السيسي يريد مجلسا للشعب … الاسطوره ٦٠

myth60

يعتقد بعض المصريين ان السيسي يريد انتخابات مجلس للشعب و مجلسا للشعب و لكنه فقط يريد مجلسا مواليا. هذا غير حقيقي و سنري لماذا. 

اولا. اجراء انتخابات لمجلس الشعب يعني امر من ٣ كلهم وحشين للسيسي:

————————————–

١- اما انها انتخابات تتم في اجواء تزوير و قمع شديده حتي ضد رجال الاعمال ناهيك عن الاخوان و الإسلاميين، و هذا سيكون مكشوف تماماً امام العالم و السيسي يعلم ان هذا سيتم استغلاله في الغرب لتثبيت صورته كحاكم مستبد ديكتاتوري يتعامل معه الغرب فقط من باب الضروره. و بالتالي تفتح الباب علي مصراعيه للضغوط الغربيه عليه في كل المجالات. 

و بعدين يبان قدام الناس كلها تزوير و قمع و يحصل زي انتخابات ٢٠١٠ مع مبارك و العالم كله يهاجم الحكم الديكتاتوري المصري. أكيد هوه مش عايز كده. 

٢- او ان يتم تثبيط الناس عن التصويت و يعزفون هم بذاتهم عن التصويت مما سيبدو انه انتقاص بشعبيه السيسي مثلما حدث في “الدوله تبحث عن صوت”. 

٣- او ان تأتي انتخابات شبه منفتحه و يأتي ممثلو نظام مبارك و رجال الاعمال للسيطره علي مجلس الشعب و هؤلاء يريدون تقليص سيطره الجيش علي الدوله و هم من قادوا حمله شد ودن السيسي في “الدوله تبحث عن صوت”. ببساطه لأنهم عاوزين السيسي لأنهم لا يستطيعون و لا يطيقون العوده لأجواء الحريات و انهم يدفعوا الضرايب كامله اللي عليهم و يشتغلوا كويس بدون واسطه و محسوبيه. لكن كمان هم مش عاوزين ان الجيش لاهف كل المشاريع في البلد. و طبعا سيطرتهم علي مجلس الشعب معناها انهم في وضع قوي يحاسبوا السيسي و الجيش. و ده كمان السيسي مش عاوزه.

و كمان وفق الدستور الحالي الحزب الفائز في مجلس الشعب يشكل الحكومه. و في الحماسه تم الإبقاء علي
مواد دستور ٢٠١٢ اللي تعطي رئيس الحكومه صلاحيات كبيره جدا عن رئيس الجمهوريه. ده طبعا لما كان رئيس الجمهوريه راجل ديمقراطي. الوضع مش كده دلوقتي. يعني رجال مبارك و رجال الاعمال دول ممكن يشكلوا حكومه و ياخدوا المشاريع من السيسي و يحاسبوا علي الرز كمان. 

يعني مفيش اي احتمال كويس ممكن يجي من مجلس شعب او انتخابات. لذلك السيسي حيؤجل كل ده لأطول فتره ممكنه. 

و هو طبعا في علاج لهذا عمله ناصر و السادات و مبارك و هو انهم عملوا الحزب بتاعهم. لكن حزب السيسي الحقيقي هو الجيش. هم أهله و عشيرته. و هو راجل شاف الحزب الوطني عمل ايه في مبارك و ان رجال الاعمال اخترقوا حزبه و لعبوا بيه. لذلك هو مش عاوز يعمل حزب عارف ان رجال الاعمال حيدخلوله فيه و يبقي حزبهم مش حزبه. 

و طبعا هيكل نصح السيسي يعمل حزب لكن فات هيكل ان وقت الاتحاد الاشتراكي لم يكن هناك رجال اعمال بالقوه الموجودين فيها الان. 

ثانيا: انتخابات مجلس الشعب تسحب ورقه بلطجه من السيسي مع الغرب

———————————————————

كل مسئول غربي يجي مصر و آخرهم كيري يضغط عشان تحصل انتخابات مجلس شعب (مصدر ١). ليه؟ لان عدم وجود انتخابات في مصر يخلي التعاون بين الغرب و مصر تعاون غير مقبول من شعوب الغرب. و شفنا احنا حصل ايه في برلمان ألمانيا لما السيسي راح هناك. حدوث انتخابات مجلس شعب في مصر يقلل من هجوم ممثلي الشعوب الغربيه علي حكوماتها علي التعاون مع السيسي. و كمان يحسس الحكومات دي ان علاقتهم مع السيسي مش ضد الأخلاق قوي. 

لكن المشكله ان السيسي لو عمل الانتخابات دي مش حيقدر يبلطج مع الحكومات الغربيه و البلطجه هي سياسته الاستراتيجيه (مصدر ٢). يعني لما هم بيجوا يقولوا له لازم تعمل انتخابات. يقوم هو قايلهم ان شاء الله بس انتم عارفين خطر الاٍرهاب و الشعب مش لاقي يأكل. انا محتاج سلاح و محتاج فلوس و أكيد حأعمل انتخابات لو ادتوني الحاجات دي. و طبعا هو بيكدب. لكن هم بيدولوه. لو حصلت الانتخابات خلاص ميقدرش يبلطج و خلاص هم يقدروا يضغطوا عليه و معندوش هو ورقه يبلطج بها. لذلك ليه يعمل انتخابات؟ 

ثالثا. الانتخابات تدي السعوديه و غيرها فرص للتحكم في مصر اكثر

————————————————————————-

شوفنا ان الأذرع الاعلاميه للسيسي تهاجم السعوديه بهدف البلطجه. سهل قوي ان السعوديه تشتري اعضاء مجلس الشعب و تبقي دي وسيله جديده لشد ودن السيسي و التحكم فيه. 

نفس الكلام ابوظبي ممكن تعمله. و شفنا ازاي ان ابي ظبي تظهر و تخفي احمد شفيق بناءا علي ما تريده من السيسي. و السيسي حساس جدا لموضوع احمد شفيق ده ببساطه لان جزء من شرعيه السيسي معتمد ان انتخابات مرسي زورت ضد شفيق. 

لذلك ليه يعمل انتخابات مجلس شعب؟ 

رابعا. السيسي مستبد 

————————————

يعني هو رجل مخابرات عسكريه متعود علي السمع و الطاعه. مش عاوز هو حياه مدنيه فيها نقاش و استجوابات و اسئله في مجلس الشعب و كلام هو شايف انه ملوش لازمه لانه دكتور الفلاسفه و خبير في المشاكل المصريه كلها. طيب هو دكتور الفلاسفه يحتاج برضه مجلس شعب؟ 

لذلك التأخير في مجلس الشعب سياسه مقصوده و سيتم تأخيره باستمرار و سيتم التعلل بأي شيئ كما استمر في الحدوث منذ ٢٠١٣. 

فاكرين لما خريطه طريق السيسي في يوليو ٢٠١٣ كان فيها ان انتخابات مجلس الشعب قبل انتخابات الرياسه؟ فاكرين و لا نسينا؟ (مصدر ٣). و فاكرين لما كان المفروض كل حاجه تحصل في ظرف ٦ شهور؟ ادينا اهوه بقالنا سنتين. و لسه. 

طيب ايه اللي حيحصل؟

—————————–

حيستمر التأجيل لأطول فتره ممكنه. الا اذا زادت الضغوط العالميه و المحليه بشكل كبير. 

لذلك السيسي معملش انتخابات الا تحت ضغط مباشر من امريكا. لدرجه ان كيري بنفسه هو اللي يطلع يقول ان الانتخابات حتحصل (مصدر ١). يعني الشعب المصري بيعرف انتخابات مجلس الشعب من وزير خارجيه امريكا! 

و امريكا شايفه ان الإصلاح ضروره في مصر (مصدر ٤) و ان وجود مجلس شعب حيعمل ضغوط علي السيسي و ان وجود رجال الاعمال و رجال السعوديه في مجلس الشعب حيقلل تاثير الجيش في الدوله و يعمل و لو حتي شكل ديمقراطي ينفس عن الوضع في مصر و يمنع تفجر الأوضاع مره اخري في مصر. 

و في الأغلب السيسي حيحاول ان مجلس الشعب ده يكون اقل تاثير ممكن و يأجله بأي شكل. يعني مش بعيد ان القضاء يطلع بأي حجج لالغاء و تعطيل الانتخابات. 

كمان حيبقي فيه لجنه لفرز المرشحين بحجه لو هم اخوان (قال يعني الاخوان مش في المعتقلات). لكن الهدف الحقيقي منع او تقليل وجود رجال الاعمال. و حيتم دفع لواءات المعاش و صحفيي المخابرات العسكريه و كل البصاصين انهم يدخلوا المجلس بمساعده المخابرات العسكريه (التي تدير البلد فعليا) 

ما سيحدث بعد ذلك هو حل مجلس الشعب بقرار من المحكمه الدستوريه. و الهدف ليس لان المجلس سيكون مشاغبا. حتي لو لم يكن المجلس مشاغبا فسيتم الحل لسبب بسيط و هو انه يتيح للسيسي أعاده دوره البلطجه مع الغرب. في وجود مجلس محلول سيقوم الغرب مره اخري بالضغط علي السيسي لاعاده الانتخابات و سيقوم هو بالمماطله و البلطجه معهم من جديد. و لنا في احتفاظ الدستوريه العليا بحقها في حل مجلس الشعب في اي وقت عبره. و الحقيقه ان الدستوريه العليا و الجيش وجهان لعمله واحده فالجيش و السيسي و قبلهم مبارك هو من يعين الدستوريه العليا و هم من شاركوا في تقويض الديمقراطيه المصريه بكفاءه و همه و بالطبع سيستمرون في هذا الدور (مصدر ٥). 

تخلصوا من الاساطير. 

الاساطير السابقه كلها في مصدر ٦. 

المصادر:

———

١- ضغوط الغرب من اجل مجلس الشعب:

http://www.state.gov/secretary/remarks/2013/08/213128.htm

٢- البلطجه هي استراتيجيه السيسي:

https://jawdablog.org/2015/08/08/thug_strategy/

٣- خريطه طريق يوليو ٢٠١٣:

http://www.shorouknews.com/news/view.aspx?cdate=03072013&id=81a805f4-49eb-4b63-b7b3-56d4a4f12a6f

٤- رؤيه امريكا ان الإصلاح ضروره في الشرق الأوسط:

http://www.brookings.edu/research/testimony/2015/03/24-us-policy-middle-east-pollack

٥- دور الدستوريه العليا و الجيش في تقويض ثوره يناير و الديمقراطيه المصريه الوليده:

https://jawdablog.org/2014/10/12/egypt_taboo_21/

https://jawdablog.org/2014/10/12/egypt_taboo_21_2/

٦ – الاساطير السابقه كلها:

https://jawdablog.org/category/الأساطير-و-التابوهات-في-السياسه-المصر/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s