تحليل علمي اولي لحادث اختطاف طائره مصر للطيران

Egypt_Air_MS181_Kidnapped2

اولا نريد ان نذكر الجميع ان موقع جوده كان اول من قال في العالم ان حادثه الطائره الروسيه كانت عمليه تفجير. و هذا لم يكن ضربا للودع و لا تحليل استراتيجي من بتوع تلفزيون مصر، بل كان تحليل علمي دقيق لكل البيانات المتاحه من اول ساعه للتفجير (مصدر ١). و بعد عده تحليلات توقفنا عن الكتابه في الموضوع لانه بعدها كله “زاط” و اصبحت الامور متاحه علي المشاع. و الزيطه و التهييج مش صنعتنا. 

تعالوا نمسك المعلومات المعروفه عن اختطاف طائره مصر للطيران رقم ١٨١:

١- اول حاجه تعملها لما تعرف ان في حادثه طيران انك تدخل علي موقع فلايت اوير (مصدر ٢) و تشوف مسار الطائره و ارتفاعها و امتي غيرت اتجاهها. 

————————

حتلاقي حاجتين. اولا ان مسار الطائره داخل مصر غير ظاهر لكن فلايت اوير عملت له تقدير estimation (فلايت اوير عندها برامج حتي لو ما اخدتش البيانات عن الطياره بتقدر بالتقريب تحدد مسارها. 

) و دي مشكله كبيره للطيارات جوه المجال الجوي المصري ان شبكه الرادار المصريه مش بتبعت لشركات زي فلايت اوير اي معلومات. و السبب انهم متخلفين. الحقيقه مش لاقيين كلمه تانيه خالص. لان شركه زي فلايت اوير بتدفع فلوس في مقابل البيانات دي و البيانات دي بتفيد المشتركين في العالم كله. لكن عقليه عسكريه متحجره بتحكمنا. 

اول ما الطياره سابت المجال الجوي المصري ابتدئ يجيلنا بيانات عن الطياره. البيانات دي جايه من رادارات مطار حيفا HFA و مطارات قبرص. و البيانات واضحه جدا من بعد ١٢ ميل خارج الاراضي المصريه اللي هي بره المجال الجوي المصري. 

الحاجه التانيه اللي حتلاقيها ان الطياره حولت مسارها وفقا لتقدير فلايت اوير مش علي طول بعد الإقلاع زي ما بيقول الاعلام. بالعكس دي حولت مسارها من اتجاه الجنوب الشرقي نحو القاهره و يبقي اتجاه الشمال الشرقي ناحيه قبرص الساعه ١:١٠ بتوقيت زولو. الطياره اقلعت الساعه ١٢:٣٦ بتوقيت زولو. يعني بعد ٢٤ دقيقه من الإقلاع. دي رحله كلها بتاخد نص ساعه. يعني الطياره فعلا كانت قربت من القاهره و دخلت ربما كمان مجال الهبوط علي مطار القاهره. 

حتي لو احنا مش مصدقين تقديرات فلايت اوير بص علي مسار الطياره و امتي دخلت مجال المراقبه بتاع مطار حيفا. حتلاقي بسهوله ان ده مش مسار طياره غيرت اتجاهها فوق اسكندريه. ده مسار طياره غيرت اتجاهها فوق الدلتا و قريبا من القاهره و خدت مسار الطائرات المتجهه شمالا لعبور البحر المتوسط و هو مسار محدد و معروف عالميا. 

لذلك توقعنا بناءا علي كده هو التالي:

——————————-

هذه طائره كانت قريبه من مطار القاهره جدا و كان يمكنها الهبوط في مطار القاهره و التفاوض مع الخاطف هناك. لكن في الأغلب الرياسه ذاتها في مصر أعطت تعليمات للطائره بالاستجابة للخاطفين و التوجه نحو قبرص او الوجهه المطلوبه. 

القرار ده منقدرش لسه نقول صح و لا غلط لانه يعتمد علي تقدير هل مع الخاطف فعلا حزام ناسف و لا لا و مدي خطوره التهديد علي حياه الموجودين. كمان ربما الرياسه في مصر ليس لديها ثقه في قدره الاجهزه المصريه علي التعامل مع عمليه اختطاف في مطار القاهره و تفضل ان تصدرها للاتحاد الاوروبي. 

٢- الحاجه التانيه اللي تبص عليها هو طراز الطياره و منها تعرف ايه علاقه تركيا بالموضوع 

—————–

هذه طائره من طراز ايرباس ٣٢٠. و هي طائره مداها حوالي ٦ ساعات طيران. لكن اي طياره عندها رحله نصف ساعه ممنوع انها تشيل وقود كتير لان الطياره لها وزن اسمه اقصي وزن الهبوط. يعني الطيارات مينفعش تهبط بوزن كبير و الا تسبب احتمال كسر في العجل عند الهبوط. Maximum landing weight. لكن كمان الطيارات مينفعش تطير شايله بس وقود نص ساعه. لازم يبقي فيه وقود إضافي احتياطي. عاده طياره دي دي فيها وقود يكفي ساعتين. 

يعني الطياره دي كانت تقدر تروح تركيا بسهوله جدا. و تنزل في اسطنبول كمان. 

لكن مسار الطياره (الصوره المرفقه) بيقول ان الطياره من وقت تحويل المسار عن القاهره متجهه أتجاه مباشر نحو قبرص. بالمناسبه المصريين مش عارفين النقطه دي و فاكرين قبرص و اسطنبول اتجاه واحد. غير صحيح. بص علي الخريطه. 

