دليلك لفهم اللخبطه الاستراتيجيه في المنطقه

Strategy_Solutions_UAE_Role1

استراتيجيه مصر تحت السيسي تتلخص في كلمه واحده هي البلطجه! كتبنا كده (مصدر ١) و الناس هاجمتنا. طيب تعالوا كده نطبق ده علي الأحداث الأخيره و زياره روسيا و نفهم.

نظريه البلطجه الاستراتيجيه

——————————-

السيسي و نظامه العسكري الفاشي مقتنع ان دول الخليج محتاجه له. و ان العلاقه معاهم هي ان كل شيئ بتمنه (مصدر ٢). و ان مصر كان لازم تاخد فلوس أكتر كتير في مقابل انها بعتت جيش الخليج في حرب الكويت.

المصيبه طبعا ان بعض المصريين متخيلين ان ده هوه الصح. يعني اننا بلطجيه و ان الجيش المصري مرتزقه. لا نظريه امن قومي و لا يحزنون. و ده طبعا تطور طبيعي لمجتمع أجهض ثوره ٢٥ يناير باستخدام البلطجه لذلك مش غريب ان البلطجه تبقي نظريه استراتيجيه. طبعا الصح هو ان العلاقات طبعا بين الدول فيها تبادل منافع و فيها تعاون لمصلحه الجميع و لخلق مصالح نتفق فيها جميعا. مش مسأله ابتزاز.

و طبعا احنا شفنا بام اعيننا هجوم و ابتزاز أذرع السيسي الاعلاميه للسعوديه بعد وفاه عبد الله (مصدر ٣). و التهديد بالتطبيع مع ايران و ان السعوديه أصل الاٍرهاب و الوهابيه اساسه (مع ان رز السعوديه وهابي ايضا!).

هذه البلطجه ستستمر. و دول الخليج بالذات السعوديه بطبيعه نظمها بطيئه الحركه لكنها في الأغلب لاحظت تلك البلطجه و في الأغلب انها ستلعب معه بذات الأسلوب و هو شد الودن عبر سحب الاستثمارات السعوديه بشكل لا يسقطه و لكن لا يجعله قادر علي الفكاك من تاثير السعوديه.

نعتقد ان هذه الديناميكية في العلاقه بين السيسي و الخليج ستستمر. هو سيبلطج ليحصل علي الرز. خصوصا ان احتياجه للرز يتزايد نتيجه ادارته السيئه جدا للاقتصاد المصري (تراجعت الصادرات المصريه بشكل مريع تحت حكم السيسي بالرغم من الهبوط التاريخي للعمله المصريه – مصدر ٤). و سيستمر شد الودن من جانب السعوديه لإفهامه ان مقدراته بيدها. لكن نشك ان تغامر السعوديه بالخلاص منه الا علي يد الجيش ذاته خوفا من قلاقل مصريه جديده لا شك واصله للسعوديه.

و بالطبع هذه الديناميكية في العلاقه تجعل مصر دوله بلطجيه متسوله. و ليس في هذا ما يدفع علي التفاؤل.

الدول العسكريه تتعاون معا

——————————–

بدون شك تري مصر السيسي ان نظام بشار الاسد هو اقرب اليها من الناحيه الفكريه. فهو نظام يقمع شعبه و هو نظام عسكري يمثل اقليه. و قد قال بشار الاسد ذاته انه يتلقي معدات عسكريه من الجيش المصري و ان التنسيق الأمني بينه و بين مصر علي افضل ما يمكن (مصدر ٥).

دون شك ان مجرم رابعه لا يضيره ان يساعد نظام يقتل شعبه. بالعكس تثبيت نظام بشار تعضيد لنظام السيسي لأنهم سيساعدان و يساندان بعضهما.

و هذا شيئ طبيعي لان الجمهوريات القمعيه العسكريه تتآلف و تتعاون و هذا ما كان يحدث في امريكا اللاتينيه وقت الحكم العسكري فيها.

طيب يتساءل قارئ متابع: ازاي ان مصر السيسي استضافت مؤتمر للمعارضه السوريه؟

الاجابه سهله جدا. هذا جزء من البلطجه الاستراتيجيه. يعني السعوديه عاوزه معارضه سوريه و دفعت تمنها إذن نستضيف المعارضه السوريه. لكن لا يمنع هذا ان نبلطج و نوري السعوديه اننا ممكن كمان نبيعها و نروح نتعاون مع بشار. بالذات ان ميلنا الطبيعي هو التعاون مع بشار و بالذات ان الاْردن و ابو ظبي و روسيا معانا في الموضوع.

