تقدير احتمالات و عواقب انتشار فيروس زيكا في مصر

Zika_Virus_in_Egypt

في ١٥ نوفمبر ٢٠١٥ اوردت منظمه الصحه العالميه في نشرتها الرسميه (مصدر ١) ان ٢٥٣ حاله من حمي الضنك dengue fever تم اكتشافها في ديروط بمحافظه أسيوط. بطبيعه الحال هذا خبر لن تجده مطلقا في الاعلام المصري. 

تم إرسال التحاليل من المصابين الي معمل أبحاث البحريه الامريكيه نمرو ٣ الموجود في جامعه عين شمس (به افضل اجهزه التحاليل في الشرق الاوسط و مجهز كمعمل في الخطوط الخلفيه عند قيام حروب في الشرق الاوسط و مساعده دول الشرق الاوسط الفقيره وقت السلم). اثبتت التحاليل وجود فيروس حمي الضنك في المصابين. 

يصيب فيروس حمي الضنك المصاب بالهزال و يسبب الإسهال و التقيؤ و يسبب طفح احمر اللون مميز علي الجلد (مصدر ٢). 

طبعا قام فريق الصحه العامه بتحليل عينات من القري المصابه. و طبعا وجدوا بيض البعوضه المصريه المعروفه بأسم aedes Aegypti. و طبعا وجدوا الفيروس في لعاب البعوضه. قامت وزاره الصحه بتطهير البرك في القري المصابه. و وفقا للمعلومات لم ترد إصابات جديده. الكلام ده كان في اكتوبر اللي فات و أعلنته منظمه الصحه العالميه في نوفمبر. حمي الضنك مشكله لانها ممكن تسبب الوفاه في الناس اللي صحتها تعبانه أصلا زي كبار السن او الحوامل او الاطفال لان الإسهال و انخفاض ضغط الدم اللي بيجي مع الحمي ممكن يكون قاتل. لذلك في دول امريكا اللاتينيه من حوالي ٢٠ سنه انتشر الوباء ده و بذلت الدول دي مجهود كبير جدا في تطهير المستنقعات و قتل البعوض لحد ما خلصت علي وباء حمي الضنك (مصدر ٣). الأوبئة دي سهله الانتشار لانها بتنتقل عن طريق الناموس من شخص للتاني و الناموس بيتوالد بسرعه جدا حوالين المستنقعات و الميه الراكده. 

المخيف في الموضوع ان ٢٥٣ واحد أتصابوا في مصر بحمي الضنك في شهر اكتوبر في الشتاء. يعني مش موسم توالد البعوض. و كمان الصعيد مش بيزرع رز كتير و بالتالي مفيهوش توالد كبير للبعوض. 

طبعا حد حيسأل ايه علاقه حمي الضنك بفيروس زيكا؟ 

فيروس زيكا بيتنقل بالضبط زي فيروس حمي الضنك و الحقيقه ان الوباء دلوقتي في البرازيل هو وباء مشترك يعني حمي الضنك و زيكا في نفس الوقت (مصدر ٤). الأعراض كمان متشابهه جدا بين المرضين. الفرق ان في حالات من تشوهات الجنين في الحوامل المصابات بفيروس زيكا. كمان نفس البعوضه المصريه هي اللي بتنقله. لذلك زيكا انتشر في امريكا اللاتينيه بعد لما ابتدت تقصر في التخلص من الناموس. يعني البرازيل ابتدت تدلع شويه في التخلص من الناموس فرجع لها الناموس كتير و رجع معاه فيروس زيكا المره دي مش حمي الضنك. لاحظ اننا دلوقتي في فصل الصيف في نصف الكره الارضيه الجنوبي. موسم انتشار الناموس هناك. 

فيروس زيكا قديم جدا و موجود كتير في افريقيا لكن الافارقه في المناطق الاستوائية كونوا مناعه ضده لكن بقوا حاملين للفيروس. مع أنتشار السفر و التجاره العالميه بقي ممكن جدا فيروس من افريقيا يروح كل دول العالم في شهور. لذلك الفيروس انتشر من افريقيا لامريكا اللاتينيه الاول لانها في فصل الصيف و الناموس دلوقتي. 

مع اقتراب فصل الصيف و الناموس في مقر في الأغلب حينتشر فيروس زيكا في مصر. لان طبعا الناموسه المصريه موجوده في مصر و ستنتشر بكثافه في فصل الصيف. و دي الناموسه الحامله للفيروس. كل المطلوب هو ان الناموسه تعض شخص واحد مريض او حامل للفيروس في مصر. و احنا شفنا ان إنفلونزا الطيور و الخنازير اللي بدأت في الصين اخدت شهور بس عشان توصل مصر مع انتشار العولمه. 

لذلك احنا متاكدين ان فيروس زيكا حيظهر في مصر مع فصل الصيف. السؤال هل المصريين زي الافارقه عندهم مناعه ضده و لا لا. ده محتاج تحاليل لكن اعتقادنا الأغلب لا لان التاريخ لم يذكر اي حاله لوباء زيكا في مصر. 

رد الفعل المطلوب و رد الفعل المنتظر

——————————-

طبعا المطلوب هو حمله ضخمه في الصيف للقضاء علي الناموس في اماكن تجمعاته. كمان تحذير المصريين من السفر للأماكن المصابه بالفيروس زي البرازيل. و كمان مراقبه القادمين من اماكن موبوءه. 

طبعا لان العلم في مصر لا وجود له في دوله الجيش نتوقع ان الجيش سيخترع جهاز لتحويل فيروس زيكا لكفته. كمان نتوقع إعدام كل شخص اسمه زكي او زكيه بالضبط زي ما أعدموا كل الخنازير لما انتشرت إنفلونزا الخنازير (مصدر ٥) مع ان إعدام الخنازير ملهوش دعوه بالموضوع و ادي اعدامها لانتشار الزباله في مصر في مخالفه لكل قواعد العلم. عادي. هذا ما تعودناه من دوله جيش الكفته. 

نصيحتنا للقراء هي التخلص من البعوض بسرعه. كمان الأفضل هو رش الجسم في فصل الصيف بدهان مضاد للبعوض بالذات الحوامل و كبار السن و المرضي مع قراءه الإرشادات المكتوبه علي الرش. 

اللهم بلغنا. اللهم فاشهد. 

#زيكا

#العلم

المصادر:

——–

١- بيان منظمه الصحه العالميه حول حمي الضنك في مصر:

http://www.who.int/csr/don/12-november-2015-dengue/en/

٢- اعراض حمي الضنك:

http://www.m.webmd.com/a-to-z-guides/dengue-fever-reference

٣- حرب البرازيل ضد حمي الضنك:

http://goo.gl/46jVcL

http://goo.gl/x7tYfV

٤- فيروس زيكا:

http://www.cdc.gov/zika/symptoms/index.html

٥- تعامل مصر مع إنفلونزا الخنازير:

http://goo.gl/38tN5o



Categories: البحث العلمي والإختراعات

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: