ماذا توقعت جوده عن الدولار و ماذا يحدث و لماذا؟

What_Jawda_expected_about_US_Dollar

في سلسله مقالات نشرناها في اكتوبر الماضي (مصدر ١) كتبنا التالي بالنص:

المقارنه بسنه ٢٠١٣/٢٠١٤

—————————

الاستيراد زاد ٥ مليار. 

التصدير نزل مليار. 

النقل و قناه السويس زي ما همه. 

السياحه زادت ٤ مليار دولار

التحويلات نزلت ٥ مليار دولار 

يبقي المجموع بقي:

٥+١-٤+٥ = ٧ مليار دولار 

يعني مصر بقت بتحتاج ٧ مليار دولار زياده عن سنه ٢٠١٣/٢٠١٤ عشان تقدر تكمل. طيب مصر بتحتاج في المتوسط ٧٠ مليار دولار بين الحج و الاستيراد و غيره. دلوقتي بقت تحتاج ٧٧ مليار دولار. يعني زياده ١٠٪. يبقي أكيد سعر الدولار لازم يزيد علي الأقل ١٠٪. طيب. الدولار كان سعره ٧,٥ جنيه السنه اللي فاتت. زود عليه ١٠٪ حتوصل لسعر ٨,٢٠ جنيه. بسيطه جدا. 

و عاده في الأحوال اللي زي دي في تضخم للجنيه المصري لان الحكومه عماله تطبع فلوس عشان تدفع عوايد تفريعه القناه التي ثبت فشلها كما توقعنا (مصدر ٤). و احنا قلنا قبل كده انه بحلول عام ٢٠١٧ التأثير التضخمي ده حيوصل ١٢٪ اللي هوه سعر الفايده علي سندات القناه لانه مشروع دون عايد. كل الفلوس المطبوعه دي فلوس رايحه. 

زود بقي ١٢٪ كمان علي سعر الدولار حتوصل ان سعره حيبقي ٩ جنيه مع عام ٢٠١٧. “

يعني توقعنا الدولار يوصل تسعه جنيه. اخطأنا في حساب السرعه. توقعنا انه يصل تسعه مع حلول ٢٠١٧ لكن ازدادت السرعه حتي وصل لهذا في فبراير ٢٠١٦. 

الحقيقه اننا لم نتوقع هذا السوء في الاداره الاقتصاديه و الماليه. قرارات متخبطه اولا بتخفيض سعر الدولار بقرار (اي عك – مصدر ٢) ثم الحرب علي شركات الصرافه مما يخلق سوق سوداء. و بعدين السماح بحدوث فارق كبير بين السعر في البنك و سعر السوق السودا مما يجعل المصريين في الخارج يحجمون عن تحويل الدولارات لان ببساطه مين العبيط اللي يحول لاهله دولار يحوّله في البنك بسعر ٨ جنيه؟ أكيد مش حيحول أساسا و حيستني لما ينزل مصر في الصيف او يبعت الفلوس مع حد تاني. معني كده ان حصيله الدولار حتقل أكتر و بالتالي السعر يزيد أكتر. 

القرارات دي كلها طبعا بتسرع تهاوي الجنيه المصري. يعني لو كانت الحكومه ساكته خالص و مش بتعمل حاجه كانت سرعه هبوط الجنيه هي زي ما توقعناها. تخيلوا؟ 

طيب رايحين علي فين بعد كده؟

————————–

بيحصل في علوم الاقتصاد حاجه بنقول عليها ان نفسيه السوق بقت هي المتحكمه. او market psychology. يعني الموضوع مبقاش حسابات. بقي مسأله نفسيه. ان السوق مش واثق في أداره السيسي للاقتصاد و بالتالي مش واثق ان مصر حيبقي فيها دولارات قريب. و بالتالي اللي معاه دولار متوقع ان سعره حيزيد و بالتالي بيحوشه و بالتالي الدولار بيقل في السوق أكتر. فسعره بيزيد أكتر في السوق السودا. و بالتالي الفرق عن البنك بيزيد أكتر. فالمصري في الخارج مش بيحول أكتر. و بالتالي سعر الدولار يزيد كمان. و بالتالي الناس تحوش الدولار كمان لانها متوقعه انه يزيد كمان. و هكذا. دوره لا نهايه لها. بتقول عليها run away Process يعني عمليه خارج نطاق السيطره. 

