تعالوا نتعلم الاقتصاد ببساطه … هل الشعب المصري فعلا مفرط في الاستهلاك؟ 

Lets_Learn_Economy_Is_Egypt_high_Consuming

هل احنا فعلا شعب مستهلك و بيضيع كل فلوسه في السلع الاستهلاكيه و هل فعلا الحكومه غلبانه معانا و انه مش معقول كده؟ طبعا أنصار الرأي ده بيقولوا بصوا علي عزومات رمضان و انك تلاقي العزومه فيها مليون صنف و حاجات كتيره بتروح الزباله او بص علي إعلانات السلع الاستهلاكيه و الكومبوندات في التلفزيون و انت تعرف اننا فعلا شعب استهلاكي. معارضو الرأي ده بيقولوا لأ دي طبقه محدده اللي بتعمل كده. بصوا علي الفقرا في الشعب و شوفوا دول بياكلوا من الزباله. و بين الرأيين الحقيقه ان الحقيقه ذاتها تاهت. و بالتالي عامه الشعب تاهت في غياب الحقيقه و المعلومات و بيبقوا معرضين انهم ياخدوا مواقف مختلفه تبعا للظروف و الأحاسيس و ده مش بيخلينا نتقدم و لا خطوه لانه بيخلي اي حد يقدر ييجي و بعملنا غسيل مخ و ممكن جدا نقتنع بأي حاجه يقولها و نستمر في اننا شعب يسهل الضحك عليه بطريقه يا ماسريين ماسر بتقولكم. طيب تعالوا نتجنب ده و نتعلم حاجه مفيده. 

مقياس انفاق البيوت الاستهلاكي 

Household final consumption expenditure او اختصارا HFCE 

———————–

ده مقياس عالمي (مصدر ١) بيقيس الفلوس اللي البيت household المتوسط بينفقها علي السلع الاستهلاكيه النهائيه. ناخد بالنا اولا من حكايه المتوسط دي. يعني مروحناش للاغنياء قوي و لا الفقرا قوي. روحنا لمتوسط الانفاق في البلد. عشان دي مشكله كبيره في مصر ان كل واحد عاوز يثبت وجهه نظره بأنه يقوم رايح علي الحالات القصوي اللي اما في اعلي شريحه او اوطي شريحه و الهدف بس انه يطلع صح. عارفين احنا الناس دي كويس و دول احد اهم أسباب المصيبه اللي مصر فيها. و مش بس كده دول كمان بيغيروا رأيهم حسب الظروف. يعني حسب القعده مين بيقول رأي ايه و هل انا بأحب الشخص ده و لا لأ و بناءا علي ذلك احدد رأيي و اطلع بيانات تعزز بيها رأيي ده من اقصي اليمين او اقصي اليسار و في النهايه انا متلخبط و مش فاهم و بالتالي الكل متلخبط و مش فاهم. 

نلاحظ كمان ان المقياس ده بيقيس الاستهلاك النهائي. يعني الفلوس دفعتها و مثلا اشتريت اكل و اكلته او رميته في الزباله. استهلاك نهائي. مش بيدخل فيه مثلا اني اشتريت اكل و طبخته و بيعته لان ده مش استهلاك نهائي. 

المقياس ده بيدخل فيه الفلوس اللي بتنصرف علي الاكل و الشرب و اللبس و قسط السياره و فاتوره الكهربا و المياه و هكذا. كمان بيدخل فيه ايجار الشقه او البيت و لو شاري البيت بيدخل فيه قسط البيت طالما البيت بهدف السكن مش بهدف الاستثمار. لذلك ده مقياس ممتاز للاستهلاك في اي بلد. 

مقارنه مصر بالعالم في الاستهلاك:

————————–

اللي حنعمله اننا حنقارن الاستهلاك في مصر بالاستهلاك في دول تانيه (مصدر ٢). لكن فيه مشكله كبيره في المقارنه دي. ليه؟ لان أكيد بلد زي امريكا او بريطانيا اغني بكتير من مصر و دخل الفرد اعلي بكتير. و بالتالي حتصرف أكتر بكتير من البيت المصري علي الاستهلاك. كمان الاسعار في أوروبا او تركيا كمان اعلي من مصر. و بالتالي البيوت في أوروبا و امريكا سهل جدا انها تصرف علي الاستهلاك اعلي من البيوت في مصر. 

و العكس كمان صحيح. بلد زي افغانستان مثلا دخلها اقل من مصر و بالتالي أكيد حتصرف علي الاستهلاك اقل بكتير من مصر. 

لذلك دي مقارنه مش عادله إطلاقا. 

امال نقارن ازاي؟ 

المقارنه حتكون كنسبه من الدخل. يعني ايه؟ كل بيت داخله فلوس قد ايه و نسبه اللي بيصرفه من الدخل ده علي الاستهلاك قد ايه. 

النسبه ده اسمها HFCE/GDP. او نسبه الاستهلاك للناتج القومي. ايه اهميه النسبه دي؟ انها بتورينا هل الشعب ده بيصرف فلوسه كلها علي الاستهلاك و لا بيحاول انه يدخر. لذلك ده افضل مقياس لما يطلق عليه thrift او التقشف او الحذر في الانفاق. 

طيب النسبه دي في مصر ٧٦٪. في افغانستان ٩٢٪. في الأرجنتين ٥٩٪. في البرازيل ٦٠٪. في قطر ١٨٪. في نيجيريا ٧٠٪. في الامارات ٤٧٪. في امريكا ٧١٪. في تركيا ٧٢٪. في اسرائيل و الهند ٥٧٪. و في فلسطين ١١٥٪. 

نفهم من كده اي حاجه؟ لاحظت حاجه؟ غالبا لأ. ليه؟ لان ممكن تكون نسبه الاستهلاك عاليه جدا لمجرد ان المواطنين دخلهم قليل جدا و بالتالي يا دوبك كل الفلوس رايحه علي الاستهلاك الأساسي اللي هوه يا دوبك الاكل و الشرب الاساسي و شويه لبس و سكن بسيط يستر الانسان. بالعكس. ممكن جدا ان حتي الدخل ده مش مكفي و الدوله ككل بتعتمد علي المعونات عشان الناس تستمر في الحياه زي فلسطين مثلا اللي بتاخد ١٥٪ فوق الدخل بتاعها عشان الناس تصرف علي الاستهلاك. نفس الكلام مثلا في جمهوريه جنوب السودان اللي هي من أفقر شعوب الارض و بتعتمد علي المعونات عشان الناس بس تعيش. في العكس من كده ممكن جدا ان متوسط الدخل يكون كبير جدا لدرجه انه مهما الاسره استهلكت برضه بيفضل فلوس كتيره جدا زي مثلا بلد زي قطر اللي فيها واحد من اعلي متوسطات الدخل في العالم. 

و ده فعلا اللي الرسم البياني المرفق بيوضحه. انه فعلا فيه علاقه أكيده بين نسبه الاتفاق علي الاستهلاك و الدخل القومي. كل لما الدخل يزيد كل لما نسبه الانفاق علي الاستهلاك بتقل. و حنلاقي كمان ان بلد زي مصر في منتصف كتله كبيره من الدول حواليها. 

لذلك لما نيجي نقارن لازم نقارن بين دول متقاربه في الدخل عشان نعرف احنا مقارنه بدول مقاربه لينا في الدخل هل بنصرف زيهم و لا أكتر منهم؟

المقارنه بدول زينا

————–

مين هيه الدول اللي دخلها مقارب جدا لمصر؟ احنا درسنا في الحلقات اللي قبل كده (مصدر ٣) ان اهم مقياس للدخل هو مقياس الناتج القومي للفرد او GDP PER CAPITA. 

مصر ترتيبها ١١٤ من حيث الدخل القومي او الناتج القومي للفرد بحوالي ٣٧٠٠ دولار في السنه. حوالينا دول زي الاتي (مصدر ٤):

– تونس : دخلها ٤٠٠٠ دولار في السنه. و طبعا بلد عربي و ظروفها الثوريه مشابهه لمصر جدا. 

– ارمينيا: دخلها اقل من مصر شويه صغيرين بحوالي ٣٥٠٠ دولار في السنه و بلد أوروبي كان تابع للاتحاد السوفيتي و استقل لكن عنده حروب و مشاكل كتير مع جارته أذربيجان. 

– جورجيا: بلد أوروبي صغير. دخلها اعلي من مصر بقليل و ما زالت تعاني من حرب قصيره مريره مع روسيا. 

– اندونيسيا: بلد اسيوي مسلم و كبير. دخل الفرد حوالي ٣٣٠٠ في السنه. مقارب لمصر جدا. 

يعني حنقارن مصر بدول متقاربه جدا معاها في الدخل القومي. واحده بلد عربي. التانيه اوروبيه و عندها مشاكل. التالته بلد اسيوي مسلم و هو اكبر بلد مسلم في العالم. أظن مقارنه عادله جدا. 

طبعا مينفعش بقي نقارن بتركيا او اسرائيل مثلا لان دول متوسط الدخل فيهم عده اضعاف مصر. مفيش وجه للمقارنه يعني. 

نتايج المقارنه بين مصر و دول العالم المشابهه ليها:

——————–

– مصر: نسبه الاستهلاك للدخل ٧٦٪

– تونس: ٦٣٪

– ارمينيا: ٨١٪

– اندونسيا: ٥٨٪

– جورجيا: ٨٣٪

متوسط الدول دي كلها حوالي ٧٣٪. يعني مصر تقريبا تقع في المتوسط من ناحيه نسبه الاستهلاك للدخل. حنلاحظ كمان حاجه. ان الأوروبيين نسبه استهلاكهم عاليه. في حين الاسيويين. اقل من مصر. في حين مصر تقع تقريبا في النص. 

ده استنتاج مهم جدا. يعني احنا فعلا مقارنه بأقراننا في العالم نسبه استهلاكنا مش عاليه قوي و كمان مش قليله قوي. تقريبا في النص. 

المقارنه مع تونس:

————–

لكن لازم نركز قوي مع تونس طبعا. لانها بلد فيها عادات و تقاليد متشابهه و دخلها متقارب مع مصر. و كمان فيها احوال ثوريه زي مصر. ليه تونس نسبه استهلاكها ٦٣٪ بس في حين ان احنا ٧٦٪؟ ده فرق كبير جدا. 

الفرق ده طبعا فلوس كان ممكن تروح في الادخار و بالتالي في الاستثمار. ده فرق حوالي ١٣٪ من الدخل القومي. يعني لو جمعناه كله يطلع حوالي ٤٣ مليار دولار (اضرب ٣٧٠٠ دولار للفرد في ٩٠ مليون في ١٣٪). ٤٣ مليار دولار ممكن تروح للادخار مش للاستهلاك لو الشعب المصري يستهلك زي الشعب التونسي! 

يعني هل الجنرال طبيب الفلاسفه عنده حق؟ تعالوا نفهم. 

ممكن جدا انك بتدفع فلوس أكتر علي الاستهلاك فقط لان اسعار السلع أغلي. مش لانك فعلا بتاخذ سلع أكتر. 

لو انت دخلت علي مصدر ٥ حتلاقي فروق الاسعار بين مصر و تونس. الحقيقه ممكن تلاقي فروق الاسعار بين اي مكانين في العالم. المصدر ده عاوزينك تحفظه عندك عشان محدش يضحك عليك بعد كده. 

حتلاقي ان متوسط الاسعار في مصر اعلي من تونس حوالي ١٣٪. و سعر ايجار الشقق في مصر لوحده اعلي من تونس ٢١٪. 

هما دول بالضبط ال ١٣٪ اللي عاملين الفارق بين مصر و تونس في الاستهلاك. 

يعني الحقيقه ان الشعب المصري استهلاكه الفعلي مقارب للشعب التونسي و يقع في النص تقريبا من شعوب العالم. لكن فيه حوالي ٤٣ مليار دولار رايحه علي الشعب المصري في ان الاسعار عنده عاليه. 

ليه الاسعار في مصر اعلي من تونس؟ ليه الاسعار لأي حاجه في اي بلد في العالم تكون اعلي من بلد تانيه؟ زي ما شفنا قبل كده (مصدر٣) هي تعتمد ان الطلب عالي و المعروض قليل. حاجه زي البيوت او الشقق. ازاي يكون فيها الطلب في مصر اعلي من المعروض بالمقارنه بتونس؟ الشقه لا سلعه مستورده و لا حاجه. و البلدين بيقدروا يبنوا عماير يعني. مش شغلانه كبيره. و البلدين عندهم صحرا واسعه. ليه سعر الايجار او التمليك في المتوسط في مصر يكون اعلي من تونس؟ 

ببساطه الفارق هو ان سوق الاسمنت و الحديد في مصر فيهم احتكارات كبيره بينما تونس بتستورد المنتجات دي بأسعار أرخص! 

الجيش و الحكومه و لا فارج (شركه فرنسية باع لها ساويرس شركات للاسمنت دون دفع الضرايب علي ارباح البيع) و ابو هشيمه (مخابرات) و عز (دوله مبارك) بيحتكروا السلع الرئيسيه دي. كمان الجيش بيحتكر الاراضي. مينفعش ان اي حد يروح يبني في اي ارض. ده بيقولك كل الاراضي علي جنب كل الطرق تابعه للجيش. و طبعا دي عمليه تسقيع و احتكار. و التسقيع بينتج عنه ارتفاع اسعار و الاحتكار بينتج عنه ارتفاع اسعار أكتر. و ده بيخلي في المتوسط الاسعار في مصر اعلي من تونس ١٣٪. 

يعني لو احنا يبقي عندنا النظام السياسي و الاجتماعي في تونس حنوفر ٤٣ مليار دولار بتروح النهارده في جيب الجيش و المحتكرين. 

يا خبر ابيض. ٤٣ مليار دولار في السنه نقدر ندخرها و نعمل استثمارات محليه. 

الشعب ده منهوب و الله. و العجيب انه بيصقف للي بينهبه! 

المقارنه بجورجيا و ارمينيا و اندونيسيا

————————

لو قارنا بالدول التلاته في مصدر ٥ دي حنلاقي ان أسعار مصر مقاربه جدا لاسعار الدول دي. هنا العادات و التقاليد يتفرق جدا. يعني جورجيا و ارمينيا دول عندها تطلعات انها تبقي دول اوروبيه و عاوزين يحسوا انهم عايشين في مستويات اوروبيه و بالتالي فعلا بيصرفوا أكتر علي الاستهلاك. نفس الكلام بالمناسبه في روسيا. الدول دي معدلات الادخار عندها قليله جدا. كلهم بعد انهيار الاتحاد السوفيتي عاوزين يعيشوا في مستوي زي أوروبا. لذلك معدلات الاستهلاك عندهم اعلي من مصر. طيب دول ملناش دعوه بيهم. 

علي الناحيه التانيه بلد زي اندونيسيا برضه الاسعار فيها زي مصر تقريبا لكن متوسط الاستهلاك فيها ٥٨٪. طيب ليه منبقاش زي اندونسيا؟

بننسي احنا ان اندونسيا مجتمع اسيوي بصفه عامه متقشف. و كمان عاداتهم في الزواج مثلا مختلفه. مفيش حفلات زواج من اي نوع. الغني و الفقير بيلبسوا لبس متقارب و متشابه جدا. معندهمش اي تطلعات اوروبيه زي المصريين او الطبقه الغنيه في مصر. معندهمش كومباوندات. معندهمش إعلانات سلع استهلاكيه. معندهمش تركيز علي تحويل المجتمع لمجتمع استهلاكي. دنيا تانيه خالص الحقيقه. 

الخلاصه:

——–

مصر من حيث الاستهلاك تقع في المنتصف تقريبا بين أقرانها من الدول.

لو قارناها بتونس نلاقي ان تونس بتستهلك اقل لكن ده نتيجه ان أسعار تونس اقل من مصر مش لان المصريين بيستهلكوا أكتر. و الفارق ده نتيجه احتكار السلع في مصر من الجيش و رجال الاعمال المحيطين به. و الفارق ده حوالي ٤٣ مليار دولار في السنه بتروح علي مصر نتيجه الاحتكار ده. 

لذلك منطقي اننا الاول قبل ما نتكلم عن تغيير عاداتنا و تقاليدنا كمجتمع و نلوم العادات دي. اننا نبدأ الاول و نقول الغي الاحتكار و ادينا نظام سياسي و اقتصادي زي تونس حنوفر بيه ٤٣ مليار دولار ممكن نحطها في الاستثمار. 

في كمان ٢٠ مليار دولار فوق دول ممكن نوفرها لو بقينا زي اندونسيا من ناحيه العادات و التقاليد في حاجات زي الزواج و اللبس و الأكل. هل ده كلام منطقي ان الجنرال يقولنا اننا الاول نبقي زي اندونسيا قبل ما ندور علي ال ٤٣ مليار دولار اللي الجيش و العصابه من حوله محتكرينهم؟ 

و نكمل ان شا الله. 

#تعالوا_نتعلم_الاقتصاد

المصادر:

——-

١- تعريف مقياس HFCE:

http://data.worldbank.org/indicator/NE.CON.PRVT.CD

٢- ترتيب دول العالم وفق مقياس الاستهلاك:

http://data.worldbank.org/indicator/NE.CON.PRVT.CD

https://en.wikipedia.org/wiki/List_of_largest_consumer_markets

https://en.wikipedia.org/wiki/List_of_countries_by_household_final_consumption_expenditure_per_capita

٣- حلقات تعالوا نتعلم الاقتصاد:

https://jawdablog.org/category/الإقتصاد/حلقات-تعالوا-نفهم-الاقتصاد/

٤- ترتيب دول العالم من حيث الناتج القومي للفرد:

http://data.worldbank.org/indicator/NY.GDP.PCAP.CD

https://en.wikipedia.org/wiki/List_of_countries_by_GDP_(nominal)_per_capita

٥- فروق الاسعار بين مصر و تونس:

http://www.numbeo.com/cost-of-living/compare_countries_result.jsp?country1=Tunisia&country2=Egypt

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s