تعالوا نفهم الاقتصاد … الحلقه الاولي: التضخم و أسبابه و حالته في مصر

بناءا علي طلب القراء نبدأ اليوم سلسله جديده نحاول فيها تبسيط مفاهيم الاقتصاد. 

التضخم ببساطه معناه ارتفاع الاسعار نتيجه لازدياد البنكنوت مع المواطنين و قله السلع المعروضه. 

يعني لو فيه اربع أشخاص فجأه بقي مع كل واحد منهم ١٠٠ جنيه لان البنك المركزي طبع فلوس و اداهم و كل واحد منهم عاوز يشتري بهم فانوس رمضان مثلا. لكن المحل فيه ٣ فوانيس فقط. حيحصل ايه؟ البياع أكيد في وقت حيجيله ٢ عاوزين يشتروا نفس الفانوس. او حيخلص عنده الفوانيس و لسه بيجي ناس يطلبوها. البياع حيلاحظ انه في طلب كبير فطبيعي انه يرفع السعر. و بالتالي يحصل ارتفاع في الاسعار فيحصل تضخم لان الناس معاها فلوس اكثر من حجم السلع و الخدمات المعروضه في السوق. 

مثال كمان لما الحكومه تزود المرتبات لكن كميه السلع الموجوده في الاسواق ثابته. طبيعي انه علي طول الاسعار تزيد لان بقي فيه فلوس اكثر بتطارد نفس السلع. 

طيب هل البياع ده بقي كده حرامي لانه بيرفع السعر؟ 

الحقيقه لا. ليه؟ لان سعر اي حاجه المفروض هو التوازن بين العرض و الطلب و هذا قانون يرتقي لمرتبه قوانين الفيزيا و الطبيعه. 

حاولت مجتمعات كثيره انها تفرض قوانين تمنع زياده الاسعار و حتي فرض عقوبات القتل لمن يرفع الاسعار. و فشلت كل هذه التجارب. من العراق لامريكا لمصر. ليه؟ لان المفروض انه لا يسن قانون يتحدي قوانين الطبيعه. يعني مينفعش تقول قانون انه لازم كل بني آدم يتحدي الجاذبيه و يطير مثلا! 

لذلك اي حكومه تقول الرقابه علي الاسعار و عقوبات صارمه ضد المخالفين هي حكومه تضحك عليك. 

و كل الدول التي حاولت تطبيق تسعيره انتهي الامر انها عملت سوق سودا. ليه؟ لان التاجر اللي عارف انه فيه طلب كبير علي سلعه محدوده و انه لازم يبيعها بسعر مفروض من الحكومه مش حيبيع او يبيع لقله محدوده محتاجه و مستعده تدفع اكثر. و بالتالي حصل انه السلعه شحت اكثر في السوق و سعرها بقي اعلي من حتي بدون التسعيره! 

طيب ازاي حكومه تعالج التضخم؟

—————————–

هما طريقتين:

١- زياده الانتاج. 

فتزيد السلع في الاسواق فتقل الاسعار. و هذا منهج الولايات المتحده مثلا التي تعتمد علي الانتاج الوفير او ما يطلق عليه بلد الوفره. بالعكس امريكا تشجع الناس علي الاستهلاك الكثيف مثل البوفيه المفتوح. 

٢- تقليل الفلوس الموجوده في السوق. 

و بالتالي السيطره علي الاسعار. 

التضخم الحالي في مصر:

———————–

التضخم الان في مصر عالي جدا و وصل اعلي من ١٢٪. يعني السلع كل سنه بيزيد سعرها ١٢٪. و كان التضخم قل جدا وقت د مرسي حتي وصل ٤٪. لكن عاد مره اخري للزياده مع الحكم العسكري. المصدر الاول به بيانات التضخم في مصر. و احنا عاوزينكم كل ٣ شهور تدخلوا علي الموقع في المصدر الاول و تتعلموا تقروا بيانات التضخم. و بالمناسبه هذه البيانات يصدرها البنك المركزي و يراجعها البنك الدولي و يتم نشرها. لاحظ انه في تقلبات موسميه يعني الاسعار في مصر بتقل في الشتا عاده مثلا لذلك انظر للمتوسط السنوي. 

