ماذا كان سيحدث للدعم لو كان الامر بيد جوده؟

بعض مؤيدي السيسي قالوا طيب انتم قاعدين تتكلموا و تهاجموا. طيب يعني كنتم حتعملوا ايه يعني للدعم. طيب نقولك حنعمل ايه.

اولا: زياده السعر للأغنياء

———————–

دعم الطاقه حقيقي مشكله في مصر و يستهلك ١٥٠ مليار جنيه. لكن هل نخلي الفقير هو اللي يستحمل و لا نخلي الغني يستحمل. السيد السيسي رفع سعر بنزين ٩٥ بتاع صاحب المرسيدس و البي ام بمقدار ٧٪ بس. في حين بنزين ٨٠ بتاع سواق التاكسي و السولار بتاع سواق النقل زاد ٧٨٪. طيب ده كلام.

بتوع السيسي قالوا ايه في الرد علي كده. قال لك أصل بنزين ٩٥ تمنه ٧ جنيه يعني دولار يعني بالسعر العالمي خلاص و مينفعش نزوده عن السعر العالمي. طبعا ادي السويد أهي تمن لتر البنزين ٢ دولار يعني ١٥ جنيه. ليه لان الدوله في السويد حاطه ضرائب كتير علي البنزين عشان تخلي الناس تستخدم مواصلات عامه.

لذلك في جوده كنا حنخلي البنزين ٩٥ بتاع المرسيدس يبقي ب ١٥ جنيه (زياده ٦٠٪) و نزود ال ٩٠ بحوالي ٢٥٪ و نسيب ال ٨٠ و السولار زي ما هو علي الأقل الان.

و للمعلومه السولار هو اللي بيمشي الاقتصاد لان نقل الخضار و الاسمنت و كله بالسولار. لذلك الحفاظ علي تمنه زي ما هوه كان حيخلي التأثير علي الأسعار محدود جدا.

ثانيا: نعمل ايه بالفلوس اللي وفرناها من الدعم؟

——————————

الخمسين مليار جنيه في السنه من توفير الدعم نوجهها اننا نعمل شبكه مترو أنفاق حقيقيه في مدن مصر. عيب قوي ان مصر بعدل ده طول المترو فيها ٣٠ كيلومتر في حين لندن فيها طول المترو ٤٥٠ كيلومتر و عدد سكانها اقل من القاهره.

الخمسين مليار جنيه دول يعملوا حوالي ٣٠-٥٠ كيلومتر مترو في السنه. يعني بعد ٨ سنين نبقي قد لندن مش لازم قد الدنيا.

ده حيخلي الناس تركب المترو و تعيش عيشه محترمه زي أوروبا بدل ما الفلوس تتنهب و يقولك صندوق تحيا مصر.

ثالثا: الحوار مع الناس

——————–

هو الشعب المصري ده محدش بياخد رأيه ليه؟ هوه بيتعامل انه قاصر ليه؟ و كفايه خلاص. زي ما ورينا قبل كده كل دول العالم اللي رفعت الدعم بنجاح اتكلمت مع الشعب.

رابعا: برامج تخفيف الصدمه علي الفقراء

—————————

تعمل بطاقه فيزا تديها للناس اللي دخلهم محدود تتولي الدوله وضع فلوس فيها كل شهر تستخدم فقط في شراء الأكل و البنزين فقط. و يكون الحفاظ عليها مرتبط بعدد الاطفال في المدارس لحد ما يوصلوا الجامعه و كده بتدي حافز للناس انهم يعلموا العيال. بالضبط زي البرازيل ما عملت.

وزير التموين اللي كان عاوز يعمل كده محكوم عليه بالإعدام بالمناسبة.

المصادر:

———–

اسعار البنزين في السويد:

http://www.bloomberg.com/…/highest-cheapest-gas-prices-by-c…

طول شبكه المترو في مصر:

http://en.wikipedia.org/wiki/Cairo_Metro

طول شبكه المترو في لندن:

http://en.wikipedia.org/wiki/London_Underground

إجراءات البرازيل في رفع الدعم:

http://www.imf.org/external/np/pp/eng/2013/012813a.pdf

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s