تعالوا نتعلم الاقتصاد … ازاي نطور مصر للطيران؟

Egypt_Air

شفنا في الحلقه السابقه ليه طيارين مصر للطيران هددوا انهم يمشوا. و شفنا كما ليه ان ده علي الأقل حاليا تهديد أجوف اكثر من اي حاجه.

طيب لو احنا عاوزين نطور مصر للطيران بجد نعمل ايه؟

مطلوب منك اولا تبص علي الشركات الناجحه حوالينا و في العالم بيعملوا ايه و خذ منهم التجارب الناجحه. عمليه سهله المفروض. لكن طبعا في مصر تصبح عمليه معقده. ليه؟

انواع شركات الطيران الناجحه في العالم

———————————

النوع الاول هو اسمه النوع المتخصص او الناقل منخفض التكلفة.

———————–

ده ناقل بيركز في خط او مجموعه خطوط محدده ضامن ان فيها ركاب كتير جدا و يقدر يملأ الطياره. و ان كلهم ركاب مش مركز في الخدمه قوي قد ما هو عاوز يدفع اقل تمن ممكن.

طالما الناقل ده ضامن انه يملأ الطياره بالتالي ممكن ياخد تمن قليل من كل راكب و بيدي خدمه محدوده. يعني ميديش اكل علي الطياره مثلا. الشركات دي زي مثلا ساوث وست في امريكا اللي بتعتمد علي الركاب اللي رايحين اورلاندو مثلا عشان يزوروا ديزني ورلد (مصدر ١).

الحقيقه مصر للطيران جواها شركه خفيه من النوع منخفض التكلفة ده هو تقريبا اللي بيصرف علي الباقي كله. الشركه دي اسمها الحج و العمره و موسم عوده المصريين في الخارج.

لذلك من مصلحه مصر للطيران انها تطلع شركه جديده تركز بس في التلات حاجات دي و انها تدي اقل اسعار للحج و العمره و المدرسين في الخليج.

لكن طبعا ده معناه ان مفيش بقي رحلات للاهل علي باريس و اليابان و كوالا لمبور. و بعدين شغل موسمي. و بعدين شغل كثير. و محدش له مصلحه في كده.

النوع التاني هو شركات الهب العملاقه

———————–

زي الامارات و القطريه و التركيه او اير فرانس او بريتيش اير وايز. و دي شركات عندها طيارات ضخمه و كتيره زي البوينج ٧٧٧ او الايرباس ٣٨٠. طيارات بتاخد ٣٥٠-٥٠٠ راكب. و الشركات دي بتاخد ركاب من الهند و الصين او افريقيا يقفوا في الهب (مركز التجميع) بتاعهم في دبي او الدوحه او اسطنبول و بعدين توديهم من هناك علي أوروبا او امريكا.

الشركات دي صعب جدا دلوقتي تنافسها. انت بتتكلم عن شركات عندها ٢٠٠-٣٠٠ طياره و اكثر كل طياره تمنها ١٥٠ مليون دولار (مصدر ٢). و عندها هب ناجح جدا.

النوع الثالث و هو شركات الهب الصغير او الميني هب

———————

و دي شركات زي الاثيوبيه مثلا. دي شركات لقت انها متقدرش تنافس الامارات او اير فرانس و تشتري ٢٠٠ طياره تمن كل واحده ١٥٠ او ٢٠٠ مليون دولار. و بعدين معندهاش القدره انها تاخد بنزين ببلاش زي طيران دول الخليج مثلا. عملت ايه الاثيوبيه. قالت انها حتركز في افريقيا و تبقي اكبر شركه في افريقيا. و انها تمد خطوط لكل افريقيا بطيارات صغيره بوينج ٧٣٧ بتشيل حوالي ١٦٠ راكب. و بعدين تجمع الناس من افريقيا عندها في أديس أبابا. و بعدين تحطهم في طياره متوسطه الحجم زي البوينج ٧٨٧ (بتشيل ٢٥٠ تقريبا) بس استهلاكها من الوقود قليل جدا (مصدر ٣). و تطلع بالركاب دول اللي جايين من كل افريقيا علي أوروبا او اسيا او امريكا. و بالتالي تقدر تنافس الامارات مثلا. لان الراكب النيجيري اللي عاوز يروح امريكا او أوروبا، صعب قوي يروح لحد الامارات و بعدين يرجع يطير لامريكا.

نفس الكلام ابتدأت الطيران المغربيه تقلده (مصدر ٤).

و طبعا الاثيوبيه حققت ١٥٠ مليون دولار أرباح في عام ٢٠١٤ (مصدر ٥). في حين ان مصر ام الدنيا بتخسر. و ملهاش دعوه بالسياحه لان مفيش سياحه بتروح اثيوبيا طبعا. لكن الجيش و الامن المصري يقولك احنا مش عاوزين حد من أفريقيا.

