ماذا يحدث لسعر الدولار (٢) … تعالوا نفهم الاقتصاد ببساطه

Lets_Learn_Economy_Questions_Answers

في السلسله دي بنحاول نبسط المفاهيم الاقتصاديه و نتكلم بالبلدي عشان الاقتصاد ده بتاعنا كلنا. 

امبارح (مصدر ١) فهمنا يعني ايه ميزان المدفوعات و انه بيقيس اللي داخل و اللي خارج من العملات الاجنبيه بين مصر و العالم كله. و عرفتا ان الدولار زي اي سلعه لما كميتها بتزيد و الطلب عليها بيقل لازم سعرها ينزل و العكس صحيح. 

النهارده نفهم بقي ايه اللي داخل و خارج في ميزان المدفوعات في مصر:

—————————–

اول حاجه تعملها تفتح تقرير البنك المركزي في مصدر ٢. ده فيه كل الأرقام. و الأرقام دي مش اسرار و لا حاجه. و لازم البنك المركزي ينشرها لانه بناءا عليه المؤسسات الدوليه بتقيم موقف مصر المالي و تحدد تسلفها و لا لأ. و اللي مش عاوز ينشر الأرقام ميلزموش و بالتالي محدش حيسلفه. لذلك كل العالم بينشر كل الأرقام. 

و بعدين بعد كده تبص علي نشره البنك المركزي عن ميزان المدفوعات في النص الاول من العام المالي السابق (مصدر ٣). لسه منشروش حاجه عن الحساب الختامي للعام المالي اللي هلق في يوليو. 

حتلاقي ايه في التقرير ده؟ عشان بس محدش يضحك عليك. 

١- الاستيراد. كل اللي انت بتستورده بتستورده بالدولار و بالتالي ده طلب علي الدولار. لو زاد الاستيراد لازم سعر الدولار يزيد لان الطلب عليه بيزيد.

مصر بتستورد في المتوسط حاجات قيمتها٦٠ مليار دولار في السنه. يعني استوردت ب ٦٠ مليار في ٢٠١٣/٢٠١٤ و نفس الرقم في ٢٠١١/٢٠١٢ لكن استوردت بس ب ٥٧ مليار في ٢٠١٢/٢٠١٣. يعني سنه مرسي اليتيمه قل الاستيراد فيها بحوالي ٣٪. مش نسبه حلوه بس علي الأقل في الاتجاه الصحيح. السنه الوحيده من ايام الثوره اللي الاستيراد قل فيها شويه. لكن فجأه في ٢٠١٤/٢٠١٥ زاد الاستيراد ١٥٪ (مصدر ٣ من نشره البنك المركزي نفسه) و يوصل ٦٥ مليار دولار بحساب ان النص التاني من السنه يبقي زي النص الأولاني. 

الزياده دي في الاستيراد حتلاقيها حواليك. بص علي العربيات الجديده اللي الناس اشترتها و السلع من الصين اللي ملهاش اي لزمه. 

يبقي أديك خسرت ٥ مليار دولار لازم دلوقتي تدور عليهم و مكنتش قبل كده محتاجهم. 

٢- التصدير. لو بتصدر أكتر و بتاخد فلوسك بالدولار المعروض من الدولار يزيد و بالتالي سعره يقل. مصر في العاده بتصدر بحوالي ٢٥ مليار دولار. في سنه ٢٠١٢/٢٠١٣ كانت السنه اليتيمه اللي مصر صدرت فيها ب ٢٧ مليار دولار (مصدر ٢). المصيبه ان في ٢٠١٤/٢٠١٥ الصادرات قلت و بقت ٢٤ مليار دولار. 

طيب ادي كمان مليار دولار كانوا بيجوا من التصدير و مبقوش يجوا.

