ليه المصريين بيتحرشوا بالنساء و يضربوهم و بيميزوا ضد السودانين و الافارقه و اي حد غريب و فقير؟

kwakbi_31

سكه الكواكبي … الحلقه ٣١

————————-

الواحد لازم يقف قدام ظواهر مهمه جدا في مصر بتعدي من غير ما بنفكر فيها لحد ما بتبقي عاديه جدا في حياتنا. مثلا ليه المصريين عندهم تعالي مع السودانيين و الافارقه؟ ليه لما السودانيين اللاجئين اعتصموا في ميدان مصطفي محمود في المهندسين حتي الناس العاديه قالت لازم نخلص منهم و ده ادي شرعيه ان الشرطه تدخل و تقتل حتي الاطفال (مصدر ١). هل ده من الدين؟ هل ده من الاخلاق؟ هل ده من الحضاره؟ إطلاقا. 

و علي فكره التمييز ده موجود ضد الكويتين مثلا في حرب الخليج لما بدا انهم افتقروا. شيئ غريب. و كلنا عارفين نظره التعالي في مصر ضد عرب الخليج مثلا. و اللي مانع اي تصرفات ضدهم هو فقط الفلوس. هل مثلا البريطانيين بيتعالوا علي الاستراليين و بيعتبروهم محدثي نعمه مقارنه بحضاره بريطانيا القديمه؟ هل البرتغاليين بيبصوا للبرازيليين أنهم اقل منهم عشان هم دوله حديثه و البرتغال هي اللي عملتها؟ هل بيقولوا لهم انتم يا ولاد امبارح فلوسكم دي جت من البترول و احنا الأصل و خيرنا عليكم؟ احنا اللي عملنالكم دوله. ما حصلش؟ 

ظاهره تانيه مهمه جدا. التحرش بالنساء. مصر اعلي دوله في العالم في التحرش بالنساء (مصدر ٢). هل ده بس بسبب الكبت الجنسي؟ أكيد عامل. لكن مش عامل وحيد. لان الكبت برضه موجود في دول تانيه كتير. مش بس كده. استخدام العنف في اي حاجه. عبارات زي: “قابلني بره”، “حأوريك”، الخ. كلها تهديدات بالعنف. مش بس كده استخدام العنف في تسويه اي نزاعات. يعني تأجير بلطجيه. تأجير حراسه. الخ. 

كل دي ظواهر مش موجوده في العالم المتحضر او اللي عاوز يتحضر. لكن مستشريه جدا في مصر. 

تعالوا نشوف الاستاذ الكواكبي بيقول ايه عن الموضوع ده من اكثر من ١٠٠ سنه:

“ومن غريب الأحوال أن الأسراء يبغضون المستبد، ولا يقوون على استعمالهم معه البأس الطبيعي الموجود في الإنسان إذا غضب، فيصرفون بأسهم في وجهة أخرى ظلما: فيعادون من بينهم فئة مستضعفة، أو الغرباء، أو يظلمون نساءهم ونحو ذلك. ومثلهم في ذلك مثل الكلاب الأهلية، إذا أريد منها الحراسة والشراسة فأصحابها يربطونها نهارا ويطلقونها ليلا فتصير شرسة عقورا، وبهذا التعليل تعلل جسارة الأسراء أحيانًا في محارباتهم، لا أنها جسارة عن شجاعة. وأحيانً تكون جسارة الأسراء عن التناهي في الجبانة أمام المستبد، الذي يسوقهم إلى الموت

فيطيعونه انذعارا كما تطيع الغنمة الذئب فتهرول بين يديه إلى حيث يأكلها.”

يعني بصراحه كده الاستبداد بيخلينا ناخد البردعه و نتشطر عليها. اي فئه مستضعفه بنضربها. فقير ممكن. ستات ميضرش. سودانيين. مش عيب. كل ده نتاج الاستبداد. لذلك تلاقي الدول الحره الظواهر دي بتختفي منها. 

#سكه_الكواكبي 

و الحلقات السابقه كلها في مصدر ٣. و كتاب الكواكبي طبائع الاستبداد و مصارع الاستعباد في مصدر ٤. 

الاستبداد أصل مشاكلنا. 

المصادر:

——–

١- فض اعتصام اللاجئين السودانيين في مصر:

http://www.alriyadh.com/119915

٢- مصر اعلي دوله في العالم في التحرش بالنساء:

http://www.smithsonianmag.com/ist/?next=%2Fsmart-news%2Fegypt-99-women-have-been-sexually-harassed-180951726%2F

٣- الحلقات السابقه مجمعه من سكه الكواكبي:

https://jawdablog.org/category/التاريخ/حلقات-سكة-الكواكبي/

٤- طبائع الاستبداد و مصارع الاستعباد:

http://www.assforum.org/web/pdf/mnhel/sciences%20sociales/30272530.pdf



Categories: حلقات سكة الكواكبي

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: