هل تربيه الأبناء في مصر ممكنه؟ … سكه الكواكبي … الحلقه ٢٩

Kawkbi_way_29_Is_it_possible_to_raise_new_generation_in_Egypt

هل ممكن نربي جيل جديد به قيم و اخلاق؟و الا مستحيل؟ 

سكه الكواكبي … الحلقه ٢٩

—————————

كتير من الناس عندها فكره تبدو جميله جدا. يقولك الحل مش في الجيل ده. الحل اننا نربي جيل جديد فاضل. نحط فيه كل القيم السليمه فيقوم بقي الجيل ده و يحل كل المشاكل في مصر و نبقي احسن من امريكا و الاتحاد الاوروبي. دول اتباع نظريه التربيه هي أصل كل شيئ. و الرك علي الأصل و الربايه و كل هذا الكلام.

نشوف الاستاذ الكواكبي بيقول ايه عن الموضوع ده:

“نعم ما أبعد الأسراء عن الاستعداد لقبول التربية، وهي قصر النظر على المحاسن والعبر، وقصر السمع على الفوائد والحكم، وتعويد اللسان على قول الخير، وتعويد اليد على الإتقان، وتكبير النفس عن السفاسف، وتكبير الوجدان عن نصرة الباطل، ورعاية الترتيب في الشئون، ورعاية التوفير في الوقت. والاندفاع بالكلية لحفظ الشرف، لحفظ الحقوق، ولحماية الدين، لحماية الناموس، ولحب الوطن، لحب العائلة، ولإعانة العلم، لإعانة الضعيف، ولاحتقار الظاملين، لاحتقار الحياة. إلى غير ذلك مما لا ينبت إلا في أرض العدل، تحت سماء الحرية، في رياض التربييتن العائلية والقومية.

الاستبداد يضطر الناس إلى استباحة الكذب والتحيل والخداع والنفاق والتذلل. ّ وإلى مراغمة الحس وإماتة النفس ونبذ الجد وترك العمل، إلى آخره. وينتج من ذلك أن الاستبداد المشئوم، هو يتولى بطبعه تربية الناس على هذه الخصال الملعونة. بناء عليه يرى الآباء أن تعبهم في تربية الأبناء التربية الأولى على غير ذلك لا بد أن يذهب عبثا تحت أرجل تربية الاستبداد، كما ذهبت قبلها تربية آبائهم لهم، أو تربية غيرهم لأبنائهم سدى.

ثم إن عبيد السلطة التي لا حدود لها هم غير مالكين أنفسهم، ولا هم آمنون على أنهم يربون أولادهم لهم. بل هم يربون أنعاما للمستبدين، وأعوانًا لهم عليهم. وفي الحقيقة أن الأولاد في عهد الاستبداد، هم سلاسل من حديد يرتبط بها الآباء على أوتاد الظلم والهوان والخوف والتضييق. فالتوالد من حيث هو زمن الاستبداد حمق، والاعتناء بالتربية حمق مضاعف!”

بالبلدي كده ازاي انت تتوقع يطلع جيل جديد مختلف عنك انت شخصيا اذا كان المناخ كله بيخلي المواطن لازم يكذب عشان يخلص اموره و لازم يدفع رشوه عشان يخلص المخالفات و لازم يتمحلس لرئيسه في العمل عشان يترقي و شايف الوزير ذات نفسه بيتمحلس (نمشيها يتمحلس معلش) للمستبد عشان يفضل في شغله و امتيازاته. و شايف الجرايد و الوزرا و الاعلام كله بيكذب كذب بين. و شايف الرقاصه بتبقي الام المثاليه. مش ممكن يكون اي جيل في العالم شايف كل ده و يطلع ملاك. مستحيل. ليه؟ لانه عند اول اختيار حتلاقيه ينسي كل شيئ عن التربيه السليمه و يتحول الكلام كله لكلام فارغ. تعالي نشوف اختيارات و قرارات بسيطه جدا و ازاي بتلغي كل اثر للتربيه. 

– ماما انا جبت درجه وحشه في الرياضيات. ازاي يا ابني. انا حاكلملك المدرس و حاقلب الدنيا. 

– الولد لازم يدخل مدرسه خاصه إنجليزي و لو حتي بالواسطه. 

– انت ماسك الورقه دي ليه في أيدك يا ابني. عشان أرميها في الزباله يا بابا. معلش يا حبيبي أرميها في الشارع ما كله بيرمي في الشارع. 

– انا ليا واحد صاحبي يعرف الوزير. انا حاكلمه عشان تتعين. 

– النهارده يا بابا كان اول يوم في الشغل. المدير بيعمل حاجات غلط كتير و بيقول عشان الوزير عاوز كده. معلش يا بني. اربط الحمار مطرح ما صاحبه عاوزه. 

– يا ماما اللي حصل في رابعه ده جريمه. أوعي يا ابني تفتح بقك. لحنا عاوزينك تنجح في حياتك و لما تكبر كده و تبقي وزير يحلها ربنا. 

– ماما انا أتعرض عليا الوزاره. الف مبروك يا ابني. بس انا ناوي ارفض و أقول للسيسي انه مستبد. دي كلمه حق عند مستبد. انت اتجننت يا ابني. انت عاوز تودينا في داهيه.

كل المظاهر دي بتلغي اي كلام عن التربيه. و بتحول التربيه انها تبقي بس احترام الكبير و ان الواحد ميشتمش و ميتكلمش في موضوعات جنسيه! يعني التربيه بتتحول لنوع من الإبقاء علي الوضع القائم دون تغيير. بالضبط كده زي اما عمر سليمان قال ان الولاد بتوع ٢٥ يناير لو ما سابوش الميدان حنكلم اولياء امورهم عشان يجوا يأخذوهم و يربوهم.بننسي بقي خالص ان التربيه مش كده بس. التربيه منظومه متكامله من الاخلاق.

بالعكس بننفزغ لما نلاقي احاديث الرسول بعضها بيتكلم في مواضيع جنسيه مهمه. و بننسي ان الجنس مثلا و الثقافه الجنسيه جزء من الحياه. ربنا خلقنا كده. و دول نفس الناس اللي بيلاقوا مبررات للتحرش الجنسي عشان البنت مش لابسه حجاب مضبوط! كأن ده مبرر للتحرش بها و انتهاك ادمينها! شيئ عجيب فعلا ازاي الشعوب الواقعه تحت الاستبداد بتفكر و بتطلع الاستبداد اللي بيتعمل فيها في اضعف الكائنات في البلد و هم النساء و المعوقين و اي حد مختلف !

رمي الورقه في الشارع حيستمر لان مفيش حد حاسس ان البلد دي بلده و ان الشارع ده بتاعه. و الأصل في كده الاستبداد. المواطن الامريكي مش بيرمي ورقه في الشارع لانه عارف انه بيدفع فلوس تنضيف الشارع و انه محدش مسئول عن الشارع ده غيره.

التحرش الجنسي حيستمر لان ده احد وسائل التنفيس عن الكبت الواقع علي الشباب نتيجه انعدام الثقافه الجنسيه و احد وسائل التنفيس عن الاستبداد. بالعكس الديكتاتور مبسوط جدا من التحرش الجنسي لانه بيلهي الشباب عن انهم يفضوا له و يعملوا مظاهرات ضده. و اي كلام ان السيسي ضد التحرش الجنسي كلام فارغ. بالعكس هو بيستغل الشباب بتاع التحرش ده في انه يعمل له مظاهرات لصالح الديكتاتور. مفيش ديكتاتور في مصر حيعمل اي حاجه ضد التحرش الجنسي. و زي ما شفنا السيسي مثل علينا من كام سنه انه حيحط عقوبات صارمه و كل الكلام الفارغ ده. و التحرش مستمر. و المعاكسات مستمره.

و الكذب و المحلسه و التطبيل في العمل و الاعلام حيستمر لان ده طريق استمرار التمتع بالامتيازات من الحاكم المستبد.

لذلك اي كلام عن تربيه جيل جديد ميعملش كده كلام بنضحك بيه علي نفسنا. مش ممكن ده يحصل بدون التخلص من الاستبداد. مستحيل. و علي فكره موضوع التربيه ده بقاله اجيال شغال. كل جيل بيقول الكلام ده. عبد الناصر عمل مدارس المتفوقين و معسكرات الشباب عشان قال ايه يبعد الشباب دول عن المؤثرات حواليهم و تطلع اجيال تصلح البلد. بالعكس طلعت اجيال بوَّظت البلد اكثر! و كلنا شايفين نتاج التنظيم الطليعي و مدارس المتفوقين! فشل في كل المجالات و كذب اكثر و رشوه اكثر و محلسه اكثر.

الحل هو في التخلص من الاستبداد. و الله العظيم.

و نتابع في الحلقات القادمه.

‫#‏سكه_الكواكبي‬

‫#‏التربيه‬

المصادر:

——–

١- الحلقات السابقه من سكه الكواكبي:

jawdablog.org/category/التاريخ/حلقات-سكة-الكواكبي/

٢- كتاب الكواكبي الأشهر: طبائع الاستبداد و مصارع الاستعباد:

http://www.assforum.org/web/pdf/mnhel/sciences%20sociales/30272530.pdf

٣- عقوبات صارمه ضد التحرش من الجرايد المصريه:

http://www.bbc.com/arabic/middleeast/2014/06/140611_sisi_visits_harassment_victim

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s