الفرق بين الاستيراد و التصدير اسمه الميزان التجاري. و ده بقي اسوء بمقدار مجموع المليار اللي التصدير قل بيهم و ال ٥ مليار اللي الاستيراد زاد بيهم. يعني المجموع بقي ٦ مليار دولار لازم تلاقيهم. يعني الطلب علي الدولار زاد حتي عن سنه ٢٠١٣/٢٠١٤ بمقدار ٦ مليار دولار. و زاد عن سنه مرسي بمقدار ١٠ مليار دولار. تخيل. ارقام مهوله فعلا. و كله من ارقام البنك المركزي (مصدر ٢ و ٣). 

نكمل. 

الخدمات: يعني ايه؟ دي بيدخل فيها:

– النقل: يعني سفن معديه في القناه بتدفع لك فلوس بالدولار. كمان خط انابيب سوميد مصر بتاخد عليه عوايد مقاربه جدا لعوائد قناه السويس. لكن كمان مصر لها سفن بتعدي في اماكن تانيه زي قناه بنما فبرضه بتدفع فلوس هناك بالدولار. مش بس السفن. الطيارات اللي بتعدي المجال الجوي المصري بتدفع فلوس بالدولار. و العكس طيارات مصر للطيران اللي بتسافر السعوديه و غيرها بتدفع هناك بالدولار كمان. 

مصر دخل لها من النقل ٩ مليار دولار منهم ٥ من قناه السويس في سنه ٢٠١٣/٢٠١٤. و الرقم متغيرش في سنه ٢٠١٤/٢٠١٥. 

و مصر دفعت للعالم في النقل حوالي ١,٧ مليار دولار رسوم عبور سفن و طيارات مصريه في العالم. الرقم ده كمان متغيرش. 

طيب علي الأقل في بند متغيرش. و ان كان طبعا التطبيل بتاع القناه كلنا عارفين دلوقتي انه تطبيل.

– السياحه: السايح اللي بيجي مصر بيدفع بالدولار. بس كمان الحجاج المصريين بيروحوا السعوديه و بيطلبوا ريال سعودي اللي هو مرتبط بالدولار. 

طيب في ٢٠١٣/١٠١٤ مصر دخل لها ٥ مليار دولار من السياحه. المصيبه طبعا انها طلع منها ٣ مليار دولار برضه في سياحه المصريين في الخارج. يعني حج و خلافه. 

في ٢٠١٤/٢٠١٥ السياحه زادت حوالي ٢ مليار في نص السنه الأولاني. حنقول ان الكلام ده استمر في النص التاني. يعني زادت ٤ مليار دولار بالمقارنه ب ٢٠١٣/٢٠١٤. 

اللطيف في موضوع السياحه ده انه سنه مرسي السياحه عملت ٩ مليار دولار و هو تقريبا متوسط ايام مبارك. في سنه ٢٠١٣/٢٠١٤ السياحه بقت ٥ مليار دولار بس. يعني نزلت جدا عن سنه د مرسي. نزلت النص تقريبا. و بعدين رجعت بقت ٩ مليار تاني في ٢٠١٤/٢٠١٥. يعني احسن اللي عمله السيسي انه رجع السياحه لنفس معدل سنه د مرسي و بالعافيه كمان! و اخد سنتين عشان يعمل كده! 

لكن بالمقارنه بسنه ٢٠١٣/٢٠١٤ الدولار دخل من السياحه بزياده ٤ مليار. و لكن نفس العوايد بالمقارنه بسنه د مرسي! خد بالك انهم حيعتبروا ده إنجاز! 

– عوايد الاستثمار و الفوائد. يعني الحكومه المصريه عندها استثمارات في الخارج بيجي منها عوايد بالدولار. بس كمان الحكومه المصريه لازم تدفع فوايد علي القروض اللي واخداها. و كل ده بالدولار. لو الفوايد اللي لازم ندفعها بتزيد لازم ده يزود الطلب علي الدولار و بالتالي يزيد سعره. و العكس صحيح. 

