تعالوا نتعلم الاقتصاد بسهوله … مين السبب في ازمه الدولار؟

lets_understand_economy_dollar_value_and_how_the_central_bank_reduced_it (1)

في السلسله دي بنحاول نفهم مبادئ الاقتصاد المكلكعه باسلوب بسيط (الحلقات السابقه كلها في مصدر ١). النهارده حنتعلم و نفهم موضوع سعر الدولار.

في ارقام كده لازم تحفظها كده عن ظهر قلب.

الرقم الاول هو مصر بتستورد بكام. كل شهر مصر بتستورد سلع بحوالي ٤,٥ مليار دولار او بحوالي ٥٥ مليار دولار في السنه. يعني كل طلعه شمس مصر بتدفع للعالم ١٥٠ مليون دولار تكاليف الحاجات اللي بنستوردها. الرقم ده ثابت بقاله فتره طويله باستثناء سنه ٢٠١٥ جينا فجأه في شهر واحد استوردنا بحوالي ٧ مليار دولار و معظمها راح في سيارات و سلع كماليه و لو تفتكروا ده وقت الرز لما دخل جامد و السيسي كان عاوز يفهمنا اننا أغتنينا (مصدر ٢).

ets_understand_economy_Who_caused_Dollar_Issue2

بس بصفه عامه كل يوم مصر لازم تدبر ١٥٠ مليون دولار عشان نعرف نآكل و نشتري لبس و المنتجات الصينيه الأخري.

الدولارات دي بتيجي من ٤ مصادر رئيسيه: التصدير، قناه السويس، تحويلات المصريين في الخارج و السياحه. لو المصادر الاربعه دول كفوا يبقي مصر معاها دولارات كفايه و سعر الدولار يفضل ثابت. لو المصادر دي مكفتش يبقي مفيش دولارات بس طبعا لازم نأكل يبقي لازم يحصل ازمه دولار.

يبقي الرقم التاني هو التصدير. مصر بقالها سنين طويله بتصدر بحوالي ٢,٥ مليار دولار في الشهر او بحوالي ٣٠ مليار دولار في السنه. الكلام ده ثابت بقاله سنين. حتي وقت الثوره و وقت د مرسي فضل ثابت الرقم ده.

من سنه ٢٠١٣ لحد دلوقتي و التصدير عمال يقل باستمرار (الصوره الاولي) لحد لما وصل ١,٥ مليار دولار في الشهر دلوقتي. 

ets_understand_economy_Who_caused_Dollar_Issue

يعني نزل حوالي ٤٠٪ في ٣ سنين.

يعني بدل ما بنصدر ب ٣٠ مليار بقينا بنصدر ب ١٨ مليار دولار في السنه بس.

الرقم التالت هو الدخل من قناه السويس. و ده ٥ مليار في السنه مش بيتغير. بالعكس عمال ينقص شويه صغيرين بسبب التباطؤ الاقتصادي في الصين.

الرقم الرابع هو الدخل من السياحه و ده كان لحد ٢٠١٣ حوالي ١٠ مليار في السنه. دلوقتي نزل جدا بس مفيش ارقام معلنه عنه لكن حنشوف ازلي حنوصله.

الرقم الأخير هو تحويلات المصريين في الخارج و ده كانت عادته يكون من بعد الثوره حوالي ٢٠ مليار دولار في السنه. لكن برضه نزل و حنشوف ازاي حنقدر نعرف الرقم دلوقتي.

تعالوا نحسب بقي:

—————-

في الأحوال العاديه:

داخل لنا في السنه: ٥ مليار من القناه. ٣٠ مليار تصدير. ٢٠ مليار تحويلات مصريين في الخارج. و اخيرا ١٠ مليار سياحه. يعني داخلنا حوالي ٦٥ مليار دولار. بنصرف منهم حوالي ٦٠ مليار استيراد. و الباقي بنحطه احتياطي للزمن. او ساعات نستورد زياده شويه. 

يعني الدولار اللي داخل قد او أكتر من اللي طالع. و بالتالي مفيش ازمه دولار و سعر الدولار يبقي ثابت و مش محتاجين نشحت من حد.

في الازمه السيساويه (علي وزن الازمه المستنصرية):

داخلنا في السنه: ٥ مليار قناه زي ما هما. ١٨ مليار تصدير بس (مين اللي بيقفل المصانع و بيدي أراضيها للجيش و الامارات؟ أكيد مش الثوريين و لا الشباب و لا الشعب المصري. السيسي و الجيش هو اللي بيعمل كده).

