تعالوا نفهم الاقتصاد … كيف تعمل صناعه الطيران و ماذا يحدث في مصر للطيران

Egypt_Air

نواصل تعلم المواضيع الاقتصاديه بطريقه سهله. النهارده حنتعلم صناعه الطيران ماشيه ازاي و حنفهم ليه طيارين مصر للطيران عاوزين يسيبوها، او علي الأقل بيهددوا بكده.

الحقيقه انه كل مكونات صناعه الطيران المهمه قابله للانتقال من مكان لآخر بشكل كبير جدا. ازاي؟ اول حاجه الطياره نفسها. مش بس الطياره مصممه للانتقال من مكان للتاني. لا كمان بسهوله جدا ممكن الطياره البوينج ٧٣٧-٨٠٠ مثلا تشتغل في مصر او في الصين و ذات الطياره تروح تشتغل في امريكا. كل اللي يتعمل لها هو تاخد دهان جديد و رقم ديل جديد و خلاص. السبب في كده ان ترخيص الطياره و صيانتها يخضع لقواعد دوليه تتحكم فيها جهتان. الاولي هي الاف اي اي بالانجليزيه او اداره الطيران الفيدراليه في امريكا. و التانيه هي الاياسا في أوروبا. و كل هيئات الطيران المدني في العالم بتتبع القواعد اللي بتيجي من الجهتين دول. الاف اي اي الأمريكيه مثلا بتحدد بالضبط ازاي تسوق الطياره و ازاي تصونها و ازاي تجدد رخصتها و هكذا. و مفيش قدام مصر للطيران الا انها تنفذ كلام الاف اي اي و الا لا تستطيع التأمين علي الطيارات و كمان متقدرش تطير الطيارات بتاعتها لأي مكان في العالم (مصدر ١).

كمان الطيارين نفس الحكايه. كل طيار له رخصه. و الرخصه بتاعته معتمده وفقا لتعليمات اما الاف اي اي الأمريكيه او الاياسا الاوروبيه (و في الحقيقه هم بينسقوا مع بعض بشكل كامل). معني كده ان الطيار المصري او الاثيوبي او الامريكاني لازم يتعلم حاجات معينه و لازم ينفذ عدد ساعات معينه من التدريب في الطياره و التدريب في اجهزه المحاكاه و يخضع لاختبارات طبيه وفق قواعد الهيئتين دول. معني كده انه بسهوله يقدر الطيار المصري يسيب مصر و يروح يشتغل في اي شركه تانيه في العالم.

علي فكره القواعد دي لا تنطبق علي طاقم الضيافه. بس الطيارين.

طيب ليه الطيارين المصريين مش بيروحوا امريكا مثلا طالما الحكايه كده؟

—————————-

الاجابه ببساطه انه مش بيروح لأسباب عديده:

١- انه بياخد مرتب مماثل (و ان كان اقل شويه لاعتبارات حنقولها) لأقرانه في امريكا. يعني في حدود مائه الف دولار في السنه لكابتن الطياره البوينج ٧٧٧ مثلا (الأكبر حجما في أسطول مصر للطيران و تستخدم للمسافات الطويلة – مصدر ٢). اقل شويه من الطيار الامريكاني لان الطيار المصري ضرائبه اقل و عايش في مصر يعني بالمائه الف دولار دي بيعيش ملك (مصدر ٣).

٢- ان امريكا و أوروبا مانعين طيارين اجانب في بلادهم لاعتبارات امنيه (مصدر ٤). فبيفضل للطيارين المصريين شركات الطيران العربيه و الافريقيه.

ده طبعا زي ما عرفنا قبل كده بيقلل الطلب و بالتالي بيقلل السعر.

٣- ان الطيار المصري في مصر للطيران باشا. يعني طيار البوينج ٧٣٧ في امريكا (الطائره قصيره المدي) مثلا بيعمل ١٠ ساعات شغل في اليوم. و ممكن جدا يبات في مدينه مختلفه كل يوم (مصدر ٥). طيار مصر للطيران بيطلع شرم الشيخ و يرجع القاهره و خلاص.

فطبعا مفيش حافز كبير ان طيار مصر للطيران يسيب عيشه الملوك دي و يروح يشتغل بجد.

٤- ان في شك في الشركات العربيه بالذات تجاه الطيارين المصريين لان الفهلوه مش بتشتغل كويس مع الطيارات. و للاسف سجل مصر للطيران و الحقيقه مصر عموما في الحوادث سجل سيئ جدا (مصدر ٦).

و ده بيقلل الطلب أكتر و بالتالي يقلل سعر الطيار المصري.

و دي نقطه مهمه. لانه علي عكس الشائع الطيار المصري ليس الأفضل و لا ان الهبوط بتاعه جميل و محسناش بيه و يستاهل التصفيق. كل هذه خزعبلات. طيار الطائره المدنيه مطلوب منه ان يودي ذات العمل بذات الشكل بالضبط كما هو مكتوب في كتالوج استخدام الطائره. غير مطلوب منه اي نوع من الابتكار. مطلوب منه ان يهبط و يُقلع بذات الشكل كل مره و بشكل ممل جدا. يعني مثلا مطلوب انه قبل كل إقلاع يعمل مجموعه من الاختبارات يقوم بها كمبيوتر الطائره للتأكد من سلامه اجهزتها للاقلاع. حتي لو كان لسه طالع بالطياره من ساعتين. لازم يعيد ذات الاختبارات. مفيش فهلوه في الحاجات دي. ده مختلف جدا عن الطيار المقاتل. لذلك الطيار المقاتل لازم يتخلص من عادات كتير جدا قبل ما يبقي طيار مدني.

طيب ليه طيارين مصر للطيران كانوا عاوزين يمشوا و ليه رجعوا في كلامهم طالما حالهم حلو قوي؟

————————-

سهله جدا. حوالين مصر في عده شركات طيران تتوسع بشكل كبير جدا في حين مصر للطيران تتعثر: التركيه، الامارات، الاتحاد، القطريه، و الاثيوبيه.

لاحظ ان الاثيوبيه هي انجح شركه طيران في افريقيا. عملت ١٥٠ مليون دولار أرباح صافيه في سنه ٢٠١٤ (مصدر ٧). و متقوليش مصر للطيران بتخسر عشان السياحه. اثيوبيا محدش بيروحها سياحه. الشركات دي معتمده علي انها تبقي هب بالإنجليزي او مركز تجميع للركاب. يعني الراكب اللي من نيجيريا او رواندا او أنجولا او كوت دي فوار اللي عاوز يروح الصين بيركب طياره من بلده يروح اسطنبول او أديس أبابا او الدوحه او دبي و من هناك يركب طياره تانيه يروح الصين. الشركات دي ظبطت جدول مواعيدها و اسعارها بحيث تسهل علي الراكب ده الأمور. الراكب ده كمان بينزل اسطنبول او دبي ممكن يقعد يومين او يشتري من السوق الحره و كله مكسب. طبعا في مصر للطيران الامن و الجيش يقولك هو احنا حنجيب أفارقه عندما كمان! طبعا مش واخدين بالهم ان بلد زي تنزانيا مثلا فيها اعلي معدلات نمو اقتصادي في العالم بينما لا تنمو مصر اقتصاديا تقريبا (مصدر ٨). الحقيقه مصر للطيران و مصر بصفه عامه عايشين في الستينات. الاثيوبيه عندها اكبر أسطول بوينج ٧٨٧ في افريقيا و هي احدث طائره في العالم و أكثرها تعقيدا و هي من أوائل من حصل علي ٧٨٧ في العالم (مصدر ٩).

طيب انت طيار في مصر للطيران و شايف حال البلد. صحيح عايش ملك بس مش ضامن. لقيت اعلان الخطوط الاثيوبيه او القطريه طالبين طيارين بمرتبات اعلي شويه. صحيح ممكن تتقبل او لا. صحيح انت مش ضامن. صحيح حتشتغل اكثر. بس أكيد حتقول فرصه. و علي اقل الفروض حتساوم لانك عارف ان غالبا حتاخد من مصر للطيران اللي انت عاوزه و كمان غالبا الشركات دي مش حتاخدك.

و هو ده اللي حصل فعلا. ساومت. أخذت جزء من اللي انت عاوزه و قعدت في مصر للطيران ملك زي ما انت. لحد ما نشوف الفرصه الجايه.

طيب ازاي نطور مصر للطيران؟ ده موضوع الحلقه الجايه.

الحلقات كلها موجده في مصدر ١٠.

المصادر:

——–

١- ترخيص الطائرات في العالم:

https://www.faa.gov/aircraft/air_cert/international/

٢- مرتبات الطيارين المصريين:

http://www.glassdoor.com/Salary/EgyptAir-Salaries-E27360.htm

٣- مرتبات الطيارين في امريكا:

http://www.glassdoor.com/Salary/American-Airlines-Pilot-Salaries-E8_D_KO18,23.htm

٤- القيود علي جنسيات الطيارين في العالم:

http://www.askacfi.com/6300/can-foreign-pilots-international-students-take-up-jobs-with-airlines-in-the-us.htm

٥- عدد ساعات عمل الطيارين في امريكا:

http://aviation.stackexchange.com/questions/1807/what-is-common-number-of-flight-hours-a-year-for-commercial-pilot

٦- سجل الحوادث في مصر للطيران:

http://aviation-safety.net/database/operator/airline.php?var=6292

٧- أرباح الاثيوبيه في عام ٢٠١٤:

http://www.ethiopianairlines.com/en/news/prarchive.aspx?id=530

٨- معدلات النمو الاقتصادي في افريقيا مقارنه بمصر:

http://www.africaneconomicoutlook.org/en/country-notes/north-africa/egypt/

http://www.worldbank.org/en/country/tanzania/overview

٩- أسطول الاثيوبيه من البوينج ٧٨٧:

https://airlineworld.wordpress.com/2012/09/07/first-boeing-787-for-ethiopian-airilnes/

١٠- الحلقات السابقه من تعالوا نتعلم الاقتصاد:

https://jawdablog.org/category/الإقتصاد/حلقات-تعالوا-نفهم-الاقتصاد/

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s