!اعمل الصح يا هوزيه فيجويريس فيرير

cleaning_up_Do_the_right_thing1

علي نضافه … درس من كوستاريكا 

—————————————

في الحلقات دي بنتكلم عن انه بعون الله لما يسقط الانقلاب ايه هي الحاجات المفروض نعملها عشان لا نكرر اخطاء الماضي. اتكلمنا عن اهميه العدل و اتعلمنا ده من اليابان و إنجلترا في القرن ١٩. و ايه هي الطبقه اللي المفروض تقود البلد و اتعلمنا ده من الصين. و شفنا دور الجيش و اهميه المحليات و نوع الاستثمار المفروض يحصل و اتعلمنا ده من دول زي امريكا و الصين و البرازيل. الحلقات السابقه كلها في المصدر ١. حنتعلم النهارده ايه هي الصفات اللي نختارها في القيادات. و حنتعلم ده من كوستاريكا! عجيب مش كده.

كوستاريكا بلد في امريكا الوسطي. جنوبها بنما و شمالها نيكاراجوا و في القرن العشرين كانت كل الدول اللي حواليها ديكتاتوريات عسكريه زي مصر كده. لكن الغريب ان كوستاريكا من سنه ١٩٤٨ (يعني من ٦٥ سنه) محصلش فيها لا انقلابات و لا عنف سياسي و مر عليها حوالي ٢٠ رئيس منتخب في انتخابات حره (مصدر ٢). الاهم كمان ان كوستاريكا متوسط دخل الفرد فيها ١٠ الاف دولار مقارنه مثلا بنيكاراجوا اللي جنبها علي طول و متوسط دخلها ألفين دولار بس! يعني كوستاريكا متوسط المعيشه فيها اعلي من مصر ٣ مرات تقريبا. طيب ايه السبب؟

cleaning_up_Do_the_right_thing2

هل مثلا لان كوستاريكا مدخلتش حروب؟

———————————————-

بالعكس في سنه ١٩٥٤ حاولت نيكاراجوا بقياده الديكتاتور سوموزا انها تدخل تحتل كوستاريكا و تغير الحكومه فيها (مصدر ٣).

هل مثلا لان كوستاريكا في منطقه هاديه و مستقره؟

————————————————————-

بالعكس. احنا بنتكلم علي منطقه من اكثر مناطق العالم في الانقلابات العسكريه و التدخل الامريكي. منطقه حصلت فيها ثوره كوبا الشيوعيه في الخمسينات و الحرب الآهليه في نيكاراجوا و نظام الساندينستا الشيوعي في نيكاراجوا في السبعينات و الاحتلال الامريكي لجمهوريه الدومينيكان في الستينات. ده طبعا غير زلازل و انقلابات هاييتي التي تتكرر باستمرار و التدخل الامريكي المباشر في المنطقه بشكل مستمر من تشيلي (امريكا عزلت الرئيس المنتخب الليندي بشكل مباشر) للارجنتين لمحاوله غزو كوبا اللي قامت بها المخابرات المركزيه. يعني دي منطقه بتتعامل مع القوه الامريكيه بشكل مباشر و مش عن طريق وسطاء.

هل مثلا لان كوستاريكا بلد غنيه جدا؟ فيها بترول مثلا او دهب مثلا؟

————————————————————————-

بالعكس. كوستاريكا تعتمد علي زراعه البن و السياحه البيئيه (لزياره الغابات الاستوائية هناك) و هي من كبار مصدري الرقائق الإلكترونيه في العالم (مصدر ٤). و نيكاراجوا و البرازيل فيها غابات مشابهه و بيزرعوا بن أكتر بكتير كمان. و طبعا انتاج الرقائق الإلكترونيه موضوع معتمد علي البشر مش الموارد الطبيعيه. يعني لا بترول و لا دهب و لا حاجه.

(كوستاريكا بتصدر شرائح كمبيوتر بحوالي ١٠ مليار دولار!

اول حاجه فيها تصنيع مصر بتصدرها هي مخصبات التربه بقيمه ١ مليار دولار.

و بعد كده يقولك مصر حماها الله و العالم بيعمل مؤامرات علينا.

و الله خيبه)

cleaning_up_Do_the_right_thing3

cleaning_up_Do_the_right_thing5

طيب ايه اللي حصل؟

———————–

لازم نرجع لحاجه مهمه جدا حصلت في الأربعينات في نيكاراجوا و محصلتش في مصر.

