ألمانيا الشرقية بقلم عبدو فايد

طيب للناس اللي نفسها قُصر بعد 4 سنين ثورة،وشايفين أن الأمل في أي تغيير ضاع..الألمان الشرقيين قعدوا يجهزوا لثورتهم 40 سنة متصلة..بدأوها من 1953 بانتفاضة مليون شخص سحقها السوفييت بكعوب البنادق..قالوا نهرب ألمانيا الغربية..هرب منهم 2,5 مليون شخص..ايريش هونيكر رئيس ألمانيا الشرقية قفلها عليهم بسور برلين،واللي يفكر يهرب ياخد طلقة في دماغه..عشرات ماتوا بنفس الطريقة واللي تمنكوا من الهرب كان بمعجزة..زي سنة 1979 لما أسرة مكونة من أب وأم وطفليهم ما صنعوا منطاد في بيتهم وركبوا ونزلوا ألمانيا الغربية..قصة دوريس شتريلتسيك وجوزها فيها من الكفاح ما يكفي ل 100 فيلم من لحظة صنع المنطاد للهرب..

جهاز شتازي أمن الدولة لا مؤاخذة مش زي أجهزتك القمعية الخايبة..عمل مدرسة بوتسدام عشان يغسل دماغ الأطفال ويعلمهم التجسس علي اهاليهم واصحابهم..اشتري اساتذة ومثقفين وأدباء ،مارشات تمدحة و 12 الف عامل يراقبوا كل الشعب..وخدام كنيسة يسجلوا الاعترافات ويبعتوها..وبالمرة فريق كورة اسمه دينامو برلين بتاع امن الدولة عشان ياخد كل بطولات الدوري..

اللي كان ماسك الجهاز لا مؤاخذة من غشيم زي بتوعنا اللي نايمين في العسل وبيتسجلهم مكالماتهم..ايريش ميلكه كان قتال قتلة..قتل 2 ظباط في 1934 وهرب الاتحاد السوفيتي وستالين بنفسه دربه وبعته يشارك في الحرب الأهلية الاسبانية وينفذ عمليات عدائية ضد النازيين في فرنسا..وبعد تأسيس المانيا لشرقية قرر يستفاد بخبرته في التعذيب عشان يظبط الشارع ويقتل المعارضة ويزور الضمير الجمعي..

يوم ورا يوم والفعل بيتراكم والكراهية بتكبر والاستعداد يتولد..كنائس بدأت تنظم اجتماعات سرًا عشان تنظم المعارضة..شباب يقرروا يكسروا التربية الشيوعية وحدود الوطنية الوهمية..ويهربوا سفارة المجر ومنها ألمانيا الغربية..اجتماعات سرية وبناء توافق..وفي الوقت اللي ايريش هونيكر طلع يقول يوم 7 أكتوبر 1989 ان ألمانيا الشرقية باقية 100 سنة..خرج 70 الف مواطن أمضوا سنين في تنظيم نفسهم واحتلوا ساحة كارل ماركس وكنيسة القديس نيكولاي في لايبزج يوم 9 اكتوبر رافعين شعار نحن الشعب wir sind das Volk ..شهر وكسروا سور برلين باقتحام معبر بورنهوملر،وشهرين في 16 يناير 1990 وهدموا امن الدولة في برلين ليشتنبرج..و10 شهور وبالتحديد في 3 اكتوبر 1990 وتم اعادة التوحيد..

متفكرش ان المانيا اتوحدت والدنيا بقت وردي..لأ رغم 2000 مليار يورو اتصرفوا علي اعمار المانيا الشرقية..لسه المستوي الاقتصادي اقل من جيرانهم في الغرب..رغم قانون شتازي اللي هدم وزارة امن الدولة الشرقية وكشف المستور بمئات الاف الملفات المسجلة وشرائط الكاسيت وعشرات الاف المعتقلين وزيهم من المختفين قسرًا..ورغم السماح للأهالي بالاطلاع علي الملفات بتاعتهم بعد ما عرفوا ان واحد من كل 3 مواطنين كان جاسوس امن دولة..رغم الحرية والديمقراطية..لسه الأجيال الكبيرة في المانيا الشرقية مش قادرين يفهموا ثقافة الحرية زي جيرانهم..وهما عمود اليمين المتطرف حتي الان..ومع ذلك الكفاح مستمر بس المرة دي..كفاح لتشكيل الوعي ..وخلق اجيال جديدة تؤمن بمفاهيم الديمقراطية والتعددية والتنوع..

كفاحك ايه جنبهم 6 سنين حراك في الشارع من 2005،و 18 يوم في التحرير و 4 سنين ورميت طوبة الثورة وخلعت..اخلع بس مش دي الثورات خالص..عملت ايه زي الألمان الشرقيين..السوفييت اغتصبوا مليون امرأة منهم..مليون..رحلوا مئات الاف من رجالتهم يشتغلوا في صقيع سيبريا ويتقتلوا من البرد..احتلوا أرضهم وعينوا عليهم أكثر مخاليق الكوكب بطشًا..وزارة كاملة اتجسست عليهم وسجلت حركتهم وأنفاسهم واعتقلتهم وقتلتهم وحولت حياتهم جحيم مطلق..سور من أبشع أسوا الفصل العنصري في التاريخ فصل بينهم وبين اخواتهم..قدمت انت ايه زيهم عشان ترمي المنديل وتلعن الكوكب والثورة والناس..جنبهم وجنب كفاحهم ..ما قدمته لا شئ..

لو الألمان الشرقيين في كل خطوة كان بيفكروا زيك..مكنش القهر هيبقي ذكري..مكنوش هيشوفوا سور برلين متكسر..ولا مبني أمن الدولة بقي متحف في نورمانن شتراسه.ولا سجون جلاديهم حل محلها متاحف في هاله وبراندبورج وكوتبوس..ولا كان هيبقي لضحاياهم نصب تذكاري يذكر بكفاحهم في هوهنشونهاوزن.و.لا كانوا في يوم هيلاقوا ايريش ميلكه اللي حكمهم بالحديد والنار 30 سنة،بيتسجن ويخرج يقضي عمره متكلبش في دار عجزة..ولا كانوا شافوا يؤاخيم جاوك الكاهن الألماني الشرقي للي ناضل عشانهم بقي رئيس دولتهم..ولا الدكتورة الجامعية ميركل اللي اتحرمت من ترقيتها بقت مستشارتهم..

الثورات عمل متراكم وكفاح طويل الأمد..لأصحاب النفس الطويل والمؤمنين بمبادئهم..عندك استعداد تكمل وتنوع أساليبك وتبني تحالفات،وتقع وتقوم من غير فقدان امل في لحظة انتصار..اتحرك ..معندكش بطل تقطيم في الناس واشاعة روح اليأس المدمرة..شعور الصعبانيات لذيذ والباس اليأس لباس الحكمة والعقل جميل..بس خليهملك..ملكك ونهجك في حياتك،مش لينا..

الثورة مستمرة بجيلنا وباللي هيجي بعدنا..نقطة الشرارة أطلقناها في يناير والحصاد هيجي..طال الأمد أو قصر..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s