‏حادثة_الطائرة_الروسية‬ … الحلقه ٤ …ايه دخل امريكا و بريطانيا و ازاي عرفوا كل ده و ليه روسيا تراجعت؟ تحليل فني هندسي

Russian_Air_plane_4_1

كنا اول مكان في العالم يطرح احتماليه وجود قنبله بلاستيكية علي الطائره. و قلنا بالنص ان احتمالات سقوط الطائره هي (مصدر ١):

“في حاله الطائرة الروسية هي سقطت اول لما وصلت لارتفاع ٣١ الف قدم اللي هو كان ارتفاع الملاحه المطلوب. النقطه دي بنسميها قمه التسلق top of climb.

كمان حاجه لازم فريق التحقيق يلاحظها. انه ليه top of climb. يعني بالضبط اول ما وصلت الطياره قمة التسلق تقوم واقعه. غريبه شويه. مصادفة عجيبة.

ففريق التحقيق لازم يفكر في سببين:

١- ان عطل فني محدد حصل عند نقطه top of climb. يعني اول لما الطيار يغير التحكم في قمره الطائره من الوضع “تسلق” للوضع “ملاحه” هل مثلا في مشكله في جهاز التحكم و انه باظ او ادي امر ان الطياره تنزل بدل ما تستقر؟

٢- او هل مثلا انه في متفجرات بلاستيكية وضعت علي الطائره موقوته بالارتفاع بمعني اول ما الضغط جوه عنبر الشنط cargo bay يقل مع الارتفاع عن حد معين تقوم المتفجرات مشتعله. ممكن جدا لان المتفجرات البلاستيكية صعب اكتشافها الا بتحليل كيميائي و جهاز التحكم ده حيبان انه لابتوب عادي.

كمان نلاحظ ان الطياره اقلعت الساعه ٦ صباحا. يعني الشرطه المصرية فتشت الشنط الساعه ٤-٥ صباحا. عاوزين خيالك يتصور حجم الدقه التي تعمل بها الشرطه المصريه الساعه ٥ صباحا مع سياح روس!

٣- الصدفه تمنع فكره انه يكون إطلاق صاروخي. و ده غريب ان كل الناس فكرت انه صاروخ مع ان ولايه سيناء قالت انها أسقطت الطائره و مقالتش انه بصاروخ!”

يعني قبل المخابرات الامريكيه قلنا ان احتماليه القنبله اقرب من الصاروخ و انها الاحتماليه المتسقه مع ان الطياره تنفجر بالضبط عند وصولها أقصي ارتفاع و ده معناه انها صدفه غريبه جدا الا اذا كانت قنبله موقوته بالارتفاع altitude trigger.

طيب مشكورين. أنكم تنبأتم بالموضوع. لكن انتم برضه قلتم ان ده واحد من اربع احتمالات. ايه اللي يخليه مره واحده يبقي الاحتمال الاكيد و ايه اللي دخل الامريكان أساسا في الموضوع؟

الاول نعرف ايه دخل الامريكان في الموضوع:

—————

زي ما شرحنا في مصدر ١ ان اتفاقيه تكوين منظمه الطيران الدوليه الملحق ١٣ بيحدد بوضوح مين يشارك في فريق التحقيق. الفريق بيبقي برياسه الدوله اللي حصلت الحادثه علي ارضها و عضويه التاليين:

– الدوله المالكه للطياره – روسيا

– الدوله اللي الطياره مسجله فيها – ايرلندا

– الدول المصنعه و المصممه للطياره – المانيا و فرنسا

– الدول المصنعه و المصممه للمحرك – امريكا و بريطانيا

– اي دول لديها معلومات مفيده – في حالتنا هي في الأغلب اسرائيل (اللي مسحت طائراتها المكان – مصدر ٢) و قبرص اللي برج المراقبه بتاعها كان المفروض يستلم الطياره بعد خروجها من الأجواء المصريه.

يعني امريكا و بريطانيا اعضاء في فريق التحقيق وفقا لاتفاقيه الايكاو. يعني مصر لازم تشركهم.

بدون شك ان امريكا و بريطانيا بعتوا فريق من الفنيين في الطيران لكن أكيد ايضا انهم بعتوا متخصصين من المباحث الفيدراليه الامريكيه لجمع المعلومات و اخذ عينات. و كعاده امريكا في هذه التحقيقات فهي تعتمد علي ذاتها و محققيها بمعني ان محققيها مثلا يأخذون عينات خاصه من مكان التحقيق مثلا باستخدام اجهزه تحليل متطوره تقوم فقط بعمل مسح إلكتروني scanning electronic microscope و مسح كيميائي للمتفجرات البلاستيكية فقط بمسح مكان الحادث بمنديل explosive trace detection (مصدر ٣).

كذلك تعتمد الولايات المتحده علي أقمار صناعيه و اجهزه تصنت خاصه و بالتأكيد تم تحليل كل هذه المعلومات في اجهزه الاستخبارات الامريكيه.

و بدون شك امريكا مهتمه بسلامه الطيران في العالم. حيث قيام الولايه الاسلاميه في سيناء بعمل بهذا القدر من الضخامه (اكبر عمل ارهابي ضد الطيران منذ ١١ سبتمبر) يعني ان المواطنين الأمريكيين هم عرضه مجددا للخطر.

طيب طالما امريكا شاطره كده مقالتش ليه عن مصادرها؟

—————–

أسباب كثيره جدا. أولها انه امريكا مثلا مش حتروح لمصر و توريها ان فريق المحققين الامريكي مسح حطام الطياره و حلله باجهزة خاصه لان وجود الاجهزه دي أساسا امريكا مش عاوزه ان حد يعرفه.

ادي اللي قالته امريكا عن اللي هي عارفاه:

١- ان كان في قمر صناعي فوق سينا في وقت الانفجار و ان القمر أكد وجود إشعاع حراري.

طبعا الإشعاع الحراري ممكن يكون حريقه او انفجار. ممكن يكون الطياره انفجر المحرك بتاعها او اتحرق. ممكن يكون قنبله او صاروخ. ازاي يعرفوا انه قنبله؟

اولا: لو صاروخ كان حيبقي فيه إشعاع حراري اولي علي الارض وقت إطلاق الصاروخ. و بعدين ديل الصاروخ حيعمل إشعاع حراري و بعدين الانفجار لما الصاروخ يضرب الطياره يعمل إشعاع حراري كبير. لو ده محصلش يبقي مش صاروخ.

ثانيا: لو القمر الصناعي ذو دقه عاليه ممكن جدا انه يشوف الإشعاع الحراري بتاع المحرك في حاله عمله بشكل عادي. يعني ايه؟ اي محرك طياره له عادم بيعمل إشعاع حراري القمر الصناعي بيشوفه. لذلك القمر ده لو دقيق حيشوف محركين بيتحركوا و بيطلعوا عادم بدرجه حراره معينه و هي حوالي ٥٠٠ درجه مئويه (مصدر ٤).

لو محرك انفجر القمر حيشوف ان واحد من المحركين زادت حرارته جدا و بقت حراره انفجار يعني حوالي ١٥٠٠ درجه مئويه يعني ٣ اضعاف. لو الطياره هي اللي انفجرت مش المحرك يبقي حنشوف المحرك شغال و بيطلع عادم بحراره مثلا ٥٠٠ درجه مئويه. و نشوف الطياره في النص بتطلع إشعاع حراري بدرجه ١٥٠٠ درجه مئويه.

في الأغلب هي دي الطريقه اللي الامريكان عرفوا بيها ازاي ان الطياره هي اللي انفجرت مش المحرك.

و أكيد الامريكان مش عاوزين يقولوا المعلومات من النوع ده لأي بلد في العالم لانها معلومات classified بحكم القانون.

كمان ممكن جدا يكون المعلومات جايه من human intelligence او اللي بيتقال عليه human int. الاسرائليين عندهم شبكه مخبرين كبيره في سينا (ساعدهم محمد دحلان مستشار حاكم ابي ظبي في بناءها) و ممكن جوه مطار شرم الشيخ نفسه و جوه ولايه سينا. و كل فتره نسمع ان أهل سينا قتلوا مخبر للموساد و ولايه سينا تعلن عن كده. بالتأكيد الامريكان مش حيعلنوا عن النوع ده من المصادر. و بالتأكيد أكتر مش حيقولوا الكلام ده للحكومه المصريه الا لأشخاص محددين واثقين فيهم لان تحديد نوع المعلومات ممكن يحدد مين هو العميل و اجهزه المخابرات في العالم كله لا تفعل ذلك.

فهمنا ليه امريكا مش حتروح لمصر و توريها معلومات من النوع ده.

٢- امريكا كمان قالت انها سمعت محادثات بين اعضاء في ولايه الشام في الرقه بيهنوا بعض بالعمليه و يبدوا انهم أشاروا ان العمليه تمت بمساعده واحد داخل مطار شرم الشيخ (مصدر ٥).

لمن لا يعلم فحكومه امريكا عبر وكاله الامن القومي تقوم بالتصنت علي كل المكالمات في العالم و كل الرسايل الإلكترونيه في العالم خارج امريكا (مصدر ٦). و هذا ما قاله جو سنودن. كلها. دون استثناء لأحد لا وزير و لا غفير. يعني انت لما بتكلم مراتك في التليفون و تقولها انك جاي البيت المكالمه دي امريكا التقطتها و سجلتها.

طيب بيعملوا ايه بالكلام ده؟ في أجهزه كومبيوتر هدفها تحليل المكالمات دي و استخلاص لو فيها تهديد لامريكا. طبعا في ناس معينه و اماكن معينه بيتراقبوا باستمرار. يعني رؤساء الدول و الحكومات (ميركيل مستشاره المانيا مثال – مصدر ٧).

طبعا بتوع ولايه الشام فاهمين الكلام ده (لاحظ ان كتير منهم أتربوا و عاشوا في الغرب أساسا).

لذلك في الأغلب هم كتموا الامر تماماً لحد بعد التنفيذ و اتكلموا بعدها في التليفون في الأغلب عشان ياكدوا للامريكان و العالم انهم اللي نفذوا العمليه. بالذات انه كان في شك في الموضوع ده في بدايه التحقيق.

هل فعلا عند ولايه الشام ناس جوه المطار؟ 

——————

لو انت مكان ولايه الشام و عاوز تأكد للامريكان انك اللي عملت العمليه من غير ما تفضح وسائلك بشكل كبير يؤثر علي عملياتك بعد كده حتعمل ايه؟

حتمسك تليفون و تتكلم فيه و تدي معلومات محدده و قابله للتحقق لكن محدش يعرفها الا اللي نفذ عن الموضوع. صح؟

المعلومات دي ممكن تكون حاجات زي:

– التركيب الكيميائي للقنبله. بس ده لا يؤكد ان داعش هي اللي حطتها لان كل القنابل البلاستيكية ذات تركيب واحد. 

– طريقه تهريبها. ممكن يقولوا ان عميلهم جوه المطار هرب الشنطه لداخل الطياره و في الأغلب حددوا في التليفون مكان وضع المتفجرات. عنبر الشنط بتاع الطياره مش عنبر واحد. في اكثر من عنبر. لو العميل بتاع ولايه سينا حط الشنطه في عنبر محدد فده كمان موضوع سهل التأكد منه. لان تاثير الانفجار حيبقي واضح جدا في العنبر ده و يبقي اقل جدا في بقيه العنابر.

– حجم الانفجار و كميه المتفجرات. علي فكره الطيارات سهل تدميرها بمتفجرات قليله. لذلك اللي بيعلق و يقول في شنط كتير مش باين عليها اثار الانفجار مش فاهم حاجه لان ممكن تكون الشنط دي أساسا في عنبر تاني خالص. فداعش ممكن تقول ان المتفجرات كميتها ٢ كيلو مثلا و نوعها كذا و مكانها كذا علي الطياره.

و الطائرات لا تحتاج متفجرات كتيره لإسقاطها.

و بص علي الصوره المرفقه حتلاقي ان باب الطياره في اجزاء معدنيه خبطت فيه بينما بعض الشنط مفيهاش اثار تدمير خالص. معني كده ان العنبر اللي جنب الباب ده هوه اللي كان فيه القنبله.

طبعا امريكا مش حتقعد تشرح للمصريين كل الكلام ده. لانه معناه ان امريكا تقول للمصريين ايه نوع التجسس علي المكالمات المستخدم و درجه دقته و دي معلومات سريه.

طيب ليه الامريكان قالوا للروس و مقالوش للمصريين؟

——————-

الحقيقه نحن نشك ان الامريكان مقالوش اي شيئ خالص للمصريين. هم في الأغلب قالوا ان في متفجرات. و في الأغلب المصريين قالوا لهم عرفتوا ازاي.

و في الأغلب امريكا ذكرت اقل القليل نتيجه ان المعلومات دي سريه classified.

و في الأغلب الحكومه المصريه و السيسي استنصحوا و قالوا احنا حنفضل نستهبل عشان الموسم السياحي ميضيعش. و في الأغلب امريكا في ذات الوقت بلغت بريطانيا و كل أوروبا و روسيا بما لديها من معلومات.

الروس مش حيقاوحوا مع الامريكان لان حياه الناس عندهم مهمه برضه. يعني مش حيقولولهم طيب وريني الاول. او زي محمد صبحي “متقدرشي”.

و بعدين امريكا مش حتروح لمصر و تقولها خدي المعلومات دي بيننا و بينك و خبيها عن روسيا و بقيه العالم. المخابرات الامريكيه طبيعي حتبلغ كل دول الحلفاء في العالم و حتبلغ كل الدول المعنيه في حدود المطلوب دون شرح لتفاصيل الحصول علي المعلومات لانه متعارف عليه بين اجهزه المخابرات انها لا تشترك في هذا الا اقل القليل.

طيب مش ممكن امريكا هي اللي مرتبه ده عشان احتلال سينا!

——————

بدأنا العك. يعني امريكا تحتل سينا ليه؟ هل مثلا لان الجيش الاسرائيلي مش بيدخل يضرب داخل سينا بالتعاون مع الجيش المصري كل يوم ضد اهالي سينا؟ مصدر ٨.

هل مثلا لان الجيش المصري مش معتمد علي الجيش الامريكي في كل حاجه و ان الاجهزه بتاعه حصار غزه مش جايه من امريكا؟ مصدر ٩.

بعد كل ده هل مثلا امريكا غاويه صرف فلوس علي الفاضي؟

و حللنا قبل كده نظريات المؤامره دي (مصدر ١٠).

و بعدين امال القائد الدكر اللي منيم امريكا من المغرب بيعمل ايه؟ و جيش مصر العظيم. و المخابرات المصريه؟ كل ده بيشتغل ايه؟

في الحلقه القادمه نستكمل اخطاء الحكومه المصريه الكارثيه في التعامل مع الازمه.

Russian_Air_plane_4_3

المصادر:

——–

١- الحلقات السابقه من تحليل سقوط الطائره الروسيه:

jawdablog.org/category/الإقتصاد/استراتيجيات-وحلول/

٢- طائرات جيش الدفاع الاسرائيلي مسحت موقع الطائره الروسيه بعد سقوطها مساعده للجيش المصري:

jawdablog.org/category/التاريخ/تاريخ-الصراع-العربي-الإسرائيلي/

٣- مسح اثار المتفجرات:

http://blog.tsa.gov/2010/02/explosive-trace-detection-usage.html?m=1

٤- حراره عادم المحرك:

https://www.faa.gov/regulations_policies/policy_guidance/envir_policy/media/contrails.pdf

٥- مصادر امريكا في التصنّت: 

http://www.cnn.com/2015/11/04/africa/russian-plane-crash-egypt-sinai/

٦- امريكا تتصنت علي كل المكالمات في العالم:

http://www.npr.org/sections/parallels/2013/10/23/240239062/five-things-to-know-about-the-nsas-surveillance-activities

٧- امريكا تتصنت علي المستشاره ميركيل:

http://m.huffpost.com/us/entry/6647058

٨- التعاون بين مصر و اسرائيل تحت حكم السيسي:

jawdablog.org/category/التاريخ/تاريخ-الصراع-العربي-الإسرائيلي/

٩- استيراد مصر اجهزه حصار غزه من امريكا:

https://www.washingtonpost.com/news/checkpoint/wp/2015/07/08/egypt-facing-terrorism-wants-high-tech-american-border-security-system/

١٠- نظريات المؤامره. بعضها صحيح و بعضها غير عقلاني:

https://jawdablog.org/2015/09/18/egypt_taboo_63_the_west_hates_us/

One thought on “‏حادثة_الطائرة_الروسية‬ … الحلقه ٤ …ايه دخل امريكا و بريطانيا و ازاي عرفوا كل ده و ليه روسيا تراجعت؟ تحليل فني هندسي

  1. Pingback: !‫#‏حادثه_الطائره_الروسيه‬ … الحلقه ٧ … نظريات المؤامره | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s