في سنه ١٩٤٨ كان في رئيس اسمه تيودورو بيكادو. الرئيس ده كان يساري اشتراكي و عمل برامج تأمين صحي و معاشات للفقراء. البرامج دي طبعا زعلت كبار منتجي البن لانها فرضت عليهم يعملوا تأمين صحي للفلاحين.

كبار منتجي البن دول عملوا اضطرابات ضد الرئيس بيكادو و كان في ضده مظاهرات بشكل مستمر. لحد كده عادي.

حصلت انتخابات في ١٩٤٨ و نزل في الانتخابات رئيس سابق اسمه كالديرون ضد مرشح منتجي البن و اسمه اوتيليو اولاتي. كالديرون كان الاب الروحي للرئيس بيكادو و كان يساري جدا لدرجه الشيوعيه ضد مرشح منتجي البن اليميني اوتيليو اولاتي.

الانتخابات دي كانت متقاربة جدا. لحد كده مفيش مشاكل. لكن كالديرون اليساري كان معاه الجيش الكوستاريكي (نادر جدا انه يكون جيش ذي اتجاه يساري لكن بتحصل) و زور الانتخابات عشان يكسب. طبعا اتباع اوتيليو اولاتي لم يستسلموا و نزلوا الشوارع و شالوا سلاح كمان ضد اتباع كالديرون و ضد الجيش الكوستاريكي.

في الفتره من مارس – ابريل ١٩٤٨ دخلت كوستاريكا في حرب اهليه مات فيها اكثر من ٢٠٠٠ واحد. طلع منتصر من الحرب دي ميليشيا بزعامه واحد اسمه هوزيه (المصريين بيقولوها جوزيه) فيجويريس فيرير. هوزيه كان مؤيد لمرشح منتجي البن اللي اسمه اوتيليو اولاتي. الراجل ده حيغير تاريخ كوستاريكا كله و حيدي درس مهم جدا لينا. خد بالك ده راجل دخل حرب اهليه ضد الجيش الكوستاريكي و كسب فيها و مات ناس من عنده. و هو مؤيد كمان للمرشح اللي الانتخابات اتزورت ضده. يعني عنده مليون سبب انه ينتقم.

ايه اللي عمله جوزيه فيجويريس؟

——————————————

الحقيقه الحاجه الوحيده اللي تيجي علي بالنا ان جوزيه فيجويريس عمل الصح. اعمل الصح يا حزلقوم او يا فيجويريس.

اول حاجه عملها انه قال ان قوانين الرئيس بيكادو للعداله الاجتماعيه و التأمين الصحي قوانين سليمه و مهمه عشان مصلحه الفقراء! 

يعني واحد يميني جه بعد حرب اهليه دمويه عمل و أكد علي قوانين يساريه اشتراكيه! ايوه. لان العدل كده.

بالعكس ده زود قوانين يساريه اشتراكيه اكثر كمان:

– عمل قانون يخلي التعليم مضمون للجميع. ادي الجنسيه للسود (كانوا محرومين منها). 

– ادي حق التصويت للمرأه و الغير متعلمين (مش زي واحد زي علاء الأسواني يجي دلوقتي و يقول نمنع التصويت عن غير المتعلمين). 

– عمل قانون للخدمه في الحكومه عشان يمنع المحسوبيه (زي ما كتبنا دي اهم و اول خطوه لنجاح اي ثوره – مصدر ٥). 

– امّم البنوك. تخيل واحد يميني يعمل كده. و كان هدفه انه يدي قروض للفلاحين عشان يسرع عجله الاقتصاد مش انه ياخد فلوس من الناس و يكبل الاقتصاد عشان يعمل ترعه قناه السويس.

عمل حاجتين كمان مهمين جدا:

– لغي الجيش. تخيل. لغي الجيش. قال انه ايه لزمه الجيش؟ احنا امننا في الاخر بتعمله امريكا و عندي شعب مسيس و مستعد للدفاع عن البلد. 

– و في مقابل كده كمان لغي الحزب الشيوعي.

المؤرخون قالوا ان برامج فيجويريس لا تختلف إطلاقا عن اللي كان حيعمله كالديرون لو كان نجح في الانتخابات.

محكمش علي بيكادو بالإعدام. مقالش ان كالديرون كان بيتآمر مع نيكاراجوا ضده. مع ان كالديرون هرب علي نيكاراجوا. و بالمناسبه رجع كوستاريكا بعد كده و دخل انتخابات رياسه و فشل فيها و نجح في انتخابات مجلس الشيوخ و بقي سيناتور. و كمان ابنه بعد كده بفتره طويله في التسعينات بقي رئيس جمهوريه كوستاريكا.

المهم انه بعد ١٨ شهر ترك فيجويريس الرياسه لاوتيليو اولاتي الفائز الحقيقي في انتخابات ١٩٤٨. و من وقتها و كوستاريكا دوله ديمقراطيه!

cleaning_up_Do_the_right_thing4

طيب تعالوا نتخيل كده لثانيه ان الكلام ده اتطبق علي مصر!

——————————————————————

ممكن جدا تقول ان انتخابات ٢٠١٢ في مصر كانت متقاربة جدا زي انتخابات ١٩٤٨. و روايه اتباع السيسي الرسميه ان الانتخابات اتزورت لصالح مرسي. جميل. و كمان بتقول البلد كانت في حرب اهليه في ٢٠١٣. عظيم. كمل بقي. قول انا عاوز أنقذ البلد. تعمل حكومه مؤقته. تقعد ١٨ شهر تعمل فيهم الآتي من سياسات و مطالب د مرسي و اتباعه:

– ترجع مجلس الشعب المنتخب (اللي فيه البلتاجي مثلا). 

– تلغي المحكمه الدستوريه العليا و قوانينها

– تحل المجلس العسكري و تقول ملوش لزمه لانه كيان سياسي الحقيقه. تحل امن الدوله و المخابرات العسكريه. مش حنقول تحل الجيش ذاته زي ما فيجويريس عمل.

– تظهر التزوير اللي بتقول انه حصل و تحط ادله يوافق عليها الكل. 

– تعمل إصلاحات سياسيه و اقتصاديه واسعه في البلد لصالح الفقراء (مش تقول مفيش معنديش اجيب منين). يعني تلغي الدعم عن الأغنياء و تزود الضرايب عليهم و تدي للفقراء خدمات صحيه و تعليميه ادميه. 

– تمنع الواسطه و تعيد تنظيم الجهاز الاداري للدوله لتنظيفه زي ما شرحنا في مصدر ٥. 

– تدي الرياسه لاحمد شفيق بعد ١٨ شهر او تعمل انتخابات جديده. 

– تمنع اي تدخل للجيش في السياسه و تحط في الصوره مدنين فقط بشكل حقيقي مش تمثيل.

ده طبعا لو انت عاوز تبقي متسق مع الحكايه بتاعتك.

لو الكلام ده حصل الاخوان كانوا حيرضوا بالصوره دي لان كثير منهم مكانش عاوز الرياسه أصلا. و حتحل أصل مشاكل الثوره المصريه و هو حل مجلس الشعب المنتخب انتخاب شرعي. و حتقسم السلطه بين الاخوان و غيرهم في إطار تعايش و الاهم ان الفقراء حيستفيدوا من قوانين تساعدهم. و كان الأمور تستقر.

لكن طبعا محصلش كده و لذلك مصر بتعيش حاله حرب اهليه و انقسام يزداد كل يوم.

طيب ايه صفات فيجويريس عشان نتعلم نختار مين في المستقبل؟

————————————————————————–

١- فيجويريس حضر اجتماع لرؤساء امريكا اللاتينيه سنه ١٩٧٣. و طبعا وقتها كلهم كانوا جنرالات. راح قالهم: “مش شايفين انها غريبه ان كلكم جنرالات و انا المدني الوحيد. بس انا الوحيد فيكم اللي حارب في اي حرب”.

مهم جدا تختار اما رئيس مدني او لو رئيس عسكري يكون حارب حرب بحق و حقيقي. العسكري اللي عمره ما حارب زي السيسي مشكله لانه فاكر الحرب و القتل لعبه. اختار رئيس يقدر ان حياه الفرد مهمه.

٢- الشجاعه. في سنه ١٩٧١ قام ارهابيين من نيكاراجوا بخطف طياره و هبطوا في مطار عاصمه كوستاريكا سان هوزيه. كان وقتها فيجويريس في ثالث فتره رئاسيه له (تم انتخابه ٣ مرات بدون تعاقب و بدون ما يكون هو الرئيس). قام فيجويريس راح المطار و وقف قدام الطياره المخطوفه بنفسه شايل مدفع رشاش لحد لما المختطفين استسلموا و سابوا الرهائن.

هذا رجل لا يهاب الموت. لاحظ ان طوله ١٥٨ سم فقط!

٣- رجل عملي بيعمل ما هو صحيح.

زي ما شوفنا ده راجل يميني لكن طبق سياسات اشتراكيه لصالح شعبه. و علي فكره فيجويريس كان علي علاقه مع المخابرات الامريكيه الامريكيه و اتقابل معهم. و خد منهم فلوس كمان عشان ينشر مجله. و هو اعترف بكده. و قال ان دي مش عماله. ليه. لان العماله معناها اني بأشتغل معاهم ضد شعب بلدي. بيقول بالعكس انا كنت باحذرهم من غزو كوبا (فشل الغزو لاحقا في فضيحه خليج الخنازير وقت حكم كينيدي). و بيقول انا كنت أتعاون معاهم ضد الديكتاتوريه في امريكا اللاتينيه لكن كنت ضدهم لما بيكونوا مع الديكتاتوريه.

دي نقطه مهمه جدا. لانه الشعب المصري فاكر ان اي اتصال مع امريكا او الغرب او مع اي حد اجنبي تبقي خيانه. ده اسمه هبل! السؤال هو بتتصل ليه و بتعمل ايه؟ و هل ده لمصلحه الشعب و لا ضده.

و علي فكره زوجه فيجويريس الاولي امريكيه و زوجته التانيه كمان امريكيه. محدش قال ازاي. خيانه. عماله. ازاي يتجوز امريكيه.

٤- عزه النفس

في سنه ١٩٥٨ قام نائب رئيس امريكا وقتها بزياره كوستاريكا. الناس هناك “بصقت” عليه و حاولت تكسر عربيته. الكونجرس الامريكي عمل جلسات استماع عشان يفهم الموضوع. فيجويريس راح و خطب قدامهم. تعالوا نشوف قال ايه:

“البصق عمل لا اخلاقي لما يحدث بشكل فعلي. لكن ايه رأيكم في البصق الاخلاقي؟ لما حكومه امريكا تعزم بيدرو استرادا سفاح امريكا الجنوبيه عشان يتكرم في واشنطن مش ده برضه بصق علي كل شعوب امريكا اللاتينيه؟”

“نحن شعوب امريكا اللاتينيه، ممكن نكون فقراء. لكن الفقر مش معناه اننا ليس لنا عزه. احنا برضه عندنا كرامه. نحن نريد فقط اسعار عادله لمنتجات عرق شعوبنا. اسعار عادله لافقار ارضنا في مقابل تصدير المنتجات دي لبلد اخري. السعر العادل سيكون كافي عشان اننا نعيش و نكون رأسمال خاص بنا و نستمر في التنميه. “

الله عليك يا فيجويريس. 

————————–

مطلعش قال احنا اسفين يا امريكا. مطلعش قال اننا مليار عاوزين يموتوا خمسه مليار.

٥- يفهم معني الظلم.

لاحظ ان فيجويريس من أصل كاتالوني و هي مقاطعه في اسبانيا (اكبر مدنها برشلونة) تريد الاستقلال عن بقيه اسبانيا و تعرضت للاضطهاد من اسبانيا طيله الوقت. و اللغه الام لفيجويريس هي الكاتالان.

فهم معني الظلم مهم جدا.

و لاحظ انه مقالش لما اكبر حبقي اضربكم.

و قصه حياه فيجويريس كامله في مصدر ٦.

ضروري جدا انه من يصعد لأي منصب سياسي في المستقبل في مصر يكون متمتعا بالصفات الخمسه دول. مش انه يبقي أب و ام و اجداد و احفاد مصريين و زوجه مصريه و مرات أب من المنوفيه و كل العك ده.

المصادر:

————-

١- علي نضافه … تجميع الحلقات السابقه

jawdablog.org/category/الإقتصاد/استراتيجيات-وحلول/

٢- سلسله رؤساء كوستاريكا:

https://en.wikipedia.org/wiki/List_of_Presidents_of_Costa_Rica

٣- غزو نيكاراجوا لكوستاريكا في ١٩٥٤:

https://goo.gl/IeH7N9

٤- اقتصاد كوستاريكا:

https://atlas.media.mit.edu/en/profile/country/cri/

https://atlas.media.mit.edu/en/profile/country/egy/

٥- علي نضافه … كيفيه تطوير الدوله المصريه بالقضاء علي المحسوبيه:

https://jawdablog.org/2015/03/22/cleaning_up_the_next_revolution_series_1/

٦- قصه حياه فيجويريس:

http://www.britannica.com/biography/Jose-Figueres-Ferrer

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s