ماذا يحدث للدولار (٤) … تعالوا نفهم الاقتصاد ببساطه

Lets_Learn_Economy_Questions_Answers

قعدنا امبارح ندرس تقرير البنك المركزي الرسمي (مصدر ١ و ٢) و فهمنا ايه هوه الحساب الراسمالي للبنك المركزي المصري. النهارده حنحسب الزياده و النقص في احتياطي البنك المركزي اللي هوه زي ما فهمنا المره اللي فاتت (مصدر ٣) هو التغير في احتياطي البنك المركزي. 

و فهمنا من مصدر ٣ زي ما حسبنا قبل كده انه حتي من غير اي تغيير في احتياطي البنك المركزي سعر الدولار لازم يزيد في السوق لان مصر فيها عجز ١٣ مليار دولار مقارنه بعام ٢٠١٣/٢٠١٤ في ميزان المدفوعات و فيها عجز ٦ مليار دولار مقارنه بسنه د مرسي في ميزان المدفوعات نتيجه زياده الاستيراد و انخفاض التصدير بشكل أساسي. كل ده و مدخلناش لسه علي الاحتياطي في البنك المركزي. تعالوا نشوف ايه اللي في الاحتياطي ده:

الحساب المالي و الرأسمالي:

————————–

انت طبعا ممكن تقترض و يجيلك دولارات من الاقتراض. و ممكن كمان يدخلك استثمارات اجنبيه تدخل دولارات البلد. او تخرج استثمارات اجنبيه تخرج دولارات من البلد. او ان السعوديه تديك وديعه بالدولار. او انك تأخذ الوديعه دي و تحط عليها من الفلوس اللي انت شايلها للزمن و تدفع أصل الدين اللي عليك. كل ده مش بيدخل في ميزان المدفوعات. بيدخل في حاجه تانيه اسمها “الحساب المالي و الرأسمالي”. و ده كمان البنك المركزي بينشره في مصدر ١ و ٢. يعني حنحسبه و ندرسه كمان. 

الفارق بين ميزان المدفوعات و الحساب المالي و الرأسمالي هو بالضبط الفرق بين حساب جاري في البنك و الوديعه او الأصول. الحساب الجاري داخل و طالع منه فلوس بدون تغيير في الأصول. يعني مثلا بتدفع فايده القروض من ميزان المدفوعات. السياح بيدفعوا فلوس من ميزان المدفوعات. إنما الحساب الراسمالي من اسمه كده انه تغيير في الاستثمار. يعني مستثمر يدخل او يطلع او انك تسدد القروض اللي عليك او انك تاخد قروض او بلد تحط عندك وديعه. 

الفلوس من دول اخري. الرز انواع:

——————————-

نشرح شويه موضوع الوديعه من بلد تانيه الاول. لو يجيلك فلوس من بلد تانيه و تدخل في الميزانيه و انت مش مطالب بسدادها علي الأقل علي الورق او ان بلد تانيه تديك بترول او بنزين بسعر مخفض فده بيدخل في ميزان المدفوعات. و علي فكره ده شيئ مهين لأي دوله انها تأخذ الفلوس دي في ميزان المدفوعات. لانها في الأغلب بتيجي في احوال عجز عن سداد الالتزامات. لذلك لا مرسي طلبها و لا مبارك عملها.

إنما لما دوله تديك قرض او تديك وديعه مطلوب سدادها فده بيدخل في الحساب المالي و الراسمالي. فهمنا الفرق؟ 

ايه اللي داخل و طالع في الحساب المالي و الراسمالي؟

—————————–

الحساب الراسمالي ده كله بيتحكم فيه البنك المركزي. الزياده فيه هي زياده في احتياطي البنك المركزي. النقص فيه نقص في احتياطي البنك المركزي. 

طيب نشوف ايه داخل و طالع من الحساب الراسمالي ده:

١- الاستثمارات. 

—————-

فيه استثمارات مصريين بيعملوها في الخارج. مثلا ساويرس لما يحول فلوس عشان يشتري منتجع في سويسرا. دي فلوس استثمارات طالعه بره مصر. 

بالعكس في كمان لما مستثمر اجنبي يدخل يستثمر في مصر. ده بيدخل استثمارات. 

في نوعين من الاستثمار. استثمار مباشر. يعني يشتري ارض او مصنع او يبني مصنع. و فيه استثمار في أوراق ماليه. يعني يشتري اسهم في البورصه مثلا. 

الدول بتفضل جدا الاستثمار المباشر. لان المستثمر اللي بيشتري اسهم النهارده ممكن يبيعها بكره. لكن اللي بيبني مصنع ده واحد قاعد معاك فتره طويله. 

بين سنه ٢٠١٣/٢٠١٤ و سنه ٢٠١٢/٢٠١٣ تقريبا مفيش فروق خالص. يعني استثمار مصر في الخارج في سنه مرسي كان ١٨٠ مليون. في سنه ٢٠١٣/٢٠١٤ بقي ٣٠٠ مليون. ارقام هايفه. و في ٢٠١٤/٢٠١٥ محصلش تغيير يذكر (مصدر ٢). 

الاستثمار المباشر اللي دخل مصر كان ٤ مليار في ٢٠١٣/٢٠١٤ و كان ٣,٧ مليار في ٢٠١٢/٢٠١٣. برضه كلام فارغ. البنك المركزي في ٢٠١٥ بيطبل و يقول ان الاستثمار في مجال البترول زاد من مليار بقي ١,٢ مليار! طبعا احنا هنا بنتكلم في فروق بمئات الملايين. متعملش تغيير كبير. لذلك حنقول ان الاستثمار المباشر في مصر كلام فارغ و بدون تغيير. طبعا قارن ده بمثلا ٢٠٠٧/٢٠٠٨ اللي كان الاستثمار المباشر فيها ١٣ مليار دولار. و عشان احباب مبارك يتوكسوا هذه ارقام ضعيفه جدا مثلا مقارنه بافريقيا حتي و كانت في طريقها للنزول حتي في عام ٢٠٠٩/٢٠١٠. 

طيب ايه اللي حصل للاستثمار الورقي (في الأوراق الماليه)؟ 

في ٢٠١٠/٢٠١١ و في ٢٠١١/٢٠١٢ كان سالب ٢ و سالب ٥ مليار دولار. يعني مصر كانت عماله تفقد استثمارات وقت المجلس العسكري و حتي أواخر ايام مبارك. كله كان بيبيع الأسهم بتاعته. 

في ٢٠١٢/٢٠١٣ بدأ يبقي موجب و دخل مصر استثمار ورقي بقيمه ١,٤ مليار دولار. سنه مرسي دي. 

في ٢٠١٣/٢٠١٤ نزل الاستثمار الورقي شويه و بقي ١,٢ مليار. فرق بسيط عن سنه مرسي. 

في ٢٠١٤/٢٠١٥ رجع يبقي سالب ٤ مليار دولار مقارنه ب ١,٢ مليار موجب في ٢٠١٣/٢٠١٤ و ١,٤ مليار دولار موجب في سنه مرسي. يعني مره تانيه كله بيبيع. البنك المركزي في مصدر ٢ فسر ده انهم كان لازم يدفعوا الأوراق الماليه و السندات اللي اجلها حل. طيب ما هم كان ممكن يبيعوا سندات تانيه. و طبعا احنا عارفين ان الناس باعت في البورصه (مصدر ٤). 

لذلك احنا ممكن نقول ان في الاستثمار كانت سنه ٢٠١٤/٢٠١٥ اسوء من اللي قبلها بحوالي ٥ مليار دولار و اسوء من سنه مرسي برضه بحوالي ٥ مليار دولار. 

٢- القروض. 

————

و دي عاده بنقسمها لقروض طويله الأجل LT. و متوسطه MT و قصيره ST. 

قصيره يعني تقترض كام شهر و ترجع الفلوس. طويله يعني تأخذ قرض و تسدده علي ٣٠ سنه مثلا. الدول بتحب القروض الطويلة لانها فيها ثبات و معناها انه في ثقه في قدره الدوله علي السداد علي مدي بعيد. 

لما بتاخد قرض طبعا بتاخد فلوس فده معناه فلوس داخله البلد. لكن كمان القروض القديمه اللي ميعادها حل لازم تدفعها. زي ما شفنا الفايده بتتدفع من ميزان المدفوعات. أصل القرض لما يجي ميعاده بتدفعه من الحساب الراسمالي اللي هوه في الاخر بيصب في احتياطي البنك المركزي من الدولار. 

لذلك في الحساب الراسمالي حنلاقي سطرين تحت القروض: سطر اسمه drawings يعني ما يدخلك من القرض الجديد. و سطر اسمه repayment يعني أصول القروض القديمه اللي ميعاد دفعها حل. 

في ٢٠١٣/٢٠١٤ مصر اخدت قروض بحوالي مليار. و دفعت اقساط قروض بحوالي ٢ مليار. 

