الاستيراد و التصدير في مصر … تعالوا نفهم الاقتصاد ببساطه حلقه ٢

Lets_learn_Economy_Import_Export_in_EGYPT1

في السلسله دي بنتعلم مبادئ الاقتصاد المكلكعه ببساطه. يعني زي ما بيقولوا بالبلدي كده. النهارده حنحاول نفهم مصر بتصدر ايه و بتستورد ايه. و لو عاوزين نزود التصدير و نقلل الاستيراد نعمل ايه. موضوع مهم جدا و جالنا فيه اسئله كتيره من نوعيه “طيب طالما انتم فاهمين كده متقولولنا نعمل ايه”

طيب. استعنا بالله. اول حاجه لازم تعملها انك تدخل علي ويب سايت عملاه جامعه ام اي تي الامريكيه (معهد ماساتشوستس للتكنولوجيا). دي يا جماعه اهم و اكبر جامعه في العالم. الجامعه دي ميزانيتها في السنه الواحده ٣ مليار دولار (مصدر ١).

الويب سايت ده اسمه او اي سي OEC و هي الأحرف الاولي لمرصد التعقيد الاقتصادي (مصدر ٢). اه و الله اسمه كده. بيرصد حركه التجاره العالميه لكل دول العالم. الويب سايت ده فيه صفحه عن مصر زيها زي كل دول العالم (مش مؤامره علي مصر لوحدها يعني) و موجوده في مصدر ٣.

قبل ما تدخل علي صفحه مصر في الويب سايت ده لازم تعرف حاجه الاول. الويب سابت ده عمله سيزار هيدالجو (أستاذ في ام اي تي و اصله من شيلي) و بيلي كلينجر (مدرس في جامعه هارفارد) و ريكاردو هاوسمان (أستاذ الان في هارفارد و اصله من فنزويلا) و ألبرتو لازلو برباسي (أستاذ في ام اي تي و مهاجر من الاقليه المجريه في رومانيا). الناس دي مش اي كلام. دول نشروا مقاله في مجله ساينس الامريكيه سنه ٢٠٠٧ (مصدر ٤). انك تنشر في ساينس فهذا أنجاز ما بعده إنجاز بالنسبه لأي عالم. عشان بس نعرف ان ده مش ويب سايت عادي. احنا داخلين علي قمه العلم في العالم و حنحاول نبسطها و حتكتشفوا اننا زي بقيه البشر ممكن نبقي كويسين و بنفهم بس اللي حاكمنا مش عاوزين.

ادخل بقي علي صفحه مصر هنا. حتلاقي ايه. حتلاقي اول رسمه فيها اللي بتصدره مصر و التانيه فيها ايه اللي بتستورده. و احنا عشان عارفين انك حتكسل نقلنا الرسمتين هنا.

امبارح دخلنا و فصصنا الواردات بالكامل (مصدر ٥). النهارده بقي نبص علي الصادرات. ايه هي الصادرات التقيله؟

———————————————————————-

Lets_learn_Economy_Import_Export_in_EGYPT2

اول حاجه البترول غير المصفي. مصر بتصدر بترول عشان يتصفي بره عشان نرجع نستورده بعد ما يتصفي. و هذه كارثه. و علي فكره بنستورد معظم البترول المصفي ده من الهند. اه و الله. البنزين اللي انت بتروح تملأه في بنزينه وطنيه بتاعه الجيش الماسري العزيم ده، جاي من الهند. و التوكتوك اللي واقف جنبك برضه منتج في الهند. و طبعا انت بتغني تسلم الايادي. علي فكره الهند معمرهاش حكمها حاكم عسكري مع انها دخلت ٤ حروب!

بعد كده مصر بتصدر منسوجات ب ٤ مليار دولار. يعني بنستورد منسوجات ب ٤ مليار. و بنصدر ب ٤ مليار. شيئ يفرح في بلد هي مهد صناعه المنسوجات في العالم.

بعد كده بنصدر سماد بحوالي ٣,٧ مليار دولار. و بعدين منتجات زراعيه زي الليمون و البرتقال بحوالي ٣ مليار و هكذا تبتدي الأرقام تقل.

