…تعالوا نفهم سعر الدولار و ازاي البنك المركزي قلل سعره … هيا نتعلم الاقتصاد ببساطه

lets_understand_economy_Dollar_value_and_how_the_Central_bank_reduced_it

نكمل السلسله اللي بنشرح فيها مبادئ الاقتصاد المكلكعه زي ما بيقولوا بالبلدي كده. الناس اخيرا اتلخبطت. ازاي البنك المركزي يقدر كده بقرار ينزل سعر الدولار. طيب طالما يقدر يعمل كده معملش كده من بدري ليه؟ 

الموضوع سهل جدا. احنا دائماً بننسي اللي قولناه في اول الحلقات. و هو ان الدولار و اي عمله الحقيقه هو سلعه زي بقيه السلع سعرها يخضع لآليات العرض و الطلب (مصدر ١). رجعنا للكلام المكلكع. يعني ايه؟ يعني لو المعروض من سلعه كتير في السوق اكثر من الطلب عليها لازم سعرها ينزل. يعني لو ناس كتير معاها دولارات و عاوزه تبيعها في السوق اكثر من الطلب علي الدولارات دي فلازم سعر الدولار ينزل.زي بالضبط لو كان السوق فيه طماطم كتير أكتر من حاجه الناس فلازم التاجر ينزل سعر الطماطم عشان يبيع اللي معاه. 

طيب حد يقول انتم حتجننونا ليه؟ مش انتم قلتم قبل كده ان موارد مصر من الدولار اقل من احتياجاتها (مصدر ٢)؟ و احنا كلنا عارفين ان في ازمه دولار. يبقي المفروض وفق كلام العرض و الطلب بتاعكم ده ان سعر الدولار يزيد مش يقل زي ما حصل. 

جميل. تعالوا ندي مثال. المعلم محمد العسكري تاجر طماطم كبير في السوق. مشكله السوق السنه دي ان الجو حر قوي و الطماطم باظت في الارض و بالتالي المعروض من الطماطم قليل جدا و الإقبال عليها كتير فأسعار الطماطم زادت قوي. الناس بدأت تشتكي. و المعلم محمد العسكري بحكم انه تاجر كبير في السوق خاف ان الناس تدخل تكسر المحلات و تاخد الطماطم. قوم يعمل ايه. قرر انه ينزل سعر الطماطم جامد و يبيعها. طبعا الناس كلها بقت تشتري الطماطم من المعلم محمد العسكري بس. بقيه التجار مكنش قدامهم غير انهم كمان ينزلوا السعر لان المعلم محمد العسكري هو اكبر تاجر طماطم في السوق و عنده اكبر مخزون من الطماطم. 

طيب ما المعلم محمد العسكري راجل طيب قوي اهوه. امال انتم زعلانين منه ليه؟ المشكله ان الكلام ده موقت و كمان بيخلي الحاله في السوق تبقي اسوء كمان في المستقبل. ليه؟ 

مشكله المعلم محمد العسكري ان الطماطم اللي معاه كميتها قليله و محدوده لان إمداد الطماطم قليل. و حتي دلوقتي لما بيعوز طماطم بيضطر يستلفها من المعلم حسن السعودي اللي هو تاجر كبير قوي في السوق اللي جنبنا. لكن حتي المعلم حسن السعودي برضه الطماطم عنده فيها مشكله. لذلك المعلم محمد المصري بيستلف طماطم مش بتاعته و بيديها للناس بسعر رخيص لكن مخزون الطماطم عمال يقل. و طبعا هوه فرض علي التجار كلهم ان يبيعوا بنفس سعره القليل لكن مش حيقدروا يستمروا كده كتير. 

كمان العك ده حيعمل مصايب اقتصاديه قادمه في السوق. ازاي؟ طبعا في ناس شاطره و شايفه ان المعلم محمد العسكري مزنوق و عمال يبيع طماطم رخيصه عشان الناس متكسرش محله. حيعمل ايه الناس الشاطره دول؟ حيدخلوا يشتروا الطماطم الرخيصه اللي المعلم محمد العسكري عمال يبيعها و يخزنوها في تلاجات و لما المعلم محمد العسكري يخلص المخزون اللي عنده و ان المعلم حسن السعودي يزعل و يوقف تسليف طماطم زي ما حصل قبل كده فيدخل الناس الشاطره دول يبيعوا الطماطم اللي خزنوها بسعر عالي و يعملوا الفرق. بالعكس الناس دي حتتحكم في السوق و حتغلي تمن الطماطم جدا.

هل الناس دي وحشه؟ إطلاقا. هم بس بيستخدموا غباء المعلم محمد العسكري و انه مش فاهم ان مشكله الطماطم ان المعروض منها قليل و ان المعروض ده مش حيتحسن الا اذا انتجنا طماطم! 

(اللي هوه يعني الدولار مش حينخفض بشكل دايم الا اذا مصر تحولت لدوله صناعيه منتجه. مش دوله تعتمد علي الخدمات السياحيه زي ما الامارات و السعوديه و السيسي عاوزينها – مصدر ٣). 

اللي عمله المعلم محمد العسكري هو الآي بنسميه short term dislocation. يعني السوق حصل فيه كسر مؤقت. ده مش بيغير من اساسيات السوق ان العرض اقل من الطلب. هو بس بيعمل تاثير مرحلي مؤقت 

علي فكره الناس الشاطره دي اللي بتخزن الدولار دلوقتي عشان يضاربوا عليه هم بس بيستخدموا اليات السوق لمصلحتهم و ده في حد ذاته مش جريمه إطلاقا. الجريمه تبقي امتي؟ تبقي لما المعلم محمد العسكري يكون متفق مع الناس الشاطره دي ان تجيله نسبه من الارباح اللي حيعملوها من المضاربه علي سعر الدولار، أسف الطماطم. و ده احتمال مش قليل. لان المعلم محمد العسكري في أيده القانون و كل حاجه و عارف بالضبط مين الناس الشاطره دول و هم كام واحد معروفين في السوق. مش حنستغرب لو المعلم محمد العسكري بعت لهم كام واحد من رجالته يفهموهم انه عارف بيعملوا ايه و انه ليه نسبه من أرباحهم. 

الفرق بين المعلم محمد العسكري الحقيقي بتاع الدولار و المعلم العسكري بتاعنا بتاع الطماطم ان بتاع الطماطم بيشتغل في طماطم بتاعته. بتاع الدولار بيعمل أرباح من دولار هو ملك الشعب المصري. 

اللطيف ان الشعب المصري بيلعن سلسفيل المعلم محمد العسكري بتاع الطماطم و بيلعن سلسفيل الناس الشاطره اللي اشتروا الطماطم رخيصه لكن بيغني تسلم الايادي للمعلم محمد العسكري بتاع الدولار. يلا. تحيا مصر. 

المصادر:

——–

١- حلقات تعالوا نتعلم الاقتصاد ببساطه كلها مجمعه:

https://jawdablog.org/category/الإقتصاد/حلقات-تعالوا-نفهم-الاقتصاد/

٢- تحليل ازمه الدولار في مصر من واقع بيانات البنك المركزي … تعالوا نفهم بالحسابات:

https://jawdablog.org/2015/10/26/lets_learn_economy_what_is_happening_for_dollar_versus_pound_1/

https://jawdablog.org/2015/10/27/lets_learn_economy_what_is_happening_for_dollar_versus_pound_2/

https://jawdablog.org/2015/10/28/lets_learn_economy_what_is_happening_for_dollar_versus_pound_3/

https://jawdablog.org/2015/10/29/lets_learn_economy_what_is_happening_for_dollar_versus_pound_4/

https://jawdablog.org/2015/11/05/lets_learn_economy_questions_answers/

٣- عواقب الاقتصاد الخدمي في مصر:

https://jawdablog.org/2014/05/24/service_economy_and_relation_between_egypt_uae/

 

One thought on “…تعالوا نفهم سعر الدولار و ازاي البنك المركزي قلل سعره … هيا نتعلم الاقتصاد ببساطه

  1. Pingback: ماذا توقعت جوده عن الدولار و ماذا يحدث و لماذا؟ | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s