Sphinx_Wife2

من أكتر الحاجات اللي كنا خايفين منها ان السيسي يطلع نظام ديكتاتوري ذكي. زي مثلا مبارك. نظام ديكتاتوري اه. لكن عامل شكل ديمقراطي يبان بيه كويس قدام العالم. و كمان سامح بحريات بس مش قوي. لذلك لو جه عليه ضغوط عالميه ممكن انه ينفسها بانه يفتح حريات أكتر شويه. يعني يسيب نقابه و لا اتنين. يسيب كرسي مجلس شعب و لا تلاته. يسيب محمود سعد يطلع في التلفزيون المصري الرسمي يشتكي و يقول كفايه كده. يسيب دعاء لحسين الجسمي يقول فيه “ربي انا خايف من العذاب”. و كمان مبارك كان دائماً حريص انه يخلي كل خصومه متخانقين مع بعض. يدي الناصريين جرايد و مجلات و فلوس و يهيجهم ضد الإسلاميين. و بعد مره واحده يدي الإسلاميين نقابه المحاميين و يتفرج عليهم بيشتموا في الناصريين و هكذا. فضل نظامه قاعد معانا ٣٠ سنه لحد لما الموسيقي وقفت و حصل كذا عامل (مصدر ١):

١- تردي الأوضاع الاقتصاديه. طبعا جمال مبارك كان متخيل انه عبقري زمانه. لكن الازمه الاقتصاديه العالميه ٢٠٠٨ جت قفلت كل الورق اللي كان بيلعب بيه. سوء الأوضاع الاقتصاديه ده بيحرك الفقرا. لكن لوحدهم مش بيعملوا حاجه لانه جسد من غير رأس. 

٢- اتحاد القوي السياسيه المصريه من البرادعي للإخوان تحت مظله واحده هي الجمعيه المصريه للتغيير. و مبقتش لعبه التفريق بتنجح. كمان الطبقه الوسطي اللي هي الراس لقت انه في طريق مختلف. في حل. في أفق للتغيير. الطبقه دي فيها وكلاء الوزارات و عمداء الكليات و لواءات الجيش و الشرطه. كلهم حسوا ان سكه مبارك خلاص بتخلص. و سكه ابنه مش شغاله و مش سالكه و مش عاوزينها و في سكه تانيه اسهل و تخليهم يرفعوا رأسهم بدل ما تبقي مصر بالتوريث زي سوريا. خد بالك الشياكه عند الطبقه دي مهمه قوي (مصدر ٢). 

دي طبقه مثلا سابت ان صحفيه راحت غطت الأوسكار بالواسطه و مسكت انها مكانتش مشرفه لمصر عشان مش بتتكلم انجليش كويس. 

و الطبقه دي لقت ان مجلس ٢٠١٠ بيضيق عليها كل حاجه اتعودوا مع مبارك عليها. يعني اتعودوا شويه حريات. جه مجلس ٢٠١٠ خدها كلها.

الطبقه دي معندهاش مانع ان مبارك يقمع الإسلاميين الفقرا. لكن اهم حاجه ان لو واحد من الطبقه دخل قسم انه يتعامل باحترام. و طبعا جه خالد سعيد و هو من الطبقه و شكله كويس و اكتشفت الطبقه دي ان نظام مبارك ٢٠١٠ و بعدها لازم تكون مرتبط معاه بربطه دم او لجنه السياسات عشان تعدي. 

٣- في ٢٠١٢ القوي الرجعيه في المنطقه في الخليج و ورآها اسرائيل و اليمين الصهيوني الامريكي كانوا في حاله عدم تصديق. و طبعا و جود رئيس تقدمي زي اوباما خلاه يتخلي عن مبارك بمنتهي السهوله. 

٤- ثوره تونس أدت المصريين امل و كانت عدوي دون شك. و دي حاجه ثابته في نظريات التحول الديمقراطي ان حدوثها في بلد بينقلها للبلاد اللي جنبها. 

كنا خايفين جدا ان نظام السيسي يطلع بذكاء نظام مبارك بتاع ١٩٨١-٢٠٠٩. لكن الحمد لله طلع ديكتاتور و غبي في نفس الوقت. ممكن جدا ان اللي وراه في الامارات و اسرائيل بيخططوا للسيسي كويس. لكن هوه من الغباء انه مش عاوز يسمع الا نفسه. 

تعالوا نشوف كده في العوامل الاربعه بتوع التحول الديمقراطي:

١- تدهور اقتصادي. و ده واضح تماماً. و علي فكره احنا لسه في بدايته. لسه قمه الضغوط التضخميه (زياده الاسعار) حتحصل لما ديون القناه تستحق الدفع و تدي الناس فلوس و بدون عايد. و ده في تقديرنا حيحصل لسه في ٢٠١٧ (مصدر ٣). 

ده حتي رافض يغير رئيس الوزرا اللي هوه نفسه بيقول عليه الصايع الضايع. 

٢- كنا دائماً بنقول مش حتقوم ثوره الا لما من أطلقنا عليه محمد خليفه (الاسلامي) و من أطلقنا عليه شيرين الغرباوي (الليبرالي) يتحدوا مع بعض. لازم. مفيش حل تاني (مصدر ٤). 

امبارح ٦ ابريل و الاخوان المسلمين حطوا بيانات في منتهي الوحده و العقل. ان إنقاذ مصر اهم من كل شيئ. و ان التخلص من الديكتاتوريه هو الهدف الاول. 

و طبعا الطبقه الوسطي بتاعه الشياكه شايفه قد ايه النظام الموجود ده عره. عره مع جوليو ريجيني و مع إيطاليا. عره حتي في مظاهراته انه منزل شويه بلطجيه بعلم السعوديه و يقولوا لو الملك سلمان طلب الهرم حتي ندهوله (مصدر ٥). و شايفين وزير خارجيه مصر بيفش غله في ميكروفون او يبعت رقاصات في سوق برلين للسياحه. تصرفات عره من نظام عره. 

٣- لسه العالم بالذات الخليج و اسرائيل واقف ورا السيسي. لكن حتي حين. احنا من دلوقتي هدفنا نوريهم ان مصالحهم ذاتها هي ضد السيسي. 

و هم ابتدوا علي فكره. مقاله جيروزاليم اون لاين ان ايام السيسي معدوده جس نبض (مصدر ٦). و السيسي متطمنش الا لما جه سلمان و جه محمد بن زايد و جه اولاند و جه نائب ميركيل و جه كيري و جه حشد من الجنرالات الامريكان. و دول المعلن عنهم بس. 

علي فكره كل دول جايين يثبتوا ركبه. بعد شويه مش حيجوا لانه حيكتشفوا ان النظام ده مينفعش ركبه تتلصم. 

٤- و يبقي فاضل عامل واحد و هو عدوي من المنطقه. مين عالم. يمكن ليبيا. يمكن اليمن. يمكن سوريا. و ممكن احنا نفسنا نبقي المصدر و الأصل و ان عدوي تونس لسه معانا من ٢٠١١. 

احنا مش حنقول فاضل ايام و لا شهور. الأمور لسه حتاخد سنه و يمكن سنتين لحد ميعاد الانتخابات الجايه. لكن حنقول اننا لو استمرينا بالزخم ده حنشوف النهايه ان شاء الله. 

الهدف دلوقتي حاجتين:

١- إظهاره أكتر و أكتر انه نظام عره قدام الشعب المصري بالذات الطبقه الوسطي. 

٢- نسيب الجهل الاقتصادي يفعل فعله و قمه الفشل الاقتصادي جايه في ٢٠١٧-٢٠١٨ لما الديون حتبقي واجبه الدفع. 

٣- نفضل نتظاهر لحد لما اللي ساندينه يعرفوا ان الاستقرار اللي هوه واعدهم بيه مش حيحصل. و لما الجيش نفسه يفهم ان اما السيسي او بقاء امبراطوريه الجيش الاقتصاديه او بقائهم هم نفسهم علي قيد الحياه. 

الشرخ اللي اتكلمنا عنه من أسبوع (مصدر ٧)، السيسي بنفسه عمال يوسعه بالقمع و القتل اللي بيعمله النهارده ، و احنا بس هدفنا نساعده. 

#الثوره_مستمره

#كسر_الانقلاب

المصادر:

——–

١- عوامل سقوط النظم الديكتاتوريه:

https://jawdablog.org/2015/11/24/how_to_topple_the_coup_by_21st_century_methods_when_the_next_revolution_will_happen/

٢- اهميه الشياكه عند الطبقه الوسطي المصريه:

https://jawdablog.org/2015/02/11/egypt_taboo_38_look_cool_in_egypt/

٣- توقعات جوده الاقتصاديه:

https://jawdablog.org/2015/11/05/lets_learn_economy_questions_answers/

https://jawdablog.org/2014/12/28/suez_canal_certificates_jawda_analysis/

٤- حامد و محمد و شيرين و علاقتهم بالثوره:

https://jawdablog.org/2016/01/22/hamid_mihamed_shereen_and_their_relation_to_the_revolution/

٥- نظام عره:

https://twitter.com/abufmb/status/724597246986190848/video/1

٦- ايام السيسي معدوده:

http://www.jerusalemonline.com/news/middle-east/the-arab-world/report-egyptian-president-sisis-days-are-numbered-19945

٧- الشرخ في جدار النظام:

https://jawdablog.org/2016/04/16/today_is_a_new_step_egyptian_revolt

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s