طيب ليه الاْردن و ابو ظبي عاوزين يساعدوا بشار؟

——————————————————–

في بدايه الثوره السوريه كل الخليج كان ضد بشار لأنهم شافوا انها فرصه يتخلصوا منه و يتخلصوا من تاثير ايران عليه. و كلنا فاكرين لما ملك الاْردن أتكلم عن الهلال الشيعي في المنطقه (مصدر ٦). في نفس الوقت اللي كان فيه الخليج معارض تماماً للثوره المصريه و تنحي مبارك. لدرجه ان ملك السعوديه انتقد امريكا انها اتخلت عن مبارك في رأيه (مصدر ٧).

و دول الخليج بما فيها السعوديه حتي ايدت داعش في البدايه لانها ضد بشار و كشفهم جو بايدن نائب رئيس امريكا (مصدر ٨).

لكن دلوقتي داعش بقت تهديد للخليج مباشر و السعوديه بالذات. اولا انها كبرت و تتمدد. و الاهم ان ايدلوجيه داعش هي نفسها ايدلوجيه السعوديه الوهابيه. الفرق ان داعش تتبني تلك الأيدلوجية بحق و حقيقي. و الشباب السعودي ينضم لداعش بالالاف (مصدر ٩). حتي الأئمة السعوديين يتجنبوا انتقاد داعش!

فدلوقتي الامارات بقت ضد داعش. حتي السعوديه الرسميه طبعا بقت ضد داعش. الفرق ان السعوديه متقدرش تبقي مع بشار. مشكله داخليه كبيره للسعوديه لو قالت و عملت كده. كمان السعوديه تري انها لو ايدت بشار معناها انتصار لإيران عدوها الكبير في المنطقه. لذلك في نفس الوقت اللي كانت الامارات و مصر و الاْردن تجتمع مع روسيا لتأييد بشار كانت السعوديه بتقول انها إطلاقا لن تؤيد بشار و انها تعمل علي إزاحته. و ده بيدي السيسي و النظام العسكري المصري الفاشي فرصه لابتزاز السعوديه بأنه يوري انه ممكن يؤيد بشار ضد السعوديه. كمان الامارات تري ان دي نقطه خلاف مع السعوديه لان الامارات و الاْردن دلوقتي شايفين ان خطر داعش خطر حالي إنما خطر بشار خطر مستقبلي (مصدر ١٠).

مع ملاحظه ان نظام ابو ظبي و نظام الاْردن العلاقات بينهم شخصيه بسبب التزاوج بينهما (مصدر ١١).

طيب ليه روسيا؟ 

———————–

بوتين بعد تراجعه الاستراتيجي في قلب أوروبا و خسارته لأوكرانيا (كييف هي القلب التاريخي للإمبراطورية الروسيه و احد اهم المعاقل الصناعيه للاتحاد السوفيتي السابق) و تراجع اسعار البترول (مصدر ١٢) بشده اصبح هدفه هو مناؤه السياسه الامريكيه في كل مكان و محاوله ملأ الفراغ الامريكي في الشرق الأوسط. يعني امريكا بتقول للعرب احنا مش حنحارب حروبكم (مصدر ١٣). العرب بدل ما يعتمدوا علي نفسهم و يحاولوا يتصالحوا مع إيران و تركيا ، لا بيروحوا علي روسيا! فبوتين شايف ان دي فرصه لتعويض خسائره الاستراتيجيه. فروسيا الحقيقه بدون هدف استراتيجي في المنطقه لانها بتساعد الامارات و الاْردن (دول ملكيه) و بشار (نظام جمهوري مستبد) بدون اي امكانيه لتحالف استراتيجي بينهم. حتي الامارات نفسها لا تحب روسيا و لا سوريا و تري ايران عدوه. لكن هي مسأله مصالح وقتيه. و طبعا السيسي بعلاقته مع روسيا بيبتز الامريكان. يعني نفس سياسه البلطجه الاستراتيجيه.

طيب ايه موقف تركيا؟

————————–

تركيا نفسها واخده اتجاه السعوديه. و هي انها لازم تتراجع عن تأييد داعش لانه بقي تهديد مباشر ليها. و ده نفس اللي قاله جو بايدن (و هو مشهور بإفشاء الأسرار). لكن صعب تخيل ان تركيا تؤيد بشار زي ما الامارات و مصر و الاْردن اتجهت. لكن السياسه التركيه مستحيل تدخل في مواجهه بمفردها ضد داعش لان ده معناه هجمات ارهابيه في اسطنبول نفسها و دي اخر حاجه تركيا عاوزها. لذلك تركيا حتتحرك من خلال حلفاء. يعني قصف جوي بالتعاون مع امريكا و ناتو. كمان الحسابات الكرديه مهمه جدا لتركيا. و الاكراد الان هم اكبر حلفاء لامريكا في المنطقه ببساطه مش ممكن يعيشوا من غير امريكا بشكل استراتيجي. اهم شيئ لتركيا انه لا تقوم دوله كرديه في سوريا و العراق. بالرغم ان كل ملامح الدوله الكرديه موجوده. لذلك تركيا ستتحرك في ٣ اتجاهات:

اضعاف داعش. اضعاف النظام السوري بتأييد المعارضه السوريه غير المواليه لداعش. و الهدفين دول هم متفقين تماماً مع السعوديه فيهم. الهدف الثالث لتركيا هو اقامه منطقه عازله في شمال سوريا. و ده هدف السعوديه مش معارضه ليه لكن بالنسبه لها مش هدف رئيسي. ليه تركيا تعمل منطقه عازله؟ اولا عشان تخفف ضغط اللاجئين عندها اللي وجودهم أتسبب ان الاكراد في جنوب تركيا يصوتوا ضد حكومه حزب اردوغان. طبعا ملايين اللاجئين واخدين وظائف و غيرها و بالتالي الاكراد في جنوب تركيا متضايقين. الهدف التاني لتركيا من المنطقه العازله هي انها تجذب عرب سنه من حلب في اتجاه شمال سوريا و بالتالي تقلل من احتمالات وجود دوله كرديه في شمال سوريا.

طيب كل ده رايح علي فين؟

———————————–

اللي شايفينه دلوقتي مرشح للاستمرار لفترات طويله جدا.

١- السيسي سيستمر في البلطجه علي السعوديه. و السعوديون لا يريدون التخلص منه الان و هز استقرار مصر و العوده للثوره مره اخري. كمان هم لا يريدونه شوكه في جانبهم. لذلك ستتقلص المساعدات السعوديه لمصر و سيحاولون فقط ابقاء السيسي علي قيد الحياه. لا يطفو و لا يغرق.

٢- سيستمر السيسي في البلطجه مع امريكا و الغرب. حتي في مواضيع مثل مجلس الشعب مثلا. يعني هو عارف ان امريكا تضغط من اجل مجلس شعب و هو سيماطل فيه للابتزاز. كمان هو عارف ان امريكا تضغط للافراج عن المعتقلين و هو واخد المعتقلين دول رهائن للضغط علي الغرب.

طبعا هو عارف ان البلطجه لها حدود. يعني ميقدرش يبلطج مع اسرائيل. ده خط احمر بالنسبه للغرب. لكن ممكن يبلطج علي الشعب المصري اللي هوه باختصار واخده رهينه للضغط علي الغرب عشان الرز برضه. و بالمناسبه لا احد يعرف اين يذهب الرز.

٣- السعوديه تتقبل ان تتحالف الامارات و الاْردن لمساعده بشار انه يقضي علي داعش. طالما المساعده دي غير حاسمه. لان اخر حاجه السعوديه عاوزه تكررها هي لما ساعدت صدام في حرب الخليج مع ايران و بعدين اول حاجه عملها صدام انه انقلب عليها و احتل الكويت. تكرار السيناريو مع بشار أكيد لا تريده السعوديه. لذلك ستكون مساعدات محدوده و فقط ضد داعش. و في نفس الوقت حتفضل السعوديه و امريكا و حتي الاْردن يدربوا قوات معارضه سوريه تفضل شوكه ضد بشار نفسه عشان ميعرفش يتنفس!

يعني نأيد بشار و في نفس الوقت نؤيد اللي ضده.

٤- و طبعا بسبب التوازنات دي نفسها و التناقضات دي نفسها فالأوضاع ستستمر في حاله سيوله شديده لفترات طويله. لان ناس داخل المجتمع السعودي نفسهم بيؤيدوا داعش بالفلوس. يعني نفس المجتمعات بتؤيد بشار و بتؤيد داعش و بتؤيد المعارضه لبشار و داعش. و نفس المجتمعات مش عاوزه حد منهم ينتصر بشكل كامل. لذلك محدش حينتصر بشكل كامل. بالعكس اي محاوله للقصاء علي داعش بشكل واضح و تدخل سعودي كامل ممكن يفرط المجتمع السعودي.

٥- بالنسبه لتركيا حنلاقي انها حتتلاقي مصالحها مع السعوديه في هزيمه داعش من غير نصر بشار. لذلك التنسيق بينهم حيستمر و بالعكس حيزيد.

٦- امريكا مش حتؤيد تركيا في تشكيل منطقه عازله في شمال سوريا لان معناها تدهور وضع الاكراد و ده امريكا لا تريده. و تركيا مش عاوزه تعمل منطقه عازله من غير ناتو لان ده يخليها معرضه لهجمات ارهابيه.

٧- الجيش المصري حيستمر يؤيد بشار الاسد. و يستخدم ده كارت بلطجه مع السعوديه.

—————-

ياريت نكون وضحنا الأمور.

المصادر:

————

١- نظريه السيسي الاستراتيجيه:

https://jawdablog.org/2015/08/08/thug_strategy/

٢- تسريب السيسي عن نظرته للخليج:

https://www.youtube.com/watch?v=Ugd7cFa2n4w

٣- هجوم أذرع السيسي الاعلاميه علي السعوديه:

http://goo.gl/jsHGd0

٤- تراجع الصادرات المصريه بشكل غبر مسبوق:

http://www.albawabaeg.com/56539

٥- حديث بشار الاسد لقناه المنار التابعه لحزب الله عن علاقته بمصر:

http://goo.gl/lVRmsc

٦- حديث ملك الاْردن عن الهلال الشيعي في المنطقه:

http://www.economist.com/news/middle-east-and-africa/21647367-shia-militias-are-proliferating-middle-east-shia-crescendo

٧- ملك السعوديه يهاجم تخلي امريكا عن مبارك:

http://www.brookings.edu/research/opinions/2013/08/19-saudi-arabia-blames-america-for-turmoil-in-egypt-riedel

٨- جو بايدن يتحدث عن مساعده دول الخليج لداعش في البدايه:

http://www.rt.com/news/192880-biden-isis-us-allies/

٩- انضمام الشباب السعودي لداعش:

http://arabic.cnn.com/…/25/twitter-saudi-khalil-remarks-isis

١٠- رؤيه الامارات لخطر داعش و المقارنه مع بشار:

http://www.iar-gwu.org/content/part-three-uae-foreign-policy-iraq-syria

١١- التزاوج بين الاْردن و الامارات:

http://www.dailymail.co.uk/home/you/article-1103014/Princess-Haya-Jordan-A-modern-Arabian-tale.html

١٢- خساره بوتين الاستراتيجيه لأوكرانيا:

http://russia-insider.com/en/putins-ukraine-strategy-brilliantly-explained-top-russian-politician-video/ri8001

١٢- تصحيح السياسه الامريكيه في الشرق الأوسط:

http://www.brookings.edu/research/testimony/2015/03/24-us-policy-middle-east-pollack

5 thoughts on “دليلك لفهم اللخبطه الاستراتيجيه في المنطقه

  1. Pingback: الدول اما تتحارب او تتحد! الاسطوره ٦٤ | JAWDA

  2. Pingback: التحول من الفهلوه الي البلطجه… عيوب الشخصيه المصريه … و لماذا نتوقع عوده ظاهره الفتوات | JAWDA

  3. Pingback: تيجي تبلطج عليه، يبلطج عليك: لماذا أرسل السيسي قوات مصريه الي اليمن … تحليل استراتيجي | JAWDA

  4. Pingback: !بلطجستان | JAWDA

  5. Pingback: دروس من العالم … كيف تحولت البرازيل للديمقراطيه … حلقه ١ | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s