من المجاري للحنفيه — احتياجات مصر الحقيقيه لتنقيه مياه المجاري

Egypt_needs_for_sewage_purification1

هل فعلا يجب تحميل المصريين سعر التنقيه و هل فعلا ستختفي المياه الا من المجاري؟

—————————

أعلن السيسي مؤخراً ان “بسبب الأسباب اللي لا داعي لذكرها فهو محتاج يعمل محطات تنقيه ثلاثيه لمياه المجاري و ان تكلفه هذه المحطات عاليه و يجب ان يدفعها المصريون”

هل هذا الكلام علمي او صحيح؟ تعالوا نفند الموضوع حته حته بالعلم.

ايه هي محطات التنقيه الثلاثيه؟

—————————

معالجه مياه المجاري في العاده تنقسم لمعالجه أوليه و ثانويه. و بعدين في تكنولوجيا جديده لمعالجه ثلاثيه.

في المعالجه الاوليه يتم فصل الشوائب الكبيره من الميه و بعدين تدخل الميه الناتجه خزانات ترسيب بيتحط فيها كيماويات معينه بتخلي الترسيبات تتقل و تتركز في قاع الخزان و بيطلق عليها sludge او الحمأه و كمان بتخلي الزبد scum يطفو علي السطح كرغوه. بعد المعالجه الاوليه دي حوالي ٨٠٪ من المواد الصلبه بتكون اتفصلت من المياه. عاده الميه الناتجه دي بتكون نظيفه كفايه انها تلقي في البحر مثلا او اي مصدر مائي فيه تيارات و الناس مش بتشرب منه. اسكندريه مثلا و المدن الساحليه في العالم في العاده تعتمد علي المعالجه الاوليه فقط طالما المخرج يكون بعيد بدرجه كافيه عن الساحل (مصدر ١). بتتبقي مواد عضويه بتتفتت نتيجه لملوحه مياه البحر بصفه عامه.

بعد كده بتيجي المعالجه الثانويه. هنا الميه بينضاف لها بكتيريا خاصه بتاكل المواد العضوية الذائبة. و بتنتج عن كده حمأه بتركز في قاع الخزان. الميه دي بصفه عامه بتكون نضيفه بشكل كاف انها تخرج للنيل مثلا. و ده اللي بيحصل في مصر طالما بعيد عن مصادر سحب مياه الشرب بدرجه كافيه.

Egypt_needs_for_sewage_purification2

في المعالجه الثلاثيه بيتم تعديه المياه الناتجه من المعالجه الثانويه في فلترات ذات فتحات صغيره جدا و تحت ضغط عالي قوي للتخلص من الشوائب بدرجه عاليه و بعدين بيتحط علي الميه دي كلور لقتل اي بكتيريا متبقيه. التنقيه الثلاثيه دي غاليه جدا أكتر بكتير من المراحل الاوليه و الثانويه. السبب هوه الضغط العالي المطلوب لتعديه المياه في الفلاتر. الضغط ده بيتطلب طلمبات ضخ كبيره جدا و بالتالي بتستهلك كهربا كتير جدا. و ده مكلف طبعا.

الميه دي الناتجه من التنقيه الثلاثيه ذات مواصفات عاليه جدا. و يمكن استخدامها في الزراعه مباشره او في عمليات التصنيع المختلفه المحتاجه لمياه.

كتير من دول العالم اللي عندها شُح في المياه بتستخدم التنقيه الثلاثيه في ري الحدائق مثلا و في الصناعات اللي بتتطلب مياه. الجزائر و الكويت و سنغافورة و نامبيا و كاليفورنيا كلها نماذج للاستخدام ده (مصدر ٢).

الجديد هو ان سنغافورة و نامبيا و مدينه سان ديجو في امريكا عملوا حاجه اسمها التدوير الغير مباشر لمياه الشرب indirect potable reuse. يعني ايه؟ يعني الميه اللي ناتجه عن التنقيه الثلاثيه دي نحطها علي طول في مصدر مياه الشرب. يعني مثلا لو مصدر مياه الشرب في نامبيا هو المياه الجوفيه من الآبار بنقوم واخدين الميه من التنقيه الثلاثيه و تضخها في خزان المياه الجوفيه عن طريق آبار خاصه بنضخ فيها الميه (مصدر ٣).

يعني الناس مش بتشرب الميه من التنقيه الثلاثيه مباشره. لا بتشربها بعد خلطها بالمياه الجوفيه الطبيعيه. عشان كده بنقول استخدام غير مباشر. السبب في كده جزء منه نفسي عشان متحسش انك بتشرب من ميه اصلها مجاري. كمان لما بتحط الميه المنقاه في الخزان الجوفي بتحصل لها عمليه تنقيه طبيعيه.

طيب احنا نكره نبقي زي سان دييجو او سنغافورة او نامبيا؟

———————-

أكيد لا. لكن لازم نفهم ليه سان دييجو او سنغافورة او نامبيا عملوا كده. نامبيا دي هي اكثر مدن افريقيا في شحه المياه. بالضبط زي سان دييجو و سنغافوره. حوالي ٣٥٪ من الميه اللي بيستخدموها جايه من أعاده التدوير. لذلك مينفعش ترمي ميه جايه من التنقيه الثانويه بس. ليه؟ لان تركيز الشوائب في الخليط الناتج لسه حيكون عالي جدا. لو تلت الميه جاي من تنقيه ثانويه بس فيها شوائب و بكتريا طبعا الخلطه حتبقي غير لو ١٠٪ بس هو اللي جاي من تنقيه ثانويه. لذلك اللي بيحدد نحتاج تنقيه ثلاثيه و لا لأ هو نسبه الشوائب الناتجه من الخلط و هل مقبوله و لا لأ.

في حاله مصر ٨٦٪ من الميه بتروح للزراعه. بس ١٤٪ بتروح الصناعه و الاستخدام المنزلي (مصدر ٤). بافتراض اننا حنعيد تدوير نصف الميه اللي رايحه الصناعه و الاستخدام المنزلي يبقي بس حوالي ٧٪ من الميه داخله مجري نهر النيل. (لاحظ انه في فاقد و في جزء من الميه الانسان بيستخدمه و بيروح في البخر و العرق). ده طبعا بفرض ان المدن الساحليه كمان حترمي في نهر النيل و ده مش حقيقي.

٧٪ ترميهم في نهر النيل مش محتاجه إطلاقا تنقيه او معالجه ثلاثيه. المعالجه الثانويه كفايه جدا و ده اللي بيحصل دلوقتي. تبتدي تحتاج معالجه ثلاثيه لو انت بترمي ٣٠٪ مثلا في النهر.

يبقي بالوضع الموجود حاليا مفيش خطر اننا نستخدم المعالجه الثانويه فقط و نتاجها نرميه في النهر زي ما بيحصل دلوقتي. الخلطه الناتجه ممكن جدا استخدامها في انها تدخل محطات مياه الشرب اللي بتعمل عمليات تنقيه عاليه جدا بعد كده او المفروض انها تعمل عمليات تنقيه عاليه (ده موضوع تاني).

استعمال معالجه ثلاثيه اذا حيكون مكلف جدا بالنسبه للوضع الحالي في مصر.

طيب ما سد النهضه حيقلل الميه و لذلك لازم نستعمل أعاده تدوير مياه الصرف

—————————–

الكلام ده مش سليم. سد النهضه حيقلل الميه فقط في فتره ملئ خزان السد و هي حوالي ٥ سنين. في الفتره دي مصر تقدر تستخدم مياه السد العالي عشان تفضل إمدادات المياه لها ثابته. و كتبنا ده قبل كده (مصدر ٤). اثيوبيا لازم بعد كده تستمر في تمرير المياه و الا لن تولد الكهربا. طبعا بمرور الوقت ممكن الزراعه في السودان تستفيد من سد النهضه و تستهلك الميه و بالتالي المياه اللي واصله لمصر تقل. ده موضوع حياخد سنين طويله شويه.

لذلك مفيش ازمه حاله. الموضوع مش زلزال حصل و فيه كارثه عاجله تستدعي ان السيسي يطلع يهدد المصريين بالشكل ده برفع سعر المياه و انه مش حيلاقي يشربهم.

مع ملاحظه ان الشعب المصري لم يوقع اتفاقيه سد النهضه التي أعطت اثيوبيا تصريح و اعتراف كامل بالسد كما كتبنا في السابق (مصدر ٥).

طيب ايه المفروض يتعمل؟

———————-

مصر بلد شحيحه الموارد المائيه بشكل كبير (مصدر ٦) و مع زياده السكان و تنامي استخدام المياه في دول افريقيا لازم مصر تطور تكنولوجيا المعالجه الثلاثيه. ده شيئ طبيعي و مهم. السؤال نستخدمها في ايه؟ و مين اللي يتحمل تكلفتها.

مثلا الكومبوند اللي بيفتح المياه عشان يروي ملاعب الجولف عشان تبقي خضره و حلوه و بيملي حمامات السباحه. الكومبوندات دي لازم تستخدم تكنولوجيا المعالجه الثلاثيه و اما تدفع سعرها بشكل كامل او تقوم هي ذاتها بالمعالجه الثلاثيه. نفس الكلام للمصانع اللي هدفها التصدير. مش معقول تاخد سعر الميه بدعم. كل ده المفروض انه يوجه بقيه المياه بسعر مدعوم لمن يحتاجه. طبعا مفيش مانع من تحريك سعر المياه بشكل يتناسب مع نمو الاقتصاد بهدف تقليل الفواقد و جعل الناس لا تبذر في المياه. بالعكس المفروض اننا ندي تخفيضات و دعم اكبر في السعر للعائلات التي تستخدم ميه قليله.

طبعا واضح ان هدف السيسي تخويف الناس عشان يلم منهم فلوس لا نعلم ابن تذهب بدون اي رقابه.

طبعا مصر بلده شحيحه الموارد المائيه

المصادر:

——–

١- خطوات معالجه مياه الصرف الصحي:

http://water.worldbank.org/shw-resource-guide/infrastructure/menu-technical-options/wastewater-treatment

٢- تقنيه التنقيه الثلاثيه و استخدامها في العالم:

http://blogs.ei.columbia.edu/2011/04/04/from-wastewater-to-drinking-water/

٣- تجربه سان دييجو في المعالجه الثلاثيه:

http://www.cnn.com/2014/05/01/world/from-toilet-to-tap-water/

٤- عواقب سد النهضه علي مصر:

https://jawdablog.org/2015/11/18/expectations_of_water_crisis_in_egypt/

٥- مشاكل اتفاقيه سد النهضه بالعلم:

https://jawdablog.org/2015/10/19/lets_understand_declaration_of_principles_great_renaissance_dam/

٦- مصر بلد شحيحه الموارد المائيه:

https://jawdablog.org/2014/09/30/water_issue_4/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s