في ٢٠١٢/٢٠١٣ مصر اخدت قروض ٣ مليار. و دفعت اقساط ٢ مليار برضه. و كانت كلها تحت خانه القروض طويله الأجل. 

البنك المركزي في ٢٠١٥ قال ان الكلام ده متغيرش. لذلك نقدر نقول ان مفيش تغيير في دفع أصول القروض و ان مصر بتدفع حوالي ٢ مليار دولار أصول قروض كل سنه.

و الفارق الوحيد ان في سنه مرسي اقترضت مصر ٢ مليار تقريبا زياده عن الطبيعي و كانت قروض طويله الأجل. و زي ما قلنا دي قروض الدول بتحبها لانها علي فترات طويله. في الأغلب هذه قروض من تركيا و قطر. 

يعني في سنه ٢٠١٤/٢٠١٥ محصلش تغيير عن ٢٠١٣/٢٠١٤. و كمان ٢٠١٥/٢٠١٤ دخل احتياطي البنك المركزي ٢ مليار دولار استثمارات اقل في صوره قروض طويله المدي اقل. 

٣- الزياده و النقص في الأصول:

—————————–

يعني مثلا لو عندك احتياطي دهب او عقارات تملكها و سعر الدهب نزل قصاد الدولار فلازم تقول ان قيمه أصولك نزلت. او لو سعر العقارات بتاعتك نزلت فنفس الكلام. ده مثلا ينطبق علي العقارات اللي الحكومه تملكها زي السفارات و القنصليات في الخارج و المتاحف و العقارات اللي وزاره الأوقاف تملكها. كل دي أصول سعرها بيتغير و لازم تقرير البنك المركزي في مصدر ١ يرصد التغير في الاسعار دي. 

كمان لو في ودائع من دول تانيه لازم تتحسب في التغير في الأصول و الودائع. 

سنه ٢٠١٤/٢٠١٥ البنك المركزي قال انه انسحب منه نص مليار دولار صافي مقارنه بدخول ٢ مليار دولار صافي في عام ٢٠١٣/٢٠١٤. و مقارنه بدخول ٦ مليار دولار صافي في عام ٢٠١٢/٢٠١٣. و بيقول ان السحب بتاع النص مليار دولار صافي ده راجع انه سدد مستحقات عليه لبعض الدول العربيه. 

يعني ايه الكلام ده؟ نحاول نفهم. 

دخل في سنه مرسي ٦ مليار دولار ودائع. ده غير القرض اللي شرحناه فوق. الوديعه بتدخل انها مستحقه عليك تسددها عند الطلب او حسب الاتفاق. القرض ليه فايده بتدفعها و أصول تسددها و هدف اخدت القرض عشانه زي مثلا تبني مدارس او تعمل مصانع او غيره. الوديعه بتحطها معاك و تفضل مستحقه عليك. 

في ٢٠١٣/٢٠١٤ دخل مره كمان ٢ مليار دولار ودائع صافيه. 

في ٢٠١٤/٢٠١٥ عارفين انه دخل مصر ٦,٥ مليار دولار ودائع من السعوديه و الامارات (مصدر ٥). و كمان دخل زيهم في ٢٠١٣/٢٠١٤. يعني في ٣ سنين دخل مصر ١٩ مليار دولار ودائع: ١٣ مع السيسي و ٦ مع مرسي. 

طلع بره مصر أكيد ٤,٥ مليار في عام ٢٠١٣/٢٠١٤ لان الصافي في السنه دي كان ٢ مليار بس. كمان طلع بره مصر في ٢٠١٤/٢٠١٥ حوالي ٧ مليار دولار لان الصافي كان سالب نص مليار دولار. يعني طلع بره مصر حوالي ١١,٥ مليار دولار في سنتين. لو قلنا ان ٦ مليار منهم كانوا عشان يدفعوا فلوس وديعه قطر و تركيا يبقي أكيد في ٥,٥ مليار دولار راحوا في حاجات تانيه. طبعا ٤-٥ مليار دولار منهم فلوس تفريعه القناه اللي راحت الشركه الاماراتيه (مصدر ٦). و نص مليار او مليار او شيئ من هذا القبيل راحت لشركه جنرال اليكتريك عشان الكهربا و لشركات تانيه عشان تمن استيراد الغاز و تمن ايجار محطه الغاز (مصدر ٧) و هي نفذت نص العقد و اخدت نص الفلوس. 

مقارنه ٢٠١٤/٢٠١٥ بعام ٢٠١٣/٢٠١٤ من حيث الاحتياطي:

———————–

الاستثمارات نزلت ٥ مليار دولار

مفيش تغيير في القروض

الأصول و الودائع نزلت حوالي ٢,٥ مليار 

يعني احتياطي البنك المركزي نزل حوالي ٧,٥ مليار دولار. 

