و ام الهول كمان يا نظام عره؟

Sphinx_Wife

عارفين ايه أكتر حاجه مضايقه الطبقه الوسطي في مصر اللي ايدت السيسي؟ الطبقه بتاعه كبار الموظفين و موظفي البنوك و العقيد و العميد في الشرطه و أستاذ الجامعه اللي بيدي دروس و بيسافر الخليج و كان عاجبه نظام السيسي لانه حيخلي مصر زي دبي؟ أكتر حاجه مضايقاهم ان نظام السيسي عرهم. الناس دي مش هامهم ان قناه السويس فنكوش. و فعلا اقتنعوا ان المهم نبقي كده. مش مشكله ان الف واحد ماتوا في رابعه. هم كانوا يعني من بقيه عيلتنا و لا من شلتنا. دول حتي كلهم كانوا ريحتهم وحشه زي ما بيقولوا. الناس دي مشكلتها مع السيسي بدأت من تيران. و مش عشان الارض و العرض. يعتي لو كان أتنازل عنها للاتحاد الاوروبي مكنش حتبقي مشكله زي ما أتنازل قبل كده لقبرص عن الغاز. و حتي في موضوع نهر النيل و التنازل لاثيوبيا الناس دي تقولك مين عارف حيحصل ايه و بعدين ده حيحلي الميه. لكن التنازل عن تيران للسعوديه كشفهم قدام نفسهم. ان الالاطه المصريه قدام الخليج خلصت خلاص. و ان مصر بتدي ارض في مقابل الممم (الأكل يعني). 

و حتي دي كان ممكن تعدي و فيه منهم مجموعه كانت بتقول شويه صحرا و يمكن في أسباب استراتيجيه و أكيد الموضوع فيه أنّ بالشده. و كان ممكن تعدي الموضوع. 

لكن مظاهرات السيسي في يوم ٢٥ ابريل عرتهم قوي. ده طلع ناس شايله علم السعوديه و تقولك كمان الملك سلمان يطلب و احنا نديله. و لو طلب الاهرامات و ابو الهول و ام الهول كمان. الناس دي فجأه اكتشفت انها في معسكر واحد مع طبقه هي عاوزه تنكر وجودها دائماً. الطبقه الوسطي دي دائماً عاوزه تفهمنا ان مصر زي السويد و انه عندنا (بالأخص عندهم عند الطبقه دي بي) أفظع عقول و احسن شباب و أذكي أطفال، الخ. و فجأه اكتشفوا انهم بيطبلوا للسيسي بالضبط زي الست بتاعه ام الهول (مصدر ١) و انهم وصلوا ان مفيش فرق بينهم و بين الست دي. و ان مصر بقت بلد عرّه و ان تصرفات السيسي و رجالته كل يوم بتخليها عره أكتر. و ان رجاله السيسي بينزلوا بلطجيه بعلم السعوديه و مستعدين يبيعوا كل حاجه مش مشكله. حتي العاهره بيبقي عندها حد ادني من الاحترام انها تكره يتقال عليها انها عاهره! و كل ده عشان شويه فلوس من بلد بتعتبرها الطبقه الوسطي المصريه انها ادني من مصر! 

الطبقه دي اكتشفت دلوقتي قد ايه هي بقت عايشه و مواطنه في دوله جعلها نظام السيسي عره! و ان وزير خارجيتها اقصي طموحاته انه يتخانق مع ميكروفون. و ان سمعتها في العالم بقت انها دوله ديكتاتوريه بشكل بقي مفروغ منه جدا. و ان خناقه انقلاب و لا ثوره دي اللي الطبقه الوسطي اتحمقت فيها قوي العالم كله تجاوزها و بيقولك انقلاب و ديكتاتوري قمعي و انه مفيش اي مصري يقدر يروح اي بلد في العالم الا يخبط في الكلمتين دول: قمعي ديكتاتوري. 

الطبقه الوسطي المصريه دي لانها مهزومه في كل حاجه ومعمرهاش حققت اي انتصار في اي حاجه و لا حتي في تنس الطاوله، الطبقه دي عندها استعداد انها تتباهي بالشياكه في اي شيئ و لو قشور و تضخمها جدا و تعمل من الحبه قبه و كمان تصدق نفسها. 

