تعالوا نتعلم الاقتصاد بسهوله … الاسئله و الاجوبه المفيده في الدولار و الجنيه

Lets_Learn_Economy_Questions_Answers

اثارت الحلقات الأربع الماضيه من شرح لماذا يترنح الجنيه المصري الان امام الدولار (مصدر ١) اسئله و حوارات كثيره. و هي اسئله مهمه لذلك نخصص الحلقه دي للاجابه عن الاسئله:

س: ليه الدولار زاد قوي السنه دي؟

—————————————

ج: لان مصر السنه دي بتصدر اقل و بتستورد اكثر و فلوس الرز اللي دخلت اقل و قناه السويس زي ما هي و مع ان السياحه اكثر شويه من السنه اللي فاتت، فالمجموع ان مصر دخلها دولارات اقل بحوالي ٦ مليار دولار عن السنه اللي فاتت. مصر في العاده بيدخلها حوالي ٦٠-٧٠ مليار دولار. يعني الدولارات اقل ١٠٪ تقريبا فلازم الدولار يزيد ١٠٪ من ٧,٥ جنيه ليوصل ٨,٢٥. 

س: طيب ايه المقارنه مع سنه د مرسي؟

———————————————-

ج: شفنا ان دخل مصر قل بحوالي ٦ مليار دولار مقارنه بالسنه اللي فاتت. السنه اللي فاتت (٢٠١٣/٢٠١٤) اللي هي افضل سنه في تاريخ الجيش، كانت زي سنه د مرسي. السياحه في سنه د مرسي زي السنه دي (مصدر ٢) يعني في افضل احوالها. الرز طبعا اقل. بس المهم ان التصدير كان عالي و الاستيراد قليل. 

س: طيب و ايه الحل؟

————————-

ج: علي المدي البعيد زياده التصدير و تقليل الاستيراد. و كتبنا ده قبل كده (مصدر ٣). 

علي المدي القصير ان الجيش يطلع الفلوس اللي شالها من الرز اللي دخل (مصدر ١) و حسبنا انها حوالي ١٠ مليار دولار خنسرها الجيش من الرز و تتحط في تشجيع المصانع المصريه اللي قافله دلوقتي انها ترجع تشتغل تاني. 

س: هل ممكن ان شركه صرافه تتحكم في الاقتصاد المصري؟

——————————————————————-

ج: مستحيل. اكبر شركه صرافه في مصر رأسمالها عده ملايين من الدولارات. نحن نتكلم عن ميزان مدفوعات داخل فيه ٧٠ مليار دولار و خارج منه ٨٠ مليار دولار تقريبا. يعني عشره الاف ضعف قدرات ايه شركه صرافه. لا حسن مالك و لا عشره زيه! هذا كلام استهبال هدفه استحمارك. عشان تبتدي تأثر لازم تتكلم في مليار دولار علي الأقل. و هذا مما يملكه مثلا ساويرس او ربما غبور. و طبعا أثرياء الخليج و حكوماتهم. 

س: ما تأثير انقطاع الرز؟

————————–

ج: تاثير ضخم جدا. الامارات و السعوديه الان يتحكمان في الاقتصاد المصري و سعر الجنيه. لما قطعوا ٦ مليار دولار كانوا بيدفعوها شوف حصل ايه. و طبعا السيسي جري لهم كي يستجديهم. الامارات و السعوديه يحتلان مصر الان تماماً و يمكنهما خنق مصر او إبقائها طافيه. 

س: ليه الدينار الكويتي غالي قوي؟ ده دليل ان اقتصادهم قوي جدا!

————————————————————————–

ج: مش ضروري. ممكن مصر بكره تطلع قرار ان كل الف جنيه مصري حنسميهم الجنيه المصري الجديد. و يبقي الجنيه المصري الجديد ده تمنه ١٢٥ دولار حته واحده. بس ده مش حيغير حاجه لا في ميزان المدفوعات و لا في احتياطي البنك المركزي و لا في الاقتصاد المصري. 

تركيا و اسرائيل امثله لدول عملت موضوع الليره التركيه الجديده او الشيكل الاسرائيلي الجديد (اسمه new shekel). و هدفه ان مثلا لو رحت تشتري خضار من السوق متدفعش مليون شيكل او مليار ليره تركيه او ارقام عجيبه زي كده تخلي المواطن يتلخبط في الحساب. و عاده الدول بتعمل كده بعد لما يحصل تضخم كبير و بعدين يتم السيطره عليه. 

كمان الين الياباني او اليوان الصيني كل ١٠٠ منهم باقل من دولار. مش معني كده ان اقتصادياتهم ضعيفه و لا حاجه. 

العمله قويه او ضعيفه معناها قيمتها بالنسبه لسله عملات اخري او مقارنه بالدولار مقارنه بسنه أساس كانت نفس العمله مستخدمه فيه. 

كون انها مائه ين او لا هذه اختيارات دول لنوعيه مفردات العمله التي تريد التعامل بها. 

س: طيب احنا كمواطنين نعمل ايه؟

—————————————

ج: احنا منقدرش ندي نصائح استثماريه. ليه؟ لان النصائح الاستثماريه تختلف حسب الشخص. يعني مثلا انت عاوز فلوسك تاني بعد سنه و لا ممكن تاخد مخاطره و متخذش فلوسك الا بعد ٢٠ سنه. كمان تختلف انت معاك كام؟ و ايه اللي تفضله. دي كلها حاجات محتاجه نقاش مع ناصح استثماري او financial advisor و دي وظيفه موجوده في العالم المتقدم كله. 

معلش. ممكن نعيش زي العالم المتقدم و لو مره؟ 

س: طيب مصر رايحه علي فين؟

————————————-

ج: بالسياسات الحاليه، ده لو أمكن اننا نقول عليها سياسات، رايحه في داهيه. لان الدولارات راحت في مشاريع دون عايد و ده بيعمل تضخم (مصدر ٤). و كمان المصانع عماله تقفل و الناتج الصناعي عمال يقل (مصدر ٥). و كمان المنطقه غير مستقره و السياحه لم تعود و لن تعود نتيجه عدم الاستقرار السياسي في مصر نفسها. اجمع ده كله تلاقي ان السعوديه و الامارات سيطروا علي مصر تماماً و مصر بقت دوله استهلاكيه محتله!

زمان كانت بريطانيا تحتل الدول عشان تصدرلها المنتجات البريطانيه كسوق. دلوقت بكام مليار الامارات بتعمل نفس الكلام في مصر. 

داهيه طبعا. استمروا. 

س: طيب المواطن العادي حيحس بايه؟

——————————————–

ج: زياده في الاسعار بنفس قيمه زياده الدولار. يعني ١٠٪. و كمان نتوقع تضخم ١٢٪ السنه الجايه لان ده نفسه سعر الفايده علي قناه السويس (مصدر ٦) 

و بالتالي تضخم ١٢٪ كل سنه تقريبا. يعني الاسعار تتضاعف خلال عده سنوات. 

المصادر:

——–

١- الحلقات السابقه من تعالوا نتعلم الاقتصاد بسهوله:

https://jawdablog.org/category/الإقتصاد/حلقات-تعالوا-نفهم-الاقتصاد/

٢- تقرير البنك المركزي عن ميزان المدفوعات:

http://www.cbe.org.eg/NR/rdonlyres/FC987D68-4925-448E-A768-56338AC7A6D1/2843/BOPH1201415.pdf

http://www.cbe.org.eg/Excel/9_Egypts_balance_of_payments.xls

٣- استراتيجيات و حلول:

https://jawdablog.org/category/الإقتصاد/استراتيجيات-وحلول/

٤- أسباب التضخم … تعالوا نتعلم الاقتصاد. بسهوله:

https://jawdablog.org/2014/12/28/understand_economy_01_15/

٥- تدهور الناتج الصناعي المصري:

http://www.tradingeconomics.com/egypt/industrial-production

٦- تاثيرات مشروع قناه السويس:

https://jawdablog.org/2015/08/09/lies_demonstrated_new_suez_canal_/

https://jawdablog.org/category/الإقتصاد/مشروع-السيسي-لقناه-السويس/

 

One thought on “تعالوا نتعلم الاقتصاد بسهوله … الاسئله و الاجوبه المفيده في الدولار و الجنيه

  1. Pingback: ماذا توقعت جوده عن الدولار و ماذا يحدث و لماذا؟ | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s