مع ان الاسهل لمصر للطيران انها تنسق مع التركيه الخطوط في افريقيا و يقسموا الربح و بكده يُنافسوا الاثيوبيه بسهوله. لكن ازاي طبعا ننسق مع التركيه. مش ممكن.

النوع الرابع و هي الشركات الوطنيه

———————–

و دي زي مصر للطيران. و دي شركات عايشه في الماضي ايام الستينات و ام كلثوم و مصر هي ام الدنيا. شركات تعتمد علي انها تنقل مواطنيها لكل دوله في العالم. و ده كلام بقي مش ممكن في العصر ده لان المواطنين دول عندهم اختيارات و يقدر يطير يروح دبي او باريس و من هناك يروح اي حته في العالم.

و طبعا النوع ده من الشركات عنده مستشفي و مصحه و حضانه للأطفال و معاشات لا مثيل لها الخ. حاجات ملهاش علاقه باداره شركه طيران ناجحه.

طبعا صعب جدا انك تلغي الحاجات دي. لكن ممكن تعمل زي ما الصينيين عملوا انك تبيع جزء بس من الشركه مثلا ٢٠٪ و تسيب الباقي مملوك للدوله (مش زي برنامج التخصيص بتاع مصر اللي كله بيتباع). لما تبيع ٢٠٪ بيدخلك رأسمال ممكن تشتري بيه طيارات جديده و لو خليت ال ٢٠٪ دول شركه جديده بتركز في الأمور المربحه حتلاقي سعر الشركه كلها يزيد و بالتالي الدوله تعمل فلوس كمان من الموضوع و بالتالي ممكن تحط الفلوس دي في صندوق معاشات للموظفين اللي حتحتاج نستغني عنهم بالضبط زي الصينيين لما عملوا (مصدر ٦).

النوع الخامس: شركات الاسواق الضخمه:

———————–

و دول مش موجودين الا في امريكا و الصين. شركات زي دلتا و امريكان في امريكا او تشاينا سوزرن او اير تشينا في الصين.

دي شركات عملاقه عندها ٦٠٠-٧٠٠ طياره و عندها سوق ضخمه جدا جدا للنقل الجوي جوه بلادها و عندها شبكات لنقل مواطنيها لجميع أنحاء العالم. دي بقي شركات وطنيه ناجحه بس ناجحه لان ضخامه السوق و كفاءه الاداره بتخليهم يقدروا يركزوا بس في نقل مواطنيهم اللي هم كتير و كفايه عن الحاجه حتي. دي شركات لا تستطيع ان تنافسها لان وضعها في سوقها انت لا تستطيع حتي ان تقترب منه.

الحل الأفضل لمصر للطيران

————————

لذلك افضل شيئ لمصر للطيران ان تصبح شركتين في الحقيقه.

واحده تركز في الحج و العمره و عوده المدرسين. و تبيع الدوله ٢٠٪ من هذه الشركه في سوق رأس المال و تشتري بالعوائد طائرات جديده و تستخدم النموذج الصيني في الخصخصه.

و الشركه الثانيه تقلد الاثيوبيه و تعتمد علي تجميع الركاب من افريقيا و الدول العربيه المجاورة (بالذات المنطقه الغربيه في السعوديه القريبه من مصر و ليبيا و تونس و السودان و كل افريقيا) و نقلهم لاوروبا و امريكا و شرق اسيا. و يمكن استخدام ذات اُسلوب الخصخصه الصيني مع هذه الشركه ايضا.

في سنتين ستنتقل مصر للطيران للربح و تصبح شركه قويه جدا.

المصادر:

——–

١- قصه نجاح شركه ساوث وست في امريكا:

http://www.bloombergview.com/articles/2014-06-13/the-secret-to-southwest-s-success

٢- صعود شركات الطيران الخليجيه:

http://www.telegraph.co.uk/finance/newsbysector/transport/11487567/Gulf-airlines-are-winning-the-battle-for-the-skies.html

٣- البوينج ٧٨٧ الأفضل في الوقود:

http://www.flightglobal.com/news/articles/analysis-after-three-years-in-service-how-is-787-performing-405814/

٤- أعاده هيكله الطيران المغربيه:

http://centreforaviation.com/analysis/royal-air-maroc-receives-first-787-as-the-airline-finishes-restructuring–returns-to-profitability-204363

٥- أرباح الطيران الاثيوبيه:

http://www.ethiopianairlines.com/en/news/prarchive.aspx?id=530

٦- برنامج الخصخصه في الصين:

http://www.ft.com/cms/s/0/ec28674c-13ac-11e4-84b7-00144feabdc0.html#axzz3biFFoz56

٧- الحلقات السابقه من تعالوا نتعلم الاقتصاد:

https://jawdablog.org/category/الإقتصاد/حلقات-تعالوا-نفهم-الاقتصاد/

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s