طيب مصر بيدخلها حوالي ٣ مليار دولار من دخل استثمارات الحكومه في الخارج مع الرسوم اللي بتاخدها الحكومه من المصريين في الخارج مع رسوم التأشيرات للاجانب، الخ. كل ده بحوالي ٣ مليار و مش بيزيد و لا بيتغير قوي. 

لكن مصر بتدفع فوايد ديون ٧ مليار دولار في السنه. و مصاريف الحكومه المصريه في الخارج حوالي مليار دولار و مصاريف رحلات الرئيس و الوزرا و كل ده بتدخل في بند اسمه “و خلافه” و قيمته حوالي ٣ مليار دولار. الأرقام دي مش بتتغير. في وقت مرسي هي زيها في الانقلاب هي زيها النهارده. 

لذلك اللي يضحك عليك و يقولك احنا دفعنا اقساط ديون مش عارف بكام. كل ده عك ملوش وجود في الأرقام الرسميه و اقساط الديون اللي دفعناها ثابته و لسه تاثيرات الاقتراض اللي بيعمله السيسي دلوقتي مظهرتش. لسه كام سنه. كمان موضوع دفع اقساط البترول ده له حساب مختلف بيدخل في حسابات الاستثمار و حنشرحه بعدين لانه ممكن يبقي يندفع من أصول البنك المركزي مثلا و بالتالي تأثيرهم علي الدولار الموجود في السوق محدود. 

– التحويلات: و دي نوعين. تحويلات خاصه من ناس عايشين بره بيحولوا فلوس لأهلهم في مصر. و في تحويلات حكوميه يعني فلوس الرز من السعوديه و الامارات. 

تحويلات الناس العاديه بعد ما كانت عماله تزيد كل سنه. يعني كانت ١٢ مليار في ٢٠١٠ و بقت ١٨ مليار في سنه مرسي و بعد الثوره، التحويلات دي مبقتش تزيد. ثبتت عند ١٨ مليار دولار. 

تحويلات الحكومات بقي هي ده اللي فيها اللعب كله. ازاي. 

في سنه ٢٠١٢/٢٠١٣ الحكومات الخارجيه حولت لمصر ٨٠٠ مليون دولار. بس. و ده الرقم الثابت من ايام مبارك. علي فكره ده غير الودائع الرسميه في البنك المركزي. دي ليها حساب تاني حنحسبه لان الوديعه لازم تترد و متقدرش تصرفها في السوق عشان مثلا تشتري بها قمح او سكر. التحويل هو قرض او منحه داخله مباشره علي حساب الحكومه و ممكن تشتري بيه اي حاجه. 

في سنه ٢٠١٤/٢٠١٥ الرقم ده نط بقي ١٢ مليار دولار بعد لما كان ٨٠٠ مليون دولار! و فضل ٨٠٠ مليون طول وقت مبارك و مرسي و المجلس العسكري. ال ١٢ مليار دولار دول هم الرز. 

المصيبه بقي ان في ٢٠١٤/٢٠١٥ الرز خلص. بدل ما كان ١٢ مليار دولار نزل و بقي ٥ مليار دولار بس. يعني نزل ٧ مليار دولار بالمقارنه بسنه ٢٠١٣/٢٠١٤. 

تجمع كل ده فوق بعضه يديلك ميزان المدفوعات في مصر. 

يلا. هات قلم و ورقه و اله حاسبه و يلا نحسب. 

اولا: المقارنه بسنه ٢٠١٣/٢٠١٤

—————————

الاستيراد زاد ٥ مليار. 

التصدير نزل مليار. 

النقل و قناه السويس زي ما همه. 

السياحه زادت ٤ مليار دولار

التحويلات نزلت ٥ مليار دولار 

يبقي المجموع بقي:

٥+١-٤+٥ = ٧ مليار دولار 

يعني مصر بقت بتحتاج ٧ مليار دولار زياده عن سنه ٢٠١٣/٢٠١٤ عشان تقدر تكمل. طيب مصر بتحتاج في المتوسط ٧٠ مليار دولار بين الحج و الاستيراد و غيره. دلوقتي بقت تحتاج ٧٧ مليار دولار. يعني زياده ١٠٪. يبقي أكيد سعر الدولار لازم يزيد علي الأقل ١٠٪. طيب. الدولار كان سعره ٧,٥ جنيه السنه اللي فاتت. زود عليه ١٠٪ حتوصل لسعر ٨,٢٠ جنيه. بسيطه جدا. 

و عاده في الأحوال اللي زي دي في تضخم للجنيه المصري لان الحكومه عماله تطبع فلوس عشان تدفع عوايد تفريعه القناه التي ثبت فشلها كما توقعنا (مصدر ٤). و احنا قلنا قبل كده انه بحلول عام ٢٠١٧ التأثير التضخمي ده حيوصل ١٢٪ اللي هوه سعر الفايده علي سندات القناه لانه مشروع دون عايد. كل الفلوس المطبوعه دي فلوس رايحه. 

زود بقي ١٢٪ كمان علي سعر الدولار حتوصل ان سعره حيبقي ٩ جنيه مع عام ٢٠١٧. 

ثانيا: المقارنه بين ٢٠١٤/١٠١٥ بسنه د مرسي ٢٠١٢/٢٠١٣

————————–

الاستيراد أكتر ٨ مليار دولار عن سنه مرسي

التصدير أقل ٢ مليار دولار عن سنه مرسي

السياحه زي ما هيه. احسن اللي عرفوا يعملوه. 

النقل زي ما هوه. 

الخدمات كلها دي ما هيه. 

الفارق ان الرز بقي ٥ مليار دولار في ٢٠١٤/٢٠١٥ مقارنه ب ١ مليار في سنه د مرسي. 

يعني ٢٠١٤/٢٠١٥ اسوء بمقدار ٦ مليار دولار عن سنه مرسي! و اسوء ٧ مليار دولار عن سنه ٢٠١٣/٢٠١٤ اللي دخل فيها مصر ١٢ مليار دولار تحويلات حكوميه! 

عرفنا ليه الدولار لازم يوصل ٨,٢٠ جنيه و بعدين ٩ جنيه في ظرف سنتين. 

عرفنا ليه ٢٠١٣/٢٠١٤ بانت انها سنه حلوه عشان الرز! 

عرفنا يعني ايه ان د مرسي كان شغال في الأمور المهمه: تقليل الاستيراد و زياده التصدير. 

عرفنا ان السيسي شغال في العكس تماماً! 

نكمل بقي عشان نفهم موضوع احتياطي البنك المركزي. 

أوعي حد يضحك عليكم. 

المصادر:

——–

١- الحلقات السابقه من تعالوا نفهم الاقتصاد ببساطه:

https://www.facebook.com/jawda.org/photos/p.933320373404843/933320373404843/?type=3

https://jawdablog.org/category/الإقتصاد/حلقات-تعالوا-نفهم-الاقتصاد/

٢- تقرير البنك المركزي عن ميزان المدفوعات:

http://www.cbe.org.eg/Excel/9_Egypts_balance_of_payments.xls

٣- بيان البنك المركزي عن ميزان المدفوعات في النصف الاول من العام المالي السابق:

http://www.cbe.org.eg/NR/rdonlyres/FC987D68-4925-448E-A768-56338AC7A6D1/2843/BOPH1201415.pdf

٤- ملف جوده عن قناه السويس:

https://jawdablog.org/2015/08/09/lies_demonstrated_new_suez_canal_/

https://jawdablog.org/category/الإقتصاد/مشروع-السيسي-لقناه-السويس

 

2 thoughts on “ماذا يحدث لسعر الدولار (٢) … تعالوا نفهم الاقتصاد ببساطه

  1. Pingback: !بلطجستان | JAWDA

  2. Pingback: ماذا توقعت جوده عن الدولار و ماذا يحدث و لماذا؟ | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s