أرون أرونسون الذي لا يعرفه احد …الحلقه ٤

Sykes_Pico_4

صفحات مخفيه من تاريخ مصر

سايكس-بيكو و الحرب العالميه الاولي و قيام الشرق الاوسط الحديث … الحلقه ٤

أرون أرونسون الذي لا يعرفه احد

—————————-

أرون أرونسون لعب اهم دور في تشكيل الشرق الاوسط اللي احنا عايشين فيه دلوقتي لدرجه انه من العجيب ان محدش يعرفه. طبعا حكومه اسرائيل كرمته و سمت ورده مخصوص باسمه (ارونسونيا) لتكريمه كعالم نباتات (كام ورده اتسمت بأسم عالم مصري؟) و كمان عملت متحف عشانه. لكن احنا كمان لازم نفهم دوره و نتعلم منه. 

في ٣ محطات مهمه في حياه أرون غير فيها كل تاريخ الشرق الاوسط. 

محطه الجراد

————-

في مارس ١٩١٥ المصايب كانت نازله علي الامبراطورية العثمانيه بشكل كبير. من ضمن الكوارث دي كان تفشي الجراد في فلسطين و سوريا بشكل محصلش قبل كده. 

يوم ٢٢ مارس ١٩١٥ قنصل اسبانيا في القدس أنتونيو دي لا سيرفا كان في مكتبه. و فجأه لقي الدنيا ضلمت (مصدر ١) كأن في كسوف للشمس. القنصل خرج في البلكونه لقي سحابه فوق القدس مغطيه الشمس تماماً. لما ركز في السحابه لقي انها ملايين من الجراد. الجراد ده كان بينزل اي قريه في فلسطين و يخلص عليها. مش بس بياكل الزرع، كان كمان بيشرب الميه من عيون الاطفال الرضع. 

جمال باشا كان حاكم سوريا (الكبري اللي وقتها بتضم الاْردن و فلسطين و لبنان و سوريا الحاليه). جمال باشا كان من جبهه الصعود و الترقي التركيه اللي كانت عاوزه تطور الامبراطورية. جمال كان عاوز فعلا يدخل أساليب حديثه. 

يوم ٢٧ مارس ١٩١٥ استدعي جمال باشا العالم اليهودي الشاب أرون أرونسون اللي كان وقتها و عمره بس ٣٩ سنه اهم علماء النباتات في العالم. أرون قابل جمال باشا و كان لقاء في البدايه صعب جدا لان أرون هاجم الجيش العثماني و قال ان احد اهم أسباب الازمه هي الجيش العثماني نفسه و انه أخذ كل الفلاحين في التجنيد الإجباري و ساب الارض بدون حراسه. 

جمال باشا بالعرق التركي طبعا معجبوش الكلام. و قال لارون: “ايه رأيك لو انا أعدمتك دلوقتي شنقا”. 

أرون رد عليه: “فخامه الباشا، لو حاولت حتلاقي ان وزني حياخد كل المشنقه و يكسرها. و حتتكسر بصوت عالي جدا لدرجه انه حيتسمع حتي في امريكا”

طبعا أشاره واضحه لكل أصدقاء أرون في امريكا. 

جمال باشا عجبته الاجابه. و عين أرون يبقي مسئول عن مكافحه الجراد في كل سوريا و فلسطين و أعطاه خطاب من جمال باشا نفسه يديله سلطات فوق الجيش العثماني نفسه. 

أرون اشتغل بجد في مكافحه الجراد. و كان بيلف فلسطين كلها يدي محاضرات. و البرنامج بتاعه كان انه:

١- يحفروا خنادق حوالين القري و يولعوا فيها نار عشان الجراد يبعد. 

٢- ان كل راجل و ست و طفل يلم ٢٠ كيلو من بيض الجراد عشان يدمروه. 

البرنامج ده فضل طول سنه ١٩١٥ و عمل فرق كبير جدا لدرجه ان أرون كتب في مذكراته ان واحده فلاحه عربيه قالتله: “ذاتنا ممنونين” يعني متشكرين علي اللي انت بتعمله معانا. أرون كتب ان ما كانش يتخيل أبدا ان العرب ممكن يشكروا يهودي (مصدر ٢). 

حمله مكافحه الجراد دي أدت أرون فرصه انه يلف فلسطين كلها من سينا للنقب للقدس للجليل الاعلي و يتعرف علي طبيعه الارض و الزراعه في كل فلسطين. و كمان أتعرف علي فين تجمعات الجيش العثماني و تحصيناته. المعرفه دي حتكون مهمه جدا بعدين. 

