اسطوره ان مبارك لم ينتوي توريث الحكم لابنه …. الاسطوره ٧٠

Myth70_Mubarak_did_not_intend_to_inherent_presedency_to_his_Son1

ذكريات ثوره ٢٥ يناير من واقع بريد هيلاري كلنتون الالكتروني 

———————-

خطه الجيش من البدايه وضع رئيس عسكري!

———————-

الجيش يكره عمر سليمان لانه من المخابرات

———————-

وفقا لقانون حريه المعلومات نشرت وزاره الخارجيه الامريكيه مجموعه ضخمه من مراسلات هيلاري جزء منها (عشان إخوانا بتوع نظريه المؤامره المراسلات عن كل المواضيع) يتعلق بمصر.

طبعا احنا انقطع نفسنا للمطالبه بقانون لحريه المعلومات في مصر و فعلا كان في مشروع في وقت د مرسي لكن طبعا اندثر.

ننشر هنا ترجمه و تعليق علي بعض منها و جميعها موجود في مصدر ١.

Myth70_Mubarak_did_not_intend_to_inherent_presedency_to_his_Son2

————

من: آس بي دبليو (بقيه الاسم محجوب لانه غالبا في المخابرات)

تاريخ: الاثنين ٣١ يناير ٢٠١١ الساعه ١١,٢٦ صباحا 

الي: إتش (اختصار هيلاري)

الموضوع: معلومات استخباراتيه جديده من درمهيلر و لانج عن مصر 

المرفقات: تقرير معلومات استخباراتيه للسيده إتش ار سي (احرف هيلاري كلنتون الاولي و اسمها بالكامل هيلاري رودهام كلنتون)

خاص

يناير ٣١، ٢٠١١

الي: هيلاري

من: سيد (في الأغلب هو سيدني بلومنثال مساعد هيلاري كلنتون المقرب و هو ينقل لها معلومات استخباراتيه وصلته)

الموضوع: معلومات عن مصر

تباحثت اليوم مع تايلر درمهيلر و بات لانج.

(تعليق جوده: تايلر درمهيل كان رئيس محطه السي اي ايه في مصر في وقت سابق ثم ترك مصر. و يبدو ان الاداره الامريكيه كانت في حيره بالنسبه للوضع في مصر و انها فعلا تفاجأت و لذلك طلبت من الخبراء القدامي بتوع مصر انهم يتحققوا من ايه اللي بيحصل لان في الأغلب كان الشك في الموجودين في مصر وقتها كبير. و اللي يؤكد ذلك انهم شالوا السفيره مارجريت سكوبي لاحقا لانها في الأغلب عجزت عن التنبؤ بالثوره.)

درمهيلر كان في تواصل مستمر مع مسئولين اوروبين علي مستوي عالي في المخابرات عندهم مصادر معلومات علي الارض في مصر. 

(تعليق جوده: واضح نبره عدم الثقه في المصادر الامريكيه وقتها لانها في نظر واشنطن فشلت).

لانج ايضا صديق قديم لعمر سليمان. التالي هو المعلومات منهم و الاختيارات أمامنا في الفتره القادمه:

١- الوضع في الاسكندريه و السويس اسوء من القاهره بمراحل. لا يوجد شرطه و لا حكومه و لا نيابه. العنف اكثر و القتلي اكثر. الجيش يريد الحفاظ علي نفسه و ده معناه التخلص من مبارك.

مبارك عاوز يفضل أسبوعين عشان ما يضطرش يهرب بسرعه.

(طبعا في البرقيه اللي فاتت احنا عرفنا ليه مبارك كان عاوز يقعد أسبوعين. اول طلب ليه كان تأمين فلوسه. و البرقيه الامريكيه واضحه جدا في الموضوع ده و نشرناها. مصدر ٢)

٢- في الخريف الماضي مبارك غضب علي عمر سليمان لسبب غير معلوم. في الأغلب بسبب طموح جمال مبارك. مبارك اساء معامله عمر سليمان جدا. مبارك بيوعد عمر سليمان بنائب الرئيس من ١٥ سنه لان مبارك كان خايف انه يخلفه بدل جمال. المفروض ان عمر سليمان يخلف مبارك لحد لما جمال يتمرن علي الرياسه.

(تعليق جوده: يعني “لم أكن انتوي” دي كانت ضحك علينا بشكل كامل. و ان الدنيا كلها الامريكان و الأوروبيين و كله عارفين انه ناوي يورث لجمال و احنا كشعب اللي كان بينضحك علينا. الحقيقه فكره جهنميه ان عمر سليمان يقعد شويه و بعدين يجي جمال مبارك. ساعتها مكانش حد يقدر يقول توريث. المصيبه ان الامريكان عارفين كل ده و احنا الشعب مضحوك علينا! بس طبعا لأنهم مافيا و كلهم شاكين في بعضهم فمبارك مش واثق في عمر سليمان لدرجه يسلمه دقنه. و المسأله زي ما شوفنا مش حب مصر. دي فلوس في سويسرا زي ما الامريكان كاتبين.).

الجيش مش بيحب عمر سليمان لانه من المخابرات مش من الجيش. الجيش مش بيكرهه لكن كمان عارفين ان الشعب رافضه دلوقتي.

(تعليق جوده: دي طبعا جديده علينا. و ده بيفسر لنا دلوقتي ليه السيسي، اللي هوه برضه من المخابرات مصر يلبس بدله عسكريه مكتوب عليها انه القايد الاعلي للقوات المسلحه. و بيشرح لنا كمان ليه السيسي رغم انه مسيطر علي المخابرات العسكريه و قلش كل فريق عمر سليمان من المخابرات العامه، لسه برضه قلقان من الجيش. و انه غير ما الناس بتقول ان حازم عبد العظيم مسنود من المخابرات، اللي السيسي رفد و غير كل وكلائها، بالعكس غالبا حازم مسنود من حد جوه الجيش نفسه من فرقه سامي عنان اللي عايش في السعوديه اللي عاوزه تبلطج علي السيسي زي ما هوه عاوز يبلطج عليها. و واضح طبعا ان التسريبات بتاعه السيسي كانت من المخابرات العامه و فريق عمر سليمان. و بعد التسريبات يبدو ان السيسي طردهم كلهم. و حط ابنه.)

٣- الجيش عارف انه لازم يوصل لتوافق مع الاخوان المسلمين و فعلا بيتواصل مع الاخوان. معظم قيادات الاخوان المتطرفه في السجن لكن الجيش بيتواصل مع المعتدلين. مفيش خميني و لا نصر الله هنا. المشكله مش في الاخوان. المشكله هي في حاله التدين العام عند الطبقات الفقيره اللي البطاله عندها مرتفعه.

(تعليق جوده: مقصود مفيش خميني ان الاخوان معندهمش قياده كبيره. و ده شيئ احنا عرفناه كلنا لاحقا. و طبعا موضوع التدين ده بيفسر ليه السيسي بيتكلم عن تجديد الخطاب الديني و ليه بيقول كده بالبلدي. هو هدفه الطبقات الفقيره. و احنا حنشوف تكثيف لهذا في المستقبل. و كمان تكثيف الدفع في اتجاه التصوف. ادينا قلنا اهوه. مش معني كده التصوف وحش. لكن طبعا فيه ممارسات في بعض التصوف ملهاش علاقه بالدين لكن حلو تسهيلها للفقراء. و علي فكره علي جمعه متصوف تصوف به كثير من المشاكل. يعني بيقول الامام ممكن يزني. و بيقول ان الحشيش لا يبطل الوضوء. و ده دور علي جمعه انه ينشر الخرافات و يحلل المخدرات بين الطبقات الفقيره عشان محدش يثور بعد كده. واضح الكلام)

٤- الجيش عاوز رئيس يكون لواء او فريق. و واحد مدني زي البرادعي يكون رئيس وزرا. و لكن مش البرادعي نفسه لانه ملوش وجود علي الارض و ان كان الناس ابتدت تعرفه.

