مقارنه الصادرات المصريه و التونسيه … تعالوا نتعلم الاقتصاد ببساطه

Lets_Learn_Economy_Tunis_versus_Egypt_Exports1

نكمل اننا نتعلم المبادئ الاقتصاديه المكلكعه زي ما بيقولوا بالبلدي كده.

حنتعلم النهارده ازاي نقارن بين قيمه الصادرات لبلدين زي مثلا مصر و تونس.

اول حاجه نعملها ندخل علي مصدر ١. المصدر ده فيه كل الإحصائيات الاقتصاديه اللي بتصدرها الجهات الرسميه في كل دول العالم. يعني من مصر بياخدوا البيانات من الجهاز المركزي للتعبئه و الإحصاء و وزاره الماليه و البنك المركزي كل في اختصاصه و يحطوها في فورمه ممكن نستخدمها للمقارنه مع بقيه العالم. الموقع ده مهم قوي لأي دارس للاقتصاد علي فكره و ميزته ان بياناته كلها من مصادر رسميه و بيدخله ٥ مليون واحد في السنه من ٢٠٠ دوله. اي كورس اقتصاد دولي في دول العالم المتقدم بيعتمد دلوقتي علي الموقع ده.

مقارنه بسيطه بين البلدين:

———————–

طيب تعالوا نمسك معلومات الصادرات في بلدين: مصر و تونس. حنلاقي تونس في مصدر ٢ و مصر في مصدر ٣. نمسك تونس الاول. في شهر نوفمبر ٢٠١٥ صدرت تونس بحوالي ٢٥٠٠ مليون دينار تونسي. الكلام ده مصدره هو معهد الإحصاء الوطني التونسي. طيب الدينار التونسي سعره دلوقتي حوالي نصف دولار (مصدر ٤). يعني تونس صدرت في شهر نوفمبر بحوالي ١٢٥٠ مليون دولار أمريكي.

Lets_Learn_Economy_Tunis_versus_Egypt_Exports2

طيب ندخل علي مصر. أخر بيانات مصر هي شهر اكتوبر مصر صدرت في اكتوبر بحوالي ١٦٥٠ مليون دولار. لاحظ انه تونس بتكتب بياناتها بالدينار التونسي بس مصر بتكتب بالدولار علي طول. جنيه مصري ايه و بتاع ايه. احنا حنهرج.

اول ملاحظه هي انه مصر بسكانها ٩٠ مليون صدرت بحوالي ١٦٥٠ مليون دولار في الشهر. تونس سكانها ١١ مليون بس. اه و الله. صدرت بحوالي ١٢٥٠ مليون دولار. طبعا ميصحش كده. لكن أكيد دي مؤامره علي البلد المنتجه دي.

Lets_Learn_Economy_Tunis_versus_Egypt_Exports3

المقارنه بين تأثير ثوره تونس و ثوره مصر

———————————-

نبص بقي كده علي الأرقام في تونس من سنه ٢٠٠٦ لحد دلوقتي و نفس الكلام في مصر. احنا عشان نسهلك الامور طلعنا الرسمتين من موقع تريدنج ايكونومكس في مصدر ٢ و ٣ و حطينهم في الصور المرفقه. بس انت مفروض كده تتعلم و تدخل الموقع من نفسك و تعمل نفس اللي احنا عملناه عشان تتعلم.

حتلاقي ايه؟ بص كده علي الصوره الاولانيه. حتلاقي ان تونس صادراتها عماله تزيد باستمرار من سنه ٢٠٠٦ لحد دلوقتي. و لا حتي باين انه في تأثير للثوره و لا اي حاجه. منحني مستمر في الارتفاع بنفس الوتيره.

بس في حاجه مهمه. تونس مقيمه صادراتها بالدينار التونسي. و الدينار سعره قل قصاد الدولار. فعلا. في ٢٠١١ سعر الدينار كان ٧٠ سنت أمريكي و الصادرات كانت حوالي ١٨٠٠ مليون دينار تونسي في الشهر في ٢٠١١. يعني نحولهم لدولار بسعر ٢٠١١ يطلعوا ١٢٥٠ مليون دولار أمريكي. دلوقتي في ٢٠١٥ الدينار التونسي بحوالي ٥٠ سنت و صادرات تونس حوالي ٢٥٠٠ مليون دينار. نحولهم لدولار بسعر دلوقتي يطلعوا ١٢٥٠ مليون دولار برضه.

يعني ايه الكلام ده؟ يعني صادرات تونس مقومة بالدولار من سنه ٢٠١١ لحد دلوقتي تقريبا ثابته بالرغم ان العمله التونسيه قلت.

نبص كده علي مصر. حتلاقي ايه في الصوره الثانيه؟ نفتكر مصر بتقوم صادراتها بالدولار علي طول. حنلاقي انه صادرات مصر كانت بتزيد لحد ٢٠١١. و بعدين من ٢٠١١ لحد ٢٠١٣ صادرات مصر تقريبا ثابته. يعني لحد ٢٠١٣ مصر كانت ماشيه زي تونس اللي هما بلدين حصل فيهم ثوره و بالتالي قللت النشاط الاستثماري و ده طبيعي في اي ثوره ان الناس مش بتستثمر لحد ما تطمئن. و في خلال الوقت من ٢٠١١-٢٠١٣ حصل ثبات في التصدير مقوم بالدولار زي تونس بالضبط.

لكن جه عصر الأمان و الاستقرار!

——————————

تونس لسه التصدير فيها ثابت مقوم بالدولار. لكن مصر بقه قررت انها تروح علي طول في أتجاه الأمان و الاستقرار بتاع يونيو ٢٠١٣. و من ساعتها و احنا واخدين استقرار الحقيقه. بص كده علي منحني الصادرات المصريه من وقتها حتلاقيه انه نازل بسرعه الصاروخ. بدل ما كنا في ٢٠١٢ بنصدر بحوالي ٢٥٠٠ مليون دولار في الشهر بقينا في ٢٠١٥ بنصدر بحوالي ١٥٠٠ مليون دولار في الشهر. يعني صادراتنا قلت ٤٠٪. اه و الله ٤٠٪. تقريبا النص. و ده نتيجه مباشره للامان و الاستقرار و ثوره ٣٠-٦ اللي قامت عشان عجله الاقتصاد تدور.

و علي فكره لو تلاحظ ان اتجاه النزول تسارع في ٢٠١٤ مع انتخاب المشير السيسي و سيطرته الكامله و سيطره الجيش المصري الكامله علي الاقتصاد.

مع ان المفروض ان خلاص بقي فيه استقرار و المفروض ان المستثمر اللي كان خايف يدخل بقي. لذلك عاده بعد الثورات بعده سنوات يحصل نمو كبير (و ده اللي داخله عليه تونس لان سعر العمله فيها ابتدى يستقر (مصدر ٤) و مع ذلك الصادرات بالدينار عماله ترتفع.

طبعا ده محصلش في مصر. و كمان ما ننساش ان مصر دخلها ٤٠ مليار دولار رز و حصل فيها مؤتمر لا مؤاخذة اقتصادي. و كمان حصل فيها لنض موفره و مشروع لا مؤاخذة الكنال. و هكذا.

و بعد كل ده يجي ابنك انت و يبيعلي البتاع ده هوه و يقولي عجله الانتاج. مسخره و الله. نحن نري ما لم نري في اي نظام اقتصادي في العالم. يلا. بكره تشوفوا ماسر.

و الحلقات كلها مجمعه من تعلم الاقتصاد ببساطه في مصدر ٥.

المصادر:

———

١- موقع تريدنج ايكونومكس. 

http://www.tradingeconomics.com/about-te.aspx

٢- صادرات تونس:

http://www.tradingeconomics.com/tunisia/exports

٣- صادرات مصر:

http://www.tradingeconomics.com/egypt/exports

٤- سعر الدولار للدينار التونسي:

http://www.xe.com/currencycharts/?from=TND&to=USD&view=10Y

٥- تعال نتعلم الاقتصاد ببساطه:

jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s