ليه التضخم بيزيد في مصر دلوقتي و ليه ده موضوع خطير؟

————————–

التضخم بيزيد في مصر دلوقتي للأسباب التاليه:

١- مفيش استثمار و بالتالي مفيش انتاج. 

زياده الانتاج محتاجه استثمار. مش بتحصل لوحدها. 

الاستثمارات الاجنبيه قليله جدا الان (المصدر الثاني – ستلاحظ أيضاً في المصدر ان الاستثمار الأجنبي تضاعف وقت انتخابات د مرسي ثم عاد للانخفاض مره ثانيه بعد الانقلاب لأكثر من النصف. يعني الحريات تجلب الاستثمار و ليس القهر !). و الاستثمارات المحليه ضعيفه. و حتي وقت مبارك كان معظم الاستثمارات الاجنبيه رايحه في انتاج غاز و بترول. طيب الاجانب و خائفين من مصر. ليه الاستثمار المحلي ضعيف؟ لان سعر الفايده عالي جدا. 

اي مستثمر محلي عاده بيقترض من البنك عشان يستثمر. نادر جدا انه واحد معاه كاش كبير عشان يحطه في استثمار. الغني بيبقي غني عشان عنده موجودات و أصول (بيوت عقارات مصانع محلات) و غيره. محدش بيشيل فلوسه كلها كاش. طيب انا البنك او مشروع السيسي لتفريعه قناه السويس بيديني فايده ١٢٪. فايده عاليه جدا احلي من اي استثمار فيه مخاطر و وجع دماغ. لذلك مفيش مستثمر عادي حيستثمر. لازم يكون مستثمر غير عادي! يعني مستثمر عنده مشروع يجيب اكثر من ١٢٪ في السنه بدون مخاطر. (في الأغلب. مستثمر اماراتي مثلا او ضالع في الانقلاب) و في بلد مثل مصر ده لازم يكون مستثمر واصل لأعلي المستويات في الجيش… كوسه يعني. لكن مشكله الكوسه انها بتخلي طبقه محدده غنيه و بقيه الشعب بعيد عنها. و بالمناسبه لها تعريف علمي اسمه “الاقتصاد الاقصائي”. المصدر الثالث فيه اهم دراسه علميه عن لماذا تفشل الدول ذات الاقتصاد الاقصائي. 

لذلك لو انت عاوز تحفز الاستثمار المحلي المفروض تقلل سعر الفايده!

بس ازاي. احنا سمعنا في التلفزيون انك لو قللت سعر الفايده بيحصل تضخم! 

ايوه حقيقي. ليه؟ لان المستثمر لما بياخد قرض عشان يستثمر مش بيزود الانتاج علي طول. ده لسه يبني مصنع و يجيب عمال و يديهم مرتبات من غير ما يبقي فيه انتاج. معني كده انه جزء من الاستثمار بيروح في مرتبات. يعني بيدخل السوق قبل ما يزيد الانتاج، يعني زي ما اتعلمنا يعمل تضخم. 

و هذا ما يسمي في علم الاقتصاد “الضغوط التضخميه للنمو”. يعني اي مجتمع لازم يتقبل شويه تضخم لفتره محدده خلال النمو. 

الحرفنه في قياده البنك المركزي انها تعمل توازن بحيث انه الضغوط التضخميه تبقي في حدود المقبول. 

في مصر بقي قفلوا الباب ده من اصله و راحوا يشحتوا. و رفع سعر الفايده و بالتالي بيقولك انت لازم تكون حبيبي و في الشله بتاعتي عشان تعمل استثمار. طبعا ده بيقلل نمو الاقتصاد و بالتالي توقع نمو الاقتصاد في مصر لا يزيد عن ٣٪ خلال السنين القادمه! يعني التضخم اعلي بكثير من كل النمو و نسبه نمو تجعل مصر تتخلف اكثر مقارنه بالهند و الصين و تركيا و زامبيا و غانا اللي بيعملوا ١٠٪ في السنه (المصدر الخامس. و حتي مؤيدو الانقلاب مثل هيكل قالوا ان الانقلاب عاجز عن تحقيق النمو الاقتصادي و ان الصوره قاتمه). 

٢- البنك المركزي بيطبع بنكنوت و الحكومه بتزود معاش العسكريين!

عشان يدفع الفايده بتاعه مشروع القناه (انظر المصدر الرابع: بدل ما ياخد قرض دولي ب ٢٪ راح واخد قرض محلي ب ١٢٪ عشان يمول مشروع حيجيب ١٢٪ عايد و يعتبر هذا ذكاء!) فطبعا لازم يطبع بنكنوت (الصوره الثانيه). 

و طبعا عشان نرضي الجيش و القضا و الشرطه نزود مرتباتهم. فاكيد يحسوا بانتعاش. و يحسوا الحياه حلوه لكن التضخم طبعا مع مرور الوقت حيشفط كل الإحساس ده. و التضخم ده زي ما شوفنا في الاول بياخد وقت بالذات في بلد زي مصر مفيش فيها بيانات اسعار واضحه. 

٣- رفع الدعم عن الطاقه لدفع فايده ١٢٪ علي مشروع القناه. 

يعني الحكومه مباشره ترفع الاسعار و الباقي قادم. مثل السكك الحديديه و المترو و خلافه. 

لذلك نقول ان السياسه الاقتصاديه للسيد السيسي هي سياسه اقصائيه:

١- تركيز الاستثمار في يد قله. 

٢- إرضاء مجموعات معينه بجعلهم يتخيلون ان معهم فلوس كثيره. 

٣- رفع الاسعار لدي بقيه الناس. 

طبعا بيعملوا كده بشكل تدريجي. يعني رفع الدعم كان تدريجي و بيقلل طباعه البنكنوت لانه بيدفع جزء من الفايده علي مشروع السيسي للقناه. لكن السياسه واضحه تماماً اتجاهها هو اقصائي بشكل اكبر بكثير من ايام مبارك. يعني ايام مبارك لازم تكون من شله جمال مبارك بس. دلوقتي لازم تكون مشارك في الانقلاب و مشارك في القتل و مشارك الامارات و تكون في الجيش و مع الكفته مع بعض! 

المصادر:

——–

١- بيانات التضخم في مصر:

http://www.tradingeconomics.com/egypt/inflation-cpi

٢- شحه الاستثمار الأجنبي في مصر. 

http://www.tradingeconomics.com/egypt/foreign-direct-investment

٣- لماذا تفشل الدول؟ 

http://whynationsfail.com/

٤- دراسه جوده التفصيلية عن مشروع السيسي للقناه:

https://jawdablog.org/category/مشروع-السيسي-لقناه-السويس/

٥- توقعات معدلات النمو في الاقتصاد المصري:

http://data.worldbank.org/indicator/NY.GDP.MKTP.KD.ZG/countries/EG?display=graph

 

4 thoughts on “تعالوا نفهم الاقتصاد … الحلقه الاولي: التضخم و أسبابه و حالته في مصر

  1. Pingback: تعالوا نفهم الاقتصاد ببساطه … الحلقه الثانيه: سعر الصرف | JAWDA

  2. Pingback: لماذا يستمر العجز في الموازنة ويزداد الدين العام | JAWDA

  3. Pingback: تعالوا نتعلم الاقتصاد بسهوله … الاسئله و الاجوبه المفيده في الدولار و الجنيه | JAWDA

  4. Pingback: ماذا يحدث لسعر الدولار (١)… تعالوا نفهم الاقتصاد ببساطه | JAWDA

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s