البنك المركزي أعلن (الصوره الثالثه) ان العجز في الدولارات في مصر وصل انه ٥ مليار دولار كل ربع سنه. يعني عشرين مليار دولار في السنه (مصدر ٣).

ets_understand_economy_Who_caused_Dollar_Issue3

معني كده ان السياحه و التحويلات بقوا ١٧ مليار دولار بس بدل ما كانوا ٣٠ مليار. يعتي نزلوا النصف.

هل احنا اللي ضربنا الطياره الروسيه؟ هل احنا اللي قعدنا نتلاعب و نستذكي مع الروس و نقول لا مش ارهاب؟ هل احنا اللي قتلنا باولو ريجيني؟ هل احنا اللي استنصحنا مع إيطاليا في موضوعه؟ لا.

يبقي دور مين اللي استنصح و هو اللي مسئول ان السياحه نزلت النصف.

و دور مين اللي طلع قال الدولار حيبقي باربعة جنيه و مين اللي عينه. لان هوه ده اللي مسئول ان تحويلات المصريين نزلت النص بان مفيش مصري حيحول دلوقتي و هو عارف انه لو استني شويه حيحول بسعر اعلي. اللي بيدير الاقتصاد دلوقتي مش جوده. و لا شباب الثوره. و لا الاخوان المسلمين. اللي بيدير الاقتصاد هو السيسي و الجيش.

Dollar_will_reach_$4LE

السيسي و الجيش طيروا ١٢ مليار دولار كانوا بيجوا من التصدير.

السيسي و الجيش طيروا ١٥ مليار دولار كانوا بيجوا من تحويلات المصريين في الخارج و من السياحه.

لذلك مصر بدل ما تبقي عايشه بقت دلوقتي بتشحت و محتاجه ٢٠ مليار دولار معونات كل سنه بس عشان سعر الدولار يثبت.

لذلك معونه محمد بن زايد بتاعه ال ٤ مليار دولار دي حتكفي بس شهرين و نص يعني تقريبا لحد لما السيسي يعدي ٣٠/٦ اللي جاي!

و ده بس عشان سعر الدولار يفضل زي ما هوه.

العجز ده وقت د مرسي كان في طريقه ينصلح و يقفل الفجوه دي لكن جه السيسي و قلل التصدير و زاد العجز في الحساب المصري الجاري باستمرار لحد لما وصل ٥ مليار دولار كل ٣ شهور بدل لما وصل صفر وقت د مرسي!

و ده ايه مع وجود فلوس الرز كمان.

و للاسف لسه بقي فوايد الديون المتلتله مدخلتش لان كلها ديون بالدولار و حيجي وفت لازم تتدفع.

ازمه سيساويه و الله. ده حيكون اسمها في كتب التاريخ.

و لو عاوز تقرأ الموضوع أكتر اقرأ السلسله اللي عملناها قبل كده فصصنا فيها ميزان المدفوعات المصري (مصدر ٥).

المصادر:

——–

١- تعالوا نفهم الاقتصاد …. السلسله مجمعه:

jawdablog.org/category/الإقتصاد/حلقات-تعالوا-نفهم-الاقتصاد/

٢- مكونات الاستيراد في مصر:

https://jawdablog.org/2016/01/13/lets_learn_economy_import_export_in_egypt/

https://jawdablog.org/2016/01/14/httpjawdablog-org20160113lets_learn_economy_import_export_in_egypt/

٣- ارقام العجز في ميزان المدفوعات المصري:

http://www.tradingeconomics.com/egypt/current-account

٤- تحليل ميزان المدفوعات في مصر:

https://jawdablog.org/2015/10/26/lets_learn_economy_what_is_happening_for_dollar_versus_pound_1/

https://jawdablog.org/2015/10/27/lets_learn_economy_what_is_happening_for_dollar_versus_pound_2/

https://jawdablog.org/2015/10/28/lets_learn_economy_what_is_happening_for_dollar_versus_pound_3/

https://jawdablog.org/2015/10/29/lets_learn_economy_what_is_happening_for_dollar_versus_pound_4/

https://jawdablog.org/2015/12/30/lets_understand_economy_dollar_value_and_how_the_central_bank_reduced_it/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s