يعني الطبقه دي معندهاش مشكله تقولك جون مجدي عبد الغني في كاس العالم ١٩٩٠ اللي هوه جه من بنالتي و مفيش اي شعب تاني في العالم فاكره. معندهاش مانع لما ينزل مصري مغترب في الخارج انها تاخده تفرجه مثلا مركز شباب الجزيره و الماريوت و الأوبرا و كارفور و طريق مصر-اسكندريه و تقوله انت رأيك ايه في كل ده مش زي أوروبا برضه؟ و لما الرد يجي لا مغزي أوروبا لان ده طريق واحد بس و مبني واحد بس لكن أوروبا كل الطرق كده و كل المباني كده و احسن من كده، الطبقه دي تزعل جدا جدا. و يمكن تعمل خناقه كمان عشان الراجل المصري المغترب ده خلاص بقي اجنبي و اتبري من الوطن و جاحد لافضال مصر عليه. 

الطبقه دي فرحت قوي بمؤتمر شرم الشيخ مع اننا قلنا ده اي كلام و ملوش نتيجه (مصدر ٢). فرحوا بيه عشان شوفت الشباب و البنات مظهرهم مشرف ازاي. شوفت الستائر و البلتكانات. شوفت شرم الشيخ حلوه ازاي. تحيا مصر. 

الطبقه دي لصقت في موضوع قناه السويس في خبر نشرته فيتو جيت التابعه المخابرات ان فرنسا رفعت علم مصر فوق قوس النصر و ده محصلش إطلاقا! لكن الطبقه دي سابت ان جنرال بيفتح مشروع فاشل ببدله عسكريه متقمص شخصيه السادات زي ما شاف في الحلم و ان ده راجل مجنون و ان ده مشروع ملوش اي لزمه. سابوا كل ده و مسكوا ان طالما فرنسا رفعت علم يبقي مصر دخلت في الدول المتقدمه! 

الطبقه دي فشلت كجماعة في تحقيقات شيئ. الطبقه دي بتحكم مصر من ١٩٥٢ بالتعاون مع الجيش بعد لما أزاحوا طبقه الباشوات ملاك الاراضي. و أخدوا مصر ورده مفتحه و خلوها تشحت من اللي يسوي و اللي ما يسواش. و الاغلبيه ما تسواش. و كمان حطوا ولادهم في كل المراكز الممكنه بالواسطه و اسسوا لنظام الفساد بالتعاون مع الجيش. الطبقه دي معظمها انتهازيه جدا. اول ما اي ضرب يحصل تطلع علي دبي او أوروبا او تدور علي هجره. الطبقه دي بتتكلم عن حقوق الانسان و الحيوان كمان لكن هي قصدها حقوقها هيا مش حقوق اي إنسان.

الطبقه دي هي اللي قالت شفت محافظ اسكندريه الجديد “شيك” ازاي. ! قلنا ده حيفشل فشل كامل (مصدر ٣). لكن المخمليه شيك. و ادوله فرصه. 

الطبقه دي مشكلتها مع البنت اللي راحت الأوسكار مش انها راحت بواسطه من ابوها اللواء. إطلاقا. مشكلتها انها متكلمتش انجليش لانجواش كويس (مصدر ٤). 

لكن للاسف قدرنا اننا لازم نعيش مع الناس دي. و لازم نوعيهم. و لازم نسحبهم بعيد عن قياداتهم عشان مياخدوناش في داهيه. و دي مشكله الإسلاميين علي فكره انهم متخيلين معني ان الطبقه دي وحشه اننا نخلص عليها مثلا. مينفعش الكلام ده. بالعكس احنا نعمل زي اردوغان و نسحب تأييد و لو حتي نص الطبقه دي من القيادات الفاشله الفاسده بتاعتهم. الناس دي عاوزه حريات و ضمانات. احترام و حريه اقتصاديه و برستيج في الحكم. اديهم كل الكلام ده. 

لذلك احنا عاوزين منكم ان تاخذوا الفيديو اللي في مصدر ١ و تحطوه في وش كل واحد أيد السيسي. شير عشان تحسسه قد ايه السيسي و نظامه عره. دي نقطه مهمه جدا علي الطريق. خليكم معانا. 

و بقيه حلقات كسر الانقلاب في مصدر ٥. 

#كسر_الانقلاب

المصادر:

——–

١- نظام عره:

https://twitter.com/abufmb/status/724597246986190848/video/1

٢- توقعات مؤتمر شرم الشيخ:

https://jawdablog.org/2015/03/07/egypt_taboo_41_economy_conferences/

٣- اسطوره الشياكه عند المصريين:

https://jawdablog.org/2015/02/11/egypt_taboo_38_look_cool_in_egypt/

٤- مشكلتنا مع تغطيه الأوسكار: 

https://jawdablog.org/2016/03/11/the_oscar_lady_from_egypt/

٥- كيف تكسر الانقلاب بأساليب القرن ٢١:

https://jawdablog.org/category/الانقلابات-العسكرية/كيف-تكسر-الإنقلاب/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s