طيب صادراتنا بتروح لفين؟ 

————————

Lets_learn_Economy_Import_Export_in_EGYPT4

بص علي الصوره التالته فيها صادراتنا بتروح لفين. إيطاليا و الهند و السعوديه و تركيا و الصين و امريكا هم اهم الاسواق اللي احنا بنصدر لها.

تلاحظ بقي مثلا ان دوله الامارات العربيه المتحده مش موجوده تقريبا (مصدر بتصدر لها ٧٠٠ مليون دولار في السنه بس معظمها منتجات بتروليه للمصانع الاماراتيه و بعض الليمون و البرتقال. يعني مش منسوجات حتي). مع انها بتستورد تقريبا كل حاجه من كل حته.

مصر بتصدر لتركيا مثلا سماد و منسوجات غير نهائيه. و بتصدر للهند بترول غير مصفي عشان يتصفي في الهند و يرجع لنا تاني. شيئ مفرح.

طيب ازاي نزود الصادرات؟

————————

Lets_learn_Economy_Import_Export_in_EGYPT5

سيزار هيدالجو و المجموعه بتاعته في أم اي تي اخترعوا رسمه سموها خريطه الصادرات (الصوره الرابعه). الرسمه دي مهمه قوي و حنعلمك ازاي تستخدمها. و علي فكره مفيد قوي هنا لو انك تدخل علي الخريطه التفاعليه في المصدر ٦ بنفسها لانها جميله جدا. يعني مثلا تحط السهم علي نقطه حتطلعلك ايه هي و حجم اللي مصر بتصدره من السلعه دي كمان.

كل نقطه في الصوره هي سلعه مصر بتصدرها. الخطوط بين النقط بتعبر عن ان السلع دي مترابطه ببعضها. ازاي؟ يعني مثلا لو بلد بتصدر ليمون. في الأغلب تقدر كمان تصدر برتقال. و كمان تقدر تصدر خضار و فاكهه و هكذا. كمان لو بلد بتصدر توكتوك، تقدر بشويه مجهود تصدر عربيات و بعدين اتوبيسات مثلا و هكذا.

لما تبص علي خريطه التصدير لمصر حتلاقي في نقط ملونه و نقط رمادي. النقطه الملونه معناها مصر بتصدر السلعه دي فعلا. النقطه الرمادي معناه ان مصر مش بتصدرها او بتصدرها بكميه قليله قوي.

طيب انت لو عاوز تزود التصدير تعمل ايه؟ تبص علي النقط الرمادي في الخريطه اللي مرتبطه بنقط احنا فعلا بتصدرها. واضح الكلام؟

يعني مثلا لو احنا بتصدر برتقال دلوقتي حيبان انه نقطه ملونه. و نفرض اننا مش بنصدر لمون. حيبان اللمون انه نقطه رمادي متوصله بنقطه البرتقال. يعني الخريطه بتقولنا و بتتكلم احنا نركز في ايه عشان نزود الصادرات. بس مين اللي يفهم.

ناخد بمثال:

————–

Lets_learn_Economy_Import_Export_in_EGYPT7

بص كده علي شمال الخريطه من تحت خالص و حتركز عليها في الصوره الخامسه. حنلاقي ان مصر بتصدر سجاد بارز (الصوره السادسه) بحوالي ١٣٥ مليون دولار. و ده رقم مش وحش بس مش كبير قوي. السجاد البارز ده سهل عمله جدا. حتلاقي ان السجاد البارز ده له خط مرتبط بسلعه تانيه هي “أدوات البيت المعدنيه”. يعني الحلل و الكسرولات و السلالم المعدنيه الخ. دي برضه تكنولوجيا إنتاجها بسيطه و سهل إنتاجها. و كون ان في خط بينهم معناه ان الدول اللي تقدر تنتج سجاد بارز تقدر كمان تنتج حلل و تصدرها. المصيبه بقي ان مصر بتصدر أدوات منزليه معدنيه بس ب ١٥ مليون دولار.