عبور سينا و اقتحام فلسطين

————————-

جيش اللنبي في مصر كان بيحاول يقتحم فلسطين عن طريق انه يدخل غزه. الجنرال اللنبي حاول مرتين يدخل غزه بهجوم مباشر من بورسعيد و بعدين العريش و بعدين غزه. و في كل مره كان العثمانيين بيصدوه بسبب ان تحصينهم في غزه كان قوي جدا. سقوط فلسطين في أيد الإنجليز طبعا غير مسار التاريخ. لان الإنجليز حاولوا يدخلوا تركيا نفسها في الحرب العالميه الاولي و النتيجه ان دلوقتي تركيا دوله مستقله و قويه. لو كان الإنجليز فشلوا في دخول فلسطين كنا بقينا في دنيا تانيه خالص في الشرق الاوسط. 

في يوليو ١٩١٥ كانت امريكا دوله محايده و كانت سفنها في بيروت بتجلي الرعايا الاجانب اللي عاوزين يسيبوا الامبراطورية العثمانيه. طبعا بيروت وقتها كانت سوق في تجاره المستندات المزوره. اي حد كان ممكن يشتري مستندات مزوره و يطلع علي السفن الامريكيه كأنه اجنبي طالما بيتكلم لغه اجنبيه. 

اخو أرون أرونسون كان اسمه اليكس أرونسون. اليكس دخل في خناقه مع القائمقام التركي و كان عاوز يهاجر بأي شكل. في نفس الوقت سكرتير أرون أرونسون و خطيب اخته (اسمها رفقه او بالعبري رفكا) و اسمه ابسالوم فاينبرج (عبد السلام فاينبرج بالعربي) كان معادي للعرب و الأتراك و بيكرههم كره شديد جدا. و اثر ده علي أرون و خلاه مقتنع انه لابد من التخلص من العثمانيين و ان سقوطهم حاصل لا محاله و انه لا بد من اقامه وطن قومي لليهود في فلسطين مكان الحكم العثماني. 

أرون أعطي أخيه اليكس كل التقارير اللي كتبها عن اوضاع الجيش العثماني في فلسطين. اليكس مثل انه امريكاني و اخته رفقه مثلت انها مراته و طلعوا علي السفينه الامريكيه يو آس آس دي موين اللي راحت من بيروت علي اليونان و من هناك أخذتهم علي مصر. اول اما اليكس وصل مصر راح مباشره علي المخابرات الحربيه البريطانيه في القاهره و طبعا معاه الكنز المهم. 

الكنز ده مش بس ادي الإنجليز فين تجمعات الجيش التركي. لا كمان وراهم ان طريق العريش غزه مش الطريق الوحيد لدخول فلسطين. الإنجليز مكانوش عارفين انه ممكن دخول فلسطين عن طريق بير سبع. كانوا خايفين ان العربيات حتغرز في الصحرا و انهم ميلاقوش ميه. لكن تقارير أرون أرونسون عن طبيعه الصحرا هناك ورتهم ان في اماكن العربيات ممكن تمشي فيها و ورتهم كمان اماكن الميه. 

طبعا ده ادي لحمله الجنرال اللنبي في فلسطين اللي هي لسه بتتدرس في كليات الحرب في العالم لانه بدخول بير سبع التف حوالين الجيش العثماني اللي كان مستنيه في غزه و حاصره تماماً هناك و هاجمه من الخلف و ده خلي فلسطين تسقط. اول ما فلسطين تسقط من السهل جدا بعد كده احتلال دمشق ذاتها بحكم قصر المسافات. 

لذلك دور أرون أرونسون في حياتنا دور تاريخي الحقيقه و العجيب ان محدش عربي يعرف او درس عنه حاجه. 

لقاء أرون أرونسون مع سايكس

—————————

أرون بعد كده هرب من فلسطين عن طريق مصر و بعدين وصل لندن نفسها. و يوم ٣٠ اكتوبر ١٩١٦ اتحدد له ميعاد انه يقابل سير مارك سايكس نفسه. 

سايكس كان راجل متدين كاثوليكي. و جزء من تدينه انه كان مقتنع ان عوده اليهود لفلسطين هو امر طبيعي لتصحيح اخطاء ٢٠٠٠ سنه (حنعلق علي الكلام ده و تطبيقاته الحاليه بعدين. عارفين انك حتنط و تشتم في المسيحيين و الغرب. أمسك نفسك دلوقتي). 

