الاماراتيه او السعوديه زي ما ناس كتير بتقول. مش ضروري. لكن ممكن جدا انهم لقوا لقيه فيه بعد لما ثوره يناير ٢٠١١ كانت واخده مصر في أتجاه ديمقراطي و اتجاه ان مصر تصبح حليفه قويه لامريكا و تتلقي مساعدات تكنولوجيه حقيقيه كما كان الوضع في بدايه ثوره يناير و حتي بعد انتخاب د مرسي لغايه أواخر ٢٠١٢. 

٢- و طبعا معروف و واضح مساعدات اسرائيل و السعوديه و الامارات لنظام السيسي لاحقا و التعاون المخابراتي بين مصر و اسرائيل هو علاقه دافيه الحقيقه و الطيران الاسرائلي يقصف سينا باستمرار. لذلك مش محتاجين احنا اننا نقول انه عميل من زمان. احنا شايفين الوضع أمامنا بعينا. تجنبوا المبالغات. 

٣- كتير من الثورات اللي بدأت بريئه و هدفها ديمقراطي بيتم تحويلها في اتجاه اخر. مصر و روسيا متشابهين جدا جدا من ناحيه الفقر و التاريخ الطويل من الاستبداد. 

٤- طبعا مع الفارق بين مصر و روسيا في الموارد. روسيا بلد غني في الموارد و شعب فقير. مصر بلد فقيره الموارد و شعب فقير جدا جدا يتم نهب حتي موارده المحدودة (مصدر٥) مش عيب فقر الموارد النهب هوه العيب. 

٥- امريكا لسه عندها الجزء الاخلاقي في السياسه. حتي لو تتابع الانتخابات الامريكيه تلاقي انهم بيتكلموا عن مبادئ امريكا علي الأقل الحزب الديمقراطي او بعضه. دائماً امريكا عندها اضطراب في الأهداف بين الاخلاق و المصالح. و شوفنا ده لما اوباما قطع المعونه عن مصر اولا بدافع اخلاقي ثم رجعها بدافع المصالح. هذا الشد tension في السياسه الامريكيه كتير مش فاهمينه و بالتالي بيخسروا كتير و بيعانوا في علاقتهم مع امريكا. يعني بلد زي السعوديه او الامارات مثلا لا تفهم ازاي امريكا تقطع المعونه عن مصر او تتوقف عن تأييد مبارك! و السعوديه قالت كده و هاجمت امريكا مباشره علي كده (مصدر ٦). لكن السياسه الامريكيه ليست اخلاق فقط ايضا كما يريد البعض. هي لخبطه من الاتنين بدرجات متفاوتة. 

في نفس الوقت ده كانت بريطانيا بتجهز الجيش اللي يهجم علي العثمانيين من سينا. و كانت فرنسا قلقه جدا من بريطانيا انها حتدخل بجيشها فلسطين و بعدين سوريا و تاخد الشام كله لنفسها و تطلع فرنسا من المولد بلا حمص. حنشوف في الحلقه الأسبوع القادم ان شاء الله ازاي بريطانيا اتصرفت مع فرنسا. و الاجابه انها عملت احزاب و جماعات كرتونيه تبان انها بتنسق مع فرنسا! نفس السياسه! 

حنشوف في الحلقه الجايه كمان ازاي بريطانيا عملت ذات الكلام في الشرق الاوسط بس بشكل اكثر ذكائا بكثير و استطاعت به الضحك علي كل الاطراف دون ان يدروا بما فيهم الحلفاء في فرنسا و الشريف حسين و كله الحقيقه! 

المصادر:

———

١- الحلقه السابقه من صفحات مخفيه من تاريخ مصر:

https://jawdablog.org/2016/07/23/sykes_pico_19_how_to_fight_in_middle_east/

٢- تاريخ الثوره الروسيه:

https://www.britannica.com/event/Russian-Revolution-of-1917

٣- مؤلفات تروتسكي عن لينين:

https://www.marxists.org/ebooks/trotsky/history-of-the-russian-revolution/ebook-history-of-the-russian-revolution-v1.pdf

٤- أوراق جلفاند:

https://www.amazon.com/Merchant-Revolution-Alexander-Helphand-1867-1924/dp/0192111620

https://www.wsws.org/en/articles/2007/12/spie-d15.html

٥- مصر دوله فقيره الموارد:

https://jawdablog.org/2014/12/03/egypt_taboo_28/

٦- هجوم السعوديه علي امريكا:

http://www.pbs.org/newshour/bb/why-the-u-s-relationship-with-saudi-arabia-is-under-strain/

و الحلقات السابقه كلها هنا:

https://jawdablog.org/category/التاريخ/صفحات-مخفيه-من-التاريخ/

#سايكس_بيكو

#صفحات_مخفيه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s