Lets_learn_Economy_Import_Export_in_EGYPT6

خش علي اللي بعدها. حتلاقي ان الرابط بعد كده هوه مع “السكاكين”. مصر بتصدر سكاكين بس ب ٢ مليون دولار. و ده رقم قليل جدا لكن مش مشكله دلوقتي. خليك معانا شويه. لو كملت تمشي تبع الخريطه حتلاقي ان كمان المفروض مصر تقدر تصدر الزرع الصناعي. يعني اللي يقدر يعمل سجاد و حلل يقدر في الأغلب بتكنولوجيا مقاربه و استثمارات مش كبيره يعمل زرع بلاستيك. دي صناعه بتحتاج انك تعرف تعمل بلاستيك و عماله يدويه شاطره تدككه في بعض عشان يطلع زرع صناعي مع فنانين يقدروا يعملوا أشكال حلوه. كل ده موجود في مصر. مصر بقي بتصدر زرع صناعي بس ب ٥ الاف دولار (انت قريتها صح ٥٠٠٠ دولار فقط لا غير و صدرتهم للأردن غالبا غلطه). ما شاء الله!

طيب احنا مش عاوزين نصدمك بس امريكا لوحدها باعت في محلاتها زرع صناعي قيمته ٢ مليار دولار في سنه واحده هي ٢٠٠٥ (بص علي صفحه ٥ في التقرير في مصدر ٧ و هو من الحكومه الامريكيه ذاتها).

يعني الامريكان لوحدهم اشتروا زرع صناعي قيمته ٢ مليار دولار. و مصر صدرت زرع صناعي قيمته ٥ الاف دولار بس.

Lets_learn_Economy_Import_Export_in_EGYPT8

علي فكره لو كملت في الخريطه حتلاقي نقطه اسمها “زينه الحفلات”. و دي مصر مش بتصدر فيها حاجه خالص. ايوه. زينه الحفلات بتاعه ورق أعياد الميلاد و كده. شركه امريكيه واحده اسمها بارتي سيتي متخصصه في مجال زينه الحفلات. واضح من اسمها. قيمه رأسمال الشركه دي في السوق الامريكيه ٢ مليار دولار (مصدر ٨).

احنا أخدنا أتفه فرع موجود في الخريطه عشان نوريك قد ايه ان العلم غائب في البلد دي. و ان اللي عملك فنكوش عبد العاطي كفته مش ممكن حيوصل انه يقرأ ام اي تي و لا يفهم خريطه الصادرات و لا يعرف يعمل حاجه من دي.

و بعد كده نسأل هم ليه بيتقدموا و احنا بنتخلف!

و سلسله تعليم الاقتصاد كلها في مصدر ٩ .

المصادر:

———-

١- ميزانيه جامعه ام اي تي الامريكيه:

http://web.mit.edu/facts/financial.html

٢- مرصد التعقيد الاقتصادي:

http://atlas.media.mit.edu/en/

٣- صفحه مصر في ويب سايت جامعه ام اي تي الامريكيه:

http://atlas.media.mit.edu/en/profile/country/egy/

٤- ما تنتجه الدول يتحكم في قدرتها علي النمو … مجله ساينس الامريكيه ٢٠٠٧:

http://www.chidalgo.com/papers.html

٥- حلقه الواردات من تعالوا نتعلم الاقتصاد بسهوله:

https://www.facebook.com/jawda.org/posts/970302243039989

٦- خريطه الصادرات المصريه التفاعليه:

http://atlas.media.mit.edu/en/visualize/network/hs92/export/egy/all/show/2013/

٧- تقرير الحكومه الامريكيه عن حجم أسواق المنتجات اليدويه في امريكا:

http://pdf.usaid.gov/pdf_docs/Pnadn210.pdf

٨- قيمه بارتي سيتي في السوق الامريكيه:

http://www.reuters.com/article/us-party-cty-holdco-ipo-idUSKBN0N62NG20150416

٩ – تعالوا نتعلم الاقتصاد ببساطه … السلسله مجمعه:

jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s