اتفاقيه سايكس بيكو والحرب العالميه الاولي … الحلقه الثانيه

Saykes_peeko_2

دور و علاقات اجهزه المخابرات العالميه

——————————-

زي ما شرحنا في الحلقه الاولي (مصدر ١)، الحرب العالميه الاولي في الحقيقه هي اللي شكلت الشرق الاوسط اللي احنا شايفينه دلوقتي و اللي اساسه قيام الدوله الوطنيه علي أنقاض الدوله العثمانيه. و في نفس الوقت هي اللي حطت عوامل فناء الدوله الوطنيه دي اللي احنا طبعا شايفين ضعفها الشديد بشكل مقارب جدا للايام الأخيره من الامبراطورية العثمانيه. و ما داعش و ثورات الربيع العربي الا تجليات لضعف نظام الدوله الوطنيه في الشرق الاوسط و علامه علي قرب انهياره. 

كتير من المصريين الحقيقه مش فاهمين دور و طبيعه عمل اجهزه المخابرات في العالم. و عندهم اوهام و احلام لها علاقه بالافلام أكتر بكتير من الحقيقه. دون شك ان اجهزه المخابرات في العالم كله بتكون موجوده في معظم مناطق العالم بالذات الحيويه منها و بالذات في وقت الصراعات. لكن احنا محتاجين نفهم الاول أهداف الاجهزه دي بيكون ايه في الأساس و ايه طرقها. الحقيقه ان الاجهزه دي لعبت دور مهم جدا في الحرب العالميه الاولي. و ان ما يبدو علي السطح ان دول معينه حلفاء مش معناه إطلاقا انهم مش بيتصارعوا. العكس في العاده صعب. يعني دول متعاديه في الأغلب بيكون في صراع بينهم و ان كان لا بمنع التعاون في مواقف محدده و لكن نادره. في العالم عكس مصر مثلا، اجهزه المخابرات منضبطه جدا. صحيح لها دور في تشكيل السياسات لكن اول لما فيه سياسه و أهداف مقرره، جهاز مخابرات محترف زي السي اي ايه او ام اي ٦ لازم حيلتزم بها الا بالمخالفة للقانون و ده فيه محاكمات لاحقه لا تسامح فيها. 

تعالوا نفهم ايه الموضوع. 

في يوم ٢ نوفمبر ١٩١٤ كان فيه عاصفه ترابيه شديده هبت علي قريه بير سبع. في الوقت ده كانت بير سبع في فلسطين تابعه للدوله العثمانيه و كان عدد سكانها حوالي ٨٠٠ واحد بس و كانت واحه بيعدي فيها كرافانات الجمال اللي رايحه الحجاز من فلسطين. في نفس الوقت كانت سينا القريبه منها تحت الاحتلال البريطاني في مصر كلها و ان كانت اسميا ما زالت تابعه للدوله العثمانيه.

٣ رجاله بريطانيين كانوا في بير سبع منتظرين ٢ امريكان عشان يقابلوهم. الامريكان معرفوش يوصلوا بير سبع لذلك وقفوا علي بعد ٥ كم بره بير سبع لحد العاصفه ما تعدي. فعلا العاصفه خلصت تاني يوم. و الإنجليز خدوا الجمال بتاعتهم و راحوا علي معسكر الامريكان عشان يقابلوهم. 

الإنجليز وصلوا و انبهروا من المعسكر الامريكي. كانت اول مره يشوفوا خيم فيها أثاث قيم و ترابيزه سفره مثلا. الاتنين امريكان كانوا ويليام يال و رودولف ماكجفورن. و قالوا للإنجليز انهم في رحله سياحه للأرض المقدسه في فلسطين. 

الإنجليز لاحظوا ان الاتنين امريكان مش طبيعيين. يعني مثلا جسمهم ضعيف جدا انهم يقدروا علي رحله زي دي وقتها كانت رحله خطره. كمان عاده لما اجانب تتقابل في الصحرا بيحبوا يتعرفوا علي بعض. الاتنين امريكان كانوا عاوزين يخلصوا من الإنجليز بأي شكل. 

كمان الامريكان كانوا شاكين في الإنجليز. واحد منهم كان بيتكلم كتير جدا عكس طبيعه الإنجليز. لكن في الحقيقه مع انه بيتكلم كتير كل كلامه كان اسئله بيحاول يستفسر عن طبيعه الامريكان. كان عمال يحكي حكايات مثلا عن اماكن محدده في فلسطين و بعد لما يوصف المكان كويس قوي يقوم سائل سوْال عشان يعرف الامريكان راحوا المكان ده و لا لأ و هل عارفين تفاصيل المكان. في الحقيقه الراجل الإنجليزي ده كان بيستجوب الامريكان بطريقه غير مباشره. 

ويليم يال كتب في مذكراته انه اكتشف بعد لما الإنجليز مشيوا انهم أخدوا منهم معلومات كتيره جدا. 

الراجل الانجليزي ده اللي كان بيستجوب الامريكان كان توماس أدوارد لورنس. او اللي اطلق عليه فيما بعد لورانس اوف ارابيا. الراجل ده حيلعب دور جبار حنفهمه بعدين في الحلقات اللي جايه في انشاء الدوله القوميه الوطنيه اللي احنا شايفينها دلوقتي بالرغم انه هوه نفسه انضحك عليه لأسباب كتيره من الحكومه البريطانيه ذاتها (لدرجه انه رفض وسام خاص من ملك بريطانيا عشان حس بالغدر من حكومه بريطانيا). الراجل ده كان ضد وطن قومي لليهود لكن كان مع تأسيس وطن عربي متحد يحل محل الدوله العثمانيه (مصدر ٢). لكن حنشوف ازاي انضحك عليه. 

في الحقيقه ويليام يال و رودولف ماكجفورن الامريكان كانوا بيشتغلوا مع شركه ستاندرد اويل اوف نيويورك (بقت لاحقا إكسون موبيل) و كانوا في مهمه سريه في فلسطين للتنقيب عن البترول. 

لورانس كان برضه في مهمه تحت مسمي التنقيب عن الاثار لكن كان هدفها هو تكوين خرائط دقيقه عن فلسطين يمكن استعمالها في حاله الحرب. و في اليوم اللي قبل العاصفه في بير سبع تلقي لورنس تلغراف من القنصلية البريطانيه في القدس انه في ٢ امريكان في بير سبع و انهم عاوزينه يعرف اهدافهم ايه. 

طبعا خرائط جنوب فلسطين اللي كان لورانس و اللي معاه بيعملوها دي اللي خلت الجنرال اللنبي ينجح في النهايه انه يقتحم فلسطين و يحتلها بمساعده لورانس نفسه زي لما حنشوف. 

في نفس الوقت اللي لورانس كان بيتكلم مع يال و ماكجفورن في بير سبع و علي بعد ٨٠ كم شمالا كان فيه شاب ألماني اسمه كورت بروفر. كورت بروفر كان معاه دكتوراه في المصريات و عملها عن مسرح العرائس في مصر الفرعونيه! في وقتها كان بروفر مستني صديق جاي من ولايه بافاريا في المانيا عشان يطلعوا مع بعض رحله أستكشافيه في صعيد مصر. 

علي مدي ٣ سنين كان كورت بروفر سكرتير في السفاره الالمانيه في القاهره. كان هدف بروفر هو اقامه علاقات مع الحياه السياسيه و الاجتماعيه في القاهره. كانت حياه بروفر عباره عن حفلات دائمه مع قمه المجتمع المصري من فنانين و سياسين و رجال اعمال. 

بروفر كون علاقات مع ناس كتير في مصر كانوا عاوزين يتخلصوا من الحكم البريطاني. بروفر كان بيتكلم عربي بطلاقه. و كان بيحاول يعمل شبكه مجاهدين من البدو في مصر عشان تحارب مع اهلهم في ليبيا ضد الاحتلال الايطالي هناك. كمان سافر سينا و سوريا لابس لبس بدوي و متنكر في زي بدوي عشان يحرك البدو ضد الاحتلال البريطاني. 

المخابرات البريطانيه في مصر اخدت بالها من تحركات كورت بروفر و طلبت من الحكومه المصريه طرده. و فعلا انطرد من العمل الدبلوماسي في مصر و طلع علي فلسطين. و طبعا منسيش ان الإنجليز هم السبب انه انطرد من شغله. 

فعلا استقبل كورت صاحبه الفنان ريتشارد فون بيلو في القدس و طلعوا علي مصر (وقتها كان السفر ده سهل جدا عكس دلوقتي اللي بسبب الدوله الوطنيه بقي فيه حدود و تفتيش و قفل قطاع غزه كمان. و كتبنا قبل كده ان قفل الحدود ده احد اهم أسباب فشل الدوله الوطنيه في الشرق الاوسط. مصدر ٣). 

كان في جانب عجيب جدا من كورت بروفر. كورت كان متزوج امريكيه اكبر منه ب ١٣ سنه. و كان له عشيقات كتير جدا طول لما كان في فلسطين. اهم عشيقه فيهم كانت طبيبه مهاجره روسيه جميله من أصل يهودي اسمها منه وايزمان. و اسم الدلع بتاعها كان فاني. 

منه وايزمان دي حتشتغل خلال الحرب في مصر كعميله لعشيقها كورت بروفر لحساب المانيا (حليفه الدوله العثمانيه) و ضد الإنجليز. 

في نفس الوقت ده بالضبط كان فيه مهاجر روماني يهودي كمان اسمه أرون أرونسون و كان عالم زراعي فذ. الراجل ده هو ابو تجربه الزراعه اليهوديه في فلسطين. و عمل مستعمره صغيره في الجليل شمال القدس. أرون كان صهيوني متعصب جدا و كان عدو للدوله العثمانيه (اللي استقبلته و عاش فيها). 

أرون ده مع حاييم وايزمان حيلعبوا دور رئيسي في وعد بلفور حنفهمه بعدين. الحقيقه حنشوف قد ايه أرون ده خطط و اشتغل و تعب بينما العرب كانوا نايمين و ده درس مهم جدا. لو عاوز تكمل نوم أوعي تشتكي ان فيه مؤامرات عليك. لان المؤامرات بتحصل في الدنيا كلها. الفرق انت بتعمل ايه (مصدر ٤). 

أرون أرونسون هو صوره الصهيوني اليهودي المتعصب اللي احنا عارفينها. 

لكن طبعا بننسي دائماً واحده زي منه وايزمان اللي اشتغلت مع الألمان و الأتراك ضد الإنجليز. مع ان اخوها يبقي حاييم وايزمان. و مش تمثيل لأننا حنشوف بعدين انها اتسجنت و اتعذبت. 

دروس و عبر:

————-

١- مش معني ان بريطانيا و امريكا حلفاء انهم بيشتغلوا مع بعض. 

نفس الكلام ده النهارده. مش معني ان اسرائيل و امريكا و الامارات حلفاء انهم بيشتغلوا مع بعض. بالعكس كتير من اللي بنشوفه في مصر و الدول العربيه دلوقتي هو صراع خفي ببن تحالف إسرائيلي-إماراتي-سيساوي مضاد لاهداف أناس ربما داخل الحكومه الامريكيه ذاتها. ناس كتير مش فاهمه الموضوع ده لان تفكيرها سطحي جدا في الامور. 

ده بيفسر الشد في العلاقات بين امريكا و السعوديه او امريكا و اسرائيل. و بيفسر الخلاف بينهم حوالين ايران و حتي تركيا. امريكا شايفه مصالح في ايران و تركيا. بعض الجهات في امريكا كمان شايفه مصالح في التحول الديمقراطي في مصر. اسرائيل و الامارات ضد التحول الديمقراطي ده. 

كمان الحكومه الامريكيه مش كيان واحد. بالعكس. فيه تيارات كتيره جدا في امريكا. في تيار جوه الحزب الديمقراطي الامريكي مع الديمقراطيه في مصر. و في تيار موالي لإسرائيل جدا جوه الحزب الجمهوري الامريكي. لازم نفهم ده. 

٢- زي ما في ١٩١٤ امريكا كانت ورا مصالحها الاقتصاديه، نفس الكلام دلوقتي. الشركات الامريكيه بتدور علي مصالحها و الحكومه الامريكيه او جهات فيها شايفه ان مصالح البترول في الدول العربيه بتقل و ان مصالح الغاز في ايران بتزيد و موقع تركيا ضد روسيا بيزداد اهميه. لازم نفهم ده. 

٣- اللي بيقعد يتفرج مش بياخد حاجه. بالعكس بينضرب فوق دماغه. 

و في الحلقه الجايه حنشوف قصه أرون أرونسون ده لانه حكايه الحقيقه. و حنشوف علاقته مع سايكس بيكو. 

#صفحات_مخفيه

#الحرب_العالميه_الاولي

#سايكس_بيكو

و كل الحلقات السابقه في مصدر ٥. 

المصادر:

——–

١- الحلقه الاولي من صفحات مخفيه من تاريخ مصر … الحرب العالميه الاولي:

https://www.facebook.com/jawda.org/posts/1011682648901948:0

٢- مذكرات لورانس اوف ارابيا:

http://www.amazon.com/Lawrence-Arabia-Deceit-Imperial-Making/dp/0307476413

٣- فشل الدوله الوطنيه في الشرق الاوسط:

https://jawdablog.org/2014/12/30/is_making_turkey_iran_enemies_useful/

https://jawdablog.org/2014/12/30/palestine_useful_or_harmful_for_egypt_security/

https://jawdablog.org/2014/12/30/leave_the_sinai_desert_or_reconstruction/

٤- اسطوره المؤامرات الخارجيه:

https://jawdablog.org/2015/09/18/egypt_taboo_63_the_west_hates_us/

https://jawdablog.org/2014/10/12/egypt_taboo_20/

٥- كل الحلقات المجمعه من الصفحات المخفيه من التاريخ:

https://jawdablog.org/category/التاريخ/صفحات-مخفيه-من-التاريخ/

One thought on “اتفاقيه سايكس بيكو والحرب العالميه الاولي … الحلقه الثانيه

  1. Pingback: صفحات مخفيه من التاريخ … سايكس بيكو الحلقه الثالثه | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s