(تعليق جوده: دي خطه الجيش من البدايه. و ده يؤكد ما قلناه قبل كده في مصدر ٣ وفق تحليل تصرفات الجيش. كان واضح تماماً من تغيير نتيجه الاستفتاء الي وثيقه السلمي الي حل مجلس الشعب.)

٥- الجيش مسيطر علي الوضع علي الارض، علي الأقل لحد دلوقتي. دول مش شويه عيال شغالين علي فيسبوك زي ما وسائل الاعلام في امريكا بتقول. لكن الوضع ممكن يقلب في اي أتجاه. لكن التغلب علي الجماهير حيكون معناه حمام الدم، و الجيش مش عاوز كده. الجيش بيكره البوليس. و في سنه ١٩٨٥ الجيش حارب البوليس في الشوارع. الشرطه بتختفي في مواقع كثيره. و الضباط بيحرقوا بدلهم.

(تعليق جوده: الجيش مسيطر علي الموقف معناها أمنيا. متاكدين طبعا ان بتوع نظريه المؤامره حيقولوا ان الجيش هو اللي مطلع الناس. لكن اللي بيخالف كده جمله ان القضاء علي المظاهرات معناه حمام دم. )

٦- الجيش عارف ان مبارك لازم يمشي. بس امتي؟ لو قعد كتير الامور حتخرج بره السيطره.

٧- افضل سيناريو ممكن هو انتخابات مع وجود سليمان كرئيس موقت. حتي ده دلوقتي بقي مش سهل. كل يوم مبارك بيستني فيه احتمالات المصيبه بتزيد.

٨- بعد تعثر في البدايه اخيرا امريكا بتقول كلام مضبوط. فكره مساعده مبارك يستني انتهت. جميل. ان اوباما يكلم مبارك مش حل كويس. اوباما مينفعش يبقي الرسول اللي يقوله انه لازم يمشي. كويس اننا نشكر الجيش لضبط النفس في البدايه لتسهيل الانتقال. و لكن امريكا لازم تبعت رسول يقول لمبارك في وشه انه لازم يمشي. الشخص ده ممكن يكون الأدميرال مولن (تعليق جوده: مايك مولن هو رئيس أركان الجيش الامريكي وقتها) لكن ده بيخلي الامر عسكري أكتر من اللازم. المصريون لا يحترمون كولن باول (تعليق جوده: رئيس الاركان و وزير الخارجيه السابق). احتمال اخر هو جيم بيكر (تعليق جوده: وزير خارجيه امريكا الأسبق). الانتظار أسبوع هو وقت أطول من اللازم.

(تعليق جوده: فعلا أرسلت امريكا مبعوث شخصي لمبارك هو السفير فرانك ويزنر و هو كان سفير امريكا في القاهره فتره طويله و لديه صداقه مع مبارك. و فعلا فرانك وزنر قابل مبارك و قاله انه لازم يمشي و مبارك زعل و رفض و طرد وزنر و رفض يقابله مره كمان. مصدر ٣ )

و نستكمل الموضوع غداً بعون الله.

المصادر:

——–

١- مراسلات هيلاري كلنتون المنشوره وفق قانون حريه المعلومات:

https://foia.state.gov/Search/Results.aspx?collection=Clinton_Email_December_Release

٢- اسطوره مبارك تنحي لإنقاذ الوطن:

https://www.facebook.com/jawda.org/posts/971235706279976

٣- اسطوره ان الجيش لم يرغب في السلطه:

https://jawdablog.org/2014/10/12/egypt_taboo_21/

https://jawdablog.org/2014/10/12/egypt_taboo_21_2/

https://jawdablog.org/2014/10/12/egypt_taboo_21-3/

٤- فرانك وزنر مبعوث اوباما لدي مبارك:

http://www.nationalreview.com/developing/258914/breaking-white-house-urging-plan-mubarak-resign-immediately-matthew-shaffer

٥- الاساطير السابقه كلها مجمعه:

jawdablog.org/category/الأساطير-و-التابوهات-في-السياسه-المصر/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s