تعالوا نفهم الاقتصاد ببساطه … الناتج القومي المحلي

نحاول في هذه الحلقات فهم الاقتصاد بطريقه سهله و مبسطه. سنتناول اليوم مفهوم الناتج القومي المحلي. و حنحاول نفهم أهميته ايه و ازاي نحسبه.

اي اقتصادي في العالم عاوز يدرس بلد لازم اول حاجه يفهمها هي الناتج القومي المحلي. ده اهم معيار للحكم علي اقتصاد اي بلد في العالم. و دي اول حاجه تبص عليها لو عاوز تقيم اي بلد من ناحيه الاقتصاد.

ما هو الناتج القومي لأي بلد؟ هو مجموع القيمه المضافه لكل السلع و الخدمات المنتجه او المقدمه في الدوله في خلال مده معينه.

طيب ايه الكلام الكبير ده. انت قلتم كلام بسيط.

تعالوا ناخد مثل نفهم بيه قصه القيمه المضافه دي. ناخد انتاج العيش. عشان تنتج عيش الفلاح محتاج يشتري حبوب بجنيه مثلا. الفلاح اشتري الحبوب و زرع قمح. طلع القمح باعه ب ٢ جنيه و نص. الفلاح ده عمل قيمه مضافه في الاقتصاد مقدارها جنيه و نص. الفرق بين القمح اللي باعه و الحبوب اللي اشتراها.

طيب. المطحن اشتري القمح ب ٢,٥ جنيه. طحن القمح. باعه دقيق ب ٣,٥ جنيه. المطحن عمل قيمه مضافه جنيه واحد.

الخباز اشتري الدقيق ب ٣,٥ جنيه. و باعه ب ٥ جنيه. الخباز عمل قيمه مضافه في الاقتصاد بالفرق بينهم يعني عمل ١,٥ جنيه.

طيب نفرض الراجل اللي عمل الحبوب من الأصل عمل الحبوب بدون اي مجهود لانها طلعت من القمح القديم اللي عنده. يعني بياع الحبوب عمل قيمه مضافه بجنيه.

طيب الناس اللي اشترت العيش كلته و انبسطت. خلاص مفيش قيمه تانيه مضافه لان العيش كان المنتج النهائي خلاص.

يبقي ايه مجموع القيم المضافه اللي اتعملت في كل الاقتصاد؟

جنيه من بتاع الحبوب + ١,٥ من الفلاح + جنيه من المطحن + ١,٥ من المخبز. يعني خمسه جنيه المجموع. اللي هي بالضبط سعر المنتج النهائي.

لذلك بنقول ان الناتج القومي المحلي هو مجموع قيمه السلع و الخدمات النهائيه التي تباع او تقدم في الدوله.

طبعا الهدف انك تعد بس قيمه السلع النهائيه او القيم المضافه فقط هي انك متعدش الحاجه مرتين و تلاته نتيجه الخطوات الوسيطة في اي اقتصاد. و الا نبقي حنعد الجنيه بتاع الحبوب اربع مرات مع ان المفروض نعدها مره واحده فقط.

فهمنا دي؟ سهله.

العلاقه المستخدمة لحساب الناتج القومي المحلي:

——————————-

طيب تعالوا نفهم ازاي بنحسب الناتج القومي:

الناتج القومي = قيمه السلع النهائيه (فهمناها دي) + مصروفات الحكومه + الاستثمارات + التصدير – الاستيراد.

نفهم دي شويه. فهمنا قيمه السلع النهائيه. ايه موضوع مصروفات الحكومه؟ يعني الحكومه عملت طريق صرفت عليه مليون جنيه. الطريق ده منتج نهائي. أتكلف مليون. يبقي الاقتصاد دخل له قيمه مضافه مليون.

ملاحظه: العاده طبعا في الدول المحترمه ان محدش بيشتري من الحكومه. يعني محدش بيشتري طريق من الحكومه. لذلك منعرفش ايه سعر الطريق اللي الحكومه عملته. فمنقدرش نعامل الطريق زي العيش او الطماطم اللي سعر المنتج النهائي معروف. لذلك بنحط تكلفه الطريق و ليس سعره في حساب الناتج القومي. لكن في بلد زي مصر الحكومه بتبيع و الجيش بيبيع و زيطه طبعا.

الاستثمار هو شراء معدات بغرض الاستثمار. يعني تشتري معدات لمصنع بمليون جنيه يبقي ده منتج نهائي و يتحسب ان الناتج القومي زاد مليون جنيه.

نرجع لمثال العيش. حسبنا القيمه المضافه بخمسه جنيه. بس لو استوردنا الحبوب يبقي لازم نخصم الجنيه بتاع الحبوب. ليه؟ لان القيمه المضافه بتاعتها محصلتش في الدوله. طيب لو عملنا بالقمح بدل العيش عملنا تورته و صدرناها بمائتي جنيه يبقي عملنا قيمه مضافه مائتي جنيه بدل الخمسه (المصدر الثاني).

ناخد مثلا بدل العيش بلد بتنتج طيارات مقاتله. سعر الطياره الاف ١٦ حوالي عشرين مليون دولار (المصدر الثالث). وزن الحديد في الطياره حوالي عشره طن (المصدر الرابع). سعر طن الحديد حوالي ٦٠٠ دولار (المصدر الخامس). يعني الطياره فيها حديد تمنه ٦ الف دولار. لكن بتتباع بعشرين مليون دولار!

احسب انت بقي القيمه المضافه في الطياره المقاتله. و طبعا السبب ان السعر عالي هو المعرفه العاليه التي بدونها لا تستطيع ان تحول شويه حديد لطياره مقاتله.

بالمناسبه صناعه الدواء مشابهه لصناعه السلاح و الطيران من ناحيه القيمه المضافه العاليه لان فرق الدواء داخل فيه كيماويات تقريبا ببلاش لكن بيتباع بأرقام عاليه جدا لان المعرفه اللي فيه مرتفعه جدا.

وضحت.

الناتج القومي المحلي للفرد:

————————

طيب اخر حاجه و بعدين نأخذ أمثله.

لما نقسم الناتج القومي المحلي الكلي علي التعداد يطلع رقم هو متوسط الناتج القومي للفرد في الدوله.

طبعا الدوله الغنيه متوسط انتاج الفرد فيها عالي جدا. و بالعكس الدوله الفقيره. لان في النهايه الناتج القومي هو قيمه مضافه تدخل في جيوب الناس. طبعا مش لازم يكون في عداله. ممكن كل الناتج داخل لفرد واحد. و لذلك في طرق لقياس عداله التوزيع حنفهمها بعدين.

ازاي دوله تبقي غنيه؟ ان أفرادها يعملوا قيمه مضافه عاليه. يعني ينتجوا سلع غاليه و يصدروها و يستوردوا اقل. الموضوع واضح جدا.

لذلك اهم شيئ ينظر له الاقتصاديون عند تقدير اقتصاد دوله مقارنه لآخري هو متوسط الناتج القومي المحلي للفرد و معدلات نموه كل سنه. يعني لا سعر الصرف و لا الديون و لا كل ده له اعتبار اذا لم يكن الفرد ينتج!

نقول كمان. ممكن مثلا تبيع غاز للعالم زي مصر زمان و تبقي عملت قيمه مضافه الفرق بين سعر التصدير و تكلفه الانتاج. و بعدين تاخد فلوس الغاز تستثمرها و تشتري بها معدات فتدخل الفلوس مره كمان في خانه الاستثمار. و بعدين لو الاستثمار ده عمل عائد و ربح يصبح قيمه مضافه جديده، و هذه “عجله” الاقتصاد الحقيقيه.

أمثله:

انظر الشكل الثاني. و به متوسط الناتج القومي للفرد لمجموعه من الدول. اخترنا الا تكون مصر منهم عشان لا يصعب حالنا علينا اكثر ما هو.

حنلاحظ حاجات مهمه:

١- متوسط الناتج القومي للفرد في السعوديه و الامارات و الكويت الان هو ذاته كما كان في عام ١٩٨٠!

هذا طبعا فشل في اداره الاقتصاد. و السبب هو الشكل الثالث و هو سعر البترول الذي انهار في التسعينات فانهارت معه متوسطات الانتاج الفردي في الخليج.

٢- تلاقي ان بلد زي امريكا بها معدلات نمو متسارعه في متوسط انتاج الفرد. و ان النمو فيها مثل القطار الذي لا يقف.

(لاحظ ان الناتج القومي يخصم الاستيراد. لذلك كل الكلام ان امريكا تستورد كثير هو كلام من لا يفهم. هي تستورد سلع ذات قيمه منخفضه و تنتج سلع عاليه القيمه المضافه)

طبعا هناك دول مثل قطر و النرويج ذات متوسط انتاج للفرد اعلي من امريكا و لكن طبعا عدد سكان امريكا كبير جدا مما يجعلها اكبر اقتصاد في العالم.

حتلاقي طبعا متوسط انتاج الفرد قليل في الصين لكن العدد كبير جدا.

٣- تلاقي دوله مثل النرويج. كانت فقيره مثل دول الخليج في السبعينات. و لكن استغلت عايد البترول في الانتاج و التصنيع و التكنولوجيا. لذلك متوسط دخل الفرد الان اعلي بكثير من الثمانينات عكس السعوديه و الامارات مثلا.

٤- تلاقي دول غير بتروليه مثل تركيا و ماليزيا. و هما كأنهما يتنافسان معا. تقريبا الدخل فيهما متقارب جدا و يتحرك بذات الوتيره.

طيب أسئله عشان تتمرن و جاوب عليها في التعليقات:

————————————————————–

١- بص علي سلطنه عمان. هل هي نموذج ناجح للتنميه؟ و لماذا؟ في رأينا انها افضل نموذج في الخليج. فكر كده ليه؟

٢- بص علي اسرائيل. حتلاقيها منطلقه بسرعه منذ اتفاقات أوسلو ١٩٩٣. يعني مع السلام تحرك اقتصاد اسرائيل بسرعه مع تطبيعها للعلاقات مع العالم و التبادل التجاري الناتج عن ذلك و مع استيعابها للمهاجرين الروس. لكن بيقل نموها كل ما في حرب. بالعكس مع انتفاضة الأقصي هبط متوسط ناتج الفرد. فكر كده و اعمل حساباتك. دي معلومات مفيش حكومه عربيه عاوزاك تعرفها. لذلك اللي يقولك ان حماس عميله لإسرائيل مش فاهم حاجه.

وضحت الأمور؟

المره القادمه نشرح ازاي نقيس عداله التوزيع. و بعدها نتكلم عن سعر البترول ان ربنا أعطانا عمر.

المصادر:

———

١- الحلقات السابقه من فهم الاقتصاد:

https://jawdablog.org/category/الإقتصاد/حلقات-تعالوا-نفهم-الاقتصاد/

٢- تعريف الناتج القومي المحلي:

http://www.investinganswers.com/financial-dictionary/economics/gross-domestic-product-gdp-1223

٣- سعر الطياره الاف-١٦:

http://www.f-16.net/forum/viewtopic.php?t=343

٤- وزن الطياره الاف-١٦:

http://www.lockheedmartin.com/us/products/f16/F-16Specifications.html

٥- سعر طن الحديد:

http://steelbenchmarker.com/files/history.pdf

 

3 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s