بقي موضوع نفسي خلاص. لذلك الحاجز بعد كده بيبقي حاجز نفسي أكتر منه اي حاجه تانيه. يعني اللي معاه دولار حيبتدي يجرب يزود سعره أكتر و أكتر لحد لما يحس ان السعر بقي مجزي او ان “شكل” السعر بقي عالي قوي و محدش حيدفع أكتر من كده. ده اللي بنقول عليه حاجز نفسي. الحاجز النفسي الجاي حيكون مثلا ١٠ جنيه. رقم مقفول و ممكن يبقي حاجز ان الناس تفكر ياه. ١٠ جنيه كتير قوي. خلاص الموضوع مبقاش حسابات و البنوك فقدت السيطره. 

لذلك الخطوه الجايه ممكن تكون ١٠ جنيه. هل ممكن يقف بعد كده؟ 

ممكن اه او لأ. 

يعني زيمبابوي مثلا او الأرجنتين حصل فيهم اللي بنقول عليه التضخم المبالغ فيه او hyper inflation. يعني عمله الدوله تنزل جامد جدا نتيجه للسياسات الماليه الغلط و نتيجه نفسيه السوق بقت شاكه في القدره علي السيطره. 

هبوط الجنيه طبعا معناه ارتفاع ضخم للاسعار لدرجه ان العمله في زيمبابوي دلوقتي بقت تقاس بالمائه تريليون دولار زيمبابوي. الدولار الامريكي يساوي دلوقتي ٣٠٠ دولار من بتوع زيمبابوي (مصدر ٣) ! 

في الدول زي زيمبابوي دلوقتي و الأرجنتين زمان الناس تنزل السوق بشنطه فلوس. سعر السلع بيزيد كل يوم باستمرار لان مفيش قيمه للعمله المحليه. كتير من الناس تبتدي تتعامل بالدولار الامريكي مباشره. الفقر بيزيد لان مرتبات الموظفين ثابته و الاسعار بتزيد. صعب جدا جدا الطلوع من الحلقه المفرغه بتاعه التضخم المبالغ hyper inflation دي (مصدر ٤). 

ممكن جدا ان ده يحصل لمصر في استمرار الفشل النقدي و الاقتصادي الحالي. احنا دلوقتي نحط احتمال ان التضخم في مصر يخرج عن السيطره في حدود ٥٠٪. 

المصادر:

——–

١- دراسه ماذا يحدث للدولار:

https://jawdablog.org/2015/10/26/lets_learn_economy_what_is_happening_for_dollar_versus_pound_1/

https://jawdablog.org/2015/10/27/lets_learn_economy_what_is_happening_for_dollar_versus_pound_2/

https://jawdablog.org/2015/10/28/lets_learn_economy_what_is_happening_for_dollar_versus_pound_3/

https://jawdablog.org/2015/10/29/lets_learn_economy_what_is_happening_for_dollar_versus_pound_4/

https://jawdablog.org/2015/11/05/lets_learn_economy_questions_answers/

٢- هل يمكن تخفيض سعر الدولار بقرار؟

https://jawdablog.org/2015/12/30/lets_understand_economy_dollar_value_and_how_the_central_bank_reduced_it/

٣- سعر دولار زيمبابوي:

http://www.xe.com/currencyconverter/convert/?Amount=1&From=ZWD&To=USD

٤- التضخم المبالغ و تاثيره:

http://www.econlib.org/library/Enc/Hyperinflation.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s