هل العرب و المصريين ربنا اختصهم بالاستبداد دونا عن بقيه البشر؟

Kwakbi_Way_30

هل للذل الذي نحن فيه قانون و هل للاستبداد و الديكتاتوريه أصول؟

سكه الكواكبي … الحلقه ٣٠

—————————

كتير مننا بيقول ان احنا المصريين مثلا شعب خاص جدا. طبعا في الناس بتاعه حضاره ٧ الاف سنه و و ذكر القرآن. الي اخره من الاوهام (ربنا ذكر ابي لهب في القرآن. و ذكر مصر للاسف كان في مواضع عظه و عبره. مع ملاحظه ان ربنا لم يجعل اي شعب مكرما علي شعب اخر الا بالتقوي. هذا المفروض موضوع منتهي). لكن احنا بنتكلم عن الناس بتاعه العكس من ده خالص. بتوع احنا مش بنيجي الا بالضرب. بتوع احنا بتوع الاستبداد. بتوع الشعب دي مش بيجي الا كده. اللطيف في الموضوع ان المصري ممكن يصحي الصبح بتاع حضاره ٧ الاف سنه و يوصل الضهر يكون قلب انه شعب مش بيجي الا بالضرب و بعدين بليل ممكن يرجع تاني ان مؤتمر شرم الشيخ حيخلي مصر احسن ناس و بعدين يقرب الفجر يقول ان احنا احسن من غيرنا في العالم! 

تعال الاول نشوف الاستاذ الكواكبي بيقول ايه في الموضوع ده. و الكلام ده لاحظ بيتقال من أكتر من ١٠٠ سنه! 

“على أن التدقيق العميق، يفيدنا بأن للأسراء، قوانين غريبة في مقاومة الفناء يصعب ضبطها وتعريفها، إنما الأسري يرضعها مع لبن أمه ويتربى عليها، وقدً يبدع فيها بسائق الحاجة، ويكون منهم الحاذق فيها علما، الماهر في تطبيقها عملا، هو الموفق في ميدان حرب الحياة مع الذل كالهنود واليهود. والعاجز عنها، إما جاهل هذا القانون أو العاجز فطرة عن أتباعه كالعرب مثلا، فلا يخرج عن كونه كرة يلعب بها صبيان الاستبداد، تارة يضربون بها الأرض أو الحيطان، وأخرى تتناولها أرجلهم بالصفعات، وهذا إذا كان عجز الأسري عن جهل، وأما إذا كان عجزه كما يقال عن عرق هاشمي، أي عن شيء من كرامة نفس أو قوة إحساس أو جسارة جنان، فيكون كالحجارة تتكسر ولا تلين. 

قوانين حياة الأسري هي مقتضيات الشئون المحيطة به، التي تضطره لأن يطبق إحساساته عليها ويدبر نفسه على موجبها، وذلك نحو مقابلة التجبر عليه بالتذلل والتصاغر، وتعديل الشدة عليه بالتلاين والمطاوعة وإعطاء المطلوب منه بعد قليل من التمنع ولو أن المطلوب هو ابنه لمجزرة الجندية أو بنته لفراش شيخ شرير، والمطالبة في الحقوق بصفة استعطاف كأنه طالب صدقة، وكسب المعاش مع شكاية الحاجة، وحفظ المال بإخفائه عن الأعيان، والتعامي عن زلات المستبدين،والتصامم عن سماع ما يهان به، والتظاهر بفقد الحس أو تعطيله بالمخدرات القوية كالأفيون والحشيش، وتعطيل العقل بالتباله وستر العلم بالتجاهل، والارتداء بالتدين والرياء، وتعويد اللسان على الزلاقة في عبائر التصاغر والتملق، وعزو كل خير إلى فضل المستبدين حتى إذا كان الخير طبيعيٍّا نحو مطر السماء، فعزوه إلى يمن الحكام أو دعاء الكهان. ويسند كل شر ولو من نوع التسلط على الأعراض، إلى الاستحقاق من جانب الله. إلى غير ذلك من أحكام ذلك القانون، الذي رءوس مسائله فقط تمل القارئ فضلا عن تفصيلاتها.”

بنشوف احنا كل التبريرات دي. يا خبر من ١٠٠ سنه نفس الكلام. 

هي دي قوانين الأسر. انك تمثل. انك توري انك ذليل. انك تصدق كل اللي بيتقالك عشان السبوبه. الممثلين بتوع الانقلاب زي الهام شاهين للاسف بتعمل كده عشان السبوبه بتاعه الخليج. هي للاسف أجيره. بالرغم انها بتروح نوادي و عايشه احسن حياه. في المقابل من ده تماماً عسكري الامن المركزي بيقتل الناس عشان يخلص التجنيد و ياخذ مكافأه او عشان بس محدش يضربه او يعذبه من الساده الضباط. 

قانون حياه الأسير انه يمثل السمع و الطاعه. ممكن يخرب املاك الدوله من ورآها. مش مهم. زي انه يقطع جلد الكراسي في الأتوبيس. المهم انه يمثل السمع و الطاعه. 

كمان بيمثل الاحتياج باستمرار. و يخبي الفلوس. علي فكره مفيش حد في العالم بيعمل الحركه دي. حركه متوارثه اما عن جده ان المصريين يخبوا الفلوس عن الناس و يتظاهروا بالفقر. مش موضوع حسد علي فكره. موضوع خوف ان الاستبداد او الحاكم الديكتاتور او الفتوه يجي ياخد الفلوس دي و يطمع فيها. و السبب اننا بنقول انه مش خوف من الحسد زي ما بنمثل ان مبتحصلش مثلا في الهدوم. او السجاد. او الستائر. بتحصل في الحاجات السائله اللي ممكن تتاخد. الدين دخل مع الفلكلور الاستبدادي. و ده شيئ محزن جدا لبلد زي مصر. 

حاجه كمان بيقولها الاستاذ الكواكبي هي تعطيل العقل و سماع الاعلام المصري مثلا و تصديقه. كتير من الناس ده هو الحل الاسلم اللي اتعودوا عليه عشان يتجنبوا شر الاستبداد. كلنا امهاتنا قالت لنا يا بني ابعد عن سكه الناس الوحشه دول اللي بيشتموا في الحكومه. ده امر اصيل في مصر هو الخوف من الاستبداد و التمثيل. هل الام دي مش عارفه ان الكلام بتاع السيسي ده حيودي في داهيه. مش عارفه انه ضد العلم؟ كتير من الأمهات عارفين ده و متاكدين منه كمان. لكن اتعودوا انهم بالطبيعة يبقوا اسراء و بيطبقوا قانون الأسر. 

المصيبه في كلام الكواكبي انه بيقول الهنود و اليهود فاهمين قانون الأسر و بيتعاملوا معاه كويس. الكلام ده من ١٠٠ سنه دلوقتي. شوف احنا بقينا فين و الهنود و اليهود بقوا فين. يعني ياريت كنا نفهم قانون الأسر زيهم كده. دي نقطه مهمه. افهم وضعك الحقيقي و تعامل معاه. الهنود فهموا وضعهم مع الإنجليز انهم اسري لهم و تعاملوا معاه و شوف بقوا ايه دلوقتي. اليهود فهموا وضعهم انهم اسري عند الروس (وقتها. يا خبر ابيض علي التغيير) و تعاملوا مع وضعهم. شوفوا بقوا فين دلوقتي. من أفقر و اذل ناس شوف وصلوا لايه. اليهود كانوا لاجئين في مصر في وقت من الأوقات. 

بس نقطه مهمه جدا هي اللي مش فاهم انه أسير للاسف بيتلعب بيه الكوره و بيتكسر. ده موضوع مهم. احنا بنمثل اننا مش اسراء. بتمثل اننا دوله مش تحت حكم عسكري. بنمثل اننا مش بنمثل اننا اسري عند الجيش المصري. و للاسف ده بيخلينا نفضل يتلعب بينا الكوره و نتكسر. من ١٠٠ سنه الكلام ده. من ١٠٠ سنه. 

لذلك احنا فعلا مختلفين و متميزين. ان العالم كله أتحرر. العالم كله يمكن باستثناء دول زي مصر و كوريا و الشماليه و سوريا و العراق و السعوديه و اللي زيهم. احنا بس اللي لسه. احنا بس اللي لسه بنمثل اننا مش مستعبدين. احنا متأخرين عن الهنود و اليهود ١٠٠ سنه. لأنهم بطلوا تمثيل و واجهوا الحقيقه. 

#سكه_الكواكبي

الصوره هي لاحتفال علماء الهنود و بينهم نساء (كان النساء مضطهدات في الهند سابقا) بالوصول الي كوكب المشتري. 

المصادر:

——–—

١- الحلقات السابقه من سكه الكواكبي:

jawdablog.org/category/التاريخ/حلقات-سكة-الكواكبي/

٢- كتاب الكواكبي الأشهر: طبائع الاستبداد و مصارع الاستعباد:

http://www.assforum.org/web/pdf/mnhel/sciences%20sociales/30272530.pdf

٣- عقوبات صارمه ضد التحرش من الجرايد المصريه:

http://www.bbc.com/arabic/middleeast/2014/06/140611_sisi_visits_harassment_victim

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s