كمان سايكس كمسئول مهم في وزاره الخارجيه البريطانيه كان شايف ان اليهود في العالم مهمين و ليهم تاثير لكن كانوا كلهم متخانقين مع بعض و مش علي تحالف واحد و كانوا كلهم ضد التحالف بين بريطانيا و قيصر روسيا في الحرب لان روسيا طبعا كانت بتعذب و تقتل اليهود. لذلك فكره سايكس العبقريه كانت انه ممكن يوحد اليهود في العالم مع بريطانيا و روسيا اذا بريطانيا وقفت مع وطن قومي لليهود في فلسطين. و طبعا دي فكره مفيده جدا لقيصر روسيا عشان يخلص من اليهود اللي عنده. يعني كانت فكره تحل كل المشاكل (مصدر ٣). 

كتب أرون أرونسون في مذكراته ان اللقاء مع سايكس كان ٩٠ دقيقه و انه كان ممتاز. 

أرون حيقابل سير مارك سايكس بعدين. و مارك سايكس كلمه عن مشروع تغيير الشرق الاوسط و اقامه وطن قومي لليهود في فلسطين و ان التعاون بين اليهود و العرب ضد الأتراك حيكون هوه أساس التقدم في الشرق الاوسط. و دي ما زالت فكره محوريه في تفكير الجماعات المسيحيه المتصهينة في الغرب. 

دي المحطه التالته و الأخيره في تاثير أرون علي الشرق الاوسط الحديث. أرون بعد نهايه الحرب عزمه وايزمان انه يحضر مؤتمر فرساي للسلام. لكن أرون مات في حادث طياره و هو بيعدي بحر المانش في أتجاه فرنسا يوم ١٥ مايو ١٩١٩. 

العبر المستفاده من حياه أرون

————————–

١- دور العلماء شديد الاهميه في حياه الامم و الشعوب. احنا تعبنا و الله من الكلام في النقطه دي. مش بس دورهم العلمي لكن كمان دورهم السياسي. كام عالم مصري كان ليه إسهامات سياسيه؟ 

و كتبنا قبل كده ان الدوله المصريه تحتفل بما يسمي عيد العلم منظره فقط بينما الحقيقه هي دوله اصلها ضد العلم و العلماء من نشأتها لان العالم اللي بيدخل في السياسه في مصر حيكون ذكي و يسأل اسئله صعبه و ده يخلي الجيش الحاكم في مصر يبان شكله الحقيقي انه جيش كفته و دوله كفته. لذلك مصر طارده للعلم و مرحبه بالكفته (مصدر ٤). بينما اسرائيل دوله قامت من الأساس بمجهود العلماء زي أرون و زي وايزمان و زي ألبرت أينشتاين. و بعدين نزعل لما نقول انهم متقدمين و احنا متخلفين و يقولك ام الدنيا و ابوها و هذا الكلام الفارغ. 

٢- شخص ممكن يغير التاريخ. أوعي تستهون بحد او بمجهود. أرون غير مسار الشرق الاوسط كله. كان ممكن الإنجليز يفشلوا في الهجوم علي فلسطين زي ما فشلوا في الهجوم علي تركيا ذاتها. تخيل الدنيا كان حيبقي شكلها ايه دلوقتي. لا كان حيبقي فيه اسرائيل و لا وعد بلفور. دنيا تانيه. واحد عالم بس غير الدنيا. لذلك ده برضه يوريك ليه دوله العسكر بتكره العلماء و بتسجنهم و تطردهم و تموتهم كمان. 

٣- بنغلط قوي احنا لما بنفتكر ان الغرب كله بيفكر بشكل واحد. او ان اليهود كلهم علي قلب واحد. اليهود فيهم نتنياهو و فيهم بيرني ساندرز و راتشيل كوري. مهم قوي انك متزودش دايره اعدائك و تكبر دايره أصدقائك. 

لاحظ ان اخو أرون أرونسون اللي اسمه اليكس. او سكرتيره اللي اسمه ابسالوم فاينبرج مقالوش أرون ده ازاي بيشتغل مع العثمانيين. يبقي مجرم و خاين لليهود و لازم نضربه و نقتله و نخلص منه. بالعكس فضلوا شغالين عليه لحد ما حولوه. 

معسكر الشرعيه في مصر اي حد بيخونوه و اي حد بيبهدلوه. غباء سياسي منقطع النظير. و بعدين نزعل لما نفشل. مش لازم الناس تتفق ١٠٠٪ في الأهداف عشان تتحالف. ممكن في التحالف معاك يبقي فيه اللي كاره مرسي بس ضد العسكر. ممكن يبقي ضد الاخوان بس عاوز ديمقراطيه. بالعكس انت المفروض توسع هدفك و قاعدتك انها تكون مع الديمقراطيه ضد العسكر و ضد التخلف و نحو التقدم. 

