أصول الصراع العربي الاسرائيلي و ليه اسرائيل متفوقه علي العرب؟ ..سايكس-بيكو … الحلقه ١١

Sykes_Pico_11_Israel_vs_Arabs_Why_Israel_Succeed

سايكس-بيكو و الحرب العالميه الاولي

———————

فتره الحرب العالميه الاولي دي الحقيقه هي الفتره المؤسسه للمنطقه. شفنا قبل كده ازاي ان مشكله الأرمن بدأت وقتها. تأسيس الدول العربيه و بذور فشل الدوله القطريه العربيه بدأت وقتها. شفنا ازاي العلاقه بين الدين و الجيش و الانقلابات اتشكلت و الغرب استغلها بدايه من وقتها (راجع الحلقات العشر السابقه في مصدر ١). 

في سوْال احنا لازم نفهم إجابته كويس جدا. هوه ليه الاسرائليين بينتصروا دائماً؟ ليه الغرب دائماً بيقف معاهم، مع اننا معانا الحق يعني؟ و هل في ناس في اسرائيل فعلا عاوزين سلام؟ و لا كله تمثيل؟

عندنا اساطير بتقول ان مثلا عائلة روتشيلد متحكمه في كل أموال العالم و عشان هم يهود مسيطرين علي العالم و فلوسه. الفلوس جزء و ليست كل من الموضوع. 

ثروه عائله روتشيلد كلها تقدر اليوم بين نصف تريليون و تريليون دولار (مصدر ٢). 

مجموع الأصول في العالم كله حوالي ٢٥٠ تريليون دولار (مصدر ٣). تمتلك السعوديه حوالي تريليون دولار من الأصول و الاحتياطي. و كذلك كل من الامارات و قطر (مصدر ٤) و تمتلك الصين اكثر من ١,٤ تريليون دولار من الأصول و الاحتياطي. لقد دخل للعرب علي مدي العقود السابقه اكثر من ٥ تريليون دولار من مدخولات النفط و الغاز (مصدر ٥). اي اكثر بكثير من اي شيئ ممكن ان تحلم به اسرائيل او روتشيلد او يهود العالم. و لكن كما رأينا في مصدر ٥ لم تستغل تلك الثروات بالشكل الأمثل. ان قيمه شركه جوجل فقط هو نصف تريليون دولار (مصدر ٦). و كيف نلوم مارك زكربرج علي انه ابتكر فيسبوك التي اصبحت قيمتها السوقيه ٣٠٠ بليون دولار؟ هل نلومه انه يهودي؟ 

الحقيقه ان اجابه السؤال ده موجوده من وقت الحرب العالميه الاولي. شفنا قبل كده ان لوز روتشيلد تبني عالم نجيب اسمه أرون أرونسون أتولد في رومانيا و هاجر علي مستوطنه في فلسطين و سفره علي حسابه انه يتعلم و ياخد الدكتوراه في فرنسا و رجع بعدها فلسطين اللي وقتها كانت تحت السيطره العثمانيه. أرون كان بينشر مقالات مهمه عن النباتات في فلسطين في افضل مجلات الغرب العلميه. و صيته وصل امريكا و تمت دعوته في امريكا للقاءات مطوله من بينها لقاء مع رئيس امريكا السابق وقتها تبدي روزفلت انبهر فيه تيدي بشخصيه أرون و لباقته. الجاليه اليهوديه في امريكا هي اللي دبرت اللقاءات دي لارون أرونسون في سنه ١٩١٧ و كان وقتها خلاص أرون بقي ضد الدوله العثمانيه و مع اقامه وطن لليهود في فلسطين مع ان معظم يهود امريكا كانوا ضد الموضوع ده (مصدر ٦). 

لكن قبل كده و في خلال سنه ١٩١٥ و ١٩١٦ كان أرون أرونسون بيلف فلسطين عشان يخلصها من وباء الجراد اللي شفنا قبل كده انه كان منتشر في فلسطين و جمال باشا طلب من أرون انه يقود حمله القضاء علي الجراد في فلسطين. 

هنا نوصل للنقطه المهمه جدا. أرون كان بيلف القري العربيه في فلسطين عشان يطلب مساعدتهم التخلص من الجراد. و كان بيفرض علي كل بني آدم بأمر عسكري انه يجمع كذا كيلو من بيض الجراد و يحرقهم. أرون كتب في مذكراته ان معظم العرب كانوا مستسلمين لوباء الجراد. و كانوا بيقولوا لارون ان دي اراده الله. بالعكس أرون كتب في مذكراته (مصدر ٦) ان العرب كانوا بيقاوموه عشان كان شايفين ان مقاومه الجراد جزء من مقاومة اراده الله! 

خد بالك ان مصر مكانتش افضل كتير. وقتها مصر كانت لسه عامله جامعه! في الوقت اللي أرون كان واخد دكتوراه و بينشر أبحاث في افضل المجلات العلميه في العالم. و في الوقت اللي حاييم وايزمان كان بيخترع الأسيتون اللي ساعد في المجهود الحربي البريطاني. 

الحقيقه انه الفرق بين اسرائيل و العرب مش فرق فلوس إطلاقا. هو فجوه ضخمه في العلوم و المعرفه في كل نواحي الحياه. 

في حرب ١٩٤٨، اسرائيل استخدمت تكنولوجيا الطائرات افضل بكثير من العرب. الطيار الاسرائلي كان وقتها مدرب و طالت من الفيلق اليهودي اللي حارب مع الإنجليز في الحرب العالميه الثانيه قتال حقيقي مش صوري. اسرائيل مش بس كده، عدد جنود الهاجاناه في حرب ٤٨ كان أكتر من كل عدد الجيوش العربيه مجتمعه في حرب ٤٨. يعني حتي الأعداد فشلوا فيها (مصدر ٧). و ده في الوقت اللي الدعايه العربيه كانت بتقول عنهم عصابات! الدعايه دي كلها هدفها تطويع عقل المواطن العربي كي يستكين. الحقيقه ان كل الدول العربيه مجتمعه لم تحقق اي تقدم علمي في اي شيئ. و كل كلام عن عيد العلم و العلماء هو كلام فارغ (مصدر ٨). ما هو الاختراع الذي اخترعه العرب او المصريون المحدثون؟ ما هي الشركه التكنولوجيه التي أسسوها؟ كل ما في الامر ان بعض العقول العربيه تهاجر للغرب و تنجح و لا تعود.

أرون أرونسون كان عنده اخ اسمه اليكس. و عنده مساعد له اسمه فاينبرج. و كانوا بيساعدوه في مقاومه الجراد. في يوم كانوا في قريه عربيه بيساعدوا اهلها يتخلصوا من الجراد. أرون كان متفاني جدا في الشغل. لدرجه ان احد كبار رجالات القريه العرب جه لارون و شكره و قاله: “ذاتنا ممنونون لك”. الكلمه دي اثرت في أرون جدا جدا. لانه ابتدا يفكر ان العرب و اليهود في فلسطين ممكن يتعايشوا مع بعض و كتب كده في مذكراته. 

لكن اليكس و فاينبرج كانوا حوالين أرون و كانوا معادين جدا للاتراك و العرب. و شايفين انه مستحيل اليهود يعيشوا تحت الحكم التركي. اليكس دخل في خناقه مع القائمقام التركي في المنطقه. أرون كالعاده كان ممكن يستغل علاقاته مع الأتراك انه يطلعه من المشكله. لكن اليكس هرب من السجن. و أرون من كتر لفه في فلسطين ابتدا يقتنع ان حاله الأتراك و الدوله العثمانيه سيئه جدا لدرجه انه مستحيل يبقي فيه إصلاح و ان العرب تعبانين جدا و مفيش فايده و انه لازم يقتنع ان اليهود يتعاونوا مع بريطانيا عشان يبقي فيه وطن قومي لليهود. و طبعا تاثير اليكس و فاينبرج عليه كان حاسم. 

الحقيقه الكلام ده كله لسه مستمر. فعلا في ناس في اسرائيل عاوزين سلام مع العرب. لكنهم واقعين تحت تاثير اليكس و فاينبرج المتطرفين. و فعلا اليهود شايفين انهم ميقدروش يثقوا في العرب او اي حاكم عربي (انت لو مكانهم هل تثق في أي حاكم عربي؟) و معندهمش استعداد يضيعوا وقتهم بيجروا ورا جهل و سراب و في مقابل كده يضيعوا حياتهم. و لسه يهود امريكا مش مقتنعين أو بعضهم علي الأقل شايف ان اسرائيل بتروح لبعيد جدا ضد العرب، بالضبط زي الوضع وقت الحرب العالميه الاولي. و ربما الوحيد اللي استغل الفجوه دي بين يهود امريكا و اسرائيلين أنور السادات زي ما شفنا قبل كده (مصدر ٩). و لسه المتطرفين الاسرائليين هم اللي بيحكموا. 

الصوره من مستعمره زكرون التي أسسها و عاش فيها أرون و أسرته. 

و نكمل. 

#سايكس_بيكو

#صفحات_مخفيه

المصادر:

———-

١- الحلقات السابقه مجمعه من صفحات مخفيه من تاريخ مصر:

https://jawdablog.org/category/التاريخ/صفحات-مخفيه-من-التاريخ/

٢- كتاب صعود عائله روتشيلد، الكونت كورتي:

http://www.todayifoundout.com/index.php/2015/01/richest-family-world-rothschild-family/

٣- مجموع الأصول في العالم:

http://www.zerohedge.com/news/2013-06-02/its-1-world-who-owns-what-223-trillion-global-wealth

٤- أصول استثمارات الدول العربيه:

http://www.swfinstitute.org/fund-rankings/

٥- مدخولات النفط و الغاز العربيه:

https://jawdablog.org/2015/08/03/myth56_where_is_oil_income/

٦- مذكرات أرون أرونسون:

https://books.google.com/books/about/Reliquiae_Aaronsohnianae.html?id=-IL9PgAACAAJ

٧- وقائع حرب ١٩٤٨:

https://en.wikipedia.org/wiki/1948_Arab–Israeli_War

٨- اسطوره عيد العلم:

https://jawdablog.org/2015/06/27/myth_52_knowledge_feast/

٩- صفحات مخفيه من تاريخ مصر: كامب ديفيد:

https://jawdablog.org/2015/10/19/hidden_pages_of_history_camp_david_accord/

https://jawdablog.org/2015/10/22/hidden_pages_of_history_camp_david_accord_2/

https://jawdablog.org/2015/11/19/hidden_pages_of_history_camp_david_accord_3/

https://jawdablog.org/2015/11/27/hidden_pages_of_history_camp_david_accord_4/

https://jawdablog.org/2015/12/02/hidden_pages_of_history_camp_david_accord_5/

https://jawdablog.org/2015/12/09/hidden_pages_of_history_camp_david_accord_6/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s