استمر في النقد … اسقاط الانقلاب بأساليب القرن ٢١

Continue_to_criticize

احد الاهم الأسس السيكولوجيه التي يعتمد عليها الانقلاب في البقاء هو تخفيض سقف طموح المصريين و امالهم. ليه؟ لان المواطن الطموح سيسعي لتحسين أوضاعه. و بعدين يكتشف انه لا يمكن تحسين الأوضاع الا بحلين: الهجره او تغيير الحكومه القائمه. مفيش حل تالت. لان الحكومه القائمه و علي رأسها الجيش لها هدفان اتنان فقط الاول حلب اي شيئ له قيمه في البلد (الارض ارض الجيش، شركات النظافه، الامن، الفنادق، الطرق، حتي النوادي بتاعه الجيش و جنرالاته) و التاني هو تطويع الشعب ميفتحش بقه عشان نقدر ننفذ تعليمات الساده في تل ابيب و يفضلوا راضيين عننا. 

طيب المواطن اللي مش قادر يهاجر لان التأشيرات بقت صعبه جدا و مصر مقفول عليها يعمل ايه؟ المواطن الطموح ده عمل ثوره ٢٥ يناير. طيب احنا كجيش و كحكام مش عاوزين ثوره من دي تاني. يبقي لازم نقلل طموحات الناس جدا. صعب قوي اننا نقطع اتصال الناس بالعالم في ظل ثوره الانترنت (مصدر ١ – الانترنت احد اهم محركات الثورات في العالم الحديث) لان العالم كله مفتوح. زمان كان ممكن نقطع الراديو و نشوش عليه فالشعب ميعرفش مثلا انه اخد اكبر هزيمه في التاريخ في ٦٧. دلوقتي صعب تعمل كده و ده ادي ان الناس كلها بتشوف العالم و ازاي بيتقدم علي الكمبيوتر و ان احنا عايشين في زباله.

يبقي الانقلاب يعمل ٣ حاجات:

————————————

١- يخلي الناس تقول احنا احسن من سوريا و العراق. المقوله دي مش هايفه. و ناس كتير اقتنعت بها. لذلك عليك انك تدحضها باستمرار و كتبنا ازاي تعمل كده (مصدر ٢). 

٢- يخلي ان نقد اي شيئ في البلد عمل لا وطني. يعني مثلا لو قلت ان الشارع فيه زباله يبقي انت مش وطني او يتقالك يعني “الحكومه تعملك ايه”. و هكذا. 

٣- يملأ الانترنت بأي كلام فارغ. يعني يحط اي زباله علي الانترنت. لذلك المواطن ميقدرش يفرق بين الحقيقه و الزباله و يوصل لاستنتاج ان كل الانترنت زباله و يبعد عنها او ميصدقهاش. و بالتالي تقل طموحاته جدا. 

يعني جزء كبير من اللي بيقوله اْبواق السيسي علي الانترنت كذب و هم عارفين انه كذب و هم نفسهم بيطلعوا يكذبوه. و الهدف انك متعرفش تفرق الحقيقه من الزباله. 

و ده كله احنا شايفينه كل يوم. 

طيب نعمل ايه؟

——————

استمر في النقد. أوعي توقف. يعني لما تلاقي زباله. قول شايف الزباله في الشارع. هوه ده اللي احنا عاوزينه في مصر؟ ان الشوارع تبقي زباله؟ لو مفيش بنزين تقول مفيش بنزين. و قول ان الجيش و السيسي مسئول عن كده. هوه عاوز ان الوزاره تكون مسئوله عشان هو يطلع منها. الحقيقه انه مسئول و هو نفسه قال انه مسئول عن كل حاجه في البلد. 

طبعا حتلاقي اللي يقولك مفيش بنزين بس فيه كهربا. قوله يعني اعمل ايه بالكهرباء؟ احطها في العربيه عشان اروح الشغل؟ هوه احنا مش زي الناس في الدنيا عندها كهربا و بنزين و شوارع نضيفه؟ 

حيقولك احمد ربنا احنا مش زي سوريا. قوله انا مالي و مال سوريا. انت شايفني باتكلم شامي و لا عايش في حلب و لا عندنا دروز و أكراد و شيعه و علويين بيخبطوا في بعض. انا عاوز ابقي زي المانيا يا اخي. فين فلوس القناه اللي تخلينا زي المانيا؟ 

أبدأ الكلام ده في المجالس العائلية المضمونه. 

بالمناسبه. سيكولوجيا الموضوع ده بسيطه جدا. لو اتنين تلاته من اهلك لقوك بتتكلم. هم كمان حيتعودوا يتكلموا. لو الكل ساكت الكل حيفضل خايف. الشجاعه معديه علي فكره (مصدر ٣). و بعدين الكلام حيبدأ في المجالس العائلية و بعدين ينتشر أكتر و يبقي ناس كتير بتتكلم لدرجه انه صعب المخابرات العسكريه تقبض علي الشعب كله. 

استمر في النقد. 

و كل الحلقات السابقه من اسقاط الانقلاب بأساليب القرن ٢١ في مصدر ٤. 

المصادر:

———–

١- تاثير ثوره الانترنت علي توسع التطلعات في العالم و الربيع العربي:

http://www.nytimes.com/2014/11/28/opinion/david-brooks-the-ambition-explosion.html?_r=0

٢- اسطوره احنا احسن من سوريا و العراق:

https://jawdablog.org/2014/10/12/egypt_taboo_19/

٣- الشجاعه معديه:

http://www.greenpeace.org/international/en/news/Blogs/makingwaves/rainbow-warrior-courage/blog/53478/

٤- كل حلقات اسقاط الانقلاب بأساليب القرن ٢١:

https://jawdablog.org/category/الانقلابات-العسكرية/كيف-تكسر-الإنقلاب/

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s