٤- كام واحد عربي قابل مارك سايكس في لندن و قعد معاه ٩٠ دقيقه؟ محدش. كام واحد عربي ادي البريطانيين معلومات علميه لدخول فلسطين؟ بلاش. ادي الأتراك معلومات عشان يحافظوا علي فلسطين؟ محدش. و بعدين نقول هم ليه مش بيحترموا العرب و يدخلوهم في القرارات المهمه؟ لان هوه وزنك كده. و طول ما انت ضد العلم و العلماء و الديمقراطيه و مع الكفته حيفضل وزنك كده. 

٥- التداخل بين الدين و السياسه موجود في الدنيا كلها زي ما شفنا مارك سايكس كده. طبعا الا في مصر اللي بيبقي الموضوع ده فيها عيب! كتبنا احنا الموضوع ده قبل كده (مصدر ٥). 

٦- بس طبعا شفنا ان انشاء وطن قومي لليهود في اسرائيل مش بس كان عامل ديني. كان عامل سياسي مهم جدا كمان للحصول علي تأييد اليهود في العالم كله و حل مشكلتهم مع روسيا. 

٧- نقطه مهمه قوي قوي. احد اهم اسس السيطره علي الشرق الاوسط هي تكوين تعاون بين العرب و اليهود ضد الأتراك و الإيرانيين. او احداث تقسيمات علي ذات النغمه. يعني اتراك مع يهود ضد العرب. الخ. 

احنا شايفين قدامنا التحالف بين ابي ظبي و مصر و اسرائيل و اللي نتنياهو بيتكلم عنه بمنتهي السعاده (مصدر ٧). و شايفين انه موجه ضد الأتراك بشكل أساسي و ضد الإيرانيين كمان. و طبعا الأتراك بيحاولوا يحيدوا اسرائيل في هذه النقطه من خلال ارغامها علي الاعتذار عن أفي مرمره و علي فتح المعابر مع غزه (اللي مصر و يا للعجب رافضاه). 

للاسف كمان شايفين ايقاد نيران الفتنه بين المسلمين و الشيعه. كل ده بيصب في هدف واحد. ان الأتراك و العرب و الإيرانيين يفضلوا متخانقين في ال ٥٠٠ سنه الجايه و تفضل شعوبهم تعاني! 

مع ان التعاون بين الأتراك و العرب و الإيرانيين المفروض يبقي أساس استقرار المنطقه و التعاون ده ممكن يبقي سبيل التعاون و التعايش مع اليهود من موقع نديه مش موقع ضعف و تذلل. 

لذلك انت و انت بتشتم الشيعه و بتشتم الأتراك انت بتطبق بالضبط اللي مطلوب منك من سنه ١٩١٦. و اللي خلاك في البلاء اللي انت عايش فيه من ساعتها. من الغباء ان تستمر في نفس السياسه و تفتكر انها ممكن تديك نتايج مختلفه. من الغباء يعني. 

و نكمل في الحلقه الجايه موضوع الشريف حسين و خيانته للعثمانيين و لورانس العرب و ازاي لورانس توقع بالضبط مشاكل الشرق الاوسط كلها بس كان ضحيه لوزاره الخارجيه البريطانيه و ازاي انها كمان ضحكت علي الشريف حسين جد جد ملك الاْردن الحالي. 

و الحلقات السابقه كلها في مصدر ٧. 

انتظرونا عشان الموضوع حيحلو جدا. 

#صفحات_مخفيه

#سايكس_بيكو

المصادر:

———

١- لورانس العرب:

https://books.google.com/books/about/Lawrence_in_Arabia.html?id=99NTgkPUh9AC&printsec=frontcover&source=kp_read_button&hl=en#v=onepage&q&f=false

http://www.nytimes.com/2013/09/09/books/scott-andersons-lawrence-in-arabia-revisits-legends.html

٢- مذكرات أرون أرونسون:

https://books.google.com/books/about/Reliquiae_Aaronsohnianae.html?id=-IL9PgAACAAJ

٣- مذكرات سايكس:

http://www.amazon.com/Caliphs-Last-Heritage-Middle-collection/dp/0405053614/ref=asap_bc?ie=UTF8

٤- اسطوره عيد العلم في مصر:

https://jawdablog.org/2015/06/27/myth_52_knowledge_feast/

٥- اسطوره لا دين في السياسه:

https://jawdablog.org/2014/09/28/egypt_taboo_6/

٦- التحالف الحالي بين العرب و اليهود في الشرق الاوسط: 

https://www.facebook.com/jawda.org/posts/1037760576294155:0

٧- الحلقات السابقه:

https://jawdablog.org/category/التاريخ/صفحات-مخفيه-من-التاريخ/



Categories: اتفاقيه سايكس بيكو

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: