حامد و محمد و شيرين و علاقتهم بالثوره

Hamid_Mihamed_Shereen_and_Their_relation_to_the_revolution

أصل الخلاف في مصر حول الثوره و الشرعيه و رابعه و متي تقوم الثوره القادمه

———————————

السيد حامد العسكري لم يغادر مصر مطلقا الا مره واحده للحج. هو مقتنع تماماً ان مصر ربنا راضي عنها لوجود أولياء الله الصالحين فيها. و انه لا يوجد بلد احلي من مصر الا الحجاز. هوه كمان مقتنع انه ادي احنا عايشين. يعني احنا حننهب يعني و ان الرضا بالقليل مفيش احسن منه. و انه كمان استقرار البلد مهم عشان الاستثمار و الدنيا تمشي. كمان الاستاذ حامد شايف ان الجيش المصري ده خير اجناد الارض. ده مش بس بيدافع عننا. لا كمان ده بيوزع اكل رخيص. السيد حامد متدين طبعا لكن مش مربي دقنه و شايف ان الاسلام بتاعه هو الاسلام الصح. 

الحاج محمد خليفه راجل طيب. الحاج محمد مقتنع تماماً ان الحكومات المصريه فاسده و مش بيراعوا شرع ربنا. و عشان مش بيراعوا شرع ربنا مصيرهم وحش. الحاج محمد بيعمل خير كتير في الحي بتاعه. لذلك أهل الحي بيحبوه جدا. الحاج محمد مقتنع ان لو الناس بتوع ربنا مسكوا مصر فالبلد حتتقدم و حالها حينصلح. 

الاستاذه شيرين الغرباوي متعلمه في الجامعه الامريكيه و بتشتغل في سفاره هولندا في القاهره. الاستاذه شيرين سافرت معظم أوروبا و كمان امريكا. الاستاذه شيرين شايفه ان مصر دوله متخلفه طبعا و كمان بتحس لما تقابل أصحابها الاجانب بالكسوف ان مصر مش دوله ديمقراطيه زي بقيه العالم. الاستاذه شيرين مقتنعه جدا انها و اللي زيها لو مسكوا مصر فالبلد حتتقدم جدا. 

لما قامت ثوره يناير حصل ايه؟

————————–

السيد حامد العسكري شاف طبعا ان دي مؤامره ضد مصر من شويه عيال اهاليهم معرفوش يربوهم. طول عمر السيد حامد شايف ان الربايه دي اهم من العلام. و ان الشعب ده مش متربي و مش بيجي الا بالضرب و ان الحاكم لازم يبقي شديد مع الشعب المصري زي ايام عبد الناصر لما كان بيرعب الناس. و لما مبارك خطب خطبته العاطفيه كان العيال دي لازم تمشي بقي و يسيبوا الراجل الكباره مبارك اللي خيره علي البلد يقعد. لما العيال اصرت تقعد في الميدان السيد حامد العسكري كان حاسس انها مؤامره من امريكا. حامد بيحب الجيش جدا و يحب عبد الناصر و يكره امريكا عمى لانها بتحب اسرائيل و ضد مصر و كل العيال اللي في التحرير دول أكيد واخدين فلوس من امريكا عشان يبوظوا البلد. لذلك لما سمع ان بيوزعوا كنتاكي في الميدان أتأكد انها مؤامره من امريكا و كان بيدعي ان ربنا ينصر الجيش عليها. طبعا مش مهم ان مبارك و الجيش بياخدوا معونه من امريكا. أصل دي سياسه و نجاسه و مالناش دعوه بها. 

الحاج محمد خليفه شاف ان اخيرا الثوره قامت ضد الفسده و ان البلد تتمسك بشرع ربنا. الحاج محمد ساعات كان ينزل الانتخابات ايام مبارك و لانه محبوب فهو طبعا بيكسب الانتخابات الا لما نظام مبارك يزور ضده. و كان كل همه ان يتعمل انتخابات و ان الناس بتوع ربنا يمسكوا البلد عشان ينضفوها. الحاج محمد نزل الميدان و دافع عن الشباب و شاف شباب الاخوان المسلمين و هما بيموتوا في سبيل البلد. و كمان شاف شباب من غير الاخوان و من غير المسلمين و هما بيتقتلوا و كان بيدعلهم طبعا ان ربنا يتقبلهم جميعا عنده. الحاج محمد كمان بيكره امريكا لانها مع مبارك و الحكم الفاسد و مع اسرائيل اللي محتله الارض و عاوزه تهد المسجد الاقصي. و طول الثوره الحاج محمد كان حاسس ان الامريكان حيغدروا بالثوره و يعملوا مؤامره يقعدوا بيها مبارك. كمان الحاج محمد رأيه ان الثوره دي اسلاميه و ان في حاجات لازم تتصلح عشان ربنا يبارك لنا. يعني مثلا الملاهي الليليه و الناس اللي بتلبس مايوهات دي عيب و حرام. كمان كامب ديفيد دي أصل البلاوي و لازم تتلغي. يمكن مش علي طول بس لازم في النهايه ده يحصل عشان نحكم بشرع الله. 

الاستاذه شيرين الغرباوي طبعا ضد مبارك و نزلت الميدان ضد مبارك كمان. و هي بتعشق حاجه اسمها محمد البرادعي. و شافت ان ثوره يناير دي مفجرها هو محمد البرادعي الراجل اللي جاي من بره و من طبقتها عشان يمسك مصر و ينقذها. و طبعا الاستاذه شيرين عارفه انه لا في مؤامره من امريكا و لا بتاع. و كمان هي متأكده ان الثوره دي “هما” اللي قاموا بها. صحيح في ناس من الاخوان و السلفيين في الميدان و دافعوا عنه لكن دول اقليه و دورهم في الثوره محدود. و انه لما الثوره تنجح حنعمل دستور زي بتوع أوروبا و مصر تعيش زي أوروبا و هي و اللي زيها ياخدوا الاحترام اللي يستاهلوه سواء في مصر او خارجها. 

السيد حامد العسكري و الحاج محمد خليفه الاتنين مقتنعين ان امريكا بتعمل مؤامره ضدهم. الاتنين متفقين ان الربايه أصل كل شيئ. لذلك لما حصل الاستفتاء بتاع مارس ٢٠١١ بتاع تعديلات الدستور الحاج محمد خليفه و السيد حامد العسكري الاتنين صوتوا بنعم. الحاج حامد عشان ماده الشريعه الاسلاميه. السيد حامد العسكري عشان لازم ينصر جيش البلد و يقوله نعم! 

الحاج محمد و الاستاذه شيرين متفقين ان ٢٥ يناير ثوره. السيد حامد العسكري شايف انها ٢٥ خساير و ان البلد وقفت و خربت و منكم لله. 

الموقف من انتخاب د محمد مرسي

——————————

الاستاذه شيرين الغرباوي موقفها هوه يا اما البرادعي يا اما بلاش. هوه صحيح احمد شفيق بيتكلم إنجليزي كويس لكن هوه من نفس المؤسسه الفاسده. 

الحاج محمد خليفه طبعا اما مع الشيخ ابو اسماعيل او مع د محمد مرسي. 

السيد حامد العسكري كان طبعا عاوز الناس بتوع الجيش زي المشير طنطاوي او اللوا عمر سليمان او طبعا الفريق احمد شفيق. عشان نخلص من مؤامره امريكا دي ضد مصر. 

طبعا د مرسي لازم يكسب في الانتخابات. لان الحاج محمد خليفه راجل محبوب من الكل و طبعا بتاع شرع ربنا و مين يقدر يقف ضد شرع ربنا؟ 

سنه د محمد مرسي

——————

د محمد مرسي كان عاوز الاستاذه شيرين الغرباوي تدخل معاه و تساعده. لكن د محمد مرسي بالنسبه لشيرين عمل غلطه كبيره. ازاي ميجيبش محمد البرادعي نائب رئيس او حتي يديله صلاحيات الرئيس. 

و بعدين محمد مرسي ده بالنسبه لشيرين راجل بيئه قوي. بص الانجليزي بتاعه تعبان قوي. الحق ده عاوز يخلي العربي يبقي لغه البلد. ده حتي جه عشان الاخوان بيوزعوا زيت و سكر علي الناس و عشان امام الجامع قال للناس روحوا انتخبوا محمد مرسي. هوه ده السبب انه نجح. و البرادعي طبعا ما ينزلش انتخابات. الانتخابات دي مش من مستواه. احنا و اللي زينا نوصل للرياسه علي طول. الشعب ده عمره ما حيتقدم أبدا. 

الست شيرين الغرباوي كل أسبوع كانت تتفرج علي باسم يوسف. و مقتنعه تماماً ان باسم يوسف يمثلها. شوفتوا قال ايه علي مرسي امبارح؟ يجنن باسم يوسف. ده كان دكتور في امريكا و بيتكلم إنجليزي حلو جدا و مراته بتلبس احدث حاجه من أوروبا. الله عليه. مرسي ده ديكتاتور فاشي و العصابه اللي حواليه دول محدش فاهملهم حاجه و مهما قالوا هم أكيد عاوزين يأخونوا البلد. ده حتي جاب رئيس وزرا مربي دقنه. شوفتوا مرات محمد مرسي؟ دي لابسه خمار. شوفتوا مجلس الشعب بتاعهم و فيه الست ام أيمن؟ حاجه مش مشرفه خالص. استحاله اننا نبقي زي أوروبا بالشكل ده. احنا خيرنا علي محمد مرسي. احنا اللي عصرنا الليمون و عملنا الثوره. ده كان عاوز يمشي النائب العام. صحيح هوه فاسد لكن محمد مرسي ده لو مد أيده علي البلد و حكمها الناس دول مش حيمشوا أبدا و حينجحوا في كل الانتخابات. 

السيد حامد العسكري كان عارف ان البلد مش حتتصلح الا لما الجيش يمسكها. و كان شايف الأزمات عماله تزيد في البلد. ازمه بنزين. ازمه كهربا. و غيره. كل ده عشان مشينا الراجل الكباره مبارك و عشان اللي ماسك البلد مش من الجيش. 

٣٠ يونيو و الانقلاب و رابعه

————————

شيرين طبعا نزلت في مظاهرات الاتحاديه ضد مرسي. و كمان طبعا نزلت في ٣٠ يونيو. و نزل معاها السيد حامد العسكري. اخيرا حامد العسكري و شيرين الغرباوي اتقابلوا. 

لكن شيرين ابتدت تقلق شويه بعد ٣ يوليو لكن كله يهون في سبيل ان البرادعي بقي نائب رئيس جمهوريه. و طبعا كلنا عارفين ان شخصيته طاغيه و انه في الحقيقه اللي ممشي البلد. 

طبعا الحاج محمد خليفه كان ضد الانقلاب و كان بيروح رابعه كل يوم. و كان متاكد انها مؤامره امريكيه ضد الرئيس مرسي. 

شيرين كان رأيها ان ٣٠ يونيو ثوره للخلاص من الاخوان و الناس دول اللي عايشين في القرن الرابع الهجري و عاوزين يرجعونا لورا و يلبسونا نقاب و يخلوها قندهار. مش مهم لما شويه منهم يموتوا عشان البلد تبقي زي أوروبا. 

السيد حامد العسكري رأيه برضه ان مش مهم لما ميت الف يموتوا عشان البلد تستقر. حامد كان قلقان جدا من البرادعي. ده راجل عميل للامريكان. و كان قلقان انهم حطوه نائب رئيس. 

لما البرادعي مشي بعد رابعه و الجيش ظهر في الصوره، شيرين كرهت البلد تاني. بالذات لما باسم يوسف هرب. و الاسوء انها رجعت تاني تتبهدل من شويه عساكر و ضباط جيش ميسووش حاجه بالنسبه لها هي خريجه الجامعه الامريكيه. الزباله دول رجعوا يمسكوا البلد تاني. يعني احنا نعمل ثوره يناير ينط عليه الفاشيه الدينيه و بعدها نعمل ثوره يونيو ينط عليها الفاشيه العسكريه؟ 

الوضع دلوقتي

————–

السيد حامد العسكري مبسوط قوي من السيسي. بالعكس شايف انه لازم يضرب أكتر. حامد متاكد ان السيسي منيم امريكا من المغرب. و ان دوا اللوا عبد العاطي شغال و ان مشروع قناه السويس ده أجدع حاجه. و الحقيقه حامد بيتفرج علي احمد موسي في التلفزيون و بيعجبه قوي كمان توفيق عكاشه. و حتي لو كل ده محصلش كفايه ان الجيش منع اننا نبقي زي سوريا و العراق. 

الحاج محمد خليفه ابنه دخل المعتقل. و شايف ان امريكا عملت مؤامره علي مصر. و لما تطلب من الحاج محمد انه يتحرك شويه ضد الانقلاب بيطلع يمشي في مسيره لمده ربع ساعه و خلاص. تقوله يا حاج محمد ارفع قواضي في امريكا و هولندا ضد الناس اللي ظالمين ابنك، يقولك انا متكلمش مع الغرب الكافر. احنا في اخر الزمن و الله دي علامات قيامه و اللي بيحصل في سوريا دي علاماتها و المسيح قرب ينزل. كلها حجج عشان ميتحركش. و كمان الحاج محمد ابتدئ يقفل دماغه. يعني حتي لو حد من طرف شيرين الغرباوي فكر يساعده الحاج محمد بيرفض. للاسف الحاج محمد افقه ضيق شويه. مع انه راجل طيب و كويس و بيكسب الانتخابات. 

شيرين الغرباوي ضد السيسي و ضد الجيش و بتقول يسقط حكم العسكر. و لسه عندها حلم. لكن أكيد طبعا مش مع الاخوان و لا مع محمد خليفه. شيرين مش حتنزل انتخابات لانها عارفه انها مش حتنجح لكن هي عندها اتصالات بالدنيا كلها و قبل ٣٠ يونيو هيجت العالم كله ضد محمد مرسي. 

كمان الحاج محمد بيشك دلوقتي في كل حد. يعني أيمن نور أكيد عميل عشان شكله كده مش بتاع ربنا. و جنينه بتاع الجهاز المركزي ده أكيد اشتغاله من السيسي لانه ليه معملش زي وليد شرابي و مشي؟ مع انه حتي لو مع السيسي و بيحبه انه يطلع فساد ضده ده بيهدم النظام و بيدي فرصه للحاج محمد انه يوري انه مش بس بتوع الشرعيه ضد النظام الحالي الفاشل. لكن الحاج محمد دلوقتي بقي منهزم و مستسلم و مستني بس الفرج من ربنا عشان الظلم زاد من غير ما هوه يتحرك ضد الظلم بطرق جديده. الحاج محمد كمان بقي بيكره المسيحين قوي و شايف انهم جزء من المؤامره مع ان التعميم غلط و في ناس زي نيفين عبد الملك وقفوا ضد الانقلاب و الحاج محمد لازم يحاسب في كلامه لان السيسي مبسوط قوي ان الحاج محمد بقي طائفي عشان السيسي يروح للمسيحيين و الغرب و يقول انه لولاه الحاج محمد حيبهدل الأقليات. العجيب كمان ان الحاج محمد مثلا حاطط امل في السعوديه بتاعه ربنا و ملكها الجديد! مع ان السعوديه اكبر مؤيد للانقلاب. و العجيب انه معاها ضد الشيعه مع انه ما شفش شيعي واحد في حياته! و اما تقوله طيب الشيخ شلتوت قال عليهم مسلمين يرد يقول يبقي الشيخ شلتوت غلط. احنا لازم الاول نخلص العالم من الشيعه و بعدين اي حاجه تانيه. الحقيقه الحاج محمد معندوش أولويات خالص! الحاج محمد مش قادر يفهم انه ممكن يبقي ضد ايران في سوريا و ليس ضد الشيعه و ممكن يبقي ضد السعوديه في اليمن و مصر و هذا لا يعني انه ضد الاسلام و لا السنه. و انه ممكن الا يعجبه الشيعه و لكن هذا لا يعني قتلهم! 

شيرين متضايقة قوي من الناس اللي زي احمد موسي و مشاريع الفنكوش بتاعه الجيش. و هي عارفه من الاول ان جهاز الكفته فنكوش و تفريعه القناه فنكوش. و ان بالرغم ان بنات حلوه من طبقتها كانوا في الموتمر الاقتصادي بتاع شرم الشيخ و ان المؤتمر ده خلي صوره مصر حلوه، لكن هي عارفه من أصحابها الاجانب ان ده كله كلام فارغ. شيرين عندها بنت عمها جيجي الغرباوي. جيجي اتعلمت في مصر و عاشت طول عمرها في مصر. جيجي مع الثورتين زي شيرين. بس جيجي مصدقه ان السيسي كويس و انه بيعمل الصح. مثلا جيجي صدقت ان فرنسا حطت علم مصر علي قوس النصر في باريس. شيرين عارفه ان ده محصلش بس هي بتهاود جيجي عشان عارفه ان هي متأثره قوي بالإعلام في مصر و عارفه انها مسافرتش كتير و ملهاش اصحاب اجانب مهمين زيها ممكن تسألهم. يعني الطبقيه حتي في داخل العيله الواحده. 

نقاط الاتفاق و الخلاف

——————–

حامد العسكري: ٢٥ يناير خساير. مع الجيش دائماً. 

محمد خليفه: يناير ثوره. ٣٠ يونيو انقلاب. رابعه جريمه. لكن عجز عن التجديد و تحجر في الفكر و عجز عن التواصل مع العالم عكس اقرانه في تركيا و تونس مثلا. 

شيرين الغرباوي: يناير ثوره ضد مبارك سرقها الاخوان. ٣٠ يونيو ثوره ضد الفاشيه الدينيه سرقتها الفاشيه العسكريه. رابعه ملناش دعوه لانها بين الجيش و الاخوان. لا اعتراف بأي خطأ. 

جيجي الغرباوي: بنت عم شيرين. زيها في كل حاجه الا انها لسه مع السيسي اما لانها بتكابر او لانها متأثره جامد بالإعلام المصري و الخليجي. 

توجهات المستقبل 

———————

حامد العسكري مهما حصل مفيش امل منه. سيبك منه. حيفضل حامد للعسكري. 

المعلم أشرف العسكري اهم تاجر في البلد كلها و صاحب كل شيئ مش ممكن التخلص منه الا لما محمد خليفه و شيرين الغرباوي يشتغلوا مع بعض. مش ممكن. شيرين محتاجه محمد يكسب الانتخابات. محمد محتاج علاقات شيرين الدوليه و قدراتها علي التنظيم و الحركه. شيرين و محمد لما اشتغلوا مع بعض ما ظهرش لحامد العسكري و لا أشرف العسكري صوت. 

علي فكره الكلام ده مش تأليف. ده تاكيد لاحدث نظريات التحول الديمقراطي في العالم. و كتبناها في المصادر هنا:

١- متي تقوم الثوره القادمه:

https://jawdablog.org/2015/11/24/how_to_topple_the_coup_by_21st_century_methods_when_the_next_revolution_will_happen/

٢- تجربه البرازيل في التحول الديمقراطي:

https://jawdablog.org/category/الانقلابات-العسكرية/الحكم-العسكري-في-البرازيل/

٣- مقومات الثوره:

https://jawdablog.org/2015/12/11/jawda_opinion_about_demonstrating_in_jan_25_2016/

#كيف_تكسر_الانقلاب 

#متي_تقوم_الثوره_القادمه

One comment

  • كلام رائع وممتاز في التحليل لكن راي الشخصي ان المصيبة كلها سببها موضوع بسيط جدا وهو الجهل المتعمد =هو االتعود علي عدم البحث عن معلومة سليمة و اكيدة واستهسال الثقه في اي اكذوبة بدوتن التوثق ولهذا ففي راي الشخصي يبقي الحل هو التصدي لكل متلقي للكذبة ومروج لها بطلب مصدر معلوماته وانا افعل هذا كثير وهو في راي يوقف النقاش الابله مع قطعان من الجهله المعجبين بجهلهم فما نراه من هذا المسخ المسمي احمد موسي موجود كثيرا في الشارع اقابلهم يوميا ولهذا اجد اجابة واحدة علي طرف لساني اعطيني مصدر معلوماتك او اخبارك لاوقف سيل الجهل والبلاهة الذي يحيطني في كل مكان

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s