مش معني كده ان الدولار ينزل. معناه انه قدره البنك المركزي علي السيطره علي نزول الدولار اقل بكتير. الدولار بيتحرك نتيجه لميزان المدفوعات بالأساس زي ما شرحنا قبل كده. الاحتياطي هو بس زي اسمه. احتياطي وقت الضروره لتجاوز مشكلات محدوده الامد. مشكله مصر مش محدوده الامد. لذلك دور الاحتياطي و نزوله تاثيره مرحلي بس و معناه ان الدولار ممكن يحصل فيه طفرات دون قدره البنك انه يسيطر عليها. 

مقارنه ٢٠١٤/٢٠١٥ بعام ٢٠١٢/٢٠١٣

———————————-

الاستثمار اقل بحوالي ٥ مليار دولار

القروض اقل بحوالي ٢ مليار دولار

الأصول و الودائع اقل بحوالي ٦,٥ مليار دولار. 

يعني سنه ٢٠١٤/٢٠١٥ اسوء من سنه د مرسي بحوالي ١٣,٥ مليار دولار. 

طيب الرز راح فين؟

—————–

احنا شفنا في مصدر ٣ ان ١٢ مليار دولار من الرز راحوا عشان يسدوا ميزان المدفوعات في ٢٠١٣/٢٠١٤ و كمان ٥ مليار دولار فوقهم راحوا في الاستيراد في سنه ٢٠١٤/٢٠١٥. رقم كبير جدا. راحوا في الاستيراد اللي زاد. 

و كمان ١٣ مليار دولار ودائع منهم ٦ رجعوا لقطر و تركيا و الباقي اشترينا بيه العتبه، أسف قناه السويس الجديده. 

يعني ٣٠ مليار دولار راحوا في الهبل (مفيش وصف تاني). 

المعروف انه مصر دخل لها حوالي ٤٠ مليار دولار من السعوديه و الامارات و غيرها (مصدر ٨). في الأغلب الجيش اخد ١٠ مليار من ال ٤٠ و موجودين في حساب خاص للصرف علي المشاريع الخاصه و مكافات خاصه لناس خاصه و شراء حاملات الطائرات (في بلد لا يوجد بها تصريف لمياه الأمطار حتي). 

يا ريت نكون فهمنا. 

أوعي حد يضحك عليك. 

المصادر:

————-

١- تقرير البنك المركزي عن ميزان المدفوعات:

http://www.cbe.org.eg/Excel/9_Egypts_balance_of_payments.xls

٢- بيان البنك المركزي عن التغير في ميزان المدفوعات في النص الاول من عام ٢٠١٤/٢٠١٥:

http://www.cbe.org.eg/NR/rdonlyres/FC987D68-4925-448E-A768-56338AC7A6D1/2843/BOPH1201415.pdf

٣- الحلقه السابقه من تعالوا نتعلم الاقتصاد بسهوله:

https://www.facebook.com/jawda.org/posts/933322170071330:0

٤- ماذا يحدث للبورصه … تعالوا نتعلم الاقتصاد ببساطه:

https://jawdablog.org/2015/08/25/what_is_happening_to_egyptian_stock_market/

٥- دخول الودائع العربيه لمصر في ٢٠١٤/٢٠١٥:

https://www.middleeastmonitor.com/news/americas/18263-hrw-gulf-pays-more-6b-to-supress-egyptian-opposition

٦- من المستفيد من حفر القناه:

https://jawdablog.org/2014/09/14/suez_canal_5th_lie/

https://jawdablog.org/2014/12/28/suez_canal_uae_corruption_jawda_analysis/

٧- قيمه العقد بين مصر و شركات التربينات الكهربائيه:

http://www.powermag.com/siemens-and-ge-ink-big-orders-with-egypt/

https://jawdablog.org/2015/05/01/predictions_for_electricity_next_summer/

٨- كميه الرز التي دخلت مصر:

http://www.bloomberg.com/news/articles/2015-05-27/even-with-gulf-billions-pouring-in-egypt-may-still-turn-to-imf

https://www.middleeastmonitor.com/news/africa/16952-sisi-received-395bn-from-gulf-leaked-recordings-show

 



Categories: حلقات تعالوا نفهم الاقتصاد

1 reply

Trackbacks

  1. ماذا توقعت جوده عن الدولار و ماذا يحدث و لماذا؟ | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: