محادثه تليفونيه:

هي: آلو. 

هو: ايوه. 

هي: حضرتك احنا من مركز العين بصيره و الايد قصيره (عبواق) لاستطلاع الرأي. اخترنا تليفون حضرتك من عينه عشوائيه. حاسألك مجموعه اسئله مش حتاخد أكتر من دقيقتين. 

هو: اتفضلي. 

هي: ممكن عنوان حضرتك و الاسم. 

هو: محمد عبد المتعال. الوايلي الجديد. 

هي: هل حضرتك راضٍ عن اداء سياده الرئيس السيسي في خلال الست شهور اللي فاتت. 

هو: آه آه اه. طبعا طبعا. (عرق بدأ يظهر علي جبينه). 

هي: طيب. شكرًا جزيلا مع السلامه.

اغلاق سماعه التليفون.

مشهد ٢: داخل مركز العين بصيره و الايد قصيره (عبواق):

هي للمدير بتاعها: يا فندم كل الاجابات دلوقتي راضيه. محدش إطلاقا بيقول انه مش راضي. 

المدير: لا مهو مش ممكن. الراجل بتاع المخابرات قال لازم ٩٠٪. علي العموم الراجل الاخراني ده شكله مش راضي قوي. ممكن نحسبه انه مش راضي. 

هي: بس كده يا فندم المخابرات حتاخده. 

المدير: دي مشكلته هو. شكله أتردد في الكلام.

مشهد ٣: داخل بيت الراجل في حجره النوم مع زوجته بعد منتصف الليل:

————

هو: البنت بتاعه عبواق دي كانت حتوقعني في الكلام و تخليني أقول ان السيسي موديني في داهيه و الحاله زي الزفت. 

مراته: ربنا ستر.

خبط جامد علي الباب.

انتهت القصه.

و لكن الحكايه مستمره.