لذلك الطياره دي لم تكن تركيا أبدا علي خياراتها. دي طياره متجهه مباشره ناحيه لارناكا من ساعه ما غيرت مسارها. لذلك الاعلام اللي يقولك تركيا ده اعلام زياط و تبع المخابرات المصريه اللي عاوزه تحشر تركيا في كل مصيبه. 

٣- اخيرا احنا عارفين من الاعلام ان اسرائيل قالت ان مقاتلاتها رافقت الطياره المخطوفه 

————————–

طبعا ناس كتير زاطت في الموضوع. مع ان ده اجراء روتيني جدا بتعمله اسرائيل و بتعمله امريكا حوالين منشآتها الحيويه في امريكا و العالم. 

اي طياره مخطوفة بتبعت كود محدد و طبعا الاسرائليين لقطوا الكود و طبعا هم مش عاوزين جد يجي عندهم و يعمل تفجير زي ١١ سبتمبر. و بالتالي بيبعتوا مقاتلات عشان لو اي طياره قربت منهم يتعاملوا معاها. شيئ طبيعي جدا. ليه احنا بنتعامل مع العالم انهم مش فاهمين زينا؟ 

٤- اختيار توقيت الخطف و نوعيه الخاطف:

——————————

الخاطف ده ممكن يكون مجنون فعلا. لكن هوه أكيد فيه المواصفات التاليه:

– انه من عيله غنيه و شكله مقبول جدا. لانه مكنش حيطلع علي رحله مصر للطيران داخليه لو مربي دقنه و بيصلي. و اي حد راح الرحلات الداخليه دي عارف ده كويس جدا. 

– عارف ان الامن في الرحلات الداخليه ضعيف جدا. 

– له علاقات عالميه قويه جدا. ليه بنقول كده؟ لان النهارده هو اول يوم بعد اجازه عيد الفصح Easter Sunday و كتير اجانب بياخدوا الاتنين كمان اجازه بعد الاحد. و بالتالي فيه اجانب كتير كانوا في اجازه في الساحل الشمالي و راجعين سفاراتهم الصبح بدري جدا عشان يرجعوا الشغل علي طول. كام مصري عارف موضوع اجازه عيد الفصح ده؟ قليل جدا. ده واحد عارف انه حيبقي فيه اجانب علي الطياره. 

لذلك احنا ممكن نصدق موضوع انه عاوز مراته او صاحبته القبرصية ده. لكن طبعا منقدرش دلوقتي نقول انه مفيش دوافع سياسيه. صعب. لسه بدري. 

في التسعينات حصلت حادثه في المهندسين لشاب مصري كان معاه متفجرات و مدافع و اتمترس في بيتهم و خطف ناس عشان كان عاوز يدخل المخابرات يشتغل فيها. و الشرطه أخذت ساعات عشان تقدر تقبض عليه بعد قتال عنيف لحد ما الرصاص معاه خلص. 

احنا مش عارفين الشاب ده فين دلوقتي. لكن دون شك في طاقات في مصر كلها مهدره. 

٥- ايه تاثير الموضوع؟

————————

نحن لم نري اتعس حظا من السيسي. حتي لو كان الموضوع مش أيدلوجي و بس واحد عاوز يرجع لصاحبته، دون شك حيخلي اجهزه الطيران و الامن في العالم كله تشك في مصر اكثر. صحيح. الاعمال بالنيات! 

كمان نقول ان كل المعلومات اللي بتطلع في الاعلام في النوع ده من الحوادث في اول كام ساعه بتكون فيها لخبطه في الأسماء و الأعداد و الظروف و كله. لذلك نستني ساعه و نشوف الامور تستقر شويه. 

٦- تخبط و جهل و انحدار الاجهزه المصريه

———————–

بسهوله جدا اتهموا واحد برئ أستاذ في الجامعه في اسكندريه و قالوا هوه ده الخاطف. و بعدها الراجل يا عيني طلع علي بي بي سي يقول انا كنت مخطوف. بسهوله كده قبل اي تحريات يتهموا اي حد و يطلع متحدث باسم “الرياسه” يقولك احنا جامدين قوي و عرفنا الخاطف. دوروا علي اي اسم شكله يكون أستاذ جامعه و بيفهم عشان يتهموه. الفهم بقي تهمه في مصر. ده يوريك قد ايه احنا في قاع العالم. 

#مصر_للطيران

#egyptair

المصادر:

——–

١- تحليل جوده لحادث اختطاف الطائره الروسيه:

https://jawdablog.org/2015/11/03/russian_air_plane_accident_1/

https://jawdablog.org/2015/11/04/russian_air_plane_accident_3/

https://jawdablog.org/2015/11/08/russian_air_plane_accident_4/

https://jawdablog.org/2015/11/11/media_dealing_with_russian_airplane_accident/

https://jawdablog.org/2015/11/11/russian_air_plane_accident/

https://jawdablog.org/2015/11/16/russian_air_plane_accident_6/

https://jawdablog.org/2015/11/17/ussian_air_plane_accident_7/

٢- بيانات طائره مصر للطيران من موقع فلايت اوير:

https://flightaware.com/live/flight/MSR181/history/20160329/0430Z/